रोमी 16
16
नमस्ते सिरच्येते बात
1था ङा ख्योकोनताङ ङुरूङ नुमु फोबी बात खितामीन। फोबीचेन किंक्रियादु जम्मा ओङकान्ते येशू ख्रीष्ट मिओन नाङ काम खित्कान्ते लेमु मि ईन। 2थेकी मि काल्बेईला आउदी लेमु खाबा ओतान। ङा ङाराङलाङ थेकी मद्धत बिन्दा ओतान। थोगी था थे थेपा वासीन थेङ प्रभु येशू ख्रीष्टला विश्वास खित्कान्ते ईन सिन परमेश्वर सन्तान नाङ दोक्पोईकी ज्येनज्यीकला चुक खिता फाप्कीते थोकराङ खाला ख्योकोनगी थेला लेमु खि। थेमे थेला च्यि च्यि गोकीका सिन ताला गोच्येतेबा बिन।
3थेमे गोमा ङात्ताङराङ येशू ख्रीष्ट काम खित्कान्ते अक्वीलाताङ प्रिस्किलाबा जाप्राङ ङिबोला ङेते नमस्ते ओत सि। 4थेबेकी ङाला जोए खिताला झन्दै खोपरोङ ज्यानोङ तेरा फापा ओतान। ङाला थेबेकी थोक लेमु खाबा ओतान। थेबेकी थोक खाबाते बात ठाउँ ठाउँला जम्मा ओङकान्ते ज्येन ज्येन जातकी येशू ख्रीष्ट मिओनगीङ गाङेकी खिदुक। 5थेबे खाम्बादु जम्मा ओङकान्ते येशू ख्रीष्ट मिओनलाङ ङेते नमस्ते ओत सि। थेमे ङे ङिङज्येते र्वा इपेनितसलाङ नमस्ते ओत सि। एशिये लुङबादु येशू ख्रीष्टला विश्वास खित्कान्ते मिओन नाङ गाङे भन्दा गोमा थेला विश्वास खित्कान्ते मि थेराङ ईन। 6थेमे मरियमलाङ ङेते नमस्ते ओत सि। थेकी ख्योकोन लाईदु थोई दुक्पा खाईन काम खाबा ओताने सिन टोक माज्येत। 7थेमे ङे मि फाप्च्येते गोमा ङात्ताङराङ जेलदु देताते एन्ड्रोनिकसताङ युनियसलाङ ङेते नमस्ते ओत सि। थेबाचेन येशू ख्रीष्टकी खटे खाबाते मिओन नाङ मिन चले खाबाते मि ईन। थेबेकी ङे भन्दा गोमामेकीराङ ख्रीष्टला विश्वास खिताला स्यूबाते ईन।
8थेमे प्रभु ख्रीष्टताङ जीउज्यीकराङ ओङाते ङे ङिङज्येते र्वा एमप्लिआतसलाङ ङेते नमस्ते ओत सि। 9थोकराङ खाला ङ्योकोन च्योकराङ ख्रीष्टकी काम खित्कान्ते उर्बानसला ङेते नमस्ते सि। ङे ङिङज्येते र्वा स्ताकिसलाङ ङेते नमस्ते ओत सि। 10अपेल्लेसला ङेते नमस्ते ओत सि। थेचेन जस्तोराङ ओङजीनोङ येशू ख्रीष्टला विश्वास खिता तोङराङ मोतोङकान्ते मि ईन सिन ङुरूङला छ्या ओत। थेमे अरिस्तोबुलस खाम्बे मिओनलाङ ङेते नमस्ते ओत सि। 11ङे मि फाप्च्येते हेरोदियनला ङेते नमस्ते ओत सि। थेमे नर्सिसस खाम्बे मिओन नाङ प्रभु ख्रीष्टला विश्वास खित्कान्ते मिओनलाङ ङेते नमस्ते ओत्लो सि। 12थेमे दुक्पा खाला खाला प्रभु ख्रीष्टकी काम खिन ओताते नुमुबा ङिबो त्रिफेनाताङ त्रिफोसाला ङेते नमस्ते ओत्लो सि। थोकराङ खाला ङिङज्येते नुमु परसीसलाङ ङेते नमस्ते ओत्लो सि। थेकी आउदी दुक्पा खाईन प्रभु ख्रीष्टकी काम खाबा ओतान। 13थे खोरोङ काम खिताला प्रभु ख्रीष्टकी छाने खाबाते रूफसला ङेते नमस्ते ओत सि। थेमे ङाला थे मोरोङ फुज्युङला च्योकराङ खाला लेमु खित्कान्ते थे आमालाङ ङेते नमस्ते ओत सि। 14थेमे असिंक्रितस, फ्लेगन, हर्मेस, पत्रोबासताङ हर्मास थेमे थेबाताङ ओताते ज्येन आज्यो न्वालाङ ङेते नमस्ते ओत सि। 15थोकराङ खाला फिलोलोगसताङ युलिया, नेरियसताङ थे नुमु थेमे ओलिम्पास थेमे थेबाताङ ओताते गाङे परमेश्वर सन्तानओनलाङ ङेते नमस्ते ओत्लो सि। 16ठेत्जीन ख्योकोनगी दोक्पोईकी ज्येनज्यीकला मान खिन नमस्ते खि। देङपा ठाउँ ठाउँला जम्मा ओङकान्ते येशू ख्रीष्ट मि गाङेकी ख्योकोनला नमस्ते ओत्लो।
पावलगी चिट्ठी टिला सिन्दे खाला साबाते बात
17आज्यो न्वावे, था थोरूम बातज्यीक च्यि सासीन ओर्च्ये ख्योकोनगी खेराङ नाङ फाटो ओङ ज्युत्कान्ते थेमे खेराङला गोमाका लाप्कीन बिन्दाते गा लाङच्येते बातताङ मिडिक्च्येते बात लाप्ला अलमल्ल लोङकान्ते मिओन सु सु ईन्दाका सिन छ्या स्येला थेबाताङ च्याङबो खि। थोक्ते मिओनताङचेन ख्योकोनगी साङराङ माकेत। 18थोक्ते मिओनगीचेन प्रभु ख्रीष्टला माने खिते साटोला खालि साच्या थुङच्ये बातताङ खोपरोङला जे जे खिता सेम लाङगीदुक थे थेराङ खिओ। थेबेकीनी स्यीम्बु स्यीम्बु बात खाला खोलु खिन साधा सुधोते मिओनला डिकस्यिकला ङ्योल्च्येते कामकामा खिओ।
19ख्योकोनचेन परमेश्वरगी खि साबाते ङेन्कान्ते मि ईन सिन गाङेपे मिओनगी छ्या स्येला दुक। ईन्दाबोङ ख्योकोन थोक्ते मिराङ ईन्देकी ङाला आउदी गा लाबा ओत। दोक ईन्सीनोङ मेलेबाते सिराते ख्योकोनगी छ्याःङ मिक्किस्यीत बरू चुक खिता लेमु ईन्दाका सिन झन लेमु खाला छ्या स्येला थोककामा खित्स्यीत सिरच्येते ङेते आउदी सेम ओत। 20ङुरूङला डिक्ला थुन्ला देत ज्युत्कान्ते परमेश्वरगी था होत्ताराङ शैतानला नोमुङ लाङा मुथुप्च्या खाला ख्योकोन तिङबे ओक्तु ज्य्वाक्यो। प्रभु येशूकी ख्योकोनला दया खिनराङ देत्स्यीत।
21थेमे ङात्ताङराङ येशू ख्रीष्ट काम खित्कान्ते तिमोथीते ख्योकोनला नमस्ते ओत्लो। थोकराङ खाला ङाराङ मि फाप्च्येते लुसियस, यासोनताङ सोसिपेटरतेङ ख्योकोनला नमस्ते ओत्लो। 22आज्यो पावलगी ताङाते दि चिट्ठी टिक्कान्ते ङा तर्तियसतेङ प्रभु येशू ख्रीष्ट छ्य्वापेई ख्योकोन गाङेला नमस्ते ओत। 23थेमे गायसतेङ ख्योकोनला नमस्ते ओत्लो। ङा पावल थे खाम्बादुराङ डोम्बो ओङगीन देता ओत। देङला ओताते येशू ख्रीष्ट मिओन दि खाम्बादुराङ जम्मा ओङगीदुक। थेमे इरास्तसतेङ ख्योकोनला नमस्ते ओत्लो। थेचेन दि सारदु च्यि च्यि खिता फाप्च्या दुका, थोई खर्च लै खित्च्या दुका सिन ताकान्ते मि ईन। थोकराङ खाला ङुरूङ न्वा क्वार्टसतेङ ख्योकोनला नमस्ते ओत्लो। 24ङुरूङ प्रभु येशू ख्रीष्टकी ख्योकोन गाङेला दया खिनराङ देत्स्यीत। आमेन।
25थेमे परमेश्वरगीराङ ख्योकोनला शक्ति तेरच्येते ईन्देकी ख्योकोनगी येशू ख्रीष्टला विश्वास खिन देता थुप्क्यो। परमेश्वरगी खित्सादु दोक खिन देता थुप्क्यो सिन येशू ख्रीष्ट सु ईन्दे, चुक्ते ईन्दे सिन ङे लोप्कीन ओताते गा लाङच्येते बातला साबा ओत। दि जुग शुरू ओङा भन्दा गोमामेईराङ परमेश्वरगी सुङलाङ छ्या स्ये च्युता मेताते दि गा लाङच्येते बात 26थाचेन परमेश्वरगी मिओनला छ्या स्ये च्युत्कीन बिन्दा ओत। दि गा लाङच्येते बातकी विषयलाचेन परमेश्वर बात खित्कान्तेबेकीङ गोमाका टिबा ओतान। सधैँ देत्कान्ते परमेश्वरगी दोकराङ ओङस्यीत साकीन जात जातकी मिकी थे खोरोङला विश्वास खाला थेकी साबाते ङेन्स्यीत सिन गाङेपा गा लाङच्येते बात लाप्कीन बिन्दा ओत। 27थेत्ताङकामा दोक खाला काम खित्च्येते छ्येज्यीक बुद्धि ओत। दोक छ्येते परमेश्वरला गाङेकी येशू ख्रीष्ट छ्य्वापेकी सधैँभरि जय जय ओङस्यीत सिन सिइ। आमेन।
Currently Selected:
रोमी 16: JUL
Highlight
Share
Compare
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
