रोमी 15
15
ङुरूङगीङ ख्रीष्टकी च्योकराङ खिता फाप्क्यो
1था येशू ख्रीष्टला विश्वास खाईन पाको गालाते ङुरूङगीचेन दाक्पोन च्योकराङ पाको गाला मेताते दि सा थुङा मेङगो, दोक खिता मेङगो सिन ज्यीबा खित्कान्ते मिओनतेङ ख्याल ज्य्वाबा फाप्क्यो। ङुरूङगी दाक्पोन बातकामा विचार खिता मेङगो। 2ङुरूङगी थेबाङ दाक्पोन च्योकराङ ईन सिन सम्झे खाला थेबाङ पाको डोरस्यीत सिन चुक खासीन थेबाला लेमु ओङगीका थोकराङ खिता फाप्क्यो। 3येशू ख्रीष्टकीङ नोमुङ थे खोरोङ फाइदा ताकीन काम खाबा मेतान। थेकी दोक खिओ सिन परमेश्वर बातला गोमाका “परमेश्वर, मिओनगी खोल्ला ईन्दा मेन्दा साबाते थेमे मोताते ङालाराङ खाबाच्योक ओङसुङ,” सिन टिबा ओतान।#भजन ६९:९ 4परमेश्वर बातला गोमाबा टिबा ओताते गाङे बात ङुरूङगी खइँदा लोप्स्यीत सिन टिबाते ईन। थे बात ताजीन ङुरूङगी ज्येनतेबे ख्याल ज्य्वाजीन दुक्पा ओङसीनोङ चुक खाला सेम मेसेता खाला काम खिन देता फाप्च्या ईन्दाका सिन छ्या स्येक्यो। थेमे परमेश्वरगी खिओ साबाच्योक पक्काराङ खिओ सिन आश खाला गुलाराङ देता थुप्क्यो। 5दोक खाला ङुरूङ सेम मेसेता खाला देता थुप्स्यीत सिन परमेश्वरगी ङुरूङला आँट तेरग्यो। ङुरूङला दोक खित्कान्ते परमेश्वरगीराङ ख्योकोनगी येशू ख्रीष्टकी च्योकराङ दाक्पोन फाइदा माताबा खाला काम खित्जीन ख्योकोन गाङेला डिक्ला देत्च्येते सेम तेरस्यीत सिन ङा प्रार्थना खिओ। 6दोक खाईन ख्योकोन गाङे सेमज्यीकराङ खाला डिक्ला ख्योकोनगी खाज्यीकराङ खाला ङुरूङ प्रभु येशू ख्रीष्ट आबा परमेश्वरते जय जय खिता थुप्क्यो।
जात जातकी मिकी परमेश्वरते जय जय खिओ साबाते
7थोगी था ङा ख्योकोन गाङेला च्यि सिते सासीन ख्रीष्टकी खेराङला लेमु खाबा च्योकराङ ख्योकोनगीङ खेराङ नाङ ङा दोक्तेताङ खो थोक्ते सिन मिसिरा खाला दोक्पोईकी ज्येनज्यीकला लेमु खि। दोक खित्च्येतेचेन परमेश्वरला मान खाबाते ईन। 8ख्रीष्टकी चुक खासुङा सिन विचार खि। थेचेन परमेश्वरगी यहूदीओन ज्युज्यु पुर्खाताङ गोमा खाबाते जमान पूरो खाला थेबाला लेमु खिताला थेबे नाङ केबा ओतान। दोक खाईन थेकी परमेश्वर थे खोरोङगी खिओ साबा च्योकराङ खित्कान्ते ईन सिन छ्या स्ये च्युत्कीन बिन्सुङ। 9थेकी दोक दोक खाबेकी ज्येन ज्येन जातकी मिकीङ परमेश्वरगी खोपरोङला ङिङज्ये खित्च्याक्वा सिन छ्या स्येकीन थेला छ्ये ज्वा थुपाते ईन। दोक ओङगो सिन परमेश्वर बातला दोक दोक सिन टिबा ओतान। चुक सासीन “प्रभु परमेश्वर, ज्येन ज्येन जातकी मि ङोन्दु ङा खुई खाबाते कामगी लाईदु खोल्ला छ्ये जोइओ, खुईते जय जय ओङस्यीत सिन लु लिन्ग्यो,” सिन साबा ओत।#भजन १८:४९ 10परमेश्वर बातलाराङ “ज्येन ज्येन जातकी मिवे, ख्योकोनोङ परमेश्वरगी छाने खाबाते थे खोरोङ मिओनताङ डिक्ला गा खि,” सिन साबा ओत।#व्यवस्था ३२:४३
11लोक्ला ठाउँज्यीक्तुचेन “ज्येन ज्येन जातकी मिवे, प्रभु परमेश्वरला छ्ये जो। लुङबा लुङबे मि ख्योकोन गाङेकी थेते जय जय खि,” सिनोङ साबा ओत।#भजन ११७:१ 12थेमे यशैयेकीङ “था तिरी यिशै सन्तान नाङ मिज्यीक केइओ। थेकीचेन ज्येन ज्येन जातकी मि गाङेला राज्य खिओ। थेमे थेबा गाङेकी खोपरोङला लेमु खित्कान्ते थेकामा ईन सिन थेलाराङ भर परे खिओ,” सिन साबा ओतान।#यशैया ११:१० 13थे खोरोङगी साबाच्योक खिओ सिन आश खाला देत ज्युत्कान्ते परमेश्वरराङ ईन। थेला विश्वास खित्कान ईन्देकी थेकी ख्योकोन गाङेला आउदी खाला गा खिन थेमे डिक्ला थुन्ला देत ज्युत्स्यीत सिन ङा प्रार्थना खिओ। थेकी थोक खानामेईचेन परमेश्वर आत्मे शक्ति छ्य्वापेकी ख्योकोन था परमेश्वरगी ङुरूङला खिओ साबाच्योक खिओतराङ सिन छ्याःङ शंका मिक्किता खाला झन आश खाला गुला देता थुप्क्यो।
पावलगी थे खोरोङ काम च्यि ईन्दे सिन साबाते
14थेमे आज्यो न्वावे, ख्योकोन ङे दोक खि, थोक खि सिन माकोतालाराङ आउदी लेमु खाला काम खिन दुक। थेमे च्यि च्यि चुक खित्च्ये सिन लेमु खाईन छ्या स्येबा ओतेकी खेराङ नाङ दोक्पोईकी ज्येनज्यीकला लोप्कीन दुक। ख्योकोनगी दोक खिन ओताते बात ङाला लेमु खाला छ्या ओत। 15ईन्सीनोङ ख्योकोनगी छ्या स्येबा ओताते बात टोक मेज्येता खाला झन लेमु खाला छ्या स्येस्यीत सिन ङे दि चिट्ठीला कोई कोई बात छ्याःङ ज्यीबा मिक्किता खाईन टिबा ओत। परमेश्वरगी ङाला दया खाईन थे खोरोङ काम खि साबा ओतेकी ङे ख्योकोनला दोक खाईन टिबाते ईन। 16ज्येन ज्येन जातकी मि नाङ काम खिताला थेकीराङ ङाला येशू ख्रीष्ट काम खित्कान्ते मि सिन खटे खाबाते ईन। थोगी ङा ज्येन ज्येन जातकी मिला परमेश्वर गा लाङच्येते बात लोप्क्यो। परमेश्वर आत्मेकी थेबे सेम खुदुक जोला थेबा परमेश्वरला चढे खाबाते थेला मन परे खित्च्येते भोग च्योकराङ ओङस्यीत सिन ङा दोक खाला लोप्च्येते काम खिओ।
17ङे येशू ख्रीष्टताङ जीउज्यीकराङ ओङगीन परमेश्वरगी ङाराङला खि साबाते काम खाबेकी खित्सादु ङा गा खिता ङेत्क्यो। 18ङे लापाते बात ङेन्गीन ज्येन ज्येन जातकी मिकी परमेश्वरगी खि साबाते ङेन्दाला स्यूसुङ। ङाराङगी स्याप स्याप खाईन खाबाते कामगी खित्सादुका थेबेकी दोक खिताला स्यूबाते ईन सिनचेन ङा नोउ छ्ये मिक्किओ। च्यिला सासीन ङे थेबे नाङ खाबाते कामताङ बात गाङे ख्रीष्टकी शक्ति छ्य्वापेकी खाबाते ईन। 19थेमे छ्ये छ्येताङ अचम्बते कामतेबाङ परमेश्वर आत्मे शक्ति छ्य्वापेकीकामा खाबाते ईन। दोक खाला ठाउँ ठाउँला युगीन ङे यरूशलेम सारदुकी इल्लिरिकुम सिराते लुङबासाक लेप्कीन मिओनला ख्रीष्टते गा लाङच्येते बात लाप्कीन बिन्दा ओत। 20दोक खित्जीन ङा ज्येन मिकी ज्युबाते कामला स्यूक्पाच्योक खाईन गोमाका ज्येनगी थे बात लाप्कीन बिन्दाते ठाउँला मागाल। बरू ङेचेन येशू ख्रीष्ट सु ईन्दे सिन नोमुङ थे बात थोबा मेताते ठाउँला गाल्ला गा लाङच्येते बात लोपा फाप्क्यो सिन थोक्ते ठाउँला थे बात लोप गालाप। 21दोक खाईन ङे परमेश्वर बातला साबा च्योकराङ खाईन काम खाबाप। परमेश्वर बातला “थे सु ईन्दे सिन सुङगीङ साकीन बिन्दा मेताते ठाउँकी मिओनगी थे बात लेमु खाला थोक्यो। थेमे थे मिनराङ थोबा मेताते मिओनगी थे सु ईन्दाका सिन छ्या स्येक्यो,” सिन साबा ओत।#यशैया ५२:१५
पावलगी रोमनापा नाम ओङगीते सिन साबाते
22ङा दोक खाला ठाउँ ठाउँला युगीन गा लाङच्येते बात लोप्कीन ओतेकी ख्योकोन ओत्सापा याङ याङ ओङा चाल्सीनोङ थोरूमसाक थेपा ओङा माङेत्सुङ। 23थानी ङे देङपे लुङबा लुङबाला ङाराङगी खिता फाप्च्येते काम खाईन सिन्दा खाबाप। थेमे ननीङ ज्यीनीङमेईराङ ख्योकोनला ठेताला आउदी सेम लाबा ओतेकी 24था ङा स्पेन लुङबापा डोजीनराङ ख्योकोनला ठेता खित ओङामीन। टिक्पी दिन ख्योकोनताङ ङ्योम्बुराङ देत्नामेई ङाला लेमु ओङगो। थेमे थेरूकी ङाला स्पेनपा ड्वाप्ला ख्योकोनगी मद्धत खिता थुप्क्यो। 25तर ख्योकोन ओत्सापा ओङा भन्दा गोमा ङा यरूशलेमदु ओताते यहूदी परमेश्वर सन्तानओनला सिन जम्मा खाबाते पैसा केलाला थेपा डुइन ओत। 26बात चुक ओङसुङा सासीन म्यासिडोनियाताङ अखैये लुङबादु ओताते परमेश्वर सन्तानओनगी यरूशलेमदु ओताते दुक्पा ङेता ओताते परमेश्वर सन्तानओनला मद्धत तेरा फाप्क्यो सिन ठो खाईन थेबे लाईदु पैसा जम्मा खाबा ओतान। 27खोपरोङ खुशीकीराङ थेबेकी थोक खाबा ओतान। ईन्दाका थेबेकी दोक खिता फाप्च्येतेराङ ईन। च्यिला सासीन परमेश्वरगी खोपरोङला आशी बिन्गीन लेमु खानामेई यहूदी परमेश्वर सन्तानओनगी ज्येन ज्येन जातकी मिलाङ थे बात लाप्कीन बिन्देकी थेबेकीङ परमेश्वरगी तेरच्येते आशी ङेत्च्या ओङाते ईन। दोक खाईन थेबेकी यहूदीओनला परमेश्वरगी बिन्दाते आशी ङेत्नामेई थेबेकीङ खोपरोङताङ ओताते सम्पत्ति यहूदीओनताङ गोला साच्येते ठीकराङ ईन। 28था यरूशलेमपा गाल्ला थेबाला तेरा फाप्च्येते पैसा थेबे लाःक्तु बिन्गीन सिन्नामेईचेन ङा ख्योकोन ओत्सापा खाला स्पेनपा डुइओ। 29थेपा ख्योकोनला ठेता खित ओङजीन ख्रीष्टकी छ्य्वापेई ङे ख्योकोनला आउदी खाला आशी तेरा थुप्क्यो सिरच्येते बात ङाला लेमु खाला छ्या ओत।
30थेमे आज्यो न्वावे, था ङा ख्योकोनला च्यि खि सिन बिन्ती खिते सासीन ङुरूङ प्रभु येशू ख्रीष्टला विश्वास खित्कान्ते मि ईन्देकी थेमे परमेश्वर आत्मेकी ङुरूङला दोक्पोईकी ज्येनज्यीकला ङिङज्ये खित ज्युत्च्येते ईन्देकी ख्योकोनगी ङे लाईदु आउदी खाला परमेश्वरताङ प्रार्थना खि। ङा ङाराङोङ प्रार्थना खिन ओत। 31ख्योकोनगी चुक सिन प्रार्थना खिसे सासीन ङा यरूशलेमपा डोजीन थेपा यहूदिये अञ्चलदु ओताते येशू ख्रीष्टला विश्वास मिक्किकान्ते यहूदीओनगी ङाला मेलेबा खिता मुथुप्स्यीत थेमे ज्येन ज्येन जातकी मिकी जम्मा खाबाते ङे यरूशलेमदु परमेश्वर सन्तानओनला खेरच्येते थे पैसा थेबेकी गा खिन लिन्स्यीत सिन प्रार्थना खि। 32दोक खाईन जेसुकै काम साबा च्योकराङ ओङनामेई गा खिन ङा परमेश्वरगी साबा च्योकराङ खाला ख्योकोन ओत्सापा ओङामीन। थेमे ख्योकोनताङ ङ्योम्बुराङ देत्जीन ङाला लेमु ओङगो। 33ङुरूङला डिक्ला थुन्ला देत ज्युत्कान्ते परमेश्वर ख्योकोन गाङेताङ ङ्योम्बुराङ देत्स्यीत। आमेन।
Currently Selected:
रोमी 15: JUL
Highlight
Share
Compare
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
