रोमी 14
14
दोक्पोईकी ज्येनज्यीकला चुक खिता फाप्कीते
1थेमे ज्येनोङ बात च्यि सासीन ख्योकोन नाङ कोई कोई येशू ख्रीष्टला विश्वास खाईन पाको गाला मेताते मिओनोङ ओत। थेबाचेन ङे दोक खासीन पा फोइता सिन ज्यीबा खिओ। ईन्सीनोङ ख्योकोन थेबाताङोङ साङ खि। ख्योकोन च्यिला दोक खाला ज्यीबा खिते सिन थेबाताङ टेकाटेउरीचेन माकेत। 2च्यिला सासीन कोई कोई सा ओङच्येते जे सोसीनोङ ओङगो सिन साला जे कुरोङ साकान ओङगो। येशू ख्रीष्टला विश्वास खाईन पाको गाला मेताते मिओनचेन जेसुकै सोला पा फोइता सिन ज्यीबेकी स्या मास्साबा खाला छोमाकामा सेइओ। 3जे सोसीनोङ ओङगो सिन स्या साकान्ते मिकी स्या मास्साकान्तेला थेनी स्या साप्ला ज्यीबा खिदुक, थे चुक लेम्बा ईन्दाका सिराच्योक खाला छ्ये माकेत। थोकराङ खाला स्या मास्साकान्तेकीङ खो च्यिला स्या सेइते? खुई दोक खाबातेनी पाप खाबाते ईन सिन मासेर। च्यिला सासीन स्या साकान्तेलाङ परमेश्वरगी थे खोरोङ मिराङ ईन सिन साबा ओत। 4थोगी ज्येनला स्या सा मेङगो सिन सिरकान्ते खो सु ईन्देरो? ना खोका थे मालिक ईन्दे? प्रभु येशू ख्रीष्टराङ थेबे मालिक ईन्देकी थेकीकामा थेबेकी पाप खाबाते ईन्दाना मेन्दे सिन सिरा ङेत्क्यो। थेराङ थेबेकी स्या सोबाते मेलेबा मेन सिन सिरकान्ते ईन्देकी स्या सोला थेबाला पा फोकराङ मोफोगो।
5थेमे याङराङ कोई कोईकी दि छोमु दोक खिता फाप्क्यो, दोक खिता मेङगो सिन कोई दिनला ज्येन भन्दा खुदुकराङ दिन ईन सिन माने खिओ। लोक्ला कोईकीचेन गाङे दिन थोजोराङ ईन, छ्याःङ फरक मेत सिन सिओ। जो जसकी जुन दिनगी छोमु जे खासीनोङ ङे दोक खाबाते ठीकराङ ईन सिन सेमदु ढुक्क ओङला खिता फाप्क्यो। 6प्रभु येशू ख्रीष्टला लेमु खाला माने खिताप सिनराङ कोईकी कोई दिनला ज्येन भन्दा खुदुक दिन ईन सिन माने खिओ। लोक्ला येशू ख्रीष्टला लेमु खाला माने खिताप सिनराङ कोईकी स्या सेइओ, कोईकी साराङ मास्साओ। स्या साकानगीङ परमेश्वरला धन्यवाद बिन्ला सेइओ, मास्साकान्तेबेकीङ खोपरोङगी जे सेइदुक थे लाईदु परमेश्वरला धन्यवाद बिन्ला सेइओ। 7ङुरूङ जोराङ ईन्सीनोङ स्या फाप्सीनोङ सोन्गीन देत्सीनोङ सुङ दाक्पोन खुशीकी चुक खिता सेम लाङगीका थोकराङ मिक्किओ। 8दाक्पोनला जे ओङसीनोङ, ङुरूङगी जे खासीनोङ प्रभु येशू ख्रीष्टला मान खितालाराङ ङुरूङ जहिलेङ थोक खिओ। थोगी सोन्गीन देत्सीनोङ स्यिसीनोङ ङुरूङ थेतेराङ ईन। 9थोरूमसाक सोम्बोराङ ओतातेबा ईन्स्यीत, गोमाका स्यिइन सिन्दातेबा ईन्स्यीत मि गाङेला राज्य खित्कान्ते प्रभु येशू ख्रीष्टराङ ईन। दोक खाला गाङेला राज्य खित्कान्ते ओङालाराङ थे स्यिइन च्याकीन सोम्बो लोक्पाते ईन।
10बात दोक ईन्देकी था ख्योकोन स्या मास्साकान्तेबेकी स्या साकान्ते खेराङ आज्यो न्वाला खुई दि सोबाते, दोक दोक पाप खाबाते ईन सिन सिरा थोङ। थोकराङ खाला स्या साकान्तेबेकीङ स्या मास्साकान्ते खेराङ आज्यो न्वाला थेकी दि मास्सादुक, दोक दोक मिक्किदुक, थे चुक लेम्बा ईन्दाका सिराच्योक खाला छ्ये खिता थोङ। च्यिला सासीन परमेश्वरगी न्याय खिते छोमु ङुरूङ गाङेराङ थे दोन्दु ड्वा फाप्क्यो सिरच्येते बात टोक माज्येत। 11ङीमाई दोक ओङगो सिन परमेश्वर बातला प्रभु परमेश्वर थे खोरोङगीराङ “मि गाङे ङे दोन्दु वाला घुँडा चुला ङाला से खिओ। थेमे थेबा गाङेकी परमेश्वर खोराङ ईन सिन सिओ। दोकचेन पक्काराङ ओङगो,” सिन साबा ओत।#यशैया ४५:२३ 12थोगी थे छोमु ङुरूङ गाङेकी दाक्पोन दाक्पोनगी जे खाला दुक थे हर हिसाबकामा परमेश्वरला तेरा फाप्क्यो।
जे खित्जीनोङ ज्येनगी वास्ता ज्य्वाबा फाप्क्यो
13थोगी ङुरूङ गाङेकी खुई च्यिला थोक खाबे, दोक खाबातेनी पाप ईन सिन साला दोक्पोईकी ज्येनज्यीकला दोष लै खित्च्येते तोङा फाप्क्यो। ख्योकोनगी खेराङ आज्यो न्वा च्योकराङ ओङाते मिओनला थेबेकी सा मेङगो साबाते साप सोसीन ओङगो साला शंका मालोङ। थेबेकी मास्साओ साबाते सो सिन कर लै माकेत। 14प्रभु येशूताङ जीउज्यीकराङ ओङाते मि ईन्देकी दि बात ङे लेमु खाईन छ्या स्येबा ओत। च्यि सासीन स्या ईन्सीनोङ ज्येनतोक ईन्सीनोङ सा मेङच्येते सिराते छ्याःङ ओतराङ मेत। मिकी जे सोसीनोङ पा फोक्च्येते मेन। दोक ईन्सीनोङ सुइँदाला दिनी सा मेङगो, दि सोसुङ सासीन पा फोइओ सिराच्योक लाङगीन लाङगीन थोक्ते साप सोसुङ सासीन थेबालाचेन दाक पा फोइओ।
15थोगी जे सोसीनोङ ओङगो सिरकान ख्योकोनगी थोक खिता मेङगो सिरकान्ते खेराङ आज्यो न्वाला थेबेकी सा मेङगो साबाते साप सोसीन ओङगो साला दुक्पा मातेर। दोक खासीन ख्योकोनगी थेबाला ङिङज्ये माक्याबाते ईन। ख्रीष्टचेन होथोक्ते मिओन लाईदुङ थे खोरोङ ज्यान बिन्गीन स्याप्ते ईन सिरच्येते बात ख्योकोनगी टोक माज्येत। साच्या थुङच्ये छ्य्वापेकी ख्योकोनगी थेबाला खोपरोङगी पा फोइता सिन साबाते काम खित च्युत्ला येशू ख्रीष्ट छ्य्वापेई ठाल माज्युत। 16थोक खासीन जे सोसीनोङ ओङगो सिन खेराङगी छ्या स्येबाते बात लेमु ईन्सीनोङ ज्येनतेबेकी थे बात लेमु मेन सिन सिओ। 17दि बातओन ङे च्यिला खाबाते ईन्दे सासीन परमेश्वर राज्यदु स्यूबाते मिओन नाङ दि सा थुङा ओङगो, थे सा थुङा मेङगो सिरच्येते बात छ्याःङ छ्येते बात मेन। छ्येते बातचेन परमेश्वर आत्मे छ्य्वापेई परमेश्वरगी खि साबा साबाच्योक खित्च्येते, दाक्पोन नाङ डिक्ला थुन्ला देत्च्येते थेमे गा खिन देत्च्येतेराङ ईन। 18होदोक दोकराङ खिन ख्रीष्टला माने खित्कान्ते मिओनताङचेन परमेश्वर खुशी ओङगो। दोक्ते मिओनला ज्येनगीङ लेमु मि ईन सिन सिओ।
19बात दोक ईन्देकी ङुरूङगी दाक्पोन नाङ मिडिक्च्येते होदोक्ते बात खिता ताङला डिक्ला थुन्ला देता फाप्क्यो। थेमे चुक खासीन दाक्पोन नाङ लेमु ओङगीका थोकराङ खित्च्ये छ्य्वापाकामा गाङेकी स्येत खिता फाप्क्यो। 20साच्या थुङच्ये बातला माडिक्ला परमेश्वरगी खेराङ नाङ खाबाते काम ङ्ये माज्युत। ईन्दाका ङे आनाङका साबा च्योकराङ जे सोसीनोङ मिला पा फोक्च्येते मेन। ईन्सीनोङ ख्योकोनगी खइँदा सोबा थुबेकी खित्सादु ज्येनगीङ खोपरोङगी मास्साओ मुथुङो सिन साबाते सेइदुक थुङगीदुक सासीन ख्योकोनगी थोक खाईन सोबा थुबाते लेमु मेन। 21ख्योकोनगी स्या साजीन कि छ्याङ थुङजीन कि होदोक्ते ज्येनतोक खइँदा काम खित्जीन खेराङ आज्यो न्वाकी खोपरोङगी मिक्किओ साबाते कामराङ खाला पाप खिदुक सासीन ख्योकोनगी बरू स्या मासोसीन, छ्याङ रक्सी माथुसीन थेमे होदोक्ते काम छ्याःङ माक्यासीन लेमु ईन। 22जे सोसीन थुसीनोङ पा मोफोगो सिन खेराङगी छ्या स्येबाते बात परमेश्वरगीकामा छ्या स्येसीन लेमु ईन। ख्योकोनगी सोकीन थुकीन खानामेई थरिङ ङे थोक खाबाते ठीक खाताकाना माक्याताका सिन विचार खित्जीन ङे थोक खाबाते ठीकराङ ईन सिराच्योक लासुङ सासीन ख्योकोनगी पाप खाबाते मेन। ख्योकोन भाग्यमानी ईन। 23लोक्ला जेसुकै सा थुङा मेङगो सिरकान्ते मिओनगी शंका लाङगीन लाङगीन खोपरोङगी सा थुङा मेङगो साबाते खइँदा सोसुङ थुसुङ सासीन थेबाचेन दोषीराङ ईन। च्यिला सासीन येशू ख्रीष्टला विश्वास खिन थेला लेमु खाला माने खिताला मिक्किओ साबाते कामराङ खासुङ सासीन थोक्ते गाङे काम पापराङ ईन।
Currently Selected:
रोमी 14: JUL
Highlight
Share
Compare
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
