लुका 8
8
इसुहेङ साघाइका बेबालाइ
1इङकोन्हुअ्सो इसु परमेस्वरको सारभिको रेम्काबानाल हिङपाकाताङ पुर पुरता रो देरा देराता हानिहि। वाकोदोफा तेन्हे चात्यागेलाइ बुङ हिघाखे। 2मासानगेलाइ रो रोगसो एल्का आधिमि बेबालाइ बुङ वासेहेङ पिताइहि। एम्बालाइता न्हिअ्लोङ मासान खोअ्तेङ एल्का मरियम मग्दलिनि बुङ हिघाहि।#मत्ति २७:५५-५६; मरकुस १५:४०-४१; लुका २३:४९ 3हेरोद राजाको खाजान्चि खुजासको बेअ् योआन्ना, सुसन्ना रो आरोङ बुङ हेन्जाङ बेबालाइ हिघाखे। जाइ इसु रो वाको चात्यागेलाइहेङ टाका काउरि पितेङ साघाइघाखे।
चालाइ बिअ्काको उदारन
(मत्ति १३:१-९; मरकुस ४:१-९)
4एअ्नि पुर पुरसो हेन्जाङ द्याङगेलाइ इसुकोता लोहि। द्याङगेलाइ लोलिदोतेङ इसु एम्बालाइहेङ इस्का काथा दोअ्हि, 5“एअ्मि द्याङ चालाइ बिअ्लि ओल्हिहि। चालाइ बिअ्लाउ आधे चालाइ दामाता बिअ्न्हाहि। वासेहेङ द्याङगेलाइ याङहि कालाउ जिह्याँगेलाइ लोतेङ चापिहि। 6आधे चालाइ उन्ठुइ खिनिङ हिका भोनोता बिअ्न्हाहि। इन्ता योनु ते योहि सेङका बाल्कुसा भोनो हिनासिङ गोताङ सेङहि। 7हेथे चालाइगेलाइ चुइको झालासता बिअ्न्हाहि, इङकोदोसा चुइको झालास बुङ धाङगातेङ लोहि रो योका चालाइहेङ बारालि मापिहि। 8आधे चालाइ रेम्का भोनोता परितेङ लादालादापा जेङतेङ बाराहि कालाउ एलोङ एलोङ चालाइसो साइसाइ गुना जेङतेङ सेहि।” इङको दोअ्लि दोअ्तेङ इसु एम्बालाइहेङ दोअ्हि, “जाइको हिङका न्हातोङ हि, वा रेम्फा हिनाको!”
उदारनको माने
(मत्ति १३:१०-२३; मरकुस ४:१०-२०)
9इसुको चात्यागेलाइ वासेहेङ इदोइ उदारनको माने हाइ कुनु दोअ्तेङ हिअ्हि। 10इसु एम्बालाइहेङ दोअ्हि, “नेलाइहेङ स्वरगको सारभिको लिअ्ताको काथा गिलि पिका हि। कालाउ बो द्याङगेलाइदोफा का काथागेलाइता खिनिङ दोअ्खा। एम्बालाइ खाङनुते खाङखे कालाउ मातिङखे। हिङनुते हिङखे कालाउ मागिखे।”#यासाइया ६:९
11इसु आरोङ दोअ्हि, “इदोइ काथाको माने चालाइ दोअ्का परमेस्वरको बचन। 12दामाता हुल्का चालाइ एम्बालाइ जाइ बचन हिङनुते हिङखे मनता ताअ्लि मादोखे। हाइदोनु खान्धुरपातेङ बान्चेलि मानिनाको दोअ्तेङ साइतान लोखे कालाउ एम्बालाइको बचन चुमपुखे। 13उन्ठुइहिका भोनोइता हुल्का चालाइ दोअ्का एम्बालाइ परमेस्वरको बचन हिङतेङ लेङचातेङ र्हुखे। कालाउ इङको बचन मनता ताअ्लि मादोखे। एन्साजेङलाउ एम्बालाइको खान्धुर इघुरिङको भाअ्सिङ खिनिङ जेङखे कालाउ मुस्किल रो तु:ता खान्धुर राम्खे। 14चुइको झालासता बिअ्न्हाका चालाइते एम्बालाइ, जाइ परमेस्वरको बचन हिङनुते हिङखे, कालाउ दुनियाको सुरता, टाका काउरि रो सुख निङतेङ खान्धुरहेङ बारालि दोङ मापिखे। कालाउ एम्बालाइसो हाइ बुङ फलपाको मासेखे। 15रेम्का भोनोता बिअ्न्हाका चालाइते एम्बालाइ जाइ बचन हिङखे रो हुकुमकारि जेङतेङ हिङका बचनहेङ रेम्फा पातेङ मनता ताअ्खे कालाउ बेलाता हेन्जाङ फल सेपाखे।”
गेसाको फाइसालाम्का
(मरकुस ४:२१-२५)
16 “हासु बुङ गेसा जोलाइतेङ पाथिहोइ माथुम्खे। नाते थारान्चालिअ्ता म्होअ्तेङ ताअ्खे। भरुङ साअ्लिअ्ता लोकालाइहेङ फाइसालामाको दोअ्तेङ झाउका थामेता ताअ्न्हाखे। #
मत्ति ५:१५; लुका ११:३३ 17एसाङपातेङ म्होअ्तेङ ताअ्का काथा जेथे हि इङको गोताङ रेम्फा ग्यावा। कालाउ गिलि मादोका काथा जेथे हि, इङको गोताङ हेतेङ झाराङ ग्यावा।#मत्ति १०:२६; लुका १२:२ 18एन्साजेङलाउ नेलाइको हिङका काथाहेङ रेम्फा फोम पासु हाइदोनु जाइदोफा हि, वासेहेङ आरोङ प्यावा। जाइदोफा मान्थु, वाकोदोफा हिका बुङ घिनावा।”#मत्ति २५:२९; लुका १९:२६
इसुको आमाइ रो ओनेगेलाइ
(मत्ति १२:४६-५०; मरकुस ३:३१-३५)
19एअ्नि इसुको ओनेगेलाइ रो वाको आमाइ वासेहेङ दुसुलि लोहि। कालाउबुङ द्याङगेलाइको चेअ्सुमेअ्सुका एम्बालाइ वासेहेङ दुसुलि मादोहि। 20एअ्मि द्याङ इसुहेङ दोअ्हि, “नाङको आमाइ रो ओनेगेलाइ नासेहेङ दुसुलि बाहार र्हुम्तेङ हि।” 21इसु एम्बालाइहेङ दोअ्हि, “परमेस्वरको काथा हिङका रो मानिकालाइ दोङ काङको आमाइ रो काङको ओनेगेलाइ।”
इसु दुम्भेरमाहेङ गाम्पाका
(मत्ति ८:२३-२७; मरकुस ४:३५-४१)
22एअ्नि इसु चात्यागेलाइदोसा नाउता धोल्तेङ ओबालाइहेङ दोअ्हि, “केलाइ चावान्दिको ओदोइपार हानाइने।” कालाउ ओबालाइ हानिहि। 23हानिकाताङ पालाउ इसु नाउताङ जिम्हि। कालाउ चावान्दिता बारका दुम्भेरमा लोलि तेङहि रो नाउता चि पोङघालि तोम्लाउ एम्बालाइ बारका आपतता परिहि। 24एन्साजेङलाउ चात्यागेलाइ लोतेङ इसुहेङ ल्होपातेङ दोअ्लि तेङहि, “मास्टर, मास्टर, केलाइ ते सिलि तोमन्हाहोइ।” इङको हिङतेङ इसु ल्होहि रो दुम्भेरमाहेङ हाकाराइहि। ओदोङघरि दुम्भेरमा गोतातेङ चिको छाल्का बुङ गाङहि। 25इसु चात्यागेलाइहेङ दोअ्हि, “खोइ नेलाइको खान्धुर?” वाको सरबङ तिङतेङ एम्बालाइ भारभुसाइहि रो थिहि। कालाउ ताताइमिताङ काथा पालि तेङहि, “या हासु? वा हाकाराइलाउ ते चिको छाल्का रो दुम्भेरमा बुङ वाको हुकुमहेङ साअ्खे।”
मासान खोअ्का द्याङ एल्का
(मत्ति ८:२८-३४; मरकुस ५:१-२०)
26इसु वाको चात्यागेलाइहेङ चुमपुतेङ गालिल चावान्दिको उदोइपार गेरासेनसको माउजाता थुकाहि। 27जेलाउ इसु नाउसो खुअ्हि कालाउ इङकोङ पुरसो मासान खोअ्का एअ्मि द्याङ वासेहेङ दुसुलि लोहि। इङको द्याङ हेन्जाङ दिनासो धाबा बुङ मालागाइघाहि। कालाउ वा ताइको साअ्ता बुङ माहिसिङ तोमगेलाइता खिनिङ हिघाहि। 28इसुहेङ तिङतेङ वा हापाङ र्हिकाइतेङ, वाको आगाता पोम्भेलेतेङ दोअ्हि, “इसु, बारका परमेस्वरको चान, ना कासेहेङ हाइपालि खाङखेना? बिम्ति हि, कासेहेङ तु:मापि।” 29इसु मासानहेङ ओल्हिलि हुकुम पिनाङसिङ इङको द्याङ एसा दोअ्हि। हेन्जाङखे इङको मासान वासेहेङ रिम्का हिघाहि। वाको खुर खोकोइ झिन्झिरिहोइ धेउतेङ ताअ्लाउ बुङ वा मासानको सरबङसो झिन्जिरि धोअ्पातेङ उदादाङका थामेभारि खाअ्घाहि।
30इसु वासेहेङ हिअ्हि, “नाङको मिङ हाइ?” वा दोअ्हि, “फाउज” हाइदोनु इङको द्याङता हेन्जाङ मासानगेलाइ दुल्का हिघाहि। 31कालाउ मासानगेलाइ इसुदोफा बिम्ति पातेङ दोअ्हि, “केलाइहेङ ओल्हिलि मादोका चिलवाङवाङका खाराता हानिका हुकुम मापि।” 32इङको आरदाङको चाउरता एअ्जेर पाया चारिघाखे। कालाउ मासानगेलाइ इसुदोफा इङको पायाको जेरता दुल्लि हुकुम र्हेहि। इसु एम्बालाइहेङ दोअ्हि, “हानिसु।” 33इदोइ मासानगेलाइ इङको द्याङसो ओल्हितेङ पायागेलाइलिअ्ता दुल्हि। कालाउ इङको पायाको जेर धाअ्तेङ हानिलाउ आरदाङसो लेता चावान्दिता हुल्तेङ दुबितेङ सिहि।
34इस्का घाटाना जेङका तिङतेङ पाया घोकालाइ धाअ्पुतेङ इङको काथा देरा रो पुरभारि फाइलाइहि। 35इङकोन्हुअ्सो हेन्जाङ द्याङगेलाइ हाइ जेङहि दोअ्तेङ इसुकोता खाङलि लोहि। कालाउ लाम्फा मासान सान्ताइका द्याङहेङ एल्तेङ एला धाबा लागाइतेङ इसुको खोकोइ भेरपा योम्तेङ हिका एम्बालाइ तिङहि। इङको तिङतेङ एम्बालाइ झाराङ थिहि। 36कालाउ मासान खोअ्का द्याङहेङ एल्का तिङकालाइ हेसापा एल्हि दोअ्तेङ इन्ता लोका झाराङ द्याङगेलाइहेङ दोअ्पिहि। 37इङकोन्हुअ्सो इङको गेरासेनस माउजाको झाराङ द्याङगेलाइ इसुहेङ इतासो हाने दोअ्तेङ बिम्ति पाहि। हाइदोनु एम्बालाइ हेन्जाङ थिका हिघाखे। एन्साजेङलाउ इसु घुरितेङ हानिलि नाउता ताङहि। 38एन्सालाउ मासान ओल्हिन्हाका इङको द्याङ इसुहेङ बिम्ति पाहि, “प्रभु, कासेहेङ बुङ नाङकोङ दोफा चुमपु।” कालाउ इसु वासेहेङ दोअ्हि, 39“ना ताइको सिता हाने; परमेस्वर नाङको भाअ्सिङ हाइ पाहि? इङको काथा बोमिहेङ बुङ हिङपा।” इसु वाको भाअ्सिङ पापिका कामको बारेता इङको द्याङ गोताङ पुरभारि हिम्पागिल्हि।
याइरसको चामिन्दि रो एअ्मि हिति होका बेबाल एल्का
(मत्ति ९:१८-२६; मरकुस ५:२१-४३)
40इसु चावान्दिको इदोइपार थुकालिलोलाउ हेन्जाङ द्याङगेलाइ वासेहेङ र्हुमतेङ हिघाहि। कालाउ एम्बालाइ वासेहेङ स्वागत पाहि। 41इघुरिङन्हुअ्सो कचहरिसाअ्को हाकिम याइरस लोतेङ इसुहेङ सेउपातेङ काङको साअ्ता लोपि दोअ्तेङ पारथाना पाहि। 42हाइदोनु वाको एलोङखिनिङ तेन्हे बाअ्सारको चामिन्दि सिलि तोम्का हिघाहि। वाको बिनइ हिङतेङ इसु वाकोङदोफा हानिलि तेङहि। इसु हानिका तिङतेङ द्याङगेलाइ चारबितिङसो चेअ्सुमेअ्सुपा लोलि तेङहि।
43इङकोङ हुलता तेन्हे बाअ्सारसो हिति होकासो मासाअ्धितेङ तु: निन्चाका एअ्मि बेबाल बुङ हिघाहि। वा ताइमिदोफा हिका टाका काउरि ओसेरे पाइतिता दोपालाउ बुङ हासुङ वासेहेङ एल्पालि दोनाङ मान्थुघाहि। 44वा द्याङगेलाइको चेअ्सुमेसुकाता न्हुअ्पाहासो लोतेङ इसुको धाबाको फेन्चा साइहि। वाको धाबा साइतेङसाङ वाको हिति होका बेथा एल्हि। 45इङको दोङ पहर इसु हिअ्हि, “कासेहेङ हासु साइहि?” कालाउ झाराङ, “काते साइनाङ मान्थुघा” दोअ्हि। कालाउ झाराङ “काते साइनाङ मान्थुघा” दोअ्हि। कालाउ पत्रुस दोअ्हि, “मास्टर, नासेहेङ ते द्याङगेलाइको चेअ्सुमेअ्सु दोङ ठेलिदोङखे।” 46कालाउ इसु दोअ्हि, “माको, हासुबिङ कासेहेङ साइहि। हाइदोनु काङकोसो सरबङ ओल्हितेङ हानिका कासेहेङ था जेङहि।” 47एला म्होअ्तेङ हिलि माज्याङ दोअ्का गितेङ इङको बेबाल थितेङ फिरतेङ लोहि रो वाको खोकोइता तुघुरहि। कालाउ वा इसुहेङ साइका रो साइतेङसाङ एल्का काथा झाराङको आगाता दोअ्हि। 48कालाउ इसु वासेहेङ दोअ्हि, “चामिन्दि, नाङको खान्धुरसो ना एलन्हा, एला सान्तिसो हाने।”
49इसु एसा दोअ्काताङ पालाउ याइरसको साअ्सो एअ्मि द्याङ लोतेङ याइरसहेङ दोअ्हि, “नाङको चामिन्दि सिलिदोहोइ, एला मास्टरहेङ तु:मापि।” 50इङको काथा हिङतेङ इसु याइरसहेङ दोअ्हि, “हारेस माचा, खान्धुर खिनिङ पा, नाङको चामिन्दि बानच्यावा।” 51इसु याइरसको साअ्ता थुकातेङ पत्रुस, याकुब, युहन्ना रो बेजानको आमाइ आबाहेङ खिनिङ बो हासुहेङ बुङ लिअ्ता दुल्लि मापिहि। 52इङको बेजान सिनाङसिङ इन्ता जोम्का झाराङ खारतेङ नेतेङ हिघाहि। इसु एम्बालाइहेङ दोअ्हि, “माखारसु, वा जिम्तेङ खिनिङ हि, सिनाङ मान्थु।” 53एम्बालाइ इसुको काथा हिङतेङ झाराङ खिस्सिपातेङ लेङपिहि। हाइदोनु एम्बालाइ वा सिहोइ दोअ्तेङ गिका हिघाहि। 54कालाउ इसु बेजानको खुर चुमतेङ दोअ्हि, “ओइ आबाउ, ल्हो!” 55इङको पहर बेजानको हाङसा आरोङ घुरितेङ लोहि। वा इघुरिताङ ल्होलाउ इसु एम्बालाइहेङ दोअ्हि, “या बेजानहेङ चाका आनेमाने पिसु।” 56इदोइ तिङतेङ बेजानको आमाइ आबा भारभुसाइहि। कालाउ इसु एम्बालाइहेङ “इदोइ काथा हासुहेङ बुङ मादोअ्सु!” दोअ्तेङ हुकुम पिहि।
Currently Selected:
लुका 8: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
