लुका 9
9
इसु चात्यागेलाइहेङ पारचार पालि दिङगिल्का
(मत्ति १०:५-१५; मरकुस ६:७-१३)
1इसु तेन्हे चात्यागेलाइहेङ काइहि। एम्बालाइहेङ मासान ओल्हिपालि रो रोगाइकालाइहेङ एल्पाका सरबङ रो खाबारा पिहि। 2कालाउ इसु एम्बालाइहेङ स्वरगको सारभिको बारेता पारचार पालि रो रोगाइकालाइहेङ एल्पालि भाअ्सिङ दिङगिल्हि। 3कालाउ इसु एम्बालाइहेङ दोअ्हि, “नेलाइहेङ दामाता गोयाङ दोअ्तेङ लाठि, झोला, चाका आनेमाने, टाका रो फेरेका धाबागेलाइ हाइदोङ माचुम्सु। 4कालाउ नेलाइहेङ जेदोङ साअ्को द्याङ स्वागत पावा, इङको पुर मालाअ्पाधाउ इङकोङ साअ्ता हिसु। 5कालाउ जेदोङ थामेको द्याङगेलाइ नेलाइहेङ स्वागत मापानु, इङको द्याङगेलाइहेङ परमेस्वरको पाका न्यायको चेतानि पिलि पाइतालाको धुला थितेङ इङको थामेहेङ लाअ्पिसु।”#साल्तेङ दिङगिल्का १३:५१; १०:४-११ 6कालाउ चात्यागेलाइ देरा देराता हानितेङ रेम्काबानाल पारचार पातेङ रोगाइकालाइहेङ एल्पाहि।
हेरोद आवाइका
(मत्ति १४:१-१२; मरकुस ६:१४-२९)
7जेलाउ इदोइ गोताङ घाटानागेलाइको बारेता गालिल माउजाता राज पाका हेरोद एन्टिपास हिङहि कालाउ वा आवाइहि। हाइदोनु हेथे द्याङगेलाइ “चिभुअ्लि पिका युहन्ना सिकासो सिन्हुहि” दोअ्तेङ दोअ्घाखे।#मत्ति १६:१४; मरकुस ८:२८; लुका ९:१९ 8आधिमि “एलिया देखाल पिहि” दोअ्घाखे। कालाउ बोगेलाइ “लाम्फाको परमेस्वर पाहासो धुइका सिकासो सिन्हुहि” दोअ्घाखे। 9एन्साजेङलाउ हेरोद एसा दोअ्हि, “चिभुअ्लि पिका युहन्नाको ते कादोङ पुरिङ पाल्लि लागाइका हिघाखा। या हासु जाइको बारेता का इस्का काथा हिन्दोङखा?” कालाउ वा इसुहेङ भेटिलि बिचार पाहि।
इसु नाहाजारहेङ चापाका
(मत्ति १४:१३-२१; मरकुस ६:३०-४४; युहन्ना ६:१-१४)
10कालाउ इसुको दिङगिल्का तेन्हेमि साल्तेङ दिङगिल्कालाइ घुरितेङ लोकान्हुअ्सो ओबालाइको पाका गोताङ कामगेलाइको बारेता इसुहेङ हिङपाहि। वा एम्बालाइहेङ खिनिङ चुमपुतेङ बेथसेदा दोअ्का पुरभारि हानिहि। 11कालाउ इदोइ काथा गितेङ हेन्जाङ द्याङगेलाइ वासेहेङ पिताइहि। इसु एम्बालाइहेङ स्वागत पाहि रो स्वरगको सारभिको बारेता हिम्पाहि। कालाउ रोगाइकालाइहेङ एल्पाहि।
12बेला दुबिलि तोम्लाउ तेन्हेमि चात्यागेलाइ लोतेङ इसुहेङ दोअ्हि, “एला इदोइ द्याङगेलाइहेङ इतासो बेदाङगि पागिल। कालाउ एम्बालाइ भेरपाको देरागेलाइता हानितेङ ताइको चाका, हिका थामेगेलाइ ताइमिङ भोकाको। हाइपानु केलाइ हाइदोङ मान्थुका चाकामान्दाका थामेता हिनाहि।” 13कालाउ इसु एम्बालाइहेङ दोअ्हि, “नेलाइदोङ एम्बालाइहेङ चालि पिसु।” कालाउ एम्बालाइ दोअ्हि, “केलाइदोफा नालोङ तोले रो न्हेलोङ हाया खिनिङ हि। इदोइ झाराङ द्याङगेलाइहेङ चालि पिलि गोइनु ते आरोङ चाका आनेमानेगेलाइ चोलतेङ चुमालिगोयाङ।” 14हाइदोनु इन्ता वाबालाइ खिनिङ नाहाजार झोको हिघाहि। कालाउ इसु वाको चात्यागेलाइहेङ दोअ्हि, “द्याङगेलाइहेङ न्हेकुरिते न्हेकुरितेको हारता योम्लि लागाइसु।” 15कालाउ चात्यागेलाइ झाराङ द्याङगेलाइहेङ एन्साङपातेङ योम्लि लागाइहि। 16इङकोन्हुअ्सो इसु नालोङ तोले रो न्हेलोङ हाया र्हुतेङ र्हुता स्वरगभारि खाङतेङ परमेस्वरदोफा च्याबास पिहि। कालाउ वा तोले रो हायाहेङ पेङतेङ द्याङगेलाइहेङ बाखाराइपिसु दोअ्तेङ चात्यागेलाइहेङ पिहि। 17कालाउ झाराङ घाइपाङ चालिदोतेङ दाइका तोले रो हायाको टुकारागेलाइ जोम्पालाउ तेन्हे दाल्हो जेङहि।
पत्रुस इसुहेङ ख्रिस्ट दोअ्तेङ मानिका
(मत्ति १६:१३-१६; मरकुस ८:२७-२९)
18एअ्नि इसु एकालाङ पारथाना पातेङहिका पहरता चात्यागेलाइ बुङ वाकोङ भेरपा हिघाखे। वा एम्बालाइहेङ हिअ्हि, “द्याङगेलाइ कासेहेङ हासु दोअ्खे?” 19एम्बालाइ दोअ्हि, “आधिमि द्याङगेलाइ चिभुअ्लि पिका युहन्ना दोअ्खे आधिमि एलिया दोअ्खे। कालाउ बोगेलाइ हेअ्मि चाहिँ लाम्फाको परमेस्वर पाहासो धुइका सिकासो सिन्हुका वाला दोअ्खे।”#मत्ति १४:१-२; मरकुस ६:१४-१५; लुका ९:७-८ 20आरोङ इसु एम्बालाइहेङ हिअ्हि, “नेलाइ कासेहेङ हासु दोस्वाना?” पत्रुस जाबाफ पितेङ दोअ्हि, “ना परमेस्वरदोङ दिङगिल्का ख्रिस्ट हिना!”#युहन्ना ६:६८-६९
इसु ताइको सिका बारेता काथा पाका
21कालाउ इसु चात्यागेलाइहेङ इदोइ काथा हासुहेङ बुङ मादोअ्सु दोअ्तेङ हुकुम पिहि। 22कालाउ इङकोन्हुअ्सो वा एम्बालाइहेङ काथा गिपातेङ दोअ्हि, “का द्याङको चान हेन्जाङ तु: भोगिलिगोयाङ। आगुवागेलाइ, मुल धामिगेलाइ रो धरम मास्टरगेलाइ वासेहेङ मामान्यावा कालाउ सेअ्तावा। कालाउ परमेस्वर वासेहेङ सुम्निता सिकासो सिन्हुपावा।”
चात्याको पालिगोइका त्याग
(मत्ति १६:२४-२८; मरकुस ८:३४-९:१)
23कालाउ इसु झाराङहेङ दोअ्हि, “खाङसु, जाइ कासेहेङ पिताइलि भोखे पानु इङको ताइमिहेङ इन्कार पाको रो दिनाङ ताइको कुरुस चुम्तेङ कासेहेङ पितायाको।#मत्ति १०:३८; लुका १४:२७ 24हाइपानु जाइ ताइको जिबन जोगाइलि इछा पाखे, वा इङको गुमाइपावा। कालाउबुङ जाइ काङको भाअ्सिङ ताइको जिबन गुमाइपावा, वा इङको बान्चिपावा।#मत्ति १०:३९; लुका १७:३३; युहन्ना १२:२५ 25हाइदोनु द्याङ गोताङ दुनियाहेङ दोङ निङलाउ बुङ, ताइको हाङसाहेङ गुमाइ पानु वासेहेङ हाइ लाभ ज्यावा? 26हाइदोनु जाइ द्याङ काङको मिङ रो काङको बिद्यादोसा लेदेरावा, का द्याङको चान बुङ काङको रो परमेस्वर आबाको कालाउ पुनित स्वरगदुतगेलाइको पारताप चुमतेङ लोलाउ वासेहेङ ताइको द्याङ दोअ्लि लेदेराङका। 27कालाउ जातिङकोङ का नेलाइहेङ दोअ्खा, इता जाअ्कालाइता आधिमि स्वरगको सारभि मातिम्पाधाउ मास्यावा।”
इसुको रुप फेरेन्हाका
(मत्ति १७:१-८; मरकुस ९:२-८)
28इदोइ काथा दोअ्का एआथार न्हुअ्सो पत्रुस, युहन्ना रो याकुबहेङ चुमतेङ इसु आरदाङता पारथाना पालि हानिहि। 29वा पारथाना पातेङहिका पहरता वाको र्हाइको रुप भेनाङ जेङहि रो वाको धाबा बुङ जेलाल्हातेङ चिल्काहि। 30कालाउ एकासि न्हेमि द्याङ इन्ता देखाल पितेङ इसुदोफा बातमारेलि तेङहि। इङको न्हेमि मोसा रो एलिया परमेस्वर पाहासो धुइका हिघाखे। 31कालाउ इङको न्हेमि स्वरगको पारतापता जेलाल्हातेङ यरुसलेमता इसु सिलिगोइका बारेता वाकोदोफा काथा पादोङघाहि।
32इङको पहर पत्रुस रो वाको सानाइतिगेलाइ माजासो निन्धातेङ हिघाखे। नाङघालाउ एम्बालाइ स्वरगको पारतापता फाइसालाम्काता इसुहेङ इङको बो न्हेमिदोफा जाअ्तेङ काथापातेङ हिका तिङहि। 33इङको न्हेमि इसुदोफा बिदा जेङलि तोम्लाउ पत्रुस दोअ्हि, “मास्टर, केलाइ बुङ इता हिलि ते रेम्का जेङधाङ। केलाइ इता सुम्लोङ हिका थामे बान्हाइने। एलोङ नासेहेङ, एलोङ मोसाहेङ रो एलोङ एलियाहेङ!” कालाउ पत्रुस हाइ दोअ्घाखे ताइमिदोङ मागिघाखे।
34पत्रुस धुइकाताङ पालाउ बादेल लोतेङ ओबालाइहेङ थुम्हि कालाउ चात्यागेलाइ थिहि। 35ओदोङघरि बादेललिअ्तासो इस्का गाला लोहि, “या काङको साल्का काङको चान, याको दोअ्का नेलाइ साअ्सु।”#यासाइया ४२:१; मत्ति ३:१७; १२:१८; मरकुस १:११; लुका ३:२२; २ पत्रुस १:१७-१८ 36इङको गाला रोकिन्हाकान्हुअ्सो चात्यागेलाइ इसुहेङ खिनिङ तिङहि। इङको पहर चात्यागेलाइ ताइमिको तिङका काथा हासुहेङ बुङ मादोअ्हि।
इसु मासान खोअ्का वाजानहेङ एल्पाका
(मत्ति १७:१४-१८; मरकुस ९:१४-२७)
37जुम्निदिना इसु चात्यागेलाइदोसाङ आरदाङसो खुअ्लाउ हेन्जाङ द्याङगेलाइ वासेहेङ भेटेलि लोहि। 38एम्बालाइता एअ्मि र्हिकाइतेङ दोअ्हि, “मास्टर, दाया पातेङ काङको चानहेङ खाङपि हाइपानु या काङको एलोङखिनिङ चान हिघाहि! 39वासेहेङ मासान घुरिघुरि थुम्खे रो वा र्हिकाइतेसाङ झाकालोङखे। नुइसो फिजाना ओल्हिपातेङ लोताइखे कालाउ चोट पटक मालागिपाधाउ मासान वासेहेङ मामा लाअ्खे। 40का नाङको चात्यागेलाइहेङ मासान ओल्हिपापिसु दोअ्तेङ बिम्ति पाघा, कालाउ एम्बालाइ मादोहि।” 41इसु दोअ्हि, “हिसिका खान्धुर मान्थुका रो दुरजन द्याङगेलाइ हिसुन्हा! नेलाइदोफा का हेथे दिनाथिकापा हिलि? का नेलाइहेङ हेथे सहिलि?” इङकोन्हुअ्सो इसु वाजानको आबाहेङ दोअ्हि, “नाङको चानहेङ चुमतेङ लो!” 42कालाउ आबा ताइको चानहेङ चुमाकाताङ पालाउ मासान वासेहेङ लोङपातेङ लादारबादार पाहि। कालाउ इसु मासानहेङ हाकाराइतेसाङ वाजान एल्हि कालाउ वाको आबाहेङ जिमा पिहि। 43परमेस्वरको इस्का बारका सरबङ तिङतेङ झाराङ द्याङगेलाइ भारभुसाइहि।
इसु ताइको सिका बारेता दोअ्का
(मत्ति १७:२२-२३; मरकुस ९:३०-३२)
44द्याङगेलाइ वाको काम तिङतेङ भारभुसाइका पहरता इसु चात्यागेलाइहेङ दोअ्हि, “का हाइ दोअ्लि भोखा इङको काथा रेम्फा हिङसु कालाउ मनता ताअ्सु। हाइपानु का द्याङको चानहेङ रिम्तेङ द्याङगेलाइको खुरता प्यावा।” 45कालाउ इसु हाइ दोअ्लि भोघाहि एम्बालाइ गिलि मादोहि। हाइदोनु इङको काथा ओबालाइसो म्होअ्तेङ ताअ्का हिघाहि। कालाउ हाइ दोअ्का दोअ्तेङ एम्बालाइ इसुहेङ हिअ्लि आट बुङ मापाहि।
झाराङखान्तेङ बारका हासु
(मत्ति १८:१-५; मरकुस ९:३३-४०)
46इङको पहर तेन्हे चात्यागेलाइको माझाता हासु झाराङखान्तेङ बारका दोअ्का काथा जेङहि।#लुका २२:२४ 47इसु एम्बालाइको मन गितेङ एलोङ जामालहेङ ताइको भेरपा चुमातेङ जाअ्पाहि। 48कालाउ एम्बालाइहेङ दोअ्हि, “काङको मिङता इस्का जामालहेङ र्हुकालाइ कासेहेङ र्हुकावा। कालाउ कासेहेङ र्हुकालाइ कासेहेङ दिङगिल्का आबाहेङ र्हुकावा। नेलाइता जाइ झाराङखान्तेङ आतुइका हिसुन्हा; वादोङ झाराङखान्तेङ बारका जेनावा।”#मत्ति १०:४०; लुका १०:१६; युहन्ना १३:२०
49युहन्ना दोअ्हि, “मास्टर, केलाइ एअ्मि द्याङ नाङको मिङता मासानगेलाइ ओल्हिपातेङहिका तिङन्हाहि। कालाउ केलाइ वासेहेङ एसा पालि मापिन्हाहि। हाइदोनु वा केलाइको हुलको द्याङ मान्थुघाहि।” 50इसु एम्बालाइहेङ दोअ्हि, “वासेहेङ मारोकेसु, जाइ नेलाइको खिलाप मापाखे एम्बालाइ नेलाइकोङ पाहाको गिसु।”
सामरिगेलाइ इसुको खिलाप पाका
51इसुको स्वरगभारि हानिका पहर जेङलि तोम्लाउ वा यरुसलेमभारि हानिलि भाअ्सिङ मन पाहि। 52कालाउ इसु लाम्फादोङ गोताङ काथा त्यार पाकाताङ पासु दोअ्तेङ आधे द्याङगेलाइहेङ सामरिया माउजाको एलोङ देराता दिङगिल्हि। 53कालाउ इसु यरुसलेम हानिदोङखे दोअ्का हिङतेङ हासु बुङ वाको स्वागत मापाहि। 54इदोइ तिन्तेङ वाको चात्यागेलाइ याकुब रो युहन्ना इसुहेङ दोअ्हि, “प्रभु, स्वरगसो मे हुल्पातेङ केलाइ एम्बालाइहेङ नास पाइने दोअ्का ना इछा पाखेना?”#२ राजा १:९-१६
55कालाउ इसु घुरितेङ एम्बालाइहेङ चेरतेङ दोअ्हि, “नेलाइदोफा हिसिका हाङसा हि दोअ्तेङ मागिसुखेना।” 56कालाउ इङकोन्हुअ्सो इसु चात्यागेलाइहेङ चुमपुतेङ भेनेङ देराता हानिहि।
इसुको चात्यातागेलाइता हिलिगोइका गुन
(मत्ति ८:१९-२२)
57इसु रो वाको चात्यागेलाइ हानिकाताङ पालाउ एअ्मि द्याङ लोतेङ वासेहेङ दोअ्हि, “मास्टर, ना हिसो हानिलाउ बुङ का नासेहेङ पितायाङका।” 58इसु वासेहेङ जाबाफ पिहि, “स्याइलेगेलाइको म्होअ्का घारा हिखे। जिह्याँ जुइलेङको बुङ भासागेलाइ हिखे। कालाउ का द्याङको चानको पुरिङ धाल्का थामेथिकापा बुङ मान्थु।”
59कालाउ आरोङ एअ्मि द्याङहेङ इसु दोअ्हि, “कासेहेङ पिताइ!” कालाउ वा दोअ्हि, “मास्टर, लाम्फा हानितेङ काङको सिका आबाहेङ लिअ्लि हानिलि पि।” 60वासेहेङ इसु दोअ्हि, “सिकालाइहेङ सिकालाइ दोङ लिअ्ताको। नाचाहिँ हानितेङ स्वरगको सारभिको पारचार पा।”
61आरोङ भेनेङ एअ्मि द्याङ लोतेङ इसुहेङ दोअ्हि, “मास्टर, का नाङको चात्या जेङलि खाङखा। कासेहेङ लाम्फा साअ्सो बिदा र्हेतेङ लोलि पि।”#१ राजा १९:२० 62वासेहेङ इसु दोअ्हि, “हाले चोइलाउ न्हुअ्पाहा घुरितेङ खाङतेङ हिका द्याङ स्वरगको सारभिको सेवा पालिको भाअ्सिङ योग्यको माज्यावा।”
Currently Selected:
लुका 9: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
