लुका 7
7
रोमि कप्तानको खान्धुर
(मत्ति ८:५-१३)
1इसु द्याङगेलाइहेङ धिरपालि दोतेङ कफरनहुमभारि हानिहि। 2इन्ता रोमि काप्तानको ओसाभारापाङ दायाका कामत्या मासाअ्धेतेङ सिलि तोम्का हिघाहि। 3इसुको बारेता हिङतेङ इङको काप्तान इसु लोतेङ काङको कामत्याहेङ एल्पाप्याको दोअ्तेङ बिम्ति पालि यहुदि आगुवागेलाइहेङ वाकोता दिङगिल्हि। 4इङको आगुवागेलाइ इसुकोता लोतेङ बिम्ति पातेङ दोअ्हि, “मास्टर, रोमि कप्तानको कामत्याहेङ एल्पापिनु रेम्का जेन्धावा। 5हाइदोनु वा केलाइको जात्याहेङ माया पातेङ केलाइको भाअ्सिङ एलोङ कचहरिसाअ् बुङ धामपिका हि।” 6इस्का बिम्ति हिङतेङ इसु एम्बालाइदोफाङ हानिहि। साअ् भेरपा थुकालिलोलाउ काप्तान ताइको सानाइतिगेलाइहेङ इसुकोता इस्का बानाल पिगिल्हि, “प्रभु, दुख मापा, नासेहेङ ताइको साअ्लिअ्ता चुमपुलि सोबाइका का मान्थुघा। 7का ताइमिङ बुङ नाङको भेरपा लोलि सोबाइका मान्थुघा। कालाउ ना हुकुम खिनिङ पि, काङको कामत्या एलावा। 8का ताइमि बुङ बारका हाकिमगेलाइको आधिनता हिखा। काङको आधिनता बुङ पलटन हिखे। एअ्मिहेङ ‘हाने’ दोअ्खा वा हानिखे, भेनाङहेङ ‘लोउ’ दोअ्खा वा लोखे। कालाउ ताइको कामत्याहेङ बुङ ‘एसा पा’ दोअ्खा वा एन्साङ पाखे।”
9इदोइ काथा हिङतेङ इसु भारभुसाइहि कालाउ ताइमिहेङ पिताइका द्याङगेलाइको हुलभारि खाङतेङ वा दोअ्हि, “का नेलाइहेङ दोअ्ताङका, इङकोझोको बारका खान्धुर पाका द्याङते का इस्राएलिगेलाइको माझाता बुङ निङनाङ मान्थुघा।” 10इङको बानाल चुमाका सानाइतिगेलाइ साअ् घुरिलाउ इङको कामत्या ते एल्तेङ हिघाहि।
इसु रान्दिको चानहेङ सिन्हुपाका
11एअ्नि न्हेनिन्हुअ्सो इसु नाइन दोअ्का पुरता हानिहि। वाको चात्यागेलाइ रो हेन्जाङ द्याङगेलाइ बुङ वाकोदोसा हानिहि। 12इसु पुरको द्वारता थुकालिलोलाउ एअ्मि सिकाद्याहेङ फातेङ मालामिगेलाइ हानिघाखे। सिका द्याङते एअ्मि रान्दिको एलोङखिनिङ चान हिघाहि। इङको रान्दिदोफा मालामि हानिका पुरको हेन्जाङ द्याङगेलाइ बुङ हिघाखे। 13रान्दिको तु: तिङलाउ इसुको मनता दाया पोङघातेङ वा रान्दिहेङ दोअ्हि, “माखार!” 14कालाउ आगाता हानितेङ इसु सिकाको मान्चाउलि चाःतेङ रोकिलाउ मालामिगेलाइ जाअ्हि। कालाउ इसु सिकाहेङ दोअ्हि, “ओइ वाजान का नासेहेङ हुकुम पिखा ल्हो!” 15उदोङघरि सिका वाजान ल्होतेङ योम्हि रो काथा पालि तेङहि। इसु इङको वाजानहेङ वाको आमाइहेङ पिहि।
16परमेस्वरको इस्का बारका सरबङ तिङतेङ झाराङ भारभुसाइतेङ वाकोदोफा थिहि कालाउ परमेस्वरको बाखिनतेङ दोअ्हि, “एअ्मि बारका परमेस्वर पाहासो धुइका केलाइको माझाता देखाल पिका हि। परमेस्वर ताइको जनगेलाइहेङ बान्चिपालि लोका हि।” 17इसु इङको वाजानहेङ बान्चिपाका बानाल यहुदिया कालाउ इङको चारबितिङको गोताङ माउजागेलाइता फाइलिहि।
युहन्ना इसुको बारेता काथा गिलि दिङगिल्का
(मत्ति ११:२-१९)
18चिभुअ्लि पिका युहन्नाको चात्यागेलाइ बुङ इसुको पाका इदोइ गोताङ काथा वासेहेङ हिम्पाहि। कालाउ युहन्ना ताइको न्हेमि चात्यागेलाइहेङ काइतेङ, 19प्रभु इसुकोता एसा दोअ्तेङ हिअ्लि दिङगिल्हि, “केलाइको आस पाका छुटकारा पिका ख्रिस्ट नादोङ हिना बे केलाइ भेनाङको दामा खानाङ?” 20कालाउ एम्बालाइ इसुकोता लोतेङ हिअ्हि, “केलाइको आस पाका छुटकारा पिका ख्रिस्ट ‘नादोङ हिना बे, केलाइ भेनाङको दामा खानाङ? इदोइ काथा चिभुअ्लि पिका युहन्ना केलाइहेङ हिअ्लि दिङगिल्हि।’”
21इङकोङ बेला इसु हेन्जा द्याङगेलाको रोग बिमारगेलाइ रो मासान खोअ्कालाइहेङ एल्पाहि। हेन्जा मिँ मातिङकालाइ बुङ तिङलि दोअ्का जेङहि। 22इसु युहन्नाको चात्यागेलाइहेङ दोअ्हि, “नेलाइ जेदोङ तिङका रो हिङका हिसुन्हा हानितेङ इङकोङ काथा दोङ युहन्नाहेङ दोअ्पिसु: मिँ मातिङकालाइ तिङलि दोहि, तेलि मादोकालाइ तेलि दोहि, रोग्यागेलाइ सुदो जेङदोङखे, न्हातोङ माहिङकालाइ हिङलि दोहि, सिकालाइ सिन्हुदोङखे रो पिर गरिबगेलाइ परमेस्वरको रेम्काबानाल हिङलि निङदोङखे।#यासाइया ३५:५-६; यासाइया ६१:१ 23काङको बारेता साङखा मापाका द्याङ जातिङको सहसाम्पा निनावा!”
24युहन्नाको चात्यागेलाइ हानिकान्हुसो इसु द्याङगेलाइहेङ युहन्नाको बारेता दोअ्हि, “नेलाइ उदादाङका थामेता हाइ खाङलि हानिका हिघासुन्हा? हाइ भेरमाता हेङगालाइन्हाका नालेहेङ? 25हाइ रेरेम्का धाबा लागाइका द्याङगेलाइहेङ? रेरेम्का धाबा लागाइका द्याङते राजमहलता खिनिङ हिखे। 26जातिङको दोअ्सु, नेलाइ हाइ खाङलि हानिका हिघासुन्हा? हाइ परमेस्वर पाहासो धुइकाहेङ? एइ, जातिङको दोअ्नुते नेलाइ परमेस्वर पाहासो धुइकाखान्तेङ बुङ बारका एअ्मिहेङ तिङका हिसुन्हा। 27हाइदोनु युहन्नाकोङ बारेता धरमकिताबता परमेस्वर एसा दोअ्का हि:
‘खाङ, ना खान्तेङ लाम्फा का काङको स्वरगदुतगेलाइहेङ दिङगिल्दोङखा।
कालाउ वा नाङको दामा त्यार पाप्यावा।’ #
मलाकि ३:१
28 “का नेलाइहेङ दोअ्खा, बेबाल द्याङसो जेङकालाइ युहन्नाखान्तेङ बारका द्याङ हासु मान्थु। कालाउ स्वरगको सारभिता जाइ झाराङखान्तेङ म्हुइका हि, वा युहन्नाखान्तेङ बुङ बारका जेनावा।” 29कालाउ युहन्नाको काथा हिङतेङ द्याङगेलाइ रो पोत ल्होपाकालाइ परमेस्वरको हुकुम ठिक हि दोअ्तेङ युहन्नासो चिभुअ्लि र्हुहि।#मत्ति २१:३२; लुका ३:१२ 30कालाउ फरिसिगेलाइ रो धरम मास्टरगेलाइ ओबालाइको भाअ्सिङ परमेस्वरको योजनाहेङ काम मालागिका दोअ्तेङ युहन्नासो चिभुअ्लि मार्हुहि। 31इसु दोअ्हि, “इन्सिका द्याङगेलाइहेङ का हासुदोफा दाज्याङका? एम्बालाइ हिसिका हि? 32एम्बालाइ ते हातेता योम्तेङ एसापा काथा पाका जामालाइ भाइका हि। एम्बालाइ ताताइमिता एसापा दोअ्खे:
‘केलाइ नेलाइको भाअ्सिङ बासुलि धुइपापिलाउ बुङ नेलाइ मान्हासुन्हा।
केलाइ बिलाप पातेङ ले लेलाउबुङ नेलाइ माखारसुन्हा।’
33 “आङगुरको निघार बुङ माआम्का, उम बुङ माचाका युहन्ना लोहि। नेलाइ वासेहेङ ‘मासान खोअ्का द्याङ’ दोअ्सुन्हा। 34द्याङको चान चातेङ आम्तेङ लोहि कालाउ वासेहेङ नेलाइ ‘इङको दुअ्का, जाँर्ह्या, पोत ल्होपाकालाइ रो पापिगेलाइको सानाइति’ दोअ्तेङ दुसिखेना। 35परमेस्वरको आकिल निङकालाइ दोङ आकिलहेङ धरमाति ठार्हाइखे।”
इसु पापि बेबालहेङ माफ पिका
36सिमोन दोअ्का एअ्मि फरिसि इसुहेङ दिलिमा उम चालि काइपुहि। कालाउ इसु इङको फरिसिको साअ्ता हानितेङ उम चालि योम्हि। 37इङको पुरको एअ्मि पापि बेबाल इसु फरिसिको साअ्ता चालि लोका हि दोअ्का हिङहि। वा एलोङ रेम्का सिङमरमरको सिसिता जाङका आतर चुमतेङ इङको साअ्ता थुकालिलोहि।#मत्ति २६:७; मरकुस १४:३; युहन्ना १२:३ 38वा न्हुअ्पाहासो लोतेङ इसुको खोकोइ भेरपा जाअ्तेङ खारलि तेङहि रो मिसिय्हाँसो ह्याअ्का मिँतिसो इसुको खोकोइ झापिहि। कालाउ वाको खोकोइ ताइको पुसिङहोइ योअ्तेङ चुमाइतेङ आतर होपिहि।
39इदोइ तिङतेङ इसुहेङ चालि काइपुका फरिसि मन मन्ताङ दोअ्हि, “इसु जातिङको परमेस्वर पाहासो धुइका हिनुते वासेहेङ साइका बेबाल हिसिका पापि बेबाल हिघाहि दोअ्तेङ गिधावा।” 40एन्सालाउ इसु इङको फरिसिहेङ दोअ्हि, “सिमोन, नासेहेङ का एलोङ काथा दोअ्लिगोइका हि।” वा दोअ्हि, “मास्टर, हुकुम ज्याको।” 41इसु दोअ्हि, “हिङ, एअ्मि साहुको न्हेमि आसामि हिघाखे। एअ्मि नासाइ रुपाको टाका कालाउ भेनेङ न्हेकुरिते रुपाको टाका रिन र्हुका हिघाखे। 42एम्बालाइ हासु बुङ र्हुका रिन तिरिलि मादोनाङसिङ साहु न्हेमिकोङ रिन मिनाहा पापिहि। एला दोअ्, हासु साहुहेङ हेन्जा माया पाङ?”
43सिमोन दोअ्हि, “काङको बिचारता हेन्जा रिन मिन्हा निङका।” इसु दोअ्हि, “ना ठिकदोङ दोअ्न्हा।” 44वा बेबालभारि घुरितेङ सिमोनहेङ दोअ्हि, “यासेहेङ खाङ! का नाङको साअ्ता लोघा, ना कासेहेङ खोकोइ झाका चिसुदाङ मापिन्हा। कालाउ याते काङको खोकोइ मिँतिहोइ झापितेङ ताइकोङ पुसिङहोइ योअ्पिहि। 45ना कासेहेङ चुमाइतेङ स्वागत मापान्हा। कालाउ याते लोकासोङ काङको खोकोइता चुमाइदोङखे। 46ना काङको पुसिङता चुइति बुङ मालागाइपिन्हा। कालाउ याते काङको खोकोइता जाङका आतर लागाइपिहि। 47या हाइपालि एसा पाहि दोअ्तेङ का नासेहेङ दोअ्खा, याको हेन्जाङ पापिगेलाइ माफ जेङलिदोहोइ। इङकोभाअ्सिङ या कासेहेङ हेन्जा माया तिम्पाहि। आतुइसा पाप माफ जेङका द्याङ आतुइसा माया पाखे।” 48कालाउ इसु इङको बेबालहेङ दोअ्हि, “नाङको पाप माफ जेङलिदोहोइ।” 49इन्ता चालि योम्का द्याङगेलाइ ताताइमिता दोअ्लि तेङहि, “पाप माफ पाका या हासु?” 50इसु इङको बेबालहेङ दोअ्हि, “नाङको खान्धुरसो नासेहेङ बान्चिपाहि। एला सान्तिसो हाने।”
Currently Selected:
लुका 7: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
