लुका 2
2
इसुको जोलोम
(मत्ति १:१८-२५)
1नाङको पहरता रोमि माहाराजा आगस्टस सारभिको गोताङ द्याङगेलाइको मिङ लेखितेङ दारता पालिगोयाङ दोअ्तेङ हुकुम पाहि। 2एसापा दारता पालिगोयाङ दोअ्तेङ हुकुम लोका या लाम्फोरति हिघाहि। एन्सालाउ कुरेनियस सिरिया माउजाको बारका हाकिम हिघाखे। 3माहाराजाको हुकुम मानितेङ झाराङ ताताइको देरा रो पुरता मिङ दारता पालि हानिहि।
4इङको पहरता योसेफ गालिल माउजाको नासरत दोअ्का पुरता हिघाखे। वा राजा दाउदको खालको सान्तान हिघाखे। इङकोभाअ्सिङ वा ताइको आजुखाल दाउदको पुर यहुदियाको बेथलेहेमता मिङ लेखिपालि हानिहि। 5योसेफदोफा मरियमको बिहु पाका काथा पाक्का जेङनाङसिङ वा मरियमहेङ बुङ दोसाङ चुमपुहि। इङको पहर मरियम गान्धितेअ्का हिघाखे। 6एम्बालाइ बेथलेहेमता हिलाउ दोङ मरियमको जामाल जेङका पहर जेङहि 7रो वा लाङ चान जोन्माइहि रो धाबाता लुन्दाइतेङ पिसालता हिका दोङगोता जिम्पाहि हाइदोनु ओबालाइ पाउवाता हिलि हिता बुङ थामे मानिङहि।
स्वरगदुत रो भेरा घोकालाइ
8इङको न्हिसिङता बेथलेहेम पुर भेरपाङ चाउरता घोकालाइ ताइको भेरा र्हुमतेङ हिघाखे। 9प्रभुको एअ्मि स्वरगदुत एम्बालाइकोता देखाल पिहि रो प्रभुको जोल्का एम्बालाइको कोरबितिङ चिलकाहि, कालाउ एम्बालाइ हेन्जाङ थिहि। 10कालाउबुङ स्वरगदुत एम्बालाइहेङ दोअ्हि, “माथिसु, हाइदोनु का गोताङ द्याङगेलाइहेङ बेराजा पिका रेम्काबानाल चुमतेङ नेलाइको आगाता लोका हिघा। 11हिङसु, दाउद जोन्मिका पुरता नानि छुटकारा पिका ख्रिस्टको जोलोम जेङका हि। वादोङ प्रभु जेनावा। 12नेलाइ जामालहेङ धाबाता लुन्दाइतेङ दोङगोता जिम्पातेङ ताअ्का निङस्वाना। इदोइसोङ नेलाइ वासेहेङ नालस्वाना।” 13कालाउ एकासि इङको स्वरगदुतगेलाइ इन्ता देखाल पिहि, कालाउ परमेस्वरको बाखिन पातेङ इस्का ले लेलि तेङहि:
14“झाराङखान्तेङ र्हुता स्वरगता हिका परमेस्वरको पारताप ज्याको,
कालाउ सुमिङता जाइ द्याङगेलाइदोफा वा लेङचाका हि, एम्बालाइहेङ सान्ति जेङतेङह्याको।”
15स्वरगदुतगेलाइ स्वरगभारि घुरिकान्हुसो घोकालाइ ताताइमिताङ दोअ्हि, “ते, प्रभु परमेस्वर केलाइहेङ दोअ्पिका काथा बेथलेहेमता खाङलि हानाइने” दोअ्तेङ 16एम्बालाइ धाअ्पुतेङ हानितेङ खाङलाउ इन्ता एम्बालाइ मरियम, योसेफ रो दोङगोता जिम्पातेङ ताअ्का जामालहेङ तिङहि। 17घोकालाइ जामालको बारेता स्वरगदुतको दोअ्का काथा झाराङहेङ हिम्पाहि। 18इदोइ काथागेलाइ हिङकालाइ झाराङ भारभुसाइहि। 19कालाउबुङ मरियमचाहिँ इदोइ गोताङ काथा लिअ्ताको मनसो बिचार पातेङ मन्ताङ ताअ्हि। 20भेरा घोकालाइ स्वरगदुतको दोअ्का भाइपाङ हिङलि रो तिङलि निङलाउ परमेस्वरको पारताप रो बाखिन पातेङ एम्बालाइ घुरितेङ हानिहि।
जामालको मिङ इसु ताअ्पिहि
21येअ्निको दिनाता जामालहेङ इस्राएलको न्याम आन्सार पाका खाताना पालाउ वाको मिङ इसु ताअ्पिहि। जाइ मिङचाहिँ वा आमाइको कोखेता हिकाखान्तेङ लाम्फादोङ स्वरगदुत ताअ्लि दोअ्का हिघाहि।#लेबि १२:३; लुका १:३१
थानता इसुहेङ तिम्पालि चुमपुहि
22मोसाको पिका न्याम आन्सार जेलाउ वाको सुतिसिअ्का दिना पुरा जेङहि कालाउ वाको आबा आमाइ वासेहेङ यरुसलेमको थानता परमेस्वरको आगाता चुमाहि। 23हाइदोनु प्रभु परमेस्वरको न्यामता लेखिका हि, “झाराङ लाङ चान परमेस्वरको भाअ्सिङ पुनित जेनावा।”#दामालाअ्का १३:२,१२ 24प्रभु परमेस्वरको न्यामता दोअ्का भाइपा एअ्जोर कुरजा माकुनु एअ्जोर पारेउको चान बुङ भोक पिलि चुमाहि।#लेबि १२:६-८
25इङको पहर सिमियोन दोअ्का द्याङ यरुसलेमता हिघाखे। वा धरम द्याङ हिघाखे रो परमेस्वरको भक्ति पाघाखे। वा इस्राएलिगेलाइहेङ बान्चिपाका द्याङको आस पातेङ दामा खाङघाखे। पुनित हाङसा वाकोदोफा हिघाहि। 26परमप्रभु परमेस्वरको दिङगिल्का छुटकारा पिका ख्रिस्टहेङ मातिम्पाधाउ ना मास्याना दोअ्तेङ पुनित हाङसा वासेहेङ लाम्फासोङ गिपाका हिघाहि। 27कालाउ पुनित हाङसाको हाउसा निङतेङ सिमियोन थानता हानिहि। इङकोघरि दोङ न्याम पुरा पालि मरियम रो योसेफ बुङ इसुहेङ चुमतेङ थानता थुकालिलोहि। 28सिमियोन जामालहेङ खुरता बाअ्तेङ परमेस्वरहेङ बाखिन्तेङ दोअ्हि,
29“प्रभु, ना ताइको केरा पुरा पाका हिना, एला ताइको बान्धाइहेङ सान्तिसो सिलि पि
30हाइदोनु ना दिङगिल्का छुटकारापिकाहेङ का ताइकोङ मिँसो तिङलि निङघा।
31ना वासेहेङ गोताङ जात्याको द्याङगेलाइ तिनाको दोअ्तेङ दिङगिल्का,
32वादोङ बोजात्याको द्याङगेलाइहेङ नाङको दामा तिम्पाका चोलका हिन्हा
रो वादोङ नाङको इस्राएलिगेलाइहेङ पारताप पिका जेनावा।”#यासाइया ४२:६; ४९:६; ५२:१०
33जामालको बारेता सिमियोनको दोअ्का काथा हिङतेङ वाको आमाइ रो आबा भारभुसाइहि। 34सिमियोन एम्बालाइहेङ सहसाम्पा पितेङ जामालको आमाइ मरियमहेङ दोअ्हि, “हिङ, इस्राएलता हेन्जाङ द्याङगेलाइको मुअ्काको रो उदारको चिनो ज्याको दोअ्तेङ परमेस्वर नाङको जामालहेङ दोङ साल्का हि। वा परमेस्वरको तिम्पिका चिनो जेनावा। जाइहेङ हेन्जाङ बिरोध पातेङ ताइको कोन्धाङको बिचारगेलाइ तिम्पावा। 35कालाउ नाङको कोन्धाङ सुइसुइका कातिहोइ बान्हाका भाइपाङ मारेम्फाङ तु:कावा।”
36थानता हन्ना दोअ्का एअ्मि बेराङ परमेस्वर पाहासो धुइका हिघाखे। वा आसेर खालको फनुएलको चामिन्दि हिघाखे। बिहु जेङका न्हिअ् बाअ्सारन्हुअ्सो दोङ वा रान्दि जेङका हिघाखे। 37कालाउ वा द्याकुरिद्या बाअ्सार जेङका हिघाखे। वा थान मालाअ्सिङ न्हिसिङनितिम म्हितुपाङ हितेङ रो पारथाना पातेङ परमेस्वरहेङ पुजिघाखे। 38वा बुङ मरियम रो योसेफको भेरपा लोतेङ परमेस्वरहेङ च्याबास पिहि। कालाउ यरुसलेमको उदारको दामा र्हुम्कालाइहेङ इसुको बारेता दोअ्पिहि।
39प्रभु परमेस्वरको न्यामता दोअ्का आन्सार पालिगोइका गोताङ काम पालि दोतेङ योसेफ रो मरियम जामाल इसुहेङ चुमपुतेङ गालिलको ताइको पुर नासरतता घुरिहि।#मत्ति २:२३ 40कालाउ जामाल इसु बारकाताङ बल, बुद्धि रो आकिलसो पोङघान्हातेङ हानिहि। हाइदोनु परमेस्वरको सहसाम्पा वाकोर्हुता हिघाहि।
जामाल इसु थानता
41इसुको आबा आमाइ बाअ्सारकिअ्पाङ लाअ्पिका पारबा मानिलि यरुसलेमता हानिघाखे।#१२:१-२७; न्याम १६:१-८ 42इसु तेन्हे बाअ्सारको हिलाउ ओबालाइ वासेहेङ दोसाङ चुमतेङ जेलाउभाइपा पारबा मानिलि यरुसलेम हानिहि। 43पारबा मानिलिदोकान्हुअ्सो एम्बालाइ घुरिलाउ जामाल इसु यरुसलेमताङ हिन्दिहि। कालाउ वा लाअ्धिन्हाका वाको आबा आमाइहेङ फोमदोङ माजेङहि। 44इसु ताइ द्याङ रो बो सानाइतिगेलाइ दोफाङ हि वाला दोअ्तेङ एम्बालाइ लिअ्पाङ तेहि। बेला दुबिकान्हुसो खिनिङ वाको सानाइति भायागेलाइको माझाता वासेहेङ भोलि तेङहि। 45चानहेङ हिसो बुङ मानिङलाउ इङको न्हेमि जामाल इसुहेङ भोलि आरोङ यरुसलेमभारि घुरिहि। 46भोतेङ हानिलाउ सुम्निता खिनिङ ओबालाइ इसुहेङ बोलधाका थानता दुसुहि। वा इङको पहर धरम मास्टरगेलाइदोफा योम्तेङ एम्बालाइको काथा हिङतेङ रो हिअ्तेङ हिघाहि। 47इन्ता जोम्का द्याङगेलाइ इसुको आकिल तिङतेङ रो वाको दोअ्का काथा हिङतेङ झाराङ भारभुसाइहि। 48चानहेङ इन्ता तिङलाउ वाको आमाइ आबा भारभुसाइतेङ मरियम वासेहेङ हिअ्हि, “आबाउ ना केलाइहेङ इदोइ हाइ पाखेना? खाङ, नाङको आबा रो का आतितेङ नासेहेङ भोलिलोन्हिङ।” 49इसु दोअ्हि, “नेलाइ कासेहेङ हाइपालि भोसुखेना? का ताइको आबाको साअ्ता हिलिगोयाङ दोअ्तेङ हाइ नेलाइ मागिसुन्हा?” 50कालाउबुङ वाको दोअ्का काथा मरियम रो योसेफ न्हेमिदोङ बुझिलिङ मादोहि। 51कालाउ जामाल इसु ओबालाइदोफाङ नासरतता घुरितेङ आबा आमाइको दोअ्का मानितेङ हि। कालाउ वाको आमाइ इदोइ गोताङ काथागेलाइ मानिल्सिङ ताइको मनताङ ताअ्हि। 52इसु परमेस्वर रो द्याङ न्हेमिङको निगाहा निङतेङ जिउता रो आकिलता बारातेङ हानिहि।#१ सामुएल २:२६; रेम्काले ३:४
Currently Selected:
लुका 2: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
