लुका 1
1
लुका इसुको बारेता थियोफिलसहेङ लेखिका
1माननिय थियोफिलस, हेन्जाङ द्याङगेलाइ केलाइको माझाता घाटितेङ पोङघाका घाटानागेलाइको बायान लेखिका काम पाका हि। 2इङको घाटानागेलाइचाहि लाम्फासो दोङ ताइकोङ मिँसो तिङका रो याको बारेता रेम्काबानाल पारचार पाकालाइ दोअ्का हि। 3का बुङ इदोइ बारेता सुरुसो दोङ रेम्फा भोघा रो नासेहेङ इदोइ बारेता मिलिपातेङ लेखिलि रेम्का ज्याङ दोअ्तेङ लेखिदोङखा। 4इदोइ किताब पर्हितेङ नासेहेङ दोअ्का काथागेलाइ हेथे जातिङको हि दोअ्तेङ ना ग्याना।
चिभुअ्लि पिका युहन्नाको जोलोम
5यहुदियाको राजा हेरोदको पालाता जकरिया मिङ हिका एअ्मि धामि हिघाखे। वा आबिया दोअ्का धामि समुहको द्याङ हिघाखे। इङकोको बेअ् हारुन खालको धामिको चामिन्दि हिघाखे। वाको मिङ एलिसिबा हिघाहि।#१ इतिहास २४:१० 6इङको न्हेमि परमेस्वरको आगाता धरमाति हिघाखे। एम्बालाइ परमेस्वरको गोताङ हुकुम रो न्यामगेलाइ माबिराइसिङ मानिघाखे। 7कालाउबुङ एम्बालाइको चानचामिन्दि मान्थुघाखे, हाइदोनु एलिसिबा बान्जि हिघाखे। इङको न्हेमि हेन्जाइ बोइसा चाका हिघाखे।
8जेलाउ जकरिया परमेस्वरको आगाता ताइ हुलको पालाता धामि काम पादोङघाखे, 9कालाउ धामिको सेवाको रितआन्सार चिठा व्हाअ्लाउ परमप्रभुको थानलिअ्ता दुल्तेङ धुमाना जोलाइका काम जकरियाहेङ परेहि। 10धुमाना जोलाइका पहरता जोम्तेङ हिका द्याङगेलाइ बाहार पारथाना पादोङघाखे। 11परमप्रभुको एअ्मि स्वरगदुत धुमाना जोलाइका थामेको दाम्पाहा जाअ्तेङ हिका तिङहि। 12जकरिया वासेहेङ तिङतेङ थिद्वाहि रो थिहि। 13कालाउबुङ स्वरगदुत वासेहेङ दोअ्हि, “ओइ जकरिया माथि, परमेस्वर नाङको पारथाना हिङका हि। एला नाङको बेअ् एलिसिबा नाङको भाअ्सिङ एलोङ चान जेनावा रो ना इङकोको मिङ युहन्ना ताअ्पि। 14इङको पहर ना हेन्जाङ लेङचाना रो हेन्जाङ द्याङगेलाइ बुङ वाको जोलोमता लेङचावा। 15हाइदोनु वा परमप्रभुको आगाता बारका द्याङ जेनावा। वा आङगुरको निघार रो बो हिदिङ बुङ निघार हेअ्लाउ माआमावा। वा ताइको आमाइको कोखेसो दोङ पुनित हाङसासो पोङघान्हावा।#गान्देका ६:३ 16वा इस्राएलको खालगेलाइता हेन्जाङहेङ एम्बालाइको परमप्रभु परमेस्वरभारि घुरिपावा। 17वा हाङसा रो सरबङता एलियाभाइपाङ जेङतेङ प्रभुखान्तेङ लाम्फा लोतेङ वाको दामा त्यार पावा। वा आबा रो चानचामिन्दिको माझाता मिलाप चुमावा। आटेरि पाकालाइहेङ परमेस्वरको हुकुम मानिका द्याङको आकिलभारि थोङगिलावा। एसापा वा प्रभुको जनहेङ वाकोङ भाअ्सिङ त्यार पाप्यावा।”#मलाकि ४:५-६
18कालाउ जकरिया स्वरगदुतहेङ दोअ्हि, “इदोइ का हेसापा गिलि? का वाराङ जेङहोइका रो काङको बेअ्को बोइसा बुङ घाटेलि दोहोइ।” 19स्वरगदुत वासेहेङ दोअ्हि, “का गब्रिएल, का परमेस्वरको आगाता जाअ्तेङहिखा। नादोफा काथा पालि रो इदोइ रेम्काबानाल हिम्पालि का दिङगिलन्हाका।#दानिएल ८:१६; ९:२१ 20जेदोङ दिनाथिकापा इदोइ काथा पोङघा माज्यावा, कालाउथिकापा ना लाता जेनाना रो धुइलि माद्वाना। हाइदोनु ना काङको बचनहेङ खान्धुर मापान्हा। जेदोङ बचन ताइको पहरता पोङघावा।”
21द्याङगेलाइ जकरियाहेङ र्हुम्तेङ हिघाखे रो थानता बेलोमनाङ भारभुसाइतेङ हिघाखे। 22जेलाउ जकरिया थानलिअ्तासो ओल्हिहि कालाउ वा द्याङगेलाइदोफा नुइधुइलि दोङ मादोहि। एन्साजेङलाउ एम्बालाइ थानलिअ्ता वा दरसन निङहि दोअ्का काथा गिहि। वा धुइलिङ मादोतेङ बाहार र्हुमतेङ हिका द्याङगेलाइहेङ खुरहोइ टिप्नि पाहि।
23जकरियाको पुजिका पाला दोकान्हुअ्सो वा ताइको साअ् हानिहि। 24इङकोन्हुअ्सो वाको बेअ् एलिसिबा गान्धितेअ्का जेङलाउ वा ना माहिनाथिकापा म्होअ्तेङ हि रो एसा दोअ्हि, 25“इदोइ काम प्रभु परमेस्वरदोङ काङको भाअ्सिङ पापिका। वा कासेहेङ दाया पातेङ कासेहेङ द्याङको दुसिकासो जोगाइहि।”
इसुको जोलोमको बारेता
26एलिसिबा गान्धितेअ्का तु माहिना जेङकान्हुअ्सो परमेस्वर गब्रिएल स्वरगदुतहेङ गालिलको नासरत दोअ्का पुरता दिङगिल्हि। 27वा एअ्मि बेजानकोता हानिहि, जाइहेङ दाउदको खाल योसेफ दोअ्का वाजानहेङ लाअ्पिका हिघाहि। इङको बेजानको मिङ मरियम हिघाहि।#मत्ति १:१८
28स्वरगदुत इङकोकोता हानितेङ दोअ्हि, “सेउपाखा, मरियम, परमेस्वर नासेहेङ हेन्जाङ दायाका हि। वा नादोफा हि।” 29कालाउबुङ मरियम इङको काथाहोइ आवाइहि रो इदोइ हिदोइ खाल्को सेउपाका दोअ्तेङ मनता फोम पालि तेङहि। 30कालाउ स्वरगदुत वासेहेङ दोअ्हि, “माथि, मरियम, हाइदोनु नासेहेङ परमेस्वर दाया पाका हि। 31एला खाङ, ना गान्धितेअ्का जेनाना रो एलोङ चान जोलोम जेनावा। ना वाको मिङ इसु ताअ्ताना।#मत्ति १:२१ 32वा बारका जेनावा रो वासेहेङ मुल परमेस्वरको चान दोअ्तावा। परमप्रभु परमेस्वर वासेहेङ वाकोङ आजुखाल दाउदको गादि प्यावा।#२ सामुएल ७:१२; यासाइया ९:७ 33वा याकुबको खालर्हुता दिनाङ राज पावा रो वाको सारभिको न्हुअ् माज्यावा।” 34मरियम स्वरगदुतहेङ दोअ्हि, “इदोइ हेसा जेङलि द्वावा, हाइदोनु का बेजान दोङ हिघा।” 35स्वरगदुत दोअ्हि, “पुनित हाङसा नाता ल्वावा रो बारका परमेस्वरको सरबङ नार्हुता पर्यावा। इदोइभाअ्सिङ जाइ जोलोम जेनावा, वा पुनित परमेस्वरको चान दोअ्तेङ दोअ्तावा। 36खाङ, नाङको ताइकोङ एलिसिबा बेराङ जेङलाउ बुङ न्हेजिउको जेङका हि। जाइ बान्जि हिघाहि कालाउबुङ वा न्हेजिउ जेङका तु माहिना जेङका हि। 37हाइपानु परमेस्वरको भाअ्सिङ हिदिङ काथा पालि मादोका मान्थु।”#सिरजाइ १८:१४ 38कालाउ मरियम दोअ्हि, “खाङ, का प्रभुको बान्धाइति, कासेहेङ नाङको दोअ्का भाइपा ज्याको।” इङकोन्हुअ्सो स्वरगदुत इन्तासो हानिहि।
मरियम एलिसिबाहेङ दुसुलि हानिका
39इङको दिनाता मरियम हातार पातेङ यहुदियाको एलोङ लाख भारिको देराता हानिहि। 40इन्ता वा जकरियाको साअ्ता हानितेङ एलिसिबाहेङ सेउपाहि। 41जेलाउ एलिसिबा मरियमको सेउपाका हिङहि कालाउ वाको कोखेता हिका जामाल तोङहि रो एलिसिबा पुनित हाङसासो पोङघान्हाहि।
42कालाउ वा बारका गालापातेङ दोअ्हि, “बेबालाइता ना सहसाम्पा निङका हिन्हा रो नाङको कोखेको जामाल हेथे च्याबासको हि। 43कार्हुता हेसापा निगाहा जेङहि, काङको प्रभुको आमाइ काङकोता लोहि। 44हाइदोनु नाङको सेउपाका हिङतेङ काङको कोखेता हिका जामाल लेङचातेङ तोङहि।
45“प्रभु नासेहेङ दोअ्का काथा पोङघातावा दोअ्तेङ खान्धुर पाका ना हेथे सहसाम्पा निङका हिना।”
मरियमको ले
46कालाउ मरियम दोअ्हि,
“का काङको कोन्धाङसो दोङ प्रभु परमेस्वरहेङ बाखिन्खा,
47रो काङको हाङसा काङको छुटकारा पिका परमेस्वरता लेङचाखे।
48हाइपानु वा काभाइका बान्धाइतिहेङ बुङ दायाहि। एला ओसो झाराङ द्याङगेलाइ कासेहेङ सहसाम्पा निङका दोअ्तावा।#१ सामुएल १:११
49वा जाइ सरबङ हिका, वा काङको भाअ्सिङ बारका काम पाका हि। वाको मिङ पुनित हि।
50वासेहेङ मान पाकालाइहेङ वा खाल खालथिकापा दायावा।
51वा ताइको सरबङ हिका खुरहोइ तुजुकगेलाइको बिचारहेङ चारामचुरुम पापिका हि।
52वा तुजुक राजागेलाइहेङ गादिसो हुल्पाका हि, कालाउबुङ नोइकालाइहेङ र्हुता तोल्हेका हि।#आय्युब ५:११; १२:१९
53वा म्हितुकालाइहेङ रेम्का चिज घाइपाङ पिका हि, कालाउबुङ धनिगेलाइहेङ खालि खुर दिङगिल्का हि।
54वा ताइको आजुखालदोफा पाका केरा पुरा पातेङ ताइको सेबक इस्राएलहेङ साघाइका हि,
55वा आब्राहाम रो वाको खालगेलाइहेङ दायालि हेअ्लाउ बुङ मानिल्हि।”#सिरजाइ १७:७; १ सामुएल २:१-१०
56इङको पहर मरियम सुम माहिना झोको एलिसिबादोफा हि रो इङकोन्हुअ्सो ताइको साअ् घुरिहि।
चिभुअ्लि पिका युहन्नाको जोलोम
57एला एलिसिबाको जामाल जेङका पहर लोहि रो वा एलोङ चान जोलोम जेङहि। 58परमप्रभु वार्हुता वाको बारका निगाहा तिङपाका हि दोअ्का हिङतेङ वाको भेरपा हिकालाइ रो ताइगेलाइ वाकोदोफा लेङचाहि। 59येअ्निता एम्बालाइ जामालहेङ खाताना पालि लोहि रो इङकोको मिङ वाको आबाको मिङभाइपाङ जकरिया ताअ्लि भोका हिघाखे।#लेबि १२:३ 60कालाउबुङ वाको आमाइ दोअ्हि, “माको, याको मिङ युहन्ना ताअ्लिगोयाङ।” 61एम्बालाइ एलिसिबाहेङ दोअ्हि, “नाङको ताइकोङता इस्का मिङ हिका हासुङ मान्थु।” 62कालाउ एम्बालाइ इङकोको आबाहेङ तिपनि पातेङ हिअ्हि, “ना याको मिङ हाइ ताअ्लि भोखेना?” 63जकरिया एलोङ लेखिका पाटि र्हेतेङ, “याको मिङ युहन्ना” दोअ्तेङ लेखिपिहि। एम्बालाइ झाराङ भारभुसाइहि। 64इदोङघरि जकरिया धुइलि दोअ्का जेङहि रो परमेस्वरको बाखिन पालि तेङहि। 65इदोइ गोताङ काथा तिङतेङ भेरपा हिकालाइ भारभुसाइतेङ परमेस्वरहेङ थिहि। इङकोन्हुअ्सो इदोइ काथागेलाइको नावाइ यहुदियाको गोताङ लाखको देराभारि चारचाराइहि। 66इस्का चारचाराइका हिङकालाइ झाराङ मनमनताङ दोअ्हि, “इदोइ जामाल न्हुअ्सो हिसिका ज्याङ वाला?” हाइदोनु परमेस्वरको सरबङ वाकोर्हुता परिका हिघाहि।
जकरिया परमेस्वरहेङ बाखिन्का
67जामालको आबा जकरिया पुनित हाङसासो पोङघातेङ धुइलि तेङहि,
68“इस्राएलिगेलाइको परमप्रभु, परमेस्वरको बाखिन्का ज्याको, हाइदोनु वा लोका हि रो ताइको द्याङगेलाइहेङ बान्चिपाका हि!
69वा केलाइको भाअ्सिङ ताइको बान्धाइ दाउदको खालता एअ्मि सरबङ हिका बान्चिपाका दिङगिल पिका हि,
70जेसापा वा लाम्फासो दोङ ताइको पुनित परमेस्वर पाहासो धुइकाको नुइसो धुइहि,
71केलाइको दुस्मनगेलाइसो रो केलाइहेङ दिगमिग पाकालाइ झाराङको खुरसो केलाइ भालाइ निनाको।
72वा केलाइको आजुखालगेलाइहेङ दाया तिम्पालि रो ताइको पुनित केरा फोम पालि,
73जेदोङ केरा वा केलाइको आजुखाल आब्राहामदोफा केरा चाका हिघाहि,
74केलाइ केलाइको दुस्मनको खुरसो लाअ्पावा
75कालाउ केलाइ माथिसिङ वाको आगाता उचित रो पुनितदोफा जिबनहिपा वाको सेवा पालि निनाको।
76ओइ काङको चान, ना बारका परमेस्वर पाहासो धुइका जेनाना, हाइपानु ना प्रभुको आगाआगा वाको दामा त्यार पालि हानाना।#मलाकि ३:१
77ना प्रभुको जनगेलाइहेङ पापसो माफ निङतेङ बान्चिस्वाना दोअ्का काथा धिरपाना।
78हाइदोनु केलाइको परमेस्वर दायाका हि। कालाउ वा स्वरगसो ख्रिस्टहेङ र्हिमाको ल्होका सानेभाइपाङ केलाइको माझाता दिङगिलप्यावा।
79कालाउ कितिकितिकाता हिका रो कालको नुइता परिलि तोमकालाइहेङ फाइसालाम्का प्यावा। कालाउ केलाइहेङ वा सान्तिको दामाता हिगिल्पावा।”#यासाइया ९:२
80कालाउ जामाल युहन्ना जिउता बारातेङ रो हाङसाता बोल्यातेङ हानिहि। कालाउ इस्राएलिगेलाइकोता मातिम्पाधाउ वा उदादाङका थामेता दोङ हि।
Currently Selected:
लुका 1: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
