लुका 3

चिभुअ्‌लि पिका युहन्‍नाको पारचार

(मत्‍ति ३:१-१२; मरकुस १:१-८; युहन्‍ना १:१९-२८)

1रोमि माहाराजा तिबेरिअस सिजरको राज पाका तेना बाअ्‌सार जेङका हिघाहि। इङको पहरता पन्‍तियस पिलातस यहुदिया माउजाको रोमि बारका हाकिम हिघाखे। रोमि माहाराजाको आधिनता हेरोद गालिल माउजाता राज पाघाखे। वाको ओने फिलिप इतुरिया रो त्‍रोखोनितिस माउजाता राज पाघाखे। कालाउ आबिलेने माउजाता लुसानियास दोअ्‌का द्‌याङ राज पाघाखे। 2इङको पहरको मुल धामिगेलाइ हन्‍नास रो काइयाफा हिघाखे। इदोङघरि उदादाङका थामेता जकरियाको चान युहन्‍नाता परमेस्‍वरको बचन लोहि। 3कालाउ युहन्‍ना यरदन झोराको चारपाहाङको माउजाता हानितेङ द्‌याङगेलाइहेङ एसापा पारचार पालि तेङहि, “नेलाइ पास्‍ताइसु रो चिभुअ्‌लि र्‍हुसु। कालाउ परमेस्‍वर नेलाइको पाका पाप माफ पाप्‍यावा।” 4एसापा यासाइया परमेस्‍वर पाहासो धुइकाको धरमकिताबता युहन्‍नाको बारेता लेखिका इदोइ काथागेलाइ पोङघाहि:

हिङसु, उदादाङका थामेता एअ्‌मि बारका गाला ओल्‍हिपातेङ एसा दोअ्‌दोङखे,

“प्रभु लोका दामा त्‍यार पासु, वाको तेगिल्‍का दामागेलाइ सोझापासु!

5गोताङ जोला जोलि पुराइलिगोयाङ, आरदाङ रो रागेलाइ सारिपालि गोयाङ,

घुराइका दामा सोझापालि गोयाङ रो मासुकाका दामा सुकाका बान्‍हाइलि गोयाङ

6कालाउ झाराङ द्‌याङगेलाइ परमेस्‍वरको पिगिल्‍का छुटकारा तिनावा।”#यासाइया ४०:३-५

7हेन्‍जाङ द्‌याङगेलाइ युहन्‍नाकोता चिभुअ्‌लि र्‍हुलि लोहि। कालाउ युहन्‍ना एम्‍बालाइहेङ दोअ्‌हि, “ओइ बिसहिका पुह्‍याँको चानगेलाइ! ‘परमेस्‍वर न्‍याय पालाउ केलाइ खाअ्‌लि निनाङ’ दोअ्‌तेङ नेलाइहेङ हासु धिरपाहि?#मत्‍ति १२:३४; २३:३३ 8नेलाइ जातिङको पास्‍ताइसुन्‍हा पानु इङकोभाइपाङ पासु। कालाउ ‘केलाइ आब्राहामको सान्‍तान’ दोअ्‌तेङसाङ नेलाइ खाअ्‌लि द्‌वाङका दोअ्‌तेङ फोम पासुखेना। का नेलाइहेङ दोअ्‌ताङका, परमेस्‍वर आब्राहामको सान्‍तानहेङ इदोइ उन्‍ठुइसो बुङ जेङपालि द्‌वावा।#युहन्‍ना ८:३३ 9सिङता दुफे धालन्‍हाहोइ। रेम्‍फा मासेका गोताङ सिङहेङ उन्‍धिपातेङ मेता थालावा।”#मत्‍ति ७:१९

10द्‌याङगेलाइ युहन्‍नाहेङ हिअ्‌हि, “एन्‍सा पानु केलाइ हाइ पालिगोयाङ कुनु?” 11वा एम्‍बालाइहेङ दोअ्‌हि, “न्‍हेलोङ लोखोन हिकालाइ लोखोन मान्‍थुकालाइहेङ प्‍याको। एन्‍साङपातेङ चाका हिकालाइ मान्‍थुकालाइहेङ प्‍याको।” 12तिरो ल्‍होपाकालाइ बुङ चिभुअ्‌लि र्‍हुलि लोतेङ युहन्‍नाहेङ हिअ्‌हि, “मास्‍टर, केलाइ हाइ पालिगोयाङ कुनु?”#लुका ७:२९ 13युहन्‍ना एम्‍बालाइहेङ दोअ्‌हि, “सारकारको तोकिका खान्‍तेङ हेन्‍जा पोत माल्‍होपासु।” 14सिपालाइ बुङ हिअ्‌हि, “केलाइ बुङ हाइ पालिगोयाङ?” युहन्‍ना एम्‍बालाइहेङ दोअ्‌हि, “करकाप पातेङ, माजेङका काथाता दुसितेङ हासुदोफा बुङ टाका मार्‍हुसु। भुरुङ ताइकोङ तानाखाता चित बुझिपासु।”

15द्‌याङगेलाइ छुटकारा पिका ख्रिस्‍टको दामा खाङतेङ हिघाखे। कालाउ एम्‍बालाइ ताइको मनमनताङ युहन्‍ना दोङ ख्रिस्‍ट हिघाहि बेअ्‌? दोअ्‌तेङ बिचार पादोङघाखे। 16एन्‍साजेङलाउ युहन्‍ना झाराङहेङ दोअ्‌हि, “काते नेलाइहेङ चिहोइ चिभुअ्‌लि पिखा। कालाउ काखान्‍तेङ बारका सरबङ हिका एअ्‌मि लोदोङखे। काते वाको जुताको तुना खाइपिलि सोबाइका मान्‍थुघा। वा नेलाइहेङ पुनित हाङसा रो मेहोइ चिभुअ्‌लि प्‍यावा 17एला वा आनाज याअ्‌लि खुरता रा चुमहोइ। आनाज याअ्तेङ भाकारता ताअ्‌तावा, कालाउबुङ पितानागेलाइ हेअ्‌लाउ मासिका मेता दुकावा।”

18इस्‍का बो बुङ हेन्‍जाङ आरतिगेलाइ पिकाताङ युहन्‍ना द्‌याङगेलाइहेङ रेम्‍काबानाल हिम्‍पाहि। 19राजा हेरोद ताइको ओनेको बेअ्‌ हेरोदियासेहेङ ताअ्काता युहन्‍ना वासेहेङ हाकाराइहि। कालाउ वाको बो हेन्‍जाङ पापगेलाइ बुङ तिम्‍पिहि।#मत्‍ति १४:३-४; मरकुस ६:१७-१८ 20एन्‍साजेङलाउ हेरोद युहन्‍नाहेङ थुनाता थुनिहि रो एसापा वा बो बुङ बारका मारेम्‍का कामगेलाइ पाहि।

इसु बुङ चिभुअ्‌लि र्‍हुहि

(मत्‍ति ३:१३-१७; मरकुस १:९-११; युहन्‍ना १:३२-३४)

21एअ्‌नि झाराङ द्‌याङगेलाइ चिभुअ्‌लि र्‍हुतेङहिलाउ इसु बुङ इङकोङ दिना चिभुअ्‌लि र्‍हुहि। वा पारथाना पाकाताङ पालाउ स्‍वरग हेन्‍हाहि। 22इङकोङ पहर पुनित हाङसा कुरजाभाइपा जेङतेङ वाकोर्‍हुता खुअ्‌हि। कालाउ स्‍वरगसो इस्‍का गाला लोहि, “ना काङको माया पाका चान हिना, नाङकोदोफा का हेन्‍जाङ लेङचाका हिघा।”#सिरजाइ २२:२; ले २:७; यासाइया ४२:१; मत्‍ति ३:१७; मरकुस १:११; लुका ९:३५

इसुको आजुखालगेलाइ

(मत्‍ति १:१-१७)

23इसु ताइको सेवाको काम थालिलाउ वाको बोइसा एअ्‌कुरिते बाअ्‌सार झोको जेङका हिघाहि। द्‌याङगेलाइ योसेफहेङ दोङ इसुको आबा दोअ्‌तेङ दोअ्‌घाहि। योसेफको आबा एलि हिघाखे, 24एलिको आबा मात्‍तात, मत्‍तातको आबा लेबि, लेबिको आबा मल्‍कि, मल्‍किको आबा यान्‍ना, यान्‍नाको आबा योसेफ, 25एसाङपातेङ योसेफको आबा मात्‍ताथियास, मात्‍ताथियासको आबा आमोस, आमोसको आबा नहुम, नहुमको आबा इसलि, इसलिको आबा नग्‍गाइ, 26नग्‍गाइको आबा माथ, माथको आबा मात्‍ताथियास, मात्‍ताथियासको आबा सेमाइन, सेमाइनको आबा योसेख कालाउ योसेखको आबा योदा हिघाखे। 27योदाको आबा योआनन, योआननको आबा रेसा, रेसाको आबा यरुबाबेल, यरुबाबेलको आबा सालतिएल, सालतिएलको आबा नेरि, 28नेरिको आबा मल्‍कि, मल्‍किको आबा आद्‌दि, आद्‌दिको आबा कोसाम, कोसामको आबा एलमादम, एलमादमको आबा एर, 29एरको आबा यहोसु, यहोसुको आबा एलिएजर, एलिएजरको आबा योरिम, योरिमको आबा मत्‍तात, मत्‍तातको आबा लेबि, 30लेबिको आबा सिमियोन, सिमियोनको आबा यहुदा, यहुदाको आबा योसेफ, योसेफको आबा योनान, योनानको आबा एल्‍याकिम हिघाखे।

31एल्‍याकिमको आबा मलेआ, मलेआको आबा मिन्‍ना, मिन्‍नाको आबा मत्‍ताथा, मत्‍ताथाको आबा नातान, नातानको आबा दाउद, 32दाउदको आबा इसाइ, इसाइको आबा ओबेद, ओबेदको आबा बोआज, बोआजको आबा सल्‍मोन, सल्‍मोनको आबा नहोसन, 33नहोसनको आबा आम्‍मिनादाब, आम्‍मिनादाबको आबा आराम, आरामको आबा हेस्रोन, हेस्रोनको आबा फारेस, फारेसको आबा यहुदा हिघाखे। 34यहुदाको आबा याकुब, याकुबको आबा इसहाक, इसहाकको आबा आब्राहाम, आब्राहामको आबा तेरह, तेरहको आबा नाहोर, 35नाहोरको आबा सरुग, सरुगको आबा रउ, रउको आबा पेलेग, पेलेगको आबा एबेर, एबेरको आबा सेलह, 36सेलहको आबा केनान, केनानको आबा आरपछद, आरपछदको आबा सेम, सेमको आबा नोआ, नोआको आबा लेमेख, 37लेमेखको आबा मतुसेलह, मतुसेलहको आबा हनोक, हनोकको आबा येरेद, येरेदको आबा महलालेल, महलालेलको आबा केनान, 38केनानको आबा एनोस, एनोसको आबा सेत, सेतको आबा आदम हिघाखे। कालाउ आदमको आबा परमेस्‍वर हिघाखे।

Currently Selected:

लुका 3: DHIM

Highlight

Copy

Compare