लुका 15
15
राम्का भेराको उदारन
(मत्ति १८:१२-१४)
1एअ्खे हेन्जा तिरो ल्होपाकालाइ रो बो पापिगेलाइ इसुको बिद्या हिङलि लोहि।#लुका ५:२९-३० 2कालाउ फरिसिगेलाइ रो धरम मास्टरगेलाइ गनगन पातेङ दोअ्हि, “इदोइ द्याङते पापिगेलाइदोफा मिलिखे रो दोफाङ योम्तेङ ओबालाइदोफाङ चाखे।”
3इसु एम्बालाइहेङ एलोङ उदारनको रुपता इस्का काथा दोअ्हि, 4“नेलाइता हासुको बुङ एअ्साइ भेरा हि वाला। इङको एअ्साइता एलोङ राम्नु भेराको धनि हाइ पावा? वा एलोङ कम एअ्साइहेङ घोका थामेताङ लाअ्धितेङ राम्का भेराहेङ मानिम्पाधाउ माभोकावा कुनु? 5वा इङको राम्का भेराहेङ निङलाउ लेङचातेङ वासेहेङ कान्धेता फातेङ ताइको साअ्ता चुमावा। 6कालाउ ताइको सानाइतिगेलाइ रो साअ्भेरपाको द्याङगेलाइहेङ काइतेङ दोअ्तावा, ‘काङको राम्का भेरा का निङहोइका! लोसु, लेङचाइने।’ 7का नेलाइहेङ दोअ्ताङका, पास्ताइलि मागोयाङ दोअ्का द्याकुरिते क्वाहा धरमाति द्याङगेलाइ खान्तेङ पास्ताइका एअ्मि पापिको भाअ्सिङ स्वरगता हेन्जाङ लेङचावा।”
राम्का टाकाको उदारन
8आरोङ इसु भेनाङ एलोङ उदारन पितेङ दोअ्हि, “एअ्मि बेबालदोफा तेलोङ रुपाको टाका हिघाहि। कालाउ एलोङ रुपाको टाका राम्पालाउ एला वा हाइ पावा? इङको राम्का टाका मानिम्पाधाउ हाइ वा गेसा जोलाइतेङ फेसारहोइ फेतेङ माभोकावा कुनु? 9जेलाउ वा राम्का रुपाको टाका निनावा कालाउ ताइको सानाइति भाया रो साअ्भेरपाको द्याङगेलाइहेङ काइतेङ दोअ्तावा, ‘काङको राम्का रुपाको टाका निङहोइका! एला लोसु, केलाइ लेङचाका मान्याइने।’ 10का नेलाइहेङ दोअ्ताङका, एन्साङपातेङ पास्ताइका एअ्मि पापिको भाअ्सिङ परमेस्वरको स्वरगदुतगेलाइ हेन्जाङ लेङचावा।”
राम्का चानको उदारन
11इसु आरोङ दोअ्हि, “एअ्मि द्याङको न्हेमि चान हिघाखे। 12एअ्नि कान्छा चान लोतेङ आबाहेङ दोअ्हि, ‘आबा, काङको आसि निङलिगोइका गोताङ टाका काउरिको आङसा कासेहेङ पि।’ कालाउ आबा बुङ ताइमिदोफा हिका काउरि न्हेमि चानहेङ बाखाराइपिहि।
13 “एअ्नि न्हेनिन्हुअ्सो कान्छा चान ताइको आङसाता निङका गोताङ टाका काउरि चुमपुतेङ भेनेङ मुलुकता हानिहि। कालाउ इन्ता मोजमजा पातेङ गोताङ टाका काउरि दोपाहि। 14जेलाउ वा ताइदोफा हिका गोताङ टाका काउरि दोपाहि कालाउ इङको मुलुकता बारका आनिकाल परिहि। एन्सालाउ वा चालि बुङ मानितेङ म्हितुपाङ हिलिगोइहि। 15कालाउ वा इङको मुलुकको एअ्मि द्याङकोता काम पालिभाअ्सिङ हानिहि। इङको द्याङ वासेहेङ ताइको मिलिङता पाया घोका कामता लागाइहि। 16हेन्जा म्हितुतेङ वा पायाको आहार चातेङलाउ बुङ ताइको हामु भेलपालि खाङघाहि। कालाउ हासु बुङ वासेहेङ चाका आनेमाने मापिहि।
17 “इङको पहर खिनिङ वाको होस खुलिहि कालाउ वा ताइको मनता दोअ्हि, ‘काङको आबाकोता कामत्यागेलाइ हेमुङ भेल्पाङ चातेङ बुङ दाइघाखे। का खिनिङ इता म्हितुपाङ हितेङ सिलि तोम्होइका। 18एला का आबाकोता हानितेङ दोअ्ताङका, आबा! का परमेस्वर रो नाङको खिलापता पाप पाका हिघा। 19एला ते कासेहेङ नाङको चान दोअ्लि बुङ मासोबायाङ। कालाउ कासेहेङ दायातेङ एअ्मि काम पाकालाइ भाइपाङ फोमपातेङ ताअ्।’ 20कालाउ इङकोन्हुअ्सो वा ताइको आबाकोता घुरितेङ लोलाउ वाको आबा वासेहेङ दुरेसोङ तिङहि। आबाको मन दायासो पोङघातेङ लोहि रो लेङचातेङ चानहेङ दुसुलि धाअ्तेङ हानिहि। कालाउ ताइको चानहेङ खोमतेङ चुमाइहि।
21 “कालाउ चान आबाहेङ दोअ्हि, ‘आबा, का परमेस्वर रो नाङको खिलापता पाप पाका हिघा। एला का नाङको चान दोअ्लि बुङ मासोबायाङका।’ 22कालाउ आबा ताइको कामत्यागेलाइहेङ काइतेङ दोअ्हि, ‘मार्फा पातेङ झाराङखान्तेङ रेम्का धाबा, आँउठि रो जुता चुमातेङ यासेहेङ लागाइपिसु। 23कालाउ पोसेतेङ ताअ्का तोइका बासा चुमातेङ सेअ्सु। चातेङ आम्तेङ लेङचाइने। 24हाइदोनु काङको इदोइ चान सिका हिघाहि आरोङ सिन्हुतेङ लोहि। वा राम्का हिघाहि एला वासेहेङ निङन्हाहि!’ कालाउ एम्बालाइ लेङचातेङ भतेर चालि तेङहि।
25 “इङको पहर वाको जेठा चान मिलिङभारि हिघाहि। जेलाउ घुरितेङ साअ् भेरपा थुकालिलोलाउ वा न्हाका लेकालाइको गाला हिङहि। 26कालाउ वा एअ्मि कामत्याहेङ काइतेङ, ‘इता हाइ जेङदोङखे?’ दोअ्तेङ हिअ्हि। 27इङको काम पाका दोअ्हि, ‘नाङको ओने रेम्फा साअ्ता घुरितेङ लोका हि। नाङको आबा इदोइ खुसिता एलोङ तोइका बासा सेअ्लि लागाइतेङ भतेर लागाइका हि।’ 28इङको हिङतेङ दादा हेन्जाङ चेरताम्पातेङ साअ्ता दुल्लि बुङ माकिअ्हि। कालाउ वाको आबा लोतेङ वासेहेङ गावाइलि तेङहि।
29 “कालाउ वा आबाहेङ दोअ्हि, ‘इदिझोको बाअ्सारसो बान्धाइभाइपा नाङको सेवा पातेङ लोका हिघाघा। कालाउ का नाङको हिदि बुङ हुकुमहेङ बिरोध सुदाङ पानाङ मान्थुघाघा। कालाउ ना काङको सानाइति भायागेलाइदोफा मिलितेङ चालि दोअ्तेङ एलोङ मेअ्सा सुदाङ बुङ कासेहेङ पिका मान्थुन्हा।
30 “‘कालाउ नाङको टाका काउरि कासबिरिगेलाइदोसा दोपाका चान लोलाउचाहिँ ना इदोइझोको बारका भतेर पाखेना।’ 31कालाउ आबा वासेहेङ दोअ्हि, ‘काङको चान खाङ, नाते जेलाउ बुङ काङकोङ दोफा हिन्हा। आरोङ काङकोदोफा हिका इदोइ गोताङ टाका काउरि नाङकोङ! 32कालाउ नानि केलाइ लेङचाका जेङतेङ इदोइ हाउसा मानाइलि दोङ गोइका हिघाहि। हाइदोनु नाङको ओने जाइ सिका हिघाहि एला आरोङ वा सिन्हुतेङ लोहि। वा राम्का हिघाहि एला आरोङ यासेहेङ निङन्हाहि!’”
Currently Selected:
लुका 15: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
