लुका 16
16
चालाक खाजान्चिको उदारन
1 इसु ताइको चात्यागेलाइहेङ दोअ्हि, “एअ्मि हेन्जा टाका काउरि हिका द्याङको साअ्द्वार खाङका एअ्मि खाजान्चि हिघाहि। एअ्नि आधिमि द्याङगेलाइ इङको हिका चाका द्याङकोता लोतेङ ‘इङको खाजान्चि नाङको टाका काउरि दोपापिलि तोमदोङखे’ दोअ्तेङ हिङपाहि। 2कालाउ वा खाजान्चिहेङ काइतेङ हिअ्हि, ‘नाङको बारेता का इदोइ हाइ हिङदोङखा? नाङको पाका गोताङ हर हिसाब कासेहेङ बुझाइ। हाइपानु एलासो उसो ना खाजान्चि जेङलि मानिनाना।’ 3एन्साजेङलाउ इङको खाजान्चि मनमनताङ दोअ्हि, ‘काङको मालिक कासेहेङ खाजान्चिको कामसो ओल्हिपालि तोम्काहि; एला का हाइपालि? का तोलिचोइलि बुङ माद्वाङका रो र्हेतेङ चालि बुङ लेदेरखा। 4एला का फोमपाहोइका! काङको मालिक कासेहेङ खाजान्चिसो ओल्हिपालाउ बुङ सानाइति बान्हाइतेङ ताअ्घा पानु ओबालाइ ते खानाङ वाला!’ 5इङकोन्हुअ्सो वा मालिकको रिन र्हुका झाराङहेङ एअ्मि एअ्मिपा काइहि। कालाउ वा एअ्मिहेङ हिअ्हि, ‘काङको मालिकको रिन ना हेथे र्हुका हिना?’ 6वा दोअ्हि, ‘सुमहाजार लिटर जाइतुनको चुइति।’ खाजान्चि दोअ्हि, ‘को नाङको तमसुकता एला एअ् हाजार नासाइ लिटर खिनिङ बान्हाइ।’ 7आरोङ वा भेनेङहेङ हिअ्हि, ‘नाङको तिरिलिगोइका रिन हेथे हि?’ वा दोअ्हि, ‘येअ् हाजार पाथि गोहोम।’ खाजान्चि दोअ्हि ‘को नाङको तमसुकता येअ् साइ पाथि खिनिङ बान्हाइ।’
8 “इदोइ काथा गितेङ इङको मालिक बाइमान खाजान्चिको चालाकिहेङ तिङतेङ बाखिन्हि। हाइदोनु परमेस्वरता खान्धुर मापाकालाइ ताइको द्याङगेलाइदोफा बेभार पालाउ परमेस्वरता खान्धुर पाकालाइ खान्तेङ हेन्जाङ चालाक जेङखे।
9 “का नेलाइहेङ दोअ्ताङका, दुनियाको टाका काउरिसो सानाइति बान्हाइसु। जेलाउ इङको टाका काउरि दोकावा नेलाइहेङ हेअ्लाउ मामुअ्का स्वरगको हिका थामेता स्वागत पावा।”
आतुइका काथाता बुङ भरपरेका जेङलिगोयाङ
(मत्ति ६:१४)
10 इसु आरोङ दोअ्हि, “आतुइका काथाता भर पालि दोका द्याङदोफा बारका काथाता बुङ भर पालि दोखे। एन्साङ आतुइका काथाता बाइमानि जेङका द्याङ बारका काथाता बुङ बाइमानि दोङ जेङखे। 11इदोइभाअ्सिङ सुमिङको टाका काउरिता खान्धुर पाका माजेङनु ते नेलाइहेङ जातिङको स्वरगता हिका टाका काउरि हासु जिम्मा प्यावा कुनु? 12यदि नेलाइ बोमिको टाका काउरिता खान्धुर पाका माजेङनु ते नेलाइको निङलिगोइका टाका काउरि हासु प्यावा कुनु?
13 “हिदोइ बुङ कामत्या न्हेमि मालिकको सेवा पालि माद्वावा। हाइपानु वा एअ्मिहेङ मारेम्का पावा रो भेनेङहेङ माया पावा। आरोङ एअ्मिहेङ मान पावा कालाउ भेनेङहेङ खाङलि माकिअ्तावा। एन्साङपातेङ नेलाइ बुङ परमेस्वर रो टाका काउरि न्हेमिकोङ सेवा पालि मादोस्वाना।” #
मत्ति ६:२४
इसुको बो आधे बचनगेलाइ
(मत्ति ११:१२-१३; ५:१८,३२)
14इदोइ गोताङ काथागेलाइ हिङतेङ फरिसिगेलाइ लेङतेङ इसुको गिल्ला पाहि। हाइदोनु एम्बालाइ टाका काउरिहेङ दोङ माया पाघाहि। 15कालाउ इसु एम्बालाइहेङ दोअ्हि, “नेलाइ द्याङगेलाइको नजरता धरमाति तिङलि ते भोसुखेना कालाउबुङ परमेस्वर नेलाइको कोन्धाङ गिखे। द्याङको झाउका फोम पाका इन्सिका काथागेलाइहेङ परमेस्वर आखेका दोअ्तेङ मोन्दामाताखे।
16 “चिभुअ्लि पिका युहन्नाको पहरथिकापा मोसाको पिका न्याम रो परमेस्वर पाहासो धुइकालाइको बिद्या यहुदि आगुवागेलाइ मानितेङ लोदोङघाहि। इङको पहरसो एलाथिकापा स्वरगको सारभिको रेम्काबानाल हिम्पाका काम जेङदोङखे। कालाउ झाराङ स्वरगको सारभिता दुल्लिको भाअ्सिङ बल पादोङखे। #
मत्ति ११:१२-१३
17आकास रो सुमिङ राम्तेङ हानिलि द्वावा कालाउबुङ परमेस्वरको न्यामको एलोङ काथा बुङ मारामावा।#मत्ति ५:१८ 18जाइ ताइको बेअ्हेङ लाअ्तेङ भेनेङ बेबालहेङ बिहु पावा वा कासबिरि पावा। कालाउ जाइ केअ्को लाअ्का बेबालहेङ बिहु पावा वा बुङ पाप पावा।”#मत्ति ५:३२; १ कोरिन्थि ७:१०-११
धनि द्याङ रो लाजरस
19इसु आरोङ दोअ्हि, “एअ् पहरता एअ्मि गिह्रि द्याङ हिघाहि। वा जेलाउ बुङ जाङका मलमलको धाबा लागाइतेङ मोजमजा पातेङ जिबन दोपाघाहि। 20एअ्मि लाजरस दोअ्का हाइदोङ मान्थुका द्याङ हिघाहि। कालाउ वाको गोताङ जिउता पेचारा दोङ पेचारा जेङका हिघाहि। द्याङगेलाइ वासेहेङ धनि द्याङको सालेङको मुल फिनुता चुमातेङ ताअ्पाघाहि। 21इङको धनि द्याङ चाका थामेसो हुल्का टुकारा चालि निनाङका बे दोअ्तेङ वा आस पातेङ हिघाहि। कालाउ खियागेलाइ लोतेङ वाको पेचारागेलाइ देअ्पिघाखे।
22 “एअ्नि इङको गरिब लाजरस सिहि रो स्वरगदुतगेलाइ वासेहेङ चुमपुतेङ आब्राहामको दोसा ताअ्हि। इङको मालिक द्याङ बुङ सिहि रो लिअ्न्हाहि। 23नरकता हानितेङ हेन्जाङ तु: निङचानाङ वार्हुता म्हालतेङ खाङलाउ आब्राहामको भेरपाङ लाजरसहेङ योम्तेङ हिका तिङहि। 24कालाउ वा र्हिकाइतेङ दोअ्हि, ‘आबा आब्राहाम, कासेहेङ दायातेङ इता लाजरसहेङ दिङगिल्पि। वा ताइको आङगुलि चिता चोभेरतेङ एअ्थोपालाउ बुङ काङको देतोङता ह्याअ्पा प्याको। हाइदोनु का इदोइ मेको रापता सितपिताइदोङखा।’ 25कालाउ आब्राहाम वासेहेङ दोअ्हि, ‘चान, हाइ नासेहेङ फोम मान्थु? फोमपातेङ खाङ त! ना सुमिङता हिलाउ नाङको जिबनता ेरेरेम्का आनेमाने निङन्हा। कालाउ लाजरस मारेम्फाङ तु: निन्चाका हिघाहि। कालाउ वा इता सुख रो सान्ति निङका हि कालाउ ना एला तु: भोगिदोङखेना। 26आरोङ नाङको रो केलाइको माझाता बारका वाङखारा हि। एन्साजेङलाउ हासु बुङ वारपार पातेङ हानिलि लोलि माद्वावा।’ 27कालाउ इङको धनि द्याङ दोअ्हि, ‘आबा, एन्सा जेङनु का नासेहेङ बिम्ति पाखा लाजरसहेङ काङको आबाको साअ्ता दिङगिल्पि। 28हाइदोनु बो काङको नामि दादाओनेगेलाइ हि। वा एम्बालाइहेङ इदोइ नरकको पिरता मालाको दोअ्तेङ चेतानि प्याको।’ 29कालाउबुङ आब्राहाम दोअ्हि, ‘एम्बालाइहेङ चेतानि पिलिको भाअ्सिङ मोसा रो परमेस्वर पाहासो धुइकालाइको लेखिका धरमकिताब हिदोङ हि। नाङको दादाओनेगेलाइ इङकोङ मानितेङ ह्याको!’ 30आरोङ इङको धनि द्याङ दोअ्हि, ‘आबा आब्राहाम, इङकोझोको खिनिङ माज्याङ। हाइदोनु एअ्मि सिका द्याङ दोङ सिन्हुतेङ आरोङ एम्बालाइकोता हानितेङ साम्झाइ बुझाइ पानु खिनिङ एम्बालाइ पास्ताइधावा।’ 31कालाउबुङ आब्राहाम वासेहेङ दोअ्हि, ‘मोसा रो परमेस्वर पाहासो धुइकालाइको काथा दोङ माहिङनु सिका द्याङ दोङ सिन्हुतेङ हानिलाउ बुङ एम्बालाइ खान्धुर मापावा।’”
Currently Selected:
लुका 16: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
