लुका 14
14
इसु पुनित माइसाका दिना मासाअ्धेकालाइहेङ एल्पाका
1पुनित माइसाका दिनाता इसु नेउता निङतेङ फरिसि दोअ्का धरमाति हुलको द्याङगेलाइको आगुवाको साअ्ता चालिको भाअ्सिङ हानिहि। इन्ता जोम्तेङ हिका द्याङगेलाइ वाको चेवा पातेङ हिघाहि। 2इङकोङ पहर इन्ता एअ्मि खुर खोकोइ इम्का द्याङ इसुको आगाता योम्तेङ हिघाहि। 3कालाउ इसु यहुदि धरम मास्टर रो फरिसिगेलाइहेङ हिअ्हि, “मोसाको न्याम आन्सार पुनित माइसाका दिना रोगाइकाहेङ एल्पालि ठिक ज्याङ ना माज्याङ?” 4कालाउ एम्बालाइ हाइदोङ मादोअ्हि। कालाउ इसु इङको रोगाइकाहेङ साइहि रो वासेहेङ एल्पातेङ दिङगिल्हि। 5इङकोन्हुअ्सो इसु एम्बालाइहेङ दोअ्हि, “नेलाइता हासुको बुङ चानचामिन्दि रो गाइ पिया पुनित माइसाका दिना च्वाता वालानु हाइ नेलाइ वासेहेङ इघुरिताङ बाहार माओल्हेपास्वाना कुनु?”#मत्ति १२:११ 6आरोङ बुङ एम्बालाइ हाइदोङ दोअ्लि मादोहि।
बान्सालाइको उदारन
7इन्ता भतेर चालि लोका बान्सालाइ बाबारकालाइको योम्का थामे साल्तेङ योम्का तिङतेङ इसु एम्बालाइहेङ इस्का काथा दोअ्हि, 8“नेलाइ हासुको बुङ बिहुता बान्सालाइ जेङतेङ हानिलाउ मुल थामे साल्तेङ मायोम्सु। हाइदोनु इन्ता नेलाइखान्तेङ प्रख्यात द्याङगेलाइहेङ बुङ नेउता पिका हि वाला।#रेम्काआरति २५:६-७ 9कालाउ वा लोलाउ साअ् धनि लोतेङ ‘वासेहेङ मुल थामे लाअ्पिसु’ दोअ्तेङ ल्होपानु ते नेलाइ लेदेरस्वाना। इङको पहर द्याङगेलाइको आगाता लेता योम्लि गोइनु नेलाइको न्हापु हानावा। 10भुरुङ नेउता निङतेङ बिहुता हानिलाउ लेताङ योम्सु। जेलाउ साअ् धनि लोतेङ नेलाइहेङ ‘र्हुताङ लोतेङ मुल थामेता योम्सु’ दोअ्नु इङको पहर झाराङको आगाता नेलाइको बारका मान जेनावा। 11हाइदोनु जाइ ताइमिङ बारालि भोकालाइ झाराङ म्हुयावा रो जाइ ताइमिहेङ म्हुइपाकालाइचाहिँ झाराङखान्तेङ बारका जेनावा।”#मत्ति २३:१२; लुका १८:१४
12कालाउ इसु नेउता पिका साअ् धनिहेङ दोअ्हि, “ना इस्का भतेर लागाइलाउ नाङको नाल्का सानाइतिगेलाइ, दादाओनेगेलाइ रो ताइ द्याङगेलाइ कालाउ हिका चाका साअ्भेरपाको द्याङगेलाइहेङ माकाइ। हाइदोनु एम्बालाइ पाला घुरिपालि भाअ्सिङ नासेहेङ काइतेङ चापावा। 13कालाउ भतेरता द्याङगेलाइहेङ काइलाउ हाइदोङ मान्थुका, तेलिमादोका लुलानेङग्रा रो कान्हागेलाइहेङ काइ। 14कालाउ एन्सा पानु ना सहसाम्पा निनाना। हाइदोनु नासेहेङ पाला घुरिपालि ओबालाइदोफा हाइदोङ मानथ्वावा। कालाउ परमेस्वरको हुकुम मानिका द्याङगेलाइ सिकासो सिन्हुलाउ परमेस्वरदोङ नासेहेङ इनाम प्यावा।”
बारका भतेरको उदारन
(मत्ति २२:१-१०)
15इसुको काथा हिङतेङ वाकोदोफा चालि योम्का एअ्मि दोअ्हि, “स्वरगको सारभिता भतेर चालि निङकालाइ दोङ हेथे सहसाम्पा निनावा।” 16इसु वासेहेङ दोअ्हि, “एअ्मि द्याङ बारका भतेर त्यार पातेङ हेन्जा द्याङगेलाइहेङ नेउता पिहि। 17कालाउ भतेर चाका पहर जेङलाउ साअ् मालिक निम्तारगेलाइहेङ ‘भतेर चाका पहर जेङहोइ’ दोअ्तेङ ताइको कामत्यालाइहेङ काइलि दिङगिल्हि। 18कालाउ नेउतारगेलाइ एलोङ एलोङ आल पातेङ लोलि माकिअ्हि। कालाउ एअ्मि दोअ्हि, ‘का मिलिङ चोलका हिघा, इन्ता मान्हेसा माजेङका हि। कासेहेङ माफ पा, का लोलि मानिनाङका।’ 19भेनेङ दोअ्हि, ‘का ना हाले पिया चोलका हिघा रो नानिङ एम्बालाइहेङ चोइतेङ खाङलि गोइका हि। कासेहेङ माफ पा, चेर माताम्पा।’ 20कालाउ आरोङ भेनेङ दोअ्हि, ‘का नावा कान्या चुमाका हिघा। इदोइभाअ्सिङ लोलि मानिनाङका।’ 21कालाउ कामत्या घुरितेङ गोताङ काथा मालिकहेङ हिम्पाहि। कालाउ मालिक चेरताम्पातेङ ताइको कामत्याहेङ दोअ्हि, ‘ना मार्फा पुरको दामा घाटे रो गल्लिगेलाइता हाने। इन्तासो मान्थुकालाइ, लुला नेङगारागेलाइ रो कान्हागेलाइहेङ काइतेङ इता चुमा।’
22 “इङको कामत्या दोअ्हि, ‘मालिक, नाङको दोअ्का भाइपाङ झाराङ द्याङगेलाइहेङ काइतेङ चुमाघा, आरोङ बुङ बो हेन्जा योम्का थामेगेलाइ खालि दोङ हि।’
23 “आरोङ मालिक इङको कामत्याहेङ दोअ्हि, ‘देराको दामा दामा रो गल्लिगेलाइता हानितेङ द्याङगेलाइहेङ जेसा पातेङलाउ बुङ काइतेङ चुमा। कालाउ काङको साअ् पोङघाको!’ 24हाइदोनु आरोङ का नेलाइहेङ दोअ्खा, ‘नेउता निङकालाइता हासु बुङ भतेर चालि मानिनावा।’”
चात्या जेङलाउ भोगिलिगोइका तु:
(मत्ति १०:३७-३८)
25एअ्नि इसुदोफा हेन्जाङ द्याङगेलाइ हानिदोङघाहि। इसु एम्बालाइभारि घुरितेङ दोअ्हि, 26“कासेहेङ पिताइलि भोकालाइ ताइको आबा आमाइ, बेअ्, चानचामिन्दि, दादाओने, बाइओने रो ताइमिहेङ माया मारेलि मादोकालाइ हेअ्लाउ बुङ काङको चात्या जेङलि माद्वावा।#मत्ति १०:३७ 27आरोङ जाइ ताइको कुरुस ताइमिङ चुमतेङ कासेहेङ मापिताइकालाइ काङको चात्या जेङलि माद्वावा।#मत्ति १०:३८; १६:२४; मरकुस ८:३४; लुका ९:२३
28 “नेलाइ एलोङ धारारा बान्हाइलि भोनु इङको धारारा बान्हाइलाउ लागिका खारचा ताइमिदोफा हि ना मान्थु दोअ्तेङ लाम्फादोङ हिसाब किताब मापाखे कुनु? 29यदि वा झाउका साअ्को जग योम्पातेङ पुरा पालि मादोनु ते द्याङगेलाइ वासेहेङ गिल्ला पातेङ दोअ्तावा, 30‘खाङसु, इदोइ द्याङ झाउका साअ् बान्हाइलि ते भोहि, कालाउ दोपालि दोङ मादोहि!’ 31आरोङ, तेहाजार पलटन हिका एलोङ राजा एअ्कुरि हाजार पलटन हिका भेनेङ राजादोफा धुम पालि हानिलाउ लाम्फादोङ जितिलि द्वाङका बे माद्वाङका दोअ्तेङ बिचार मापावा कुनु? 32कालाउ यदि धुम पालि मादोनु लाम्फादोङ वा ताइको पलटनगेलाइहेङ हाइ पातेङ मिलि पालि द्वाङ दोअ्तेङ गिलि दिङगिलावा। 33एन्सा पातेङ नेलाइता जाइ काङको भाअ्सिङ गोताङ थोक लाअ्लि माद्वावा; वा हेअ्लाउ बुङ काङको चात्या जेङलि माद्वावा।
ताइका मान्थुका देसे
(मत्ति ५:१३; मरकुस ९:५०)
34 “देसे रेम्का थोक हिलाउ बुङ, यदि वाको ताइका राम्नु वासेहेङ आरोङ हाइहोइ ताइका बान्हाइलि? 35कालाउ इङको बारिको भाअ्सिङ मल बुङ माज्यावा। द्याङगेलाइ वासेहेङ एन्साङ थालगिलावा। जाइको हिङका न्हातोङ हि वा हिनाको।”
Currently Selected:
लुका 14: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
