साल्तेङ दिङगिल्का 9
9
साउलको जिबन फेरेन्हाका
(साल्तेङ दिङगिल्का २२:६-१६; २६:१२-१८)
1साउल प्रभुको चात्यागेलाइको खिलापता एला बुङ धम्कि रो सेअ्का धुनता मुल धामिकोता हानिहि। 2वा प्रभुको दामा पिताइका वाबालाइ रो बेबालाइ जाइहेङ निङलाउ बुङ एम्बालाइहेङ रिम्तेङ यरुसलेमता चुमालि निनाको दोअ्तेङ दमस्कसको कचहरिसाअ्को मिङता पुरजि र्हेहि। 3जेलाउ साउल दमस्कसको भेरपा थुकाहि, एकासि स्वरगसो एलोङ चोलका वाको कोरबितिङ चिल्काहि। 4वा भोनोता फेअ्न्हाहि रो वा एसा दोअ्का गाला हिङहि, “साउल, साउल, ना हाइपालि कासेहेङ सान्ताइखेना?”
5साउल हिअ्हि, “प्रभु, ना हासु हिना?”
कालाउ प्रभु दोअ्हि, “का इसु, जाइहेङ ना सान्ताइदोङखेना। 6कालाउबुङ ल्होतेङ पुरता हाने, ना हाइ पालिगोइका इङको नासेहेङ दोअ्प्यावा।”
7साउलदोफा हानिका द्याङगेलाइ गालाचाहिँ हिङहि, कालाउबुङ हासुहेङ मातिङनाङ आवाइतेङ जाअ्तेङहि। 8कालाउ साउल भोनोसो ल्होहि रो मिँ हेलाउ वा हाइ बुङ मातिङहि। एम्बालाइ वासेहेङ खुर चातेङ थोङतेङ वासेहेङ दमस्कसता चुमाहि। 9कालाउ वा सुम्निथिकापा मातिङका जेङहि रो ना उम चाहि ना चि आम्हि।
10दमस्कसता हननिया मिङ हिका एअ्मि चात्या हिघाखे। वासेहेङ प्रभु दरसनता दोअ्हि, “ओइ हननिया।” वा दोअ्हि, “हाइ प्रभु, का इताङ हिघा।”
11कालाउ प्रभु वासेहेङ दोअ्हि, “ल्हो रो सिधा दोअ्का चेअ्का दामाता हाने। इन्ता यहुदाको साअ्ता साउल मिङ हिका टारससता हिकाहेङ भो, हाइपानु वा पारथाना पादोङखे। 12वा दरसनता हननिया मिङ हिका एअ्मि द्याङलिअ्ता लोतेङ वा मिँ तिनाको दोअ्तेङ ताइमिर्हुता खुर ताअ्का तिङका हि।”
13कालाउबुङ हननिया दोअ्हि, “प्रभु, इङको द्याङ यरुसलेमता हिका परमेस्वरको पुनित द्याङगेलाइहेङ हेथे सान्ताइका हिघाखे इङको का हेन्जाङ द्याङगेलाइसो हिङका हिघा। 14इता बुङ नाङको मिङ र्हुका झाराङहेङ रिम्का खाबारा मुल धामिगेलाइसो वा निङका हि।”
15कालाउबुङ प्रभु वासेहेङ दोअ्हि, “हाने, हाइपानु बोजात्यागेलाइ, राजागेलाइ रो इस्राएलको खालको आगाता काङको मिङ पारचार पालि वा साल्का। 16हाइपानु काङको मिङको भाअ्सिङ वा हेथे पिर सहिलिगोयाङ, इङको का वासेहेङ तिम्पाङका।”
17कालाउ हननिया हानितेङ इङको साअ्लिअ्ता दुल्हि रो वार्हुता ताइको खुर ताअ्तेङ दोअ्हि, “साउल ओने, जेदोङ प्रभु इसु ना लोतेङहिका दामाता नाङकोता तिङका हिघाहि, वादोङ ना मिँ तिङका रो पुनित हाङसासो पोङघाका जेङ दोअ्तेङ कासेहेङ दिङगिल्का हि।”
18कालाउ ओदोङघरि साउलको मिँसो धालेभाइका हुल्हि रो वा आरोङ मिँ तिङका जेङहि। कालाउ वा ल्होहि रो चिभुअ्लि र्हुहि। 19कालाउ उम चातेङ बल निङहि।
साउल दमस्कसता पारचार पाका
साउल हेन्जाङ दिनाथिकापा दमस्कसता हिका इसुको चात्यागेलाइदोफा हि। 20कालाउ ओदोङघरि वा कचहरिसाअ्गेलाइता, “प्रभु इसु दोङ परमेस्वरको चान” दोअ्तेङ पारचार पालि तेङहि। 21कालाउ वाको काथा हिङकालाइ झाराङ भारभुसाइतेङ दोअ्लि तेङहि, “हाइ यरुसलेमता इसुको मिङ र्हुकालाइहेङ मुअ्पालि भोका रो इता बुङ एम्बालाइहेङ धेउतेङ मुल धामिगेलाइकोता चुमपुका बिचारहोइ लोका याआङ माको कुनु?” 22कालाउबुङ साउलको पारचार झन सरबङ हिका जेङतेङ हानिहि। दमस्कसता हिका यहुदिगेलाइहेङ इसु दोङ ख्रिस्ट हि दोअ्का दासि पिलाउ एम्बालाइ हाइदोङ जाबाफ घुरिपालि मादोहि।
23कालाउ हेन्जाङ दिनान्हुअ्सो यहुदिगेलाइ वासेहेङ सेअ्लि जाल पालि तेङहि। 24कालाउबुङ एम्बालाइको जाल साउल गिहि। यहुदिगेलाइ वासेहेङ सेअ्लि न्हिसिङनितिम पुरको फिनुगेलाइता म्होअ्तेङ हिघाखे। 25एन्साजेङलाउ वाको चात्यागेलाइ वासेहेङ न्हिसिङता दोङ दाल्होता ह्वाअ्तेङ उन्ठुइको बेर्हेमसो खुअ्पागिल्तेङ खाअ्पागिल्हि।#२ कोरिन्थि ११:३२-३३
साउल यरुसलेमता
26साउल यरुसलेमता लोकान्हुअ्सो वा इसुको चात्यागेलाइदोफा मिलिलि बल पाहि। कालाउबुङ एम्बालाइ साउलदोफा थिहि, हाइपानु वा जातिङको इसुको चात्या दोअ्तेङ एम्बालाइ खान्धुर पालि मादोहि। 27कालाउ बारनाबास साउलहेङ साल्तेङ दिङगिल्कालाइकोता चुमपुहि। कालाउ साउल प्रभुहेङ दामाता तिङका, प्रभु वादोफा धुइका रो वा दमस्कसता आट पातेङ इसुको मिङता पारचार पाका काथा एम्बालाइहेङ दोअ्पिहि। 28साउल यरुसलेमता एम्बालाइदोफाङ हिलि तेङहि रो माथिसिङ प्रभुको मिङता यरुसलेमता पारचार पाहि। 29वा ग्रिक राउ धुइका यहुदिगेलाइदोफा बहस पाघाखे, कालाउबुङ एम्बालाइ वासेहेङ सेअ्लि भोघाखे। 30इदोइ गितेङ प्रभुता खान्धुर पाका ओनेगेलाइ साउलहेङ काइसरियाता चुमपुहि रो इन्तासो वासेहेङ टारससता दिङगिल्पिहि।
31एन्सापा यहुदिया, गालिल रो सामरियाको गोताङ मन्डलिगेलाइता सान्ति रो मिलाप जेङहि। प्रभुको चात्यागेलाइ पुनित हाङसासो आट निङतेङ मन्डलि उजाइतेङ हानिहि।
पत्रुस लुड्डा रो योप्पाता
32पत्रुस इसोओसो गोताङ थामेता घुराइतेङ लुड्डाता हिका परमेस्वरको पुनित जनगेलाइकोता बुङ थुकालिलोहि। 33वा इन्ता एनियास मिङ हिका एअ्मि द्याङहेङ दुसुहि, जाइ येअ् बाअ्सारसो कुज्याजेङतेङ सिदाउसो ल्होलि दोका मान्थुघाहि। 34पत्रुस इङकोहेङ दोअ्हि, “ओइ एनियास, इसु ख्रिस्ट नासेहेङ एल्पाङ। ल्हो रो नाङको सिदाउ मिलिपा।” कालाउ इङको ओदोङघरि ल्होहि। 35लुड्डा रो सारोनता हिका झोको झाराङ द्याङगेलाइ इङकोहेङ तिङतेङ प्रभुभारि घुरिहि।
36योप्पा पुरता तबिता दोअ्का एअ्मि प्रभुता खान्धुर पाका ओने हिघाहि। ग्रिक राउता वासेहेङ डोरकास दोअ्घाखे, जाइको माने नाकुना जेङखे। वा दिनाङ बोमिको भालाइ पाघाखे रो हाइदोङ मान्थुकालाइहेङ साघाइघाखे। 37वा मासाअ्धेतेङ सिहि। द्याङगेलाइ वाको सिका जिउहेङ चिउपातेङ वासेहेङ र्हुताको एलोङ तालाको कोठाता ताअ्हि। 38लुड्डा योप्पाको भेरपा हिनाङसिङ, चात्यागेलाइ पत्रुस योप्पाता हि दोअ्का हिङतेङ, “केलाइकोता माबेलोमसिङ लोपि” दोअ्तेङ वाकोता न्हेमि द्याङगेलाइ बिम्ति पालि दिङगिल्हि। 39कालाउ पत्रुस ल्होतेङ एम्बालाइदोफा हानिहि। इन्ता थुकाकान्हुअ्सो एम्बालाइ वासेहेङ र्हुताको कोठाता चुमपुहि। रान्दिगेलाइ खारतेङ डोरकास एम्बालाइदोफा हिलाउ थिरतेङ ताअ्का धाबागेलाइ तिम्पातेङ पत्रुसको कोरबितिङ जोम्हि।
40कालाउबुङ पत्रुस एम्बालाइ झाराङहेङ बाहार दिङगिल्तेङ तिर्हो थोतेङ पारथाना पातेङ इङको सिकाजिउभारि घुरितेङ दोअ्हि, “ओइ तबिता, ल्हो!” कालाउ वा मिँ हेहि रो पत्रुसहेङ तिङतेङ ल्होतेङ योम्हि। 41पत्रुस वासेहेङ ताइको खुरहोइ चातेङ जुरुक्पा ल्होपाहि, कालाउ वा परमेस्वरको पुनित जनगेलाइ रो रान्दिगेलाइहेङ काइतेङ सितेङ बुङ सिन्हुका तबिताहेङ जिमा पिहि।
42एला इदोइ काथा योप्पा पुरको गोताङ थामेगेलाइता चारचाराइहि रो हेन्जाङ प्रभुहेङ खान्धुर पाहि। 43कालाउ पत्रुस हेन्जाङ दिनाथिकापा एअ्मि सिमोन दोअ्का धालेको काम पाकादोफा योप्पाता हिहि।
Currently Selected:
साल्तेङ दिङगिल्का 9: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
