साल्तेङ दिङगिल्का 8
8
मन्डलिहेङ सान्ताइका
1स्तिफनसहेङ उन्ठुइ तोतेङ सेअ्लाउ साउल बुङ मानिका हिघाखे। इङको दिनासो यरुसलेमता हिका मन्डलिहेङ सान्ताइलि तेङहि। साल्तेङ दिङगिल्कालाइ बिना एम्बालाइ झाराङ यहुदिया रो सामरियाको माउजाभारि राइन्हाहि। 2प्रभुको सेवापाकालाउ स्तिफनसहेङ चुमपुतेङ लिअ्हि रो वाको भाअ्सिङ बिलाप पाहि। 3कालाउबुङ साउल चाहिँ मन्डलिहेङ मुअ् पादोङघाखे। वा खान्धुर पाका वाबाल रो बेबालाइहेङ हेरतेङ चुमपुतेङ थुनाता ह्वाअ्पुघाखे।#साल्तेङ दिङगिल्का २२:४-५; २६:९-११
फिलिप सामरियाता
4कालाउ इङको राइन्हाकालाइ जेसोकोसोङ हानितेङ प्रभुको बचन पारचार पाहि। 5फिलिपचाहिँ सामरियाको एलोङ पुरता हानितेङ इसु ख्रिस्टको बारेता पारचार पाहि। 6फिलिपको दोअ्का बचन हिङतेङ रो वाको पाका कामगेलाइ तिङतेङ, द्याङगेलाइ वाको दोअ्का काथा रेम्फा हिङहि। 7हाइपानु हेन्जाङ द्याङगेलाइसो मासान हाङसागेलाइ बारका गालापातेङ र्हिकाइतेङ ओल्हिलि तेङहि। इन्ता हेन्जाङ कुज्या रो नेङगारागेलाइ बुङ एल्पाहि। 8एसापा सामरिया पुरता हिकालाइ हेन्जा लेङचाहि।
9सिमोन मिङ हिका एअ्मि द्याङ इन्ता हिघाहि। इङको लाम्फासो दोङ इङको पुरता चटक तिम्पातेङ सामरियाको द्याङगेलाइहेङ भारभुसाइ पाका हिघाहि। वा ताइमिहेङ कादोङ दोअ्तेङ तुजुक पाघाखे। 10म्हुइकासो बारका झाराङ द्याङगेलाइ इङकोहेङ, “परमेस्वरको मुल सरबङ हिका” द्याङ दोअ्तेङ मानिघाखे। 11एम्बालाइ इङकोहेङ मानिघाखे, हाइदोनु हेन्जाङ पहरसो इङको ताइको चटक तिम्पातेङ द्याङगेलाइहेङ भारभुसाइ पातेङ ताअ्का हिघाखे। 12कालाउबुङ जेलाउ एम्बालाइ परमेस्वरको सारभि रो इसु ख्रिस्टको रेम्काबानाल हिङपाका फिलिपको काथाता खान्धुर पाहि, कालाउ वाबालाइ रो बेबालाइ चिभुअ्लि र्हुहि। 13सिमोन ताइमिङ बुङ खान्धुर पाहि, चिभुअ्लि र्हुहि रो इङको फिलिपदोफा हिघिल्लि तेङहि। फिलिपको पाका बारका चिनोगेलाइ रो भारभुसाइका कामगेलाइ तिङतेङ वा भारभुसाइघाखे।
14सामरियाको द्याङगेलाइ परमेस्वरको बचन र्हुहि दोअ्का हिङतेङ यरुसलेमता हिका साल्तेङ दिङगिल्कालाइ पत्रुस रो युहन्नाहेङ एम्बालाइकोता दिङगिल्हि। 15ओबालाइ इन्ता लोतेङ एम्बालाइ पुनित हाङसा निनाको दोअ्तेङ एम्बालाइको भाअ्सिङ पारथाना पाहि। 16हाइपानु इङको पहरथिकापा एम्बालाइता हासुङर्हुता बुङ पुनित हाङसा लोका मान्थुघाहि। एम्बालाइको चिभुअ्लि प्रभु इसुको मिङता खिनिङ जेङका हिघाहि। 17जेलाउ ओबालाइ ताइको खुर एम्बालाइर्हुता ताअ्हि कालाउ एम्बालाइ पुनित हाङसा निङहि।
18एला साल्तेङ दिङगिल्कालाइ खुर ताअ्लाउ पुनित हाङसा निङलि दोखे दोअ्का तिङतेङ सिमोन एम्बालाइहेङ टाका पिलि चुमाहि 19रो एसा दोअ्हि “कासेहेङ बुङ इदोइ सरबङ पिसु रो का जाइर्हुता खुर ताअ्लाउ इङको पुनित हाङसा निनाको।”
20कालाउबुङ पत्रुस दोअ्हि, “नाङको टाका नादोफाङ मुअ्ताको, हाइपानु परमेस्वरको बर टाकासो चोल्लि द्वाङ दोअ्तेङ ना बिचार पान्हा। 21नाङको इदोइता ना बाखारा हि ना खाबारा दोङ हि, हाइपानु परमेस्वरको आगाता नाङको कोन्धाङ ठिक मान्थु। 22एला का दुरजन बिचार पाका हिघा दोअ्का काथा मानितेङ पास्ताइतेङ प्रभुहेङ पारथाना पा। एन्सा पान्हा पानु नाङको कोन्धाङको इस्का बिचार माफ ज्यावा। 23हाइपानु का तिङखा, ना खाकासो पोङघाका हिन्हा, कालाउ पापको धेउन्हाकाता हिन्हा।”
24कालाउ सिमोन पत्रुस रो युहन्नाहेङ दोअ्हि, “नेलाइदोङ काङको भाअ्सिङ प्रभुहेङ पारथाना पापिसु रो नेलाइको दोअ्का हिदि बुङ काथा कार्हुता माल्वाको।”
25कालाउ एम्बालाइ दासि पिलिदोकान्हुअ्सो रो प्रभुको बचन धुइकान्हुअ्सो सामरिगेलाइको हेन्जाङ देरागेलाइता रेम्काबानाल हिङपातेङ एम्बालाइ यरुसलेम घुरिहि।
फिलिप रो इथियोपियाको खाजान्चि
26इङकोन्हुअ्सो प्रभुको एलोङ स्वरगदुत फिलिपहेङ दोअ्हि, “ल्होतेङ माहेपाहा यरुसलेमसो गाजा हानिका दामाभारि हाने, इन्ता उदादाङका थामेको दामा हि।” 27कालाउ फिलिप ल्होतेङ हानिहि रो एअ्मि इथियोपियाको हिजाराहेङ दुसुहि। जाइ इथियोपिया मुलुकको माहारानि कन्दाकिको बारका हाकिम रो गोताङ काउरिको खाजान्चि हिघाखे। वा यरुसलेमता परमेस्वरहेङ पुजिलि हानिका हिघाखे। 28वा घुरिलाउ ताइको बग्गिता योम्तेङ यासाइया परमेस्वर पाहासो धुइकाको किताब पर्हिदोङघाखे। 29कालाउ पुनित हाङसा फिलिपहेङ दोअ्हि, “हाने रो इङको बग्गिहेङ पिताइ।”
30फिलिप वाकोता धाअ्तेङ हानिहि रो वासेहेङ यासाइया परमेस्वर पाहासो धुइकाको किताब पर्हितेङहिका हिङतेङ वासेहेङ हिअ्हि, “ना पर्हितेङहिका काथा गिखेना?”
31कालाउ वा दोअ्हि, “हासुङ मादोअ्पिसिङ का हेसापा गिलि?” कालाउ वा फिलिपहेङ बग्गिता धोल्तेङ वाकोदोसा योम्लि बिम्ति पाहि। 32एला वा पर्हितेङहिका धरमकिताबको भाग इदोइ हिघाहि:
“जेसापा पान्ठा सेअ्लि चुमपुन्हाखे,
वा मुइसा चेकालाइको आगाता सिकापा हिखे,
एन्सा दोङ वा ताइको नुइ माहेहि।#यासाइया ५३:७-८
33वा बादानामि जेङलाउ बुङ निया मानिङहि।
वाको खालको बारेता हासु दोअ्ताङ?
हाइदोनु वाको जिबन सुमिङसो चुमपुन्हाहि।”
34कालाउ इङको हिजारा फिलिपहेङ हिअ्हि, “निगाहा पातेङ कासेहेङ दोअ्, परमेस्वर पाहासो धुइका इदोइ हासुको बारेता दोअ्का? वाको ताइकोङ बारेता ना बो हासुङको बारेता?” 35कालाउ फिलिप ताइको नुइ हेतेङ धरमकिताबको इदोङ भागसो वासेहेङ इसुको रेम्काबानाल हिङपाहि।
36कालाउ ओबालाइ दामाता हानिकाहानिकाताङ आधे चि हिका एलोङ थामे भेरपा थुकालिलोहि। इङको हिजारा दोअ्हि, “खाङ, इता चि हि, कासेहेङ चिभुअ्लि र्हुलि हाइहोइ रोकिलि द्वावा?” 37[फिलिप दोअ्हि, “गोताङ कोन्धाङसो दोङ खान्धुर पान्हा पानु ना चिभुअ्लि र्हुलि द्वाना।” वा दोअ्हि, “इसु ख्रिस्ट दोङ परमेस्वरको चान हि दोअ्तेङ का खान्धुर पाखा।”]#८:३७ इदोइ पद आधे पुरना स्रोत बाइबलता मान्थु। 38वा बग्गि जाअ्पालि हुकुम पितेङ फिलिप रो इङको हिजारा न्हेमिङ चिता खुअ्हि। कालाउ फिलिप वासेहेङ चिभुअ्लि पिहि। 39कालाउबुङ जेलाउ ओबालाइ चिसो बाहार ओल्हितेङ लोहि, कालाउ प्रभुको हाङसा फिलिपहेङ चा:तेङ चुमपुहि। इङकोन्हुअ्सो हिजारा फिलिपहेङ आरोङ मातिङहि रो वा लेङचातेङ ताइको दामा लाअ्हि।
40कालाउबुङ फिलिप आस्दोदता तिङन्हाहि रो काइसरिया माथुकापा गोताङ पुरगेलाइता रेम्काबानाल हिम्पाकाताङ हानिहि।
Currently Selected:
साल्तेङ दिङगिल्का 8: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
