साल्तेङ दिङगिल्का 10
10
करनेलियस पत्रुसहेङ काइका
1काइसरियाता करनेलियस मिङ हिका एअ्मि द्याङ हिघाखे। वा इटालिया दोअ्का पलटनको एअ्मि रोमि काप्तान हिघाखे। 2वा परमेस्वरहेङ मान पाघाखे रो वा रो वाको गोताङ खाल परमेस्वरता थिघाखे। वा मानथुकालाइहेङ साघाइघाखे रो दिनाङ परमेस्वरदोफा पारथाना पाघाखे।
3इङको नितिमा सुम बजेभारि दरसनता परमेस्वरको एलोङ स्वरगदुत ताइमिभारि लोतेङ एसा दोअ्तेङ हिका हिङहि, “ओइ करनेलियस!” 4करनेलियस थितेङ स्वरगदुतहेङ खाङहि रो दोअ्हि, “प्रभु, दोअ्।” कालाउ स्वरगदुत करनेलियसहेङ दोअ्हि, “नाङको पारथाना रो ना मान्थुकालाइहेङ साघाइका परमेस्वरको आगाता थुकाका हि। 5एला द्याङगेलाइहेङ योप्पाता दिङगिल रो पत्रुस दोअ्का सिमोनहेङ काइगिल। 6वा धालेको काम पाका सिमोनकोता हिका हि, जाइको साअ् जाहादिको काम्बेता हि।”
7इदोइ दोअ्तेङ स्वरगदुत करनेलियससो बेदाङगि र्हुहि। इङकोन्हुअ्सो करनेलियस ताइको कामत्यागेलाइता न्हेमि रो वाको एअ्मि पलटनहेङ काइहि। 8रो एम्बालाइहेङ गोताङ काथा दोअ्पितेङ योप्पाता दिङगिल्हि।
पत्रुसको दरसन
9जुम्निदिना एम्बालाइ नितिमाको तेन्हे बजेभारि योप्पा पुरको भेरपा थुकालिलोहि। इङको पहर पत्रुस साअ्को र्हुताको तालाता पारथाना पालि ताङहि। 10पत्रुस पारथाना पाकाताङ पालाउ म्हितुहि रो वा चालि मन पाहि। कालाउबुङ बोगेलाइ चाकाचिज गाकाताङ पालाउ वा ध्यान पालि तेङहि। 11वा स्वरग हेनाका रो इन्तासो द्या सुरता धेउन्हाका धाबाभाइका सुमिङभारि हुल्तेङहिका तिङहि। 12इङको धाबाता सुमिङको गोताङ खालको द्यालोङ खोकोइ हिका गुपुस रो ह्यालतेङ हिगिल्का जिब रो आकासको जिह्याँ जुइलेङगेलाइ हिघाखे। 13कालाउ पत्रुस एलोङ गाला हिङहि, “ओइ पत्रुस, ल्हो रो एम्बालाइहेङ सेअ्तेङ चा।”
14कालाउबुङ पत्रुस दोअ्हि, “माको प्रभु, हिदिङ हुकुम रो आपुनित चिज काङको नुइता हेअ्लाउ दुलनाङ मान्थु।” 15वा आरोङ इस्का गाला हिङहि, “परमेस्वर जेदोङ चोखो पाका हि इङकोहेङ ना हुकुम रो आपुनित मादोअ्।” 16सुम्खे थिकापा इन्सिकाङ जेङहि रो इङको आरोङ स्वरगता चुमपुन्हाहि।
17जेलाउ पत्रुस ताइमिको तिङका दरसनको माने हाइ वाला दोअ्तेङ आवाइतेङ हिघाखे, इङको दोङ पहर करनेलियसको दिङगिल्का द्याङगेलाइ सिमोनको साअ् भोतेङ फिनु आगाता जाअ्लि लोहि 18रो एम्बालाइ, “पत्रुस दोअ्का सिमोन इता हिका हि बे?” दोअ्तेङ बारका गालापातेङ हिअ्हि।
19जेलाउ पत्रुस दरसनको बारेता फोम पादोङघाखे, कालाउ पुनित हाङसा वासेहेङ दोअ्हि, “खाङ, लेता सुमि द्याङ लोतेङ नासेहेङ भोदोङखे। 20ल्हो रो लेता खुअ्तेङ एम्बालाइदोफाङ हाने, हाइदोनु एम्बालाइहेङ का दिङगिल्का।”
21कालाउ पत्रुस लेता खुअ्हि रो इङको द्याङगेलाइकोता हानितेङ दोअ्हि, “खाङसु, नेलाइको भोका द्याङ काआङ। नेलाइ हेथे कामसो लोसुन्हा?”
22एम्बालाइ दोअ्हि, “काप्तान करनेलियस केलाइहेङ दिङगिल्का। जाइ वा धरमाति रो परमेस्वरदोफा थिका रो गोताङ यहुदि जात्यासो आदर निङका द्याङ। नासेहेङ वाको साअ्ता काइगिल्तेङ नासो बानाल हिङलि दोअ्तेङ पुनित स्वरगदुतसो वासेहेङ हुकुम जेङका हि।” 23कालाउ वा एम्बालाइहेङ लिअ्ता काइतेङ चुमपुहि रो इङको दिलिमा एम्बालाइ इन्ताङ बासा हि।
करनेलियसको साअ्ता पत्रुस
जुम्निदिना पत्रुस ल्होतेङ एम्बालाइदोफा हानिहि रो योप्पाको हेअ्मि दादाओनेगेलाइ वाकोदोफाङ हानिहि। 24इतिनिदिना एम्बालाइ काइसरियाता थुकाहि। इन्ता ताइ द्याङगेलाइ रो मिलिका सानाइतिगेलाइहेङ काइतेङ करनेलियस एम्बालाइको दामा खान्तेङ हिघाखे। 25जेलाउ पत्रुस लिअ्ता लोहि कालाउ करनेलियस वाकोदोफा दुसुतेङ वाको खोकोइता सेउपाहि। 26कालाउबुङ पत्रुस वासेहेङ एसा दोअ्तेङ ल्होपाहि, “ल्हो, का बुङ ते म्हुइका द्याङखिनिङ।”
27पत्रुस करनेलियसदोफा काथा पाकाताङ साअ्लिअ्ता दुल्लाउ इन्ता वा हेन्जाङ द्याङगेलाइ जोम्तेङ हिका तिङहि। 28पत्रुस एम्बालाइहेङ दोअ्हि, “बोजात्यादोफा सङगत पालि रो एम्बालाइहेङ दुसुलि केलाइ यहुदिगेलाइको भाअ्सिङ उचित माको दोअ्का काथा नेलाइ झाराङ गिकाङ हिसुन्हा। कालाउबुङ परमेस्वर कासेहेङ हिदिङ द्याङहेङ हुकुम रो आपुनित मादोलि दोअ्तेङ तिङपाका हि। 29इदोइभाअ्सिङ काइतेङसाङ का नेलाइकोता लोघा। नेलाइ कासेहेङ हाइपालि काइसुन्हा? एला दोअ्सु।”
30कालाउ करनेलियस दोअ्हि, “द्यानि लाम्फरति इदोङ साअ्ता का नितिमाको सुम बजेको पारथाना पादोङघाखा, कालाउ चोहोचोहोका धाबा लागाइका एअ्मि द्याङ काङको आगाता जाअ्हि 31रो दोअ्हि ‘करनेलियस, परमेस्वरको आगाता नाङको पारथानाको हिङन्हाका हि रो नाङको मान्थुकालाइहेङ पिकाको फोम जेङका हि। 32इदोइभाअ्सिङ योप्पाता द्याङ दिङगिल्तेङ पत्रुस दोअ्का सिमोनहेङ काइगिल। वा जाहादिको काम्बेता धालेको काम पाका सिमोनको साअ्ता हिका हि।’ 33कालाउ का नाङकोता द्याङ दिङगिल्घा रो ना दाया पातेङ लोन्हा। एला प्रभुसो नासेहेङ हुकुम जेङका गोताङ काथागेलाइ हिङलि केलाइ झाराङ परमेस्वरको आगाता जोम्का हिन्हाहि।”
पत्रुसको बानाल
34कालाउ पत्रुस धुइलि तेङहि, “जातिङ दोङ का तिङखा, परमेस्वर पछेपात मापाखे।#न्याम १०:१७ 35कालाउबुङ द्याङ जेदोङ जात्याको हिलाउ बुङ जाइ वासेहेङ थिखे रो उचित काम पाखे, परमेस्वर इन्सिकालाइहेङ मोन्दाताखे। 36नेलाइ गिसुखेना, इसु ख्रिस्टसो पारचार पाका सान्तिको रेम्काबानाल परमेस्वर इस्राएलिगेलाइता पिगिल्हि। (वादोङ झाराङको प्रभु।) 37युहन्नाको पारचार पाका चिभुअ्कान्हुअ्सो, गालिलसो गोताङ यहुदियाभारि पारचार पाका बचन इदोइ, 38परमेस्वर नासरतको इसुहेङ ताइकोङ पुनित हाङसा रो सरबङ वाता हुपिन्हा। परमेस्वर वाकोदोफा हिनाङसिङ वा भालाइको काम पातेङ साइतानसो सान्ताइन्हाकालाइहेङ एल्पातेङ हिगिल्हि। हाइपानु परमेस्वर वाकोदोफा हिघाहि।
39“कालाउ वा यहुदिगेलाइको पुरता रो यरुसलेमता पाका गोताङ काथाको केलाइ दासि। वासेहेङ एम्बालाइ कुरुसता टाङगाइतेङ सेअ्हि। 40वासेहेङ परमेस्वर सुम्निता सिन्हुपातेङ ल्होपाहि रो झाराङको आगाता तिङपाहि। 41झाराङहेङ माको, कालाउबुङ केलाइ जाइहेङ परमेस्वर दासिको रुपता साल्हि रो वा सिकासो सिन्हुकाअ्सो केलाइ वाकोदोफा चाका आम्का पाका हिघान्हाहि। 42वा केलाइहेङ रेम्काबानाल पारचार पालि, वा सिन्हुका रो सिकालाइको निया पाका जेङलिको भाअ्सिङ परमेस्वरसो साल्का द्याङ दोअ्का दासि पिलि हुकुम पाका हि। 43झाराङ परमेस्वर पाहासो धुइकालाइ वाको दासि पिका हि। वासेहेङ खान्धुर पाका झाराङ वाको मिङसो पाप माफ निनावा।”
44पत्रुस इदोइ काथा धुइकाधुइकाताङ बचन हिङका झाराङर्हुता पुनित हाङसा खुअ्हि। 45बोजात्यागेलाइर्हुता बुङ पुनित हाङसाको बर हुपिका तिङतेङ पत्रुसदोफा लोका यहुदि खान्धुरिगेलाइ भारभुसाइहि 46हाइपानु बो राउता धुइतेङ एम्बालाइ परमेस्वरहेङ बाखिन्तेङ हिका ओबालाइ हिङहि। कालाउ पत्रुस दोअ्हि, 47“केलाइभाइपाङ पुनित हाङसा निङका एबालाइहेङ चिको चिभुअ्लि र्हुलि हासु रोकिलि द्वावा?”
48कालाउ पत्रुस एम्बालाइहेङ इसु ख्रिस्टको मिङता चिभुअ्लि र्हुलि पिसु दोअ्तेङ हुकुम पिहि। कालाउ एम्बालाइ पत्रुसहेङ आधे दिनाथिकापा ताइमिगेलाइदोफा हिलि बिम्ति पाहि।
Currently Selected:
साल्तेङ दिङगिल्का 10: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
