साल्तेङ दिङगिल्का 7
7
स्तिफनसको बानाल
1कालाउ मुल धामि स्तिफनसहेङ हिअ्हि, “हाइ इदोइ काथा ठिक?”
2स्तिफनस दोअ्हि, “दादाओनेगेलाइ रो आबागेलाइ, हिङसु। केलाइको आजुखाल आब्राहामहेङ हारानता हिका लाम्फा मेसोपोटामियाता हिलाउ परमेस्वर ताइको पारताप तिङपाका हिघाहि 3रो वासेहेङ दोअ्का हिघाहि, ‘ना ताइको मुलुक रो ताइको खालसो ओल्हितेङ, जेदोङ मुलुक का नासेहेङ तिङप्याङका, इन्ता हाने।’#सिरजाइ १२:१
4“कालाउ आब्राहाम कल्दिगेलाइको मुलुकसो ओल्हितेङ हारानता लोतेङ हि। वाको आबा सिकान्हुअ्सो परमेस्वर वासेहेङ इन्तासो इदोइ मुलुकता चुमपुहि, जेता एला नेलाइ हिका हिसुन्हा।#सिरजाइ ११:३१; १२:४ 5वासेहेङ इङको थामेता जायजात ते लाअ्पि, खोकोइ ताअ्का थामेथिकापा बुङ मापिहि। कालाउबुङ वाको खाल मान्थुलाउ बुङ इङको जायजात परमेस्वर आब्राहामको खालगेलाइहेङ पिलि केरा पाहि।#सिरजाइ १२:७; १३:१५; १५:१८; १७:८ 6परमेस्वर एसा दोअ्हि, ‘नाङको खाल बोमुलुकता हानितेङ हिलिगोयावा। ओबालाइ एम्बालाइहेङ बान्धाइ बान्हाइतेङ द्यासाइ बाअ्सारथिकापा बान्धाइ बान्हाइतेङ ताअ्तावा।#सिरजाइ १५:१३-१४ 7कालाउबुङ एम्बालाइ जेदोङ जात्या बान्धाइ जेङतेङह्यावा इङको जात्याको नियाँ का पाङका। इङकोन्हुअ्सो एम्बालाइ ओल्हितेङ लोतेङ इदोङ थामेता काङको उपासाना पावा।’#दामालाअ्का ३:१२ 8परमेस्वर आब्राहामदोफा खातानाको केरा चाहि रो वा इसहाकको आबा जेङतेङ येअ्निता इसहाकको खाताना पाहि। इसहाक याकुबको आबा जेङहि, याकुब तेन्हे खालको आबा जेङहि।#सिरजाइ १७:१०-१४; २१:२-४; २५:२६; २९:३१-३५:१८
9“याकुबको चान योसेफहेङ ताइकोङ दादाओनेगेलाइ खाङलि माकिअ्तेङ मिस्र मुलुकता पिअ्गिल्हि। कालाउबुङ परमेस्वर योसेफदोफा हिघाहि।#सिरजाइ ३७:११,२८; ३९:२,२१ 10परमेस्वर वाको गोताङ तु:सो लाअ्पातेङ मिस्र मुलुकको राजा फारोको आगाता वासेहेङ निगाहा पाहि रो आकिल पिहि। कालाउ फारो वासेहेङ मिस्र मुलुक रो वाको गोताङ साअ्को हाकिम बान्हाइहि।#सिरजाइ ४१:३९-४१
11“इङकोन्हुअ्सो गोताङ मिस्र मुलुक रो कनानता आनिकाल लोतेङ बारका तु: जेङहि रो केलाइको खालगेलाइ आनाज मानिङहि।#सिरजाइ ४२:१-२ 12कालाउबुङ याकुब मिस्र मुलुकता आनाज हि दोअ्का काथा हिङतेङ ताइको चानगेलाइहेङ लाङखेप इन्ता दिङगिल्हि। 13एम्बालाइ भेनेङखे आनाज चोल्लि हानिलाउ योसेफ वाको दादाओनेगेलाइहेङ ताइमिहेङ नाल्पाहि रो वा ताइको जाहानहेङ फारोहेङ बुङ गिपाहि।#सिरजाइ ४५:१,१६ 14कालाउ योसेफ ताइको आबा याकुबहेङ रो वाको गोताङ खाल जाइ सुमकुरितेनामि हिघाखे, झाराङहेङ मिस्रता काइगिल्हि।#सिरजाइ ४५:९-१०,१७-१८; ४६:२७ 15इन्ता हानिकान्हुअ्सो याकुब रो वाको तेन्हे चानगेलाइ झाराङ मिस्रमुलुकताङ सिहि।#सिरजाइ ४६:१-७; ४९:३३ 16एम्बालाइको सिका जिउ सकेमता चुमपुहि रो आब्राहाम हमोरको चानगेलाइसो टाका तिरितेङ चोलका तोमता ताअ्हि।#सिरजाइ २३:३-१६; ३३:१९; ५०:७-१३; यहोसु २४:३२
17“कालाउबुङ जेलाउ परमेस्वर आब्राहामहेङ पाका केरा पोङघाका पहर भेरपा लोहि कालाउ मिस्र मुलुकता इङको द्याङगेलाइ बर्हेलि तेङहि रो एम्बालाइको साङख्या हेन्जाङ जेङहि। 18कालाउ मिस्र मुलुकता योसेफहेङ मानाल्का भेनेङ राजा जाअ्हि।#दामालाअ्का १:७-८ 19वा केलाइको जात्याको खिलाप जाअ्हि। केलाइको खालगेलाइको जामालाइ साअ्सो बाहार चुमपुतेङ ताअ्लि लागाइघाखे। एसापा ताङधाराङ जोन्मिका जामालाइ झाराङ सिघाखे।#दामालाअ्का १:१०-११,२२
20“इदोङ पहर मोसाको जोलोम जेङहि। वा परमेस्वरको नजरता रेम्का जामाल हिघाखे। वा सुम माहिनाथिकापा ताइको आबा आमाइको साअ्ता पोसेन्हाहि।#दामालाअ्का २:२ 21कालाउ वा बाहार थालन्हाकान्हुअ्सो फारोको चामिन्दि वासेहेङ तोल्हेतेङ चुमपुहि रो ताइकोङ चान बान्हाइतेङ पोसेहि।#दामालाअ्का २:३-१० 22मोसाहेङ मिस्रिगेलाइको गोताङ बिद्या पिहि रो वा ताइको बचन रो कामता सरबङ हिका जेङहि।
23“जेलाउ मोसा न्हेकुरि बाअ्सारको जेङहि, कालाउ ताइको इस्राएलि दादाओनेगेलाइहेङ दुसुलि मन पाहि।#दामालाअ्का २:११-१५ 24एअ्नि वा एअ्मि मिस्रि एअ्मि इस्राएलहेङ दान्हाइतेङहिका तिङहि। वा इङको इस्राएलिहेङ बान्चिपालि भोलाउ मिस्रिहेङ सेअ्हि। 25परमेस्वर मोसासो दोङ इस्राएलिगेलाइहेङ बान्चिपालि तोम्काहि दोअ्तेङ ताइकोङ द्याङगेलाइ ग्यावा दोअ्का वा फोम पाका हिघाखे। कालाउबुङ एम्बालाइ इदोइ मागिहि। 26जुम्निदिना एम्बालाइ दोङ ताताइमिता चेरसुतेङ हिका पहरता मोसा लोहि रो एम्बालाइहेङ मिलिपालि बलपातेङ दोअ्हि, ‘नेलाइते दादाओनेता हाइपालि चेरसुतेङ हिसुखेना?’
27“कालाउबुङ हेपाइका इस्राएलि मोसाहेङ धाकालाइतेङ एसा दोअ्हि, ‘केलाइर्हुता हाकिम रो निया पाका जेङलि नासेहेङ हासु साल्हि? 28आन्जि इङको मिस्रिहेङ सेअ्काभाइपा ना कासेहेङ बुङ सेअ्लि भोखेना?’ 29इस्का जाबाफ हिङतेङ मोसा खाअ्तेङ मिद्यान मुलुकता हानितेङ ओसोङ हिलि तेङहि। इन्ता वाको न्हेमि चानगेलाइ जोन्मिहि।#दामालाअ्का १८:३-४
30“न्हेकुरि बाअ्सार दोकान्हुअ्सो सिनाइ आरदाङको उदादाङका थामेता ओअ्तेङ हिका झालासको मेता एअ्मि स्वरगदुत मोसाकोता देखाल पिहि।#दामालाअ्का ३:१-१० 31जेलाउ मोसा इदोइ तिङहि कालाउ वा इदोइ तिङतेङ भारभुसाइहि। इङको खाङलिको भाअ्सिङ भेरपा हानिलाउ परमप्रभुको इस्का गाला हिङहि, 32‘का नाङको खालगेलाइको परमेस्वर: आब्राहाम, इसहाक रो याकुबको परमेस्वर।’ मोसा फिरलि तेङहि रो वा इङकोभारि वा खाङलिसुदाङ आट मापाहि।
33“कालाउ परमप्रभु मोसाहेङ दोअ्हि, ‘नाङको खोकोइको जुता होअ्, हाइपानु जेदोङ थामेता जाअ्तेङ हिन्हा, इङको पुनित थामे। 34मिस्र मुलुकता हिका काङको राइतिको तु: का तिङघा रो एम्बालाइको बिलाप बुङ हिङघा। इदोइभाअ्सिङ एम्बालाइहेङ लाअ्पालि का खुअ्तेङ लोका हिघा। एला लोउ, का नासेहेङ मिस्र मुलुकता दिङगिलाङका।’
35“इदोङ मोसा, जाइहेङ एम्बालाइ ‘हासु नासेहेङ हाकिम रो निया पाका बान्हाइहि’ दोअ्तेङ खाङलि माकिअ्घाखे। इङकोहेङ परमेस्वर झालासता देखाल पिका स्वरगदुतसो हाकिम रो भालाइ पाका बान्हाइतेङ दिङगिल्हि।#दामालाअ्का २:१४ 36इदोङ मिस्र मुलुकता, इका जाहादिता रो न्हेकुरि बाअ्सारथिकापा उदादाङका थामेता भारभुसाइका काम रो चिनोगेलाइ पातेङ एम्बालाइहेङ बाहार चुमाहि।#दामालाअ्का ७:५; १४:२१; गान्देका १४:३३
37“इङको इङकोङ मोसा, जाइ इस्राएलिगेलाइहेङ दोअ्का हिघाखे, ‘परमेस्वर कासेहेङ जाअ्पाकाभाइपाङ नेलाइको दादाओनेगेलाइको माझासो नेलाइको भाअ्सिङ एअ्मि परमेस्वर पाहासो धुइका जाअ्पावा।’#न्याम १८:१५,१८ 38इदोइ इङकोङ मोसा, जाइ इस्राएलिगेलाइ सिनाइ आरदाङको उदादाङका थामेता जोम्लाउ एम्बालाइदोफाङ हिघाखे। स्वरगदुत सिनाइ आरदाङता वाकोदोफाङ धुइघाखे रो वादोङ स्वरगदुतसो निङका सिन्हुका बचन इस्राएलिगेलाइहेङ हिङपाहि।#दामालाअ्का १९:१-२०:१७; न्याम ५:१-३३
39“कालाउबुङ केलाइको आजुखालगेलाइ वाको काथागेलाइ मानिलि माकिअ्हि। एम्बालाइ वासेहेङ लाअ्तेङ मिस्रमुलुकताङ घुरितेङ हानिलि मन पाहि। 40एम्बालाइ मोसाको दादा हारुनहेङ एसा दोअ्हि, ‘केलाइको आगाआगा हानिका दिरगेलाइ केलाइको भाअ्सिङ बान्हाइपि। हाइपानु केलाइहेङ मिस्र मुलुकसो लाअ्पातेङ चुमाका इदोइ मोसाहेङ हाइ हेसा जेङहि केलाइ माग्याङ।’#दामालाअ्का ३२:१ 41इङको दिनाता एम्बालाइ एलोङ बासाको पुतला बान्हाइहि। इङकोता भोक बुङ पिहि रो ताइको खुरको कामता लेङचाहि।#दामालाअ्का ३२:२-६ 42कालाउबुङ परमेस्वर एम्बालाइहेङ लाअ्हि रो एम्बालाइहेङ आकासको फुरुगेलाइहेङ पुजेलि लाअ्पिहि। जाइको बारेता परमेस्वर पाहासो धुइकालाइको किताबता लेखिका हि:
‘ओइ इस्राएलिगेलाइ, हाइ नेलाइ न्हेकुरि बाअ्सारथिकापा
उदादाङका थामेता कासेहेङ गुपुसभोक रो भेटिगेलाइ पिसुन्हा?
43एम्बालाइ मोलोखको पाल रो कालाउ रेफन दिरको फुरु
रो नेलाइ पुजेलि बान्हाइका मुरतिगेलाइ तोल्हितेङ चुमासुन्हा।
एला का नेलाइहेङ बेबिलोनसो ओदोइपार ओल्हिपागिलाङका।’#आमोस ५:२५-२७
44“उदादाङका थामेता केलाइको आजुखालगेलाइको थान हिघाहि। मोसाको तिङकाभाइका परमेस्वरको हुकुम बमोजिम इदोइ त्यार जेङका हिघाहि।#दामालाअ्का २५:९,४० 45केलाइको खालगेलाइ बुङ ओबालाइको पालाता बोजात्यागेलाइको मुलुक खाबराता चुमालाउ यहोसुदोसा इङको पाल चुमाहि रो दाउदको पालाथिकापाङ इङको इन्ताङ हि।#यहोसु ३:१४-१७ 46राजा दाउद परमेस्वरको दाया निङतेङ वा याकुबको परमेस्वरहेङ ‘नाङको हिका थामे बान्हाइलि निनाको’ दोअ्तेङ बिम्ति पाहि।#२ सामुएल ७:१-१६; १ इतिहास १७:१-१४ 47न्हुअ्सो वाको भाअ्सिङ साअ्चाहिँ सोलोमन बान्हाइहि।#१ राजा ६:१-३८; २ इतिहास ३:१-१७
48“कालाउबुङ खुरहोइ बान्हाइका साअ्गेलाइता बारका परमेस्वर बासा माहिखे, परमेस्वर पाहासो धुइका एसा दोअ्का हि:
49‘काङको गादि स्वरग,
रो सुमिङ काङको खोकोइ ताअ्का थामे,
नेलाइको भाअ्सिङ हिसिका साअ् बान्हाइस्वाना? परमप्रभु दोअ्खे, काङको माइसाका थामे हिदि?#यासाइया ६६:१-२
50हाइ इदोइ गोताङ चिज काङकोङ सिरजाइका माको कुनु?’
51“ओइ आटेरि द्याङगेलाइ, थाङका कोन्धाङ रो न्हातोङ माहिङकालाइ, नेलाइ दिनाङ पुनित हाङसाको खिलाप पासुखेना। नेलाइको खाल जिसिका पाहि नेलाइ बुङ इन्सिकाङ पासुखेना।#यासाइया ६३:१० 52परमेस्वर पाहासो धुइकालाइता हिदोइचाहिँहेङ नेलाइको आजुखालगेलाइ मासान्ताइहि? ओबालाइ धरमाति कामत्या लोदोङखे दोअ्कालाइ झाराङहेङ सेअ्हि। वासेहेङ नेलाइ धोका पिसुन्हा रो सेअ्सुन्हा। इङको झाराङहेङ सेअ्हि, जाइ इङको धरमाति कामत्याको लोका बानाल लाम्फासो दोङ हिङपाका हिघाखे। एला नेलाइचाहिँ वासेहेङ धोकापिका रो जिउसेअ्का जेङका हिसुन्हा।#मत्ति ५:११-१२ 53नेलाइ स्वरगदुतगेलाइको खुरसो परमेस्वरको न्याम निङसुन्हा, कालाउबुङ इङकोहेङ मामानेसुन्हा।”
स्तिफनस उन्ठुइहोइ तोतेङ सेअ्न्हाका
54जेलाउ एम्बालाइ स्तिफनको इदोइ काथा हिङहि कालाउ एम्बालाइ चेरताम्पातेङ तासिङ रेअ्लि तेङहि। 55कालाउबुङ वाचाहिँ पुनित हाङसासो पोङघान्हातेङ स्वरगभारि खाङका खाङकाङ पाहि, कालाउ वा परमेस्वरको पारताप रो इसुहेङ परमेस्वरको दाम्पाहा जाअ्तेङ हिका तिङहि। 56वा दोअ्हि, “खाङसु, का स्वरग हेनाका तिङदोङखा रो का द्याङको चानहेङ परमेस्वरको दाम्पाहा जाअ्तेङ हिका तिङदोङखा।” 57कालाउबुङ एम्बालाइ र्हिकाइतेङ ल्होहि, ताताइको न्हातोङ थुम्हि रो एम्बालाइ झाराङ वासेहेङ झाअ्मेरहि। 58एम्बालाइ स्तिफनसहेङ पुर बाहार ओल्हिपातेङ चुमपुहि रो वार्हुता उन्ठुइ तोहि। दासिगेलाइ ताइको धाबागेलाइ साउल मिङ हिका एअ्मि वाजानको खोकोइ भेरपा ताअ्हि।
59जेलाउ एम्बालाइ स्तिफनसहेङ उन्ठुइ तोतेङ हिघाखे, कालाउ वा पारथाना पाहि, “प्रभु इसु, काङको हाङसाहेङ र्हुपि।” 60वा तिर्हो थोतेङ बारका गालापातेङ र्हिकाइतेङ दोअ्हि, “प्रभु इसु, इदोइ पापको दुस एबालाइहेङ मालाग्याको।” दोअ्तेङ वा पारान लाअ्पिहि।
Currently Selected:
साल्तेङ दिङगिल्का 7: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
