साल्तेङ दिङगिल्का 18
18
पावल कोरिन्थ पुरता हानिका
1इङकोन्हुअ्सो पावल एथेन्ससो बिदा जेङतेङ कोरिन्थता हानिहि। 2वा पोन्टसता हिका आकिलास मिङ हिका एअ्मि यहुदिहेङ दुसुहि। वा ताइको बेअ् प्रिस्किलादोफा इटालियासो लोका हिघाखे, हाइपानु रोमि राजा क्लाउडियस गोताङ यहुदिगेलाइहेङ रोमसो ओल्हितेङ हानिलि हुकुम पिका हिघाखे। पावल ओबालाइहेङ दुसुलि हानिहि। 3एम्बालाइ पाल बान्हाइका काम पातेङ जिबिका चालाइघाखे। पावल एम्बालाइदोफाङ हितेङ काम पाहि। हाइपानु वा बुङ एम्बालाइभाइपाङ पाल बान्हाइका काम पातेङ जिबिका चालाइघाखे। 4पावल माइसाका दिनाकिअ्पाङ कचहरिसाअ्ता यहुदि रो बोजात्यागेलाइदोफा बहस पातेङ ओबालाइहेङ मानिपालि भोघाखे।
5जेलाउ सिलास रो तिमोथि माकेडोनियासो थुकालिलोहि, कालाउ पावल पारचारको कामता लागितेङ हिलाउ यहुदिगेलाइहेङ इसु दोङ ख्रिस्ट हि दोअ्का दासि पिदोङघाखे। 6कालाउबुङ जेलाउ ओबालाइ बिरोध पातेङ पावलको आपजस पालि तेङहि, कालाउ वा ताइको धाबा थि:तेङ ओबालाइहेङ दोअ्हि, “नेलाइको हिति नेलाइकोङ कापालता पर्याको, कासेहेङ बादानामि माल्वाको। एला ओसो का पारचार पालि बोजात्यागेलाइकोता हानाङका।”
7कालाउ पावल इन्तासो परमेस्वरहेङ मानिका तितस युस्तस मिङ हिका एअ्मि ग्रिक द्याङको साअ्ता हानिहि। वाको साअ् कचहरिसाअ्को भेरपाङ हिघाहि। 8कचहरिसाअ्को हाकिम क्रिस्पस रो वाको झाराङ खाल प्रभुहेङ खान्धुर पाहि रो कोरिन्थिगेलाइता बुङ हेन्जाङ पावलको बचन हिङतेङ प्रभुता खान्धुर पाहि रो चिभुअ्लि र्हुहि।
9एअ् दिलिमा प्रभु पावलहेङ दरसन पितेङ दोअ्हि, “हासुदोफा बुङ माथि, सिपापा माहि, रेम्काबानाल हिङपातेङ हाने। 10का नाङकोदोफा हिघा रो नासेहेङ हासु बुङ हाइदोङ पालि माद्वावा, हाइपानु इदोइ पुरता काङको हेन्जाङ द्याङगेलाइ हि।” 11एसापा परमेस्वरको बचन धिरपातेङ पावल एअ् बाअ्सार तु माहिनाथिकापा एम्बालाइदोफा हि।
12जेलाउ गलियोन आखाइयाको बाडाहाकिम जेङहि, कालाउ यहुदिगेलाइ एअ्मत जेङतेङ पावलहेङ रिम्हि रो वासेहेङ निया पाका थामेता चुमाहि 13रो एसा दोअ्हि, “इदोइ द्याङ न्यामको खिलाप परमेस्वरहेङ पुजिलि द्याङगेलाइहेङ धिरपादोङखे।”
14जेलाउ पावल धुइलि तोमका हिघाहि, कालाउ गलियोन इङको यहुदिगेलाइहेङ दोअ्हि, “यहुदिगेलाइ, इदोइ हिदिङ मारेम्का काम रो बारका आपाराधि काथा हिका हिनु का नेलाइको उजुर हिङतेङ निया पालि ठिकोङ जेङधावा। 15कालाउबुङ इदोइ काथा ते नेलाइकोङ धरमकिताब, मिङ रो न्यामको बारेता खिनिङ हिनाङसिङ नेलाइ ताइमिङ बिचार पासु। का इस्का काथागेलाइको निया मापाङका।” 16एसा दोअ्तेङ गलियोन एम्बालाइहेङ निया पाका थामेसो दिङगिल्पिहि। 17कालाउ यहुदिगेलाइ झाराङ कचहरिसाअ्को हाकिम सोस्थेनेसहेङ रिम्तेङ निया पाका थामेको आगाता दान्हाइहि। कालाउबुङ गलियोन इङको काथाता हाइदोङ मातिङका भाइपिहि।
पावल एन्टिओखियाता घुरिका
18इङकोन्हुअ्सो पावल हेन्जाङ दिनाथिकापा कोरिन्थता हि। कालाउ खान्धुरि दादाओनेगेलाइदोफा बेदाङगि जेङतेङ वा चिजाहाजता सिरिया हानिहि। वाकोदोफा प्रिस्किला रो आकिलास बुङ हिघाखे। पावल भाकेका हिनाङसिङ वा किक्रियाता ताइको पुसिङ सिअ्पाहि।#गान्देका ६:१८ 19एफिससता थुकाकान्हुअ्सो प्रिस्किला रो आकिलास एफिससताङ हि। पावलचाहिँ एलोङ कचहरिसाअ्ता दुल्तेङ यहुदिगेलाइदोफा बहस पालि तेङहि। 20कालाउ एम्बालाइ पावलहेङ आरोङ एअ्नि न्हेनि हिलि बिम्ति पालाउ, वा माकिअ्हि। 21ओबालाइदोफा बिदा जेङलाउ वा दोअ्हि, “परमेस्वरको इछा हिनु का आरोङ नेलाइकोता घुरितेङ ल्वाङका।” कालाउ वा चिजाहाजता धोल्तेङ एफिसससो हानिहि।
22जेलाउ वा काइसरियाता खुअ्हि कालाउ र्हुता यरुसलेमता हानिहि रो इन्ताको मन्डलिगेलाइहेङ दुसुतेङ वा एन्टिओखियाभारि खुअ्हि। 23वा इन्ता आधे दिनाथिकापा हितेङ इन्तासो गलातिया रो फ्रिगियाको माउजागेलाइ जेङतेङ झाराङ चात्यागेलाइहेङ आट पितेङ भेनेङ भेनेङ थामेता हानिहि।
आपोल्लोस एफिससता
24इङकोङ माझाता आलेक्जेन्ड्रिया पुरता हिका आपोल्लोस मिङको एअ्मि यहुदि एफिससता लोहि। वा एअ्मि रेम्फा धुइका रो धरमकिताबता गिका हिघाखे। 25वा प्रभु इसुको बारेता बिद्या निङका हिघाखे रो हाङसाता बोल्यातेङ इसुको बारेता काथागेलाइ ठिकसो रो धिरपाघाखे। कालाउ वा युहन्नाको चिभुअ्लि पिका खिनिङ गिका हिघाखे। 26वा कचहरिसाअ्ता माथिसिङ धुइलि तेङहि। कालाउबुङ आपोल्लोसको धुइका काथा हिङतेङ प्रिस्किला रो आकिलास वासेहेङ ताइको साअ्ता चुमपुहि। कालाउ ओबालाइ परमेस्वरको दामाको माने वासेहेङ रेम्फा गिपाहि।
27इङकोन्हुअ्सो आपोल्लोस आखाइया माउजाता हानिलि बिचार पाहि। एफिससता हिका प्रभुको चात्यागेलाइ वासेहेङ हानिलि आट पितेङ वासेहेङ खाङसु दोअ्तेङ इन्ता हिका चात्यागेलाइहेङ एलोङ चिथि बुङ लेखिपिहि। आपोल्लोस आखाइयाता थुकातेङ निगाहासो खान्धुर पाकालाइहेङ हेन्जाङ साघाइहि। 28हाइदोनु वा धरमकिताबको बचनसो इसु दोङ ख्रिस्ट हि दोअ्तेङ यहुदिगेलाइहेङ दासि पिहि।
Currently Selected:
साल्तेङ दिङगिल्का 18: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
