साल्तेङ दिङगिल्का 17
17
पावल रो सिलास थेसलोनिकेता
1पावल रो सिलास आम्फिपोलिस पुरसो रो आपोल्लोनियाको दामा जेङतेङ थेसलोनिकेता लोहि। इन्ता यहुदिगेलाइको एलोङ कचहरिसाअ् हिघाहि। 2दिनाङभाइपा पावल इङको कचहरिसाअ्ता हानिहि रो वा इन्ता सुम आथारथिकापा माइसाका दिनागेलाइता धरमकिताबसो बहस पातेङ हि। 3वा धरमकिताबसो दासि पितेङ एम्बालाइहेङ एसा गिपाहि, “ख्रिस्टहेङ तु: भोगिलि रो सिकासो सिन्हुलि गोइधाङ। इदोइदोङ इसु, जाइको बारेता रेम्काबानाल का नेलाइहेङ हिङपाखा, वादोङ ख्रिस्ट।” 4नेलाइता आधिमि खान्धुरपातेङ पावल रो सिलासभारि लागिहि। एन्साङपातेङ लागिकालाइता परमेस्वरको सेवा पाका हेन्जाङ बोजात्यागेलाइ रो आधिमि मिङ चारचाराइका मुल बेबालाइ बुङ हिघाखे।
5कालाउबुङ बो यहुदिगेलाइ चाहिँ रनथनि पातेङ हातेको फाटाहागेलाइहेङ जोम्पातेङ हुल ल्होपातेङ खाइला बाइला पालि लागाइहि। कालाउ यासोनको साअ्ता दुल्तेङ पावल रो सिलासहेङ चुमातेङ द्याङगेलाइको आगाता जाअ्पालि भोहि। 6एम्बालाइ दुसुलि मादोलाउ, ओबालाइ यासोन रो आधे दादाओनेगेलाइहेङ पुरको हाकिमगेलाइकोता एसा दोअ्तेङ र्हिकाइतेङ हेरतेङ चुमाहि, “दुनियाहेङ उत्पात पाका इदोइ द्याङगेलाइ इता बुङ थुकालिलोका हि। 7एबालाइ यासोनको बान्सालाइ जेङका हि। एम्बालाइ झाराङ इसु दोअ्का एअ्मि भेनेङ राजा हि दोअ्तेङ काइसरको हुकुमको उल्टा काम पाखे।” 8इदोइ काथा हिङतेङ द्याङगेलाइ रो पुरको हाकिमगेलाइ थिहि। 9ओबालाइ यासोन रो वाकोदोसा हिका द्याङगेलाइहेङ दस्तुर र्हुतेङ एम्बालाइहेङ लाअ्पिहि।
पावल रो सिलास बेरिया पुरता
10जेलाउ बेल्हाहि कालाउ खान्धुरि दादाओनेगेलाइ पावल रो सिलासहेङ बेरिया दिङगिल्हि। जेलाउ एम्बालाइ इन्ता थुकाहि कालाउ यहुदिगेलाइको कचहरिसाअ्ता हानिहि। 11इताको यहुदिगेलाइ थेसलोनिकेगेलाइखान्तेङ हेन्जाङ रेम्का हिघाखे। हाइदोनु एबालाइ रेम्काबानाल मन पितेङ हिङहि रो लेङचातेङ बचन र्हुहि। इङको काथागेलाइ ठिक इन्सिकाङ ना माको दोअ्तेङ एम्बालाइ दिनाङ धरमकिताब पर्हितेङ जाच पाघाखे। 12इदोइभाअ्सिङ एबालाइता हेन्जाङ यहुदिगेलाइ प्रभुता खान्धुर पाहि। एन्साङपातेङ मिङ चलिका ग्रिक बेबालाइ रो वाबालाइ सुदाङ खान्धुर पाहि।
13कालाउबुङ जेलाउ परमेस्वरको बचन पावलसो बेरियाता बुङ पारचार जेङदोङखे दोअ्का थेसलोनिकेको यहुदिगेलाइ गिहि, कालाउ ओबालाइ इन्ता बुङ जोम्का द्याङगेलाइहेङ तोल्हेलि रो उकलाइलि थुकालिलोहि। 14इदोइ तिङतेङसाङ खान्धुरि दादाओनेगेलाइ ओदोङघरि पावलहेङ जाहादिपाहा दिङगिल्पिहि। कालाउ सिलास रो तिमोथिचाहिँ इन्ता दोङ हिहि। 15पावलहेङ सिरपुलि हानिकालाइ वासेहेङ एथेन्सथिकापा सिरपाहि। सिलास रो तिमोथिचाहिँ जेथे दोका मारफा वाकोता लोलिगोयाङ दोअ्का हुकुम निङतेङ एम्बालाइ घुरिहि।
पावल एथेन्सता
16पावल एम्बालाइहेङ एथेन्सता र्हुम्तेङहिलाउ, इङको पुरहेङ मुरति दोङ मुरतिहोइ पोङघाका तिङतेङ वाको मन हेन्जाङ तु:हि। 17इदोङभाअ्सिङ वा यहुदिगेलाइ रो परमेस्वरको सेवा पाका ग्रिकगेलाइदोफा कचहरिसाअ्ता रो दुसुका झोकोदोफा चाहिँ हातेता दिनाङ बहस पाघाखे। 18इपिक्युरि रो स्तोइकि दरसिगेलाइता बुङ हेअ्मि पावलदोफा बहस पाहि। ओबालाइ हेअ्मि दोअ्हि, “या बेजेबेजेका हाइ दोअ्खे?” बोगेलाइ दोअ्हि, “बो हिदिङ भेनेङमुलुकको नावा दिरगेलाइको पारचार पाकाभाइका तिङखे।” हाइपानु पावल इसुको बारेता रो वाको सिकासो सिन्हुका काथाको पारचार पाघाखे। 19कालाउ ओबालाइ पावलहेङ आरियोपागसता चुमपुहि रो हिअ्हि, “नाङको पारचार पाका इदोइ नावा बिद्या हाइ, हाइ केलाइ गिलि द्वाङ? 20हाइपानु ना केलाइको न्हातोङता नावा काथागेलाइ हिङपादोङखेना। इदोइभाअ्सिङ इदोइ काथाको माने हाइ इङको केलाइ गिलि भोन्हाखे।” 21झाराङ एथेन्सता हिकालाइ रो इन्ता हिका भेनेङमुलुकसो लोकालाइ नावानावा काथा दोअ्लि रो माहिङसा ताइको पहर बो हिदिङ काथाता मादोपाघाखे।
22पावल आरियोपागस दोअ्का कचहरिको माझाता जाअ्तेङ दोअ्हि, “एथेन्सता हिकालाइ, नेलाइहेङ का गोताङ काथाता हेन्जा धरमाति तिङदोङखा। 23हाइपानु घुराइतेङ हानिकाताङ पालाउ नेलाइको पुजिका थामेगेलाइ बुङ तिङघा। का एलोङ इस्का भोक पिका थामे बुङ दुसुघा जाइता ‘मानाल्का दिरको भाअ्सिङ’ दोअ्तेङ खोपाइन्हाका हिघाहि। इदोइभाअ्सिङ जाइहेङ नेलाइ मागिसिङ पुजिसुखेना वासेहेङ का नेलाइको माझाता हुकुम पादोङखा।
24“परमेस्वर, जाइ दुनिया रो इङकोता हिका गोताङ चिज सिरजाइहि, वा स्वरग रो सुमिङको प्रभु हिनाङसिङ खुरहोइ बान्हाइका थानता बासा माहिखे।#१ राजा ८:२७; यासाइया ४२:५; साल्तेङ दिङगिल्का ७:४८ 25वासेहेङ हिदिङ चिजको जरुरि जेङनाङभाइपा द्याङको खुरसो वाको सेवा जेङलिगोयाङ दोअ्तेङ फोम मापासु। हाइदोनु वादोङ झाराङहेङ जिबन, हुसि रो गोताङ चिज पिखे। 26वा एअ्मिसो गोताङ सुमिङता बासा हिलि द्याङको गोताङ जात्या सिरजाइहि। एम्बालाइहेङ हिलिगोइका थामे रो सिन्हुलि गोइका पहर बुङ तोकिपिहि। 27द्याङगेलाइ परमेस्वरहेङ भोकाको रो भोलाउ निङलि द्वाको दोअ्तेङ वा एसा पाहि। एला बुङ वा केलाइसो दुरे हिकामान्थु 28हाइदोनु
‘केलाइ वाताङ सिन्हुन्हाखे, वाताङ हिगिलन्हाखे रो वाताङ सिन्हुन्हाखे रो वाताङ केलाइको जिबन हि।’
नेलाइको ताइकोङ कबिगेलाइ बुङ एसा दोअ्का हि, ‘केलाइ जातिङको वाकोङ खाल हिन्हाहि।’
29“एसापा केलाइ परमेस्वरको खाल जेङका हिनाङसिङ, परमेस्वरहेङ द्याङको आकिल रो खुरहोइ बान्हाइका सोना, रुपा रो उन्ठुइको मुरतिभाइका हि दोअ्तेङ फोम पालि माएल। 30इदोइभाअ्सिङ लाम्फा मागिसिङ पाका मारेम्का कामहेङ परमेस्वर माफ पाहि। कालाउबुङ एला परमेस्वर गोताङ थामेता झाराङ द्याङगेलाइहेङ ‘पास्ताइसु’ दोअ्का हुकुम पिहि। 31हाइदोनु दुनियाको झाराङ द्याङगेलाइको निया पाका दिना वा तोकिपिलि दोका हि रो इङको दिना वा ताइमिङ साल्का द्याङसो नियादोसा फाइसाला पावा। वासेहेङ सिकासो सिन्हुपातेङ परमेस्वर झाराङ द्याङगेलाइहेङ याको दासि पिका हि।”
32सिकासो द्याङ सिन्हुखे दोअ्का हिङतेङ आधिमि पावलहेङ लेङपिहि। कालाउ आधिमि दोअ्हि, “याको बारेता आरोङ भेनेङखे बुङ केलाइ हिङलि भोन्हाखे।” 33कालाउ पावल एम्बालाइसो बेदाङगि र्हुतेङ हानिहि। 34आधिमि द्याङगेलाइ वाकोदोफा लागितेङ प्रभुहेङ खान्धुर पाहि। एम्बालाइता आरियोपागस कचहरिको सदस्य डियनुसियस, दामारिस दोअ्का बेबाल रो बोमि बुङ प्रभुता खान्धुर पाहि।
Currently Selected:
साल्तेङ दिङगिल्का 17: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
