साल्तेङ दिङगिल्का 19
19
पावल एफिसस पुरता
1आपोल्लोस कोरिन्थता हिलाउ पावल लिअ्ता माउजागेलाइ जेङतेङ एफिससता लोहि। इन्ता वा आधिमि चात्यागेलाइहेङ दुसुहि। 2वा ओबालाइहेङ हिअ्हि, “हाइ नेलाइ प्रभुता खान्धुरपातेङ पुनित हाङसा निङसुन्हा?” ओबालाइ वासेहेङ दोअ्हि, “पुनित हाङसा हि दोअ्का ते केलाइ हिङका बुङ मान्थुन्हाहि।” 3आरोङ पावल हिअ्हि, “एन्सानु नेलाइ हिसिका चिभुअ्लि र्हुसुन्हा?” ओबालाइ दोअ्हि, “युहन्नाको चिभुअ्लि निङन्हाहि।” 4कालाउ पावल दोअ्हि, “युहन्नाको पिका चिभुअ्लिचाहिँ पास्ताइको चिभुअ्लि हिघाहि। वान्हुअ्सो लोका द्याङ इसुहेङ खान्धुर पासु दोअ्तेङ वा द्याङगेलाइहेङ दोअ्घाखे।”#मत्ति ३:११; मरकुस १:४,७,८; लुका ३:४,१६; युहन्ना १:२६,२७
5इदोइ काथा हिङकान्हुअ्सो ओबालाइ प्रभु इसुको मिङता चिभुअ्लि र्हुहि। 6जेलाउ पावल ओबालाइर्हुता खुर ताअ्हि, कालाउ पुनित हाङसा ओबालाइर्हुता लोहि रो ओबालाइ भेनेङ राउता धुइहि रो आगमबानि दोअ्लि तेङहि। 7इन्ता ओबालाइ तेन्हेमि झोको द्याङगेलाइ हिघाखे।
8पावल कचहरिसाअ्ता हानिहि रो सुम माहिनाथिकापा परमेस्वरको सारभिको बारेता एम्बालाइदोफा माथिसिङ बहस पाहि रो द्याङगेलाइहेङ गिपाहि। 9कालाउबुङ आधिमि मन थाङपातेङ प्रभुता खान्धुर मापाहि। उल्टाङ एम्बालाइ प्रभुको पिका छुटकाराको दामाहेङ झाराङको आगाता हेला पाहि। कालाउ पावल कचहरिसाअ् लाअ्तेङ खान्धुरगेलाइहेङ दोसाङ चुम्पुतेङ टुरान्नसको स्कुलता बहस पालि तेङहि। 10न्हे बाअ्सार एसाङ दोङ दोहि। कालाउ इङकोन्हुअ्सो खिनिङ एसिया माउजाता हिका यहुदि रो बोजात्याको द्याङगेलाइ न्हेमिङ प्रभुको बचन हिङहि।
11परमेस्वर पावलको खुरसो नावा भारभुसाइका कामगेलाइ पाहि। 12हाइपानु गाम्छा माकुनु नोसोइ वाको जिउता धेलपातेङ मासाअ्धेकालाइकोता चुमपुघाखे, कालाउ एम्बालाइको जिउसो रोगाइका हानिघाखे रो मासान बुङ ओल्हिघाखे।
13कालाउबुङ इसोओसो घुराइगिल्का यहुदि ओझागेलाइ मासान खोअ्कालाइहेङ प्रभु इसुको मिङ ल्होपितेङ एसा दोअ्घाखे, “पावलको पारचार पाका इसुको मिङता का नासेहेङ ओल्हिलि हुकुम पिखा।” 14इन्ता एअ्मि स्केबास मिङ हिका यहुदि मुल धामिको न्हिअ्मि चानगेलाइ इस्का पाघाखे। 15कालाउ मासान जाबाफ पितेङ एम्बालाइहेङ दोअ्हि, “इसुहेङ का नाल्खा, पावलहेङ बुङ का नाल्खा, कालाउबुङ नेलाइचाहिँ हासु?” 16कालाउ इङको मासान खोअ्का द्याङ एम्बालाइर्हुता तोङतेङ लोहि। एम्बालाइ झाराङहेङ आधिनता ताअ्तेङ एम्बालाइहेङ लोङपाहि रो एम्बालाइ इङको साअ्सो नाङघाङ घाइते जेङतेङ खाअ्हि।
17इदोइ काथा एफिससता हिका यहुदि रो बोजात्याको द्याङगेलाइ हिङतेङ झाराङ थिहि। एम्बालाइ प्रभु इसुको मिङहेङ हेन्जाङ मान पाहि। 18हेन्जाङ खान्धुर पाकालाइ इन्ता लोतेङ ताइको पाका मारेम्का कामगेलाइ द्याङगेलाइको आगाता केरा पाहि। 19हेन्जाङ खान्धुर पाकालाइ जाइ जादु पाघाखे एम्बालाइ जादुको बारेता लेखिका किताबगेलाइ चुमातेङ झाराङको आगाता दु:पिहि। दु:का किताबगेलाइको दाम आनुमान पालाउ झान्डाइ न्हेकुरिते हाजार रुपाको टाकाको हिसाब जेङलि लोहि। 20एसापा प्रभुको बचन चारबितिङ चारचाराइतेङ हानिहि।
एफिसस पुरता हुल्दुङगा
21इङकोन्हुअ्सो पावल माकेडोनिया रो आखाइया माउजा जेङतेङ यरुसलेम हानिलि भोहि। वा दोअ्हि, “यरुसलेम हानिकान्हुअ्सो का रोम पुर बुङ हानिलिङ गोयाङ।” 22इङकोन्हुअ्सो वा ताइमिहेङ साघाइका सानाइतिगेलाइ तिमोथि रो इरास्तसहेङ माकेडोनियाभारि दिङगिल्हि, कालाउ वा ताइमिचाहिँ आसा दिनाथिकापा एसिया माउजाता दोङ हि।
23इङको पहरता प्रभुको छुटकाराको दामाको पारचार जेङका हिनाङसिङ एफिससता बारका खाइला बाइला जेङहि। 24हाइदोनु डेमेत्रियस मिङ हिका एअ्मि आरतेमिस देबिको रुपाको म्हुम्हुइका थानगेलाइ बान्हाइघाखे। इदोइ काम पातेङ वा रो वाको ताअ्का काम पाकालाइ सुदाङ हेन्जाङ टाका कामाइघाखे। 25कालाउ डेमेत्रियस वाको काम पाकालाइ रो एम्बालाइभाइकाङ काम पाकालाइ झाराङहेङ जोम्पातेङ दोअ्हि, “ओनेगेलाइ, इदोइ कामसोङ केलाइ हेन्जाङ टाका कामाइका हिनाहि दोअ्तेङ नेलाइदोङ गिसुखेना। 26कालाउबुङ इदोइ पावल हाइ दोअ्दोङखे, नेलाइ ताइमिङ तिङदोङसुखेना रो हिङदोङसुखेना। वा द्याङको खुरहोइ बान्हाइका दिरचाहिँ दिर दोङ माको दोअ्दोङखे। वा इता एफिसस रो एसिया माउजाता हिका हेन्जाझोको द्याङगेलाइहेङ ताइको काथा धिरपातेङ केउपालि दोखोइ। 27एसापा केलाइको कामको खिनिङ माको कालाउ बारका देबि आरतेमिसको थानको बुङ हेला ज्यावा कालाउ एसिया रो दुनियाभरिको द्याङगेलाइ मानितेङ लोका देबि आरतेमिसको पुजा बुङ बन्द ज्यावा।”
28इदोइ काथा हिङतेङ इन्ता जोम्तेङ हिका द्याङगेलाइ चेरताम्पाहि रो एम्बालाइ र्हिकाइतेङ दोअ्लि तेङहि, “एफिससता हिका देबि आरतेमिसको जाइ ज्याको!” 29इङको पुरता खाइला बाइला जेङलि तेङहि। द्याङगेलाइ हुल जेङतेङ लोहि रो माकेडोनियासो लोका पावलको सानाइति गायस रो आरिस्तारखसहेङ रिम्तेङ घाकाथामेता चुमपुहि। 30पावल द्याङगेलाइको चेअ्सुमेसुकाता हानिलि भोहि, कालाउबुङ प्रभुता खान्धुर पाका दादाओनेगेलाइ वासेहेङ इन्ता हानिलि मापिहि। 31एसिया माउजाको आधिमि सारकारि हाकिमगेलाइ सुदाङ पावलको भालाइ चिताइतेङ वासेहेङ इङको घाकाथामेता देखाल मापि दोअ्तेङ साल्हा पिहि।
32द्याङगेलाइको चेअ्सुता बारका खाइला बाइला जेङदोङघाहि। आधिमि एअ् थोक आधिमि भेनेङ थोक दोअ्तेङ र्हिकाइघाहि। कालाउ हेन्जाङहेङ द्याङगेलाइ हाइपालि जोम्हि इङको बुङ गिका मान्थुघाहि। 33एन्सालाउ यहुदिगेलाइ आलेक्जेन्डर दोअ्का द्याङहेङ आगाइ पाहि। चेअ्सुमेअ्सुकासो हेअ्मि र्हिकाइतेङ जेङका घाटानाको बारेता वासेहेङ दोअ्लि लागाइहि। वा ताइको खुरको टिप्निहोइ झाराङहेङ सिपापा हिलि दोअ्तेङ ताइको काथा द्याङगेलाइता ताअ्हि। 34कालाउ वासेहेङ यहुदि दोअ्तेङ नाल्कान्हुअ्सो इङको द्याङगेलाइ “एफिससता हिका देबि आरतेमिसको जाइ ज्याको!” दोअ्तेङ न्हे घान्टाझोको र्हिकाइतेङहि।
35इङकोन्हुअ्सो नगर कचहरिको सचिब द्याङगेलाइहेङ सिपापा हिलि दोअ्तेङ वा दोअ्हि, “एफिससको दादाओनेगेलाइ, एफिसिगेलाइको पुरचाहिँ बारका देबि आरतेमिसको थान रो आकाससो हुल्का वाको मुरतिको काथा हासु मागिखे कुनु? 36इदोइ काथा सत्ते हि, यासेहेङ हासु बुङ माको दोअ्लि माद्वावा। एन्साजेङलाउ नेलाइ सिपापा हिसु। एसापा जोसता लोतेङ बिचारदोङ मापासिङ हिदिङ काम पालि रेम्का माको। 37नेलाइको रिम्तेङ चुमाका द्याङगेलाइ ना केलाइको थान लुटिका हि ना एम्बालाइ केलाइको देबि आरतेमिसको बारेता बादानामि पाका हि।
38“यदि डेमेत्रियस रो वाको मुरति बान्हाइका सानाइतिगेलाइको खिलापता दुसिका काथा हिनु एम्बालाइ न्यायपाका थामेता हानितेङ उजुर पालि द्वावा। 39आरोङ नेलाइ इङकोखान्तेङ बुङ हेन्जा हिदिङ काथा भोनु केलाइ कचहरि काइतेङ इङको काथाको बहस पापिलि द्वाङ। 40नानि एसापा खाइला बाइला जेङनाङसिङ केलाइर्हुता उत्पात माचाइका दुस लागिलि द्वाङ। इङको खाइलाबाइलाको दुस केलाइता लोनु केलाइ हासुङ हाइदोङ दोअ्लि बुङ माद्वाङ।” 41इदि दोअ्लिदोतेङ वा कचहरिहेङ दोपाहि।
Currently Selected:
साल्तेङ दिङगिल्का 19: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
