साल्तेङ दिङगिल्का 11
11
पत्रुस यरुसलेमको मन्डलिता
1यहुदियाता हिका दिङगिल्कालाइ, खान्धुरि दादाओनेगेलाइ रो बोजात्यागेलाइ बुङ परमेस्वरको बचन र्हुहि दोअ्का हिङहि। 2जेलाउ पत्रुस यरुसलेमता लोहि, कालाउ खाताना पाकालाइ वासेहेङ एसा दोअ्तेङ दुसिहि। 3एम्बालाइ पत्रुसहेङ दोअ्हि “खाताना मापाका द्याङगेलाइकोता हानितेङ एम्बालाइदोफा हाइपालि चाका आम्का पान्हा?”
4कालाउ पत्रुस मेलोसो एम्बालाइहेङ हिङपालि तेङहि: 5“का योप्पा पुरता हिलाउ पारथाना पादोङघाखा, का ध्यान पालाउ इस्का एलोङ दरसन तिङघा। स्वरगसो एलोङ धाबा चिज द्या सुरता चातेङ लेता काभारि हुल्तेङहिका तिङघा। 6का रेम्फा खाङलाउ इन्ता सुमिङको गोताङ खालको द्यालोङ खोकोइ हिका गुपुस, ह्यालतेङ हिगिल्का जिब रो आकासको जिह्याँ जुइलेङगेलाइ तिङघा। 7कालाउ एलोङ गाला का हिङघा, ‘ओइ पत्रुस, ल्हो रो एबालाइहेङ सेअ्तेङ चा।’ 8कालाउबुङ का दोअ्घा, ‘माको प्रभु, हिदिङ हुकुम रो आपुनित चिज काङको नुइता हेअ्लाउ दुल्का मान्थु।’ 9स्वरगसो आरोङ इस्का गाला हिङघा, ‘परमेस्वर चोखो बान्हाइका काथाहेङ आपुनित मादोअ्।’ 10सुम्खे थिकापा इस्काङ जेङहि रो इङको आरोङ स्वरगता चुमपुन्हाहि।
11“इङको दोङ पहर काइसरियासो काता दिङगिलन्हाका सुमि द्याङगेलाइ केलाइ हिका साअ्ता थुकालिलोहि। 12दोमन मापासिङ एम्बालाइदोफा हानिलि कासेहेङ पुनित हाङसा दोअ्हि। इदोइ तुमि खान्धुरि दादाओनेगेलाइ बुङ काङकोदोफा लोका हिघाखे रो केलाइ झाराङ करनेलियसको साअ्ता दुलन्हाहि। 13वा केलाइहेङ दोअ्हि, एलोङ स्वरगदुत वाको साअ्ता जाअ्तेङ एसा दोअ्का वा हिङहि, ‘योप्पाता द्याङ दिङगिल्तेङ पत्रुस दोअ्का सिमोनहेङ काइलिदिङगिल। 14वा नासेहेङ बचन हिम्पावा, जाइसो ना रो नाङको गोताङ खाल बानच्यावा।’
15“जेलाउ का धुइलि तेङघा, कालाउ लाम्फा केलाइर्हुता खुअ्काभाइपाङ पुनित हाङसा एम्बालाइर्हुता बुङ खुअ्हि। 16कालाउ प्रभुको दोअ्का इदोइ बचन कासेहेङ फोम जेङहि, ‘युहन्ना ते चिहोइ चिभुअ्लि पिहि, कालाउबुङ पुनित हाङसासो नेलाइको चिभुअ्लि ज्यावा।’#साल्तेङ दिङगिल्का १:५ 17प्रभु इसु ख्रिस्टता खान्धुर पालाउ परमेस्वर केलाइहेङ जेदोङ बर पिहि, नेलाइहेङ बुङ इङकोङ बर पिकान्हुअ्सो परमेस्वरहेङ हासु रोकिलि द्वावा कुनु?”
18इदोइ काथा हिङकान्हुअ्सो एम्बालाइ सिपापा हि रो एसा दोअ्तेङ परमेस्वरहेङ बाखिन्हि, “एला ते परमेस्वर बोजात्यागेलाइहेङ बुङ हेअ्लाउ मामुअ्का जिबनको भाअ्सिङ पास्ताइलि माउका पिका हि।”
एन्टिओखियाको मन्डलि
19स्तिफनसहेङ सेअ्कान्हुअ्सो प्रभु इसुता खान्धुर पाकालाइहेङ सान्ताइलि तेङनाङ आधिमि खाअ्हि रो आधिमि फोनिके माउजाता थुकाहि, आधिमि साइप्रस टापु रो हेअ्मि एन्टिओखिया पुरथिकापा बुङ थुकाहि। लाङफोरति एम्बालाइ रेम्काबानाल यहुदिगेलाइहेङ खिनिङ हिङपाहि।#साल्तेङ दिङगिल्का ८:१-४ 20कालाउबुङ आधिमि साइप्रस रो कुरेनिको द्याङगेलाइ हिघाखे। एम्बालाइ एन्टिओखियाता लोतेङ ग्रिकगेलाइहेङ बुङ प्रभु इसुको बारेता हिङपाहि। 21प्रभुको सरबङ एम्बालाइदोफा हिनाङ खान्धुर पाकालाइ हेन्जाङ प्रभुभारि घुरिहि।
22जेलाउ इदोइ बानाल यरुसलेमता हिका मन्डलिता थुकाहि, एम्बालाइ बारनाबासहेङ एन्टिओखियाता दिङगिल्हि। 23इङको इन्ता लोतेङ परमेस्वरको निगाहा तिङतेङ लेङचाहि रो एम्बालाइ झाराङहेङ पुराङ कोन्धाङसो प्रभुता खान्धुरि हितेङहिलि हाउसाला पिहि। 24हाइदोनु बारनाबास रेम्का, पुनित हाङसा रो खान्धुरसो पोङघान्हाका द्याङ हिघाखे रो वासो हेन्जाङ द्याङगेलाइ प्रभुता खान्धुर पाहि।
25कालाउ साउलहेङ भोलि बारनाबास टारससता हानिहि। 26जेलाउ वा साउलहेङ दुसुहि कालाउ वासेहेङ एन्टिओखियाता चुमाहि। इङकोन्हुअ्सो बाअ्सारथिकापाङ इङको न्हेमि मन्डलिको द्याङगेलाइदोफा सङगति पातेङ द्याङगेलाइहेङ बिद्या पिहि। चात्यागेलाइ लाङफोरति एन्टिओखियाता दोङ ख्रिस्टियन दोअ्न्हाहि।
27इङको पहर आधिमि परमेस्वर पाहासो धुइकालाइ यरुसलेमसो एन्टिओखियाता लोहि। 28एम्बालाइता आगाबस मिङ हिका एअ्मि जाअ्तेङ, गोताङ दुनियाता बारका आनिकाल जेङलि तोम्काहि दोअ्का पुनित हाङसासो न्हुअ्सो जेङका काथा दोअ्हि। इङको आनिकाल क्लाउडियसको राजकालता जेङहि।#साल्तेङ दिङगिल्का २१:१० 29एन्टिओखियाको चात्यागेलाइ यहुदियाता हिका दादाओनेगेलाइको भाअ्सिङ दोकाझोको भेटि पिगिल्लि बिचार पाहि। 30एम्बालाइको भेटि बारनाबास रो साउलको खुरसो मन्डलिको एल्डरगेलाइकोता पिगिल्हि।
Currently Selected:
साल्तेङ दिङगिल्का 11: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
