साल्तेङ दिङगिल्का 12
12
राजा हेरोद मन्डलिहेङ सान्ताइका
1इङको पहरता राजा हेरोद आग्रिपा मन्डलिको हेथे दादाओनेगेलाइहेङ आतिचार पालि तेङहि। 2वा युहन्नाको दादा याकुबहेङ कातिहोइ सेअ्हि। 3इदोइ कामसो यहुदिगेलाइ लेङचाका तिङतेङ पत्रुसहेङ बुङ रिम्लि तरखर पाहि। इदोइ घाटाना लाअ्पिका पारबाको पहरता जेङका हिघाहि। 4हेरोद पत्रुसहेङ रिम्तेङ थुनाता ह्वाअ्पिहि। कालाउ वासेहेङ र्हुम्लि सिपाल्हाइको द्या डफ्फाको जिम्मा लागाइपिहि। लाअ्पिका पारबाको न्हुअ्सो पत्रुसहेङ यहुदिगेलाइको आगाता चुमालि हेरोदको बिचार हिघाहि।#दामालाअ्का १२:१-२७ 5एसापा पत्रुसहेङ थुनाता ताअ्लाउ मन्डलि एलोङ मनको जेङतेङ वाको भाअ्सिङ परमेस्वरदोफा पारथाना पातेङ हिघाखे।
पत्रुस थुनासो ओल्हिका
6हेरोद पत्रुसहेङ बाहार ओल्हिपातेङ चुमालि भोकाङ न्हिसिङ, वा न्हेमि सिपाल्हाइको माझाता न्हेलोङ झिन्झिरिहोइ धेउन्हातेङ जिम्तेङ हिघाखे। बो सिपाल्हाइ बुङ फिनु आगाता जाअ्तेङ वासेहेङ र्हुमतेङ हिघाखे। 7एकासि प्रभुको एलोङ स्वरगदुत इन्ता देखाल पिहि रो कोठा दोङ फाइसालाम्हि। स्वरगदुत पत्रुसको कोखेता दान्हाइतेङ “मार्फा ल्हो” दोअ्तेङ वासेहेङ ल्होपाहि। कालाउ झिन्झिरिगेलाइ वाको खुरसो खाइन्हातेङ हुल्हि।
8स्वरगदुत पत्रुसहेङ दोअ्हि, “लोखोन रो जुता लागाइ।” कालाउ वा एन्साङ पाहि। स्वरगदुत पत्रुसहेङ दोअ्हि, “धाबा गुअ्तेङ कासेहेङ पिताइ।” 9कालाउ वा ओल्हितेङ स्वरगदुतहेङ पिताइहि। स्वरगदुतसो पाका इदोइ काथा जातिङकोङ दोअ्तेङ वा मागिहि। कालाउबुङ दरसन तिङदोङखा दोअ्तेङ वा गिहि। 10जेलाउ न्हेलोङ र्हुम्का थामे काल्हामतेङ पुरता दुल्का चिरको द्वारता एम्बालाइ थुकालाउ, इङको द्वार ताइमिङ एम्बालाइको भाअ्सिङ हेनाहि। एम्बालाइ बाहार ओल्हितेङ एलोङ चेअ्का दामा जेङतेङ हानिहि। कालाउ स्वरगदुत पत्रुसहेङ लाअ्तेङ हानिहि।
11जेलाउ पत्रुसको होस खुलिहि कालाउ वा दोअ्हि, “एला कासेहेङ जातिङको दोङ था जेङहि, प्रभु ताइको स्वरगदुत दिङगिल्पितेङ राजा हेरोदको खुरसो रो यहुदिगेलाइ हाइपालि भोघाखे इङको झाराङसो कासेहेङ लाअ्पाहि।”
12इदोइ काथा गिकान्हुअ्सो, वा मरकुस दोअ्का युहन्नाको आमाइ मरियमको साअ्ता हानिहि। इन्ता हेन्जाङ द्याङगेलाइ जोम्तेङ पारथाना पादोङघाखे। 13पत्रुस फिनुता चालापिलाउ रोदा मिङ हिका कामत्या फिनु हेलि लोहि। 14पत्रुसको गाला नाल्तेङ वा लेङचातेङ फिनुङ माहेसिङ लिअ्ता धाअ्तेङ हानिहि रो दोअ्हि, “पत्रुस फिनुता जाअ्तेङ हि।” 15एम्बालाइ इङकोहेङ दोअ्हि, “ना पागिलि जेङन्हा ना हाइको?” कालाउबुङ इङको दोअ्हि, “जातिङकोङ पत्रुस दोङ।” दोअ्तेङ जिद्दि पाहि। कालाउ एम्बालाइ दोअ्हि, “एन्सानु वासेहेङ खाङका स्वरगदुत वाला!”
16कालाउबुङ पत्रुसचाहिँ फिनु चालापादोङघाहि। फिनु हेलाउ वासेहेङ तिङतेङ एम्बालाइ भारभुसाइहि। 17एम्बालाइहेङ पत्रुस “सिपापा हिसु” दोअ्तेङ खुरहोइ टिप्नि पाहि। कालाउ प्रभु वासेहेङ हेसापा थुनासो ओल्हिपाहि इङको एम्बालाइहेङ दोअ्पिहि। इदोइ काथाको बानाल याकुब#१२:१७याकुब इसुको ओने रो यरुसलेम मन्डलिको मुल खान्धुरि हिघाखे। रो बो ओनेगेलाइहेङ बुङ पिसु दोअ्तेङ वा बिदा जेङतेङ भेनेङ थामेता हानिहि।
18फाइसालाम्का जेङकान्हुअ्सो पत्रुसहेङ हाइ जेङहि दोअ्तेङ सिपाल्हाइको माझाता बारका खाइला बाइला जेङहि। 19हेरोद वासेहेङ भोतेङ बुङ मादुसुलाउ, सिपाल्हाइहेङ जाच पातेङ एम्बालाइहेङ जिबनदारको हुकुम पाहि। इङकोन्हुअ्सो हेरोद चाहिँ यहुदियासो काइसरिया हानितेङ इन्ताङ दोङ हिहि।
राजा हेरोद सिका
20हेरोद टुरोस रो सिदोनको द्याङगेलाइदोफा हेन्जाङ चेरताम्पाका हिघाखे। एम्बालाइ एअ् हुल जेङतेङ वाकोता लोहि रो राजाको दरबार लिअ्ताको द्याङ बलस्तसदोफा मिलापको भाअ्सिङ काथा पालि बिम्ति पाहि। हाइपानु एम्बालाइको मुलुक चाका आम्का चिजको भाअ्सिङ राजाको मुलुकता भर परिलि गोइघाहि।
21तोकिका दिनाता राजाको धाबा लागाइतेङ हेरोद वाको गादिता योम्हि 22रो एम्बालाइहेङ “इदोइ ते परमेस्वरको गाला, द्याङको माको!” दोअ्तेङ र्हिकाइहि। 23कालाउबुङ परमेस्वरहेङ पारताप मापिकाता इङको दोङ पहर प्रभुको एलोङ स्वरगदुत वासेहेङ मासाअ्धेपाहि रो पेअ्सा पेअ्तेङ वा सिहि।
24कालाउबुङ प्रभुको बचन बार्हेतेङ रो फिजाइन्हातेङ हानिहि। 25बारनाबास रो साउल ताइको काम पोङघापातेङ यरुसलेमता घुरिहि। एम्बालाइदोफा मरकुस दोअ्का युहन्ना बुङ हिघाखे।
Currently Selected:
साल्तेङ दिङगिल्का 12: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
