२ कोरीन्थी 2
2
1ओउःत झ्यान्ते नीङ्कायःपाय् “लीह्ताक्माःसाकायः ङा द्यान्ह्ती वाङ्ङल” त ल्हुङ्हाङः म्हर्आलाङः। 2नीङ्खेपाय् लीह्तो स्याव्तेःचै त खेःया ङाखेकायः सुइ चोङाय्ताक्चाःताङः र। नीङ्इ ह ङाकायः चोङाय्ताक्सा खाय्तेःनेःनाङ्स। 3नीङ्कायः लीह्तो स्याव्ताक्माःसाकायः ङाइ चेती लेखनेःआलाङ्स। “ङा वाङ्चाङः त खेःया ओउःमयःइ ङाकायः चोङाय्ताक्ओ खेःल लीह्ताक्नाःताङः” त म्हर्ती नीङ्कःहाङः वाङ्ङल चेतीलेः लेखनेःआलाङ्स। ङामा चोङाय्ती मुनाङः त खेःया नीङ् सबैमा चोङाय्तेःनै त ङाइ चीःनाङः। 4चेती लेखओ बेलाहाङः ङाइ आन ल्हुङ् लीह्ती र्याःती लेखनेःआलाङ्स। नीङ्कायः लीह्ताक्साकायः लेखओ खेःल नीङ्कायः आन राप्नेःनाङ्स त चीःताक्साकायः चेती लेखनेःआलाङ्स।
5यात्चाक्इ अरु सुलाङःकायः लीह्ताक्आन् त खेःओ ङाखेकायः लीह्ताक्ओ खेःल ओउःइ नीङ् सबैखेकायः बल लीह्ताक्तेःआकाय्। 6ओउः मान्ताकायः नाःतो अरुइ ङ्हासै दाह्तोलेः न्युम्ह्तेः ताक्तेःआकानी। 7द्याह् ओउःइ नीङ्कायः जाङ्ह्ओ रेव्ओ काम् म्हेःती ओउःकायः लुङ्ती तोनु उया ओउःपाय् न्हाङ्तोलेः लीह्ती वाय्तो स्याव्चाः। 8ओउःकायः नीङ्इ राप्तेःनानी त ओउःकायः फेरी चीःताक्नु दा एत तेती तोलेःनेःनाङ्स। 9ङाइ तोओपाय् नीङ्इ सबै ग्याती जाङ्ह्तेःनानीया जाङ्ह्तेःनीलीया त योसाकायः ओउः चेती लेखनेःआलाङ्स। 10यात्चाक्कोः रेव्ओ काम् नीङ्इलेः म्हेःतेःनानी त खेःया ङाइमा ओउःकोः काम् म्हेःलेःनाङः। फेरी यात्नीस्चाक्कायः एत हायःसा परनाः त खेःया ङाइ ख्रीस्कोः मीक्हाङः ओउःकोः रेव्ओ काम्पाय् म्हेःतीलेः वाय्नाङः। नीङ्कायः पेतो स्याव्ताक्सा थेङा एत हायःनेःनाङ्स 11दोह् हायःती दाय्ह्सा एत हायःधार्ना सैतान्इ ङीकायः क्लीमःसा खाय्तय्हीली। ओउःइ ङीकायः क्लीमःसा आन बोङःनाःतय्ही त चीःनाङःसु।
12लौ ख्रीस्कोः पेओ समचार् तोलाङ् ङा त्रोआस् सहर्हाङः दाह्तोक्हाङः प्रभुइ ओउःकोः काम् पेतो जाङ्ह्साकायः दोःताक्ताङःतो। 13ङाकोः हौ तीतस् त तोओ च्यवःमाःत झ्यान्ते ङापाय् ल्हुङ् धोमाय्ङल। ओउःत झ्यान्ते ओहाङःकोः मान्तालम्कायः दाम्ती फेती गम्आक्तीको मासीदोनीयाताङ् आल्आलाङः।
14लौ परमेस्वर्कायः “च्युता” त तोपाःथै दोह् हायःती दाय्ह्सा परमेस्वर्इ स्याव्ताक्ती झ्यान्ते ङी सैतान्कायः क्लीमःओलम् स्याव्ती ख्रीस्कुस् वाह्नाःतय्ही। म्हय्ङ्तो सय्ङ्ओलम् गाःताङ्मा थुह्ती आल्नाः ओउःलो लेखालेः ओउःकोः कुरा छ्यानःती चीःताक्साकायः परमेस्वर्इ ङीकायः सबै थाव्ताङ् ल्होक्आताङी। 15एत हायःती ङीपाय् ख्रीस्इ उलःती परमेस्वर्कायः बयःओ पेओ सय्ङ्ओ सातीलो लेखा स्याव्नाःतय्ही। ओउः दल्सा खेःओलम्कायःमा वाय्सा खेःओलम्कायःमा ङीइ थोल्ह्ती तोओ कुरापाय् सय्ङ्ओलो लेखा खेःनाः बा। 16दल्सा खेःओलम्खेकायः ओउः कुरापाय् जीङःकोः कुरा लेःआः ह्र्योङःती वाय्सा खेःओलम्खेकायः सीओकोः कुरा लेःआः। एत ताङ्ह्ओ कुरापाय् थोल्ह्ती तोसाकायः सुसुलो त्याक्चै। 17नाःतो मान्तालम्खेइ परमेस्वर्कोः कुरा मीतो योती पैसाकायः स्यान्नानी ङीखेपाय् परमेस्वर्इ ल्होक्ओ मान्ता लेःआः ङी ओउःत खेःओ ङी ख्रीस्कोः काम् जाङ्ह्ओलम् स्याव्ती परमेस्वर्कोः मीक्हाङः ङीइ ख्रीस्कोः कुरापाय् पेओ नीङ्ओ ल्हुङ्इलेः तोनाङःसु।
Currently Selected:
२ कोरीन्थी 2: CDM93
Highlight
Copy
Compare
Share
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
