२ कोरीन्थी 3
3
1ङी एत तोओकायःपाय् लयः ताङ्ह्ताक्नाःइसी त ताःतेःनानी यादो। खेःल ङी अरु मान्तालो लेखा चेती लात्सा परल। ङीकायःपाय् “पेओलेः” त नीङ्कायः छ्यानःसाकायः ङीइ चेती वानःसामा परल अरुकायः छ्यानःसाकायः नीङ्इ लेखओ चेती ङीइ लात्सामा परल 2दोह् हायःती दाय्ह्सा नीङ्पाय् ङीकोः चेतीलो लेखा मुतेःनै सबैइ पह्रती योसाकायः नीङ्कोः कुरापाय् ङीकोः ल्हुङ्हाङः लेखओआः बा। 3इ चेतीपाय् ख्रीस्इलेः लेखती ङीकुस्इ ल्होक्आकान् एतलेः ङीइ जाङ्ह्ओ काम्पाय् “पेओलेः” त सबैइ चीःसा खाय्नानी। फेरी ओउः चेतीपाय् कागत्हाङः मसीइ लेखओ खेःल बाङ्कोः पाथालःहाङः वरःती लेखओ खेःल ओउः जीङः नाःओ परमेस्वर्कोः ग्वालामःइ मान्ताकोः ल्हुङ्हाङः लेखओआः बा। 4इत तोओपाय् ङीइ लयः ङाःती तोओलेः खेःल परमेस्वर्इलेः सबै जाङ्ह्सा खाय्नौ त ख्रीस्इ चीःताक्ती झ्यान्ते ङीइ इतलेः तोनेःनाङ्स। 5इ पेओ कुरापाय् ङीइ लयःलेः जाङ्ह्सा खाय्नाङःसु त ताःङीसीली परमेस्वर्कःसै ग्वम् दोःती ह जाङ्ह्सा खाय्नाङःसु। 6ओउःकोः नया तोती गम्ओ कुराकोः काम् जाङ्ह्साकायः परमेस्वर्इलेः ङीकायः दोःताक्आताङी। ओउः ङ्हा बयःओ तोती गम्ओखे ऐन्कोः लेखओ कुरालेः खेःतो ओउः नया तोती गम्ओखे परमेस्वर्कोः ग्वालामःकोः लेःआः। ओउः लेखती गम्ओ ऐन् जवती जाङ्ह्ओलम्खे सीलेःनै ओउः ग्वालामःखेइ मान्तालम्कायः जीङः बयःनौ। 7ओउः बाङ्कोः पाथालःहाङः लेखओ ऐन् बयःओ बेलाहाङः परमेस्वर्इ ओउःच्युक् अङ्ग थङ्ग थोङ्ताक्ती झ्यान्ते अरु इस्राएल्कोः मान्तालम्इ मोसाकोः खेन् योतोक्हाङः ङ्हालेः मीक् झोर्आथास। ओउः मान्ताकायः सीताक्सामा लोने म्हीत्ती वाय्सा खेःओ ऐन्खेपाय् ओउःच्युक् ताङ्ह्लेःआ त खेःया 8परमेस्वर्कोः ग्वालामःइ बयःओ कुराखे ओउःसै आन पेतोमा ताङ्ह्तोलेः खेःनाः बा। 9मान्तालम्कायः गाल्तुम्ती फुःओ ऐन्कोः कुराखे ओउःच्युक् ताङ्ह्ओलेः खेःतो त खेःया ओउः मान्ताकायः परमेस्वर्कोः मीक्हाङः पेतो स्याव्ताक्सा कुराखे न्हाङ्तोलेः ताङ्ह्लेःनाः बा। 10माः रैस ओउः नया कुरा ओउःच्युक् न्हाङ्तोलेः ताङ्ह्नाः त खेःओ ओउः ङ्हाकोः कुरा द्याह् ताङ्ह्गार्ल। 11ओउः लोने म्हीत्ती वाय्सा खेःओ कुराखेपाय् ताङ्ह्लेःनाः त खेःया ओउः गलकायःमा म्हीत्मालो कुराखे ओउःसै न्हाङ्तोलेः आन ताङ्ह्ओ लेःआः बा।
12एत ताङ्ह्ओ कुरा चीःती झ्यान्ते ङीखे दोङ्ह्ती नोःसा ग्यानाङी। 13मोसाखेपाय् मान्ताकोः मीक्हाङः दोङ्ह्तो नोःसा खाय्उलु ओउःकोः खेन्कोः थोङ्ओ म्हीत्खेःतोक्हाङः इस्राएली मान्तालम्इ च्यवःताक्माःसाकायः मोसाइ खेन् खुप्आकास। 14ओउः बेलाहाङःपाय् ओउः इस्राएलीलम् ल्हुङ् चाक्तो स्याव्आकाय् तेन्छ्याङ्मा ओउः मोसाइ लेखओ आखरःहाङः मुओ ऐन्कोः कुरा पह्रओ बेलाहाङःपाय् इस्राएली मान्तालम्इ ओउः कुराकोः माने च्यवःसामा चीःसामा खाय्नीली मीक् खुप्ओ मान्तालो लेखा मुलेःनै। मान्ताइ ख्रीस्कःताङ् वाङ्आक्तीको ह चीःसा खाय्नानी। 15दोङ्सीलेः तेन्छ्याङ्मा आखरःहाङः लेखओ मोसाकोः ऐन् पह्रओ बेलाहाङः ओउःकोः माने इस्राएली मान्ताकोः ल्हुङ्सै नुसुती मुनाः। 16ओउःमयःकोः ल्हुङ्सै नुस्सापाय् नुसुती मुसापाय् मुतो “प्रभुकःताङ् द्यान्ह्तोक्हाङः ओउः खुप्ओपाय् ल्हेस्तोलेः स्याव्नाः” त आखरःहाङः लेखती मुनाः। 17ओउः प्रभु त तोओपाय् परमेस्वर्कोः ग्वालामः लेःआः। फेरी गाःहाङःलो प्रभुकोः ग्वालामः मुनाः ओहाङः मान्तापाय् ऐन्कोः नोकरी खेःइली। 18ङी सबै खेन् खुप्माःत प्रभुकोः आन पेओ थोङ्ओ योती ओउःकोः थोङ्ओ बल दोःनाःतय्ही। एत दोःतोक्हाङः परमेस्वर्कोः ग्वालामःइ ङीकायः प्रभुलो लेखा न्हाङ्तोलेः पेओ स्याव्ताक्नाःतय्ही।
Currently Selected:
२ कोरीन्थी 3: CDM93
Highlight
Copy
Compare
Share
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
