२ कोरीन्थी 1
1
1इ ङा पावुल् त तोओमा ङीकोः हौ तीमोथी त तोओमा नीची नीस्चाक्इ नीङ् कोरीन्थ सहर्हाङःमा सबै आखया देस्हाङः मुओ ङ्हाम्ओलम्कायःमा इ चेती लेखती ल्होक्नेःनाङ्स। ङाकायःपाय् परमेस्वर्इ ओउःकोः कुरा छ्यानःसाकायः लयः झाक्ती छ्युङ्ह्ती तोती ल्होक्आताङः। 2लौ ङीकोः परमेस्वर् आपाइमा ङीकोः प्रभु येसु ख्रीस्इमा नीङ्कायः योनःती झ्यान्ते ल्हुङ् धोमाय्तो स्याव्ताक्तेःपै।
3-4ङीकोः प्रभु येसुकोः परमेस्वर् आपाकायः ताङ्ह्ताक्ती तोचाक्नी दा दोह् हायःती दाय्ह्सा ओउःइ गलमा योनःती योती लव्ह्नाःतय्ही। ङी लीह्सीःओ गोरःती मुतोक्हाङः ओउःइ ङीकायः लव्ह्नाःतय्ही ओहाङःसै परमेस्वर्इ ङीकायः लव्ह्आक्तीको ङीइमा अरु लीह्सीःओ गोरःती मुओलम्कायः ओउःतलेः लव्ह्सा खाय्नाङःसु। 5ख्रीस्कःताङ् वाङ्ओलो लेखालेः ङीकःताङ्मा आन लीह्सीःओ वाङ्आनाः ओउःत झ्यान्ते ख्रीस्कोः लव्ह्ओ आन दोःनाःतय्ही। 6ङीपाय् लीह्सीःओ गोरःनाङी त खेःया नीङ् दल्तोमा ल्हुङ् धोमाय्तोमा स्याव्तेःनै। ङीपाय् लव्ह्ओ दोःनाङी त खेःया नीङ्कायःमा लव्ह्ओ दोःतेःनै ओहाङःसैको नीङ् ङीलो लेखालेः लीह्सीःओ गोरःसा खाय्तेःनानी। 7नीङ्इपाय् ङीकुस्इ ब्राङ्तीलेः लीह्सीःओ गोरःनाःतय्ह्नी ओउःत झ्यान्ते ङीकुस् ब्राङ्तीलेः लव्ह्ओमा दोःनाःतय्ही एत ङीइ ल्हुङ्हाङः पेतोलेः ताःनाङःसु।
8फेरी इमा नीङ्कायः छ्यानःसा खेःनाङी। ङी असीया देस्हाङः मुतोक्हाङः आन लीह्ओ च्यवःआलाङःसु। ओउःच्युक् नाःतो लीह्सीःओ च्यवःती झ्यान्ते “लौ ङी स्याक्ती मुसा खाय्तय्ह्नीली सीसा खेःनाःतय्ही” त म्हर्ती ङी ग्रमःत मुसा दोःङीली। 9ङी एतलेः सीखेःओ दोह् हायःती स्याव्ओ त दाय्ह्साकायः “ङीइ लयःकायः दल्ताक्नाःतय्ह्इसी” त दाय्ह्ती ङाःती म्हर्साकायः खेःबाय्ल “ओउः सीओलम् उह्ती च्योक्ताक्ओ परमेस्वर्इपाय् दल्ताक्नाःतय्ही” त ङीकायः चीःताक्ती ङ्हाम्ताक्सा थेङा स्याव्ओआः बा। 10ओउः परमेस्वर्इपाय् ङीकायः ओउःच्युक् पेमालो सीसा खेःओसै ङ्हामा दल्ताक्आतय्ही लोनेमा ओउःइ फेरीलेः दल्ताक्नाःतय्ही त ङीइ ल्हुङ्हाङः चीःसा खाय्नाङःसु। 11ओउःत हायःसाकायः ङीकायः परमेस्वर्कः तेती तोनु दा। ओहाङःसैको नाःतोलम्इ तेती तोतोक्हाङः परमेस्वर्इ ङीकायः योनःती योती झ्यान्ते लोने दल्ताक्नाःताङी। ओउःत खेःओ नाःतोलम्इ परमेस्वर्कायः “च्युता” त तोनानी।
12ल्हाव्ह्दैबाङ्हाङः ङीपाय् दोङ् नीङ्तो रेव्मालो ल्हुङ्इ पेतो हायःती वाह्आलाङी। नीङ्कःहाङःमा ङी न्हाङ्तोलेः ओउःत पेतो हायःलाङ् वाह्आलाङी। ओउःत वाह्ओ बेलाहाङःपाय् ङीकोः व्हाय्तो चीःओपाय् मान्ताकःसै दोःओ खेःल परमेस्वर्कःसै दोःओ लेःआः बा। ओउःत झ्यान्ते ङी ल्हुङ्हाङः ङाःतीलेः नोःसा खाय्नाङःसु। 13-14ङीइ लेखओ बेलाहाङः नीङ्इ पह्रआक्तीको चीःसा खाय्ओ कुरा ह लेखती ल्होक्नेःनाङ्स। ओउःत झ्यान्ते द्याह्खेपाय् ङीकोः कुरा नीङ्इ जुदालेः चीःसा खाय्तेःनीली त खेःया लोनेखे नीङ्इ जुदालेः व्हाय्तो चीःसा खाय्तेःनानी। ओहाङःसै प्रभु येसुकोः वाङ्सा खेःओ दीन्हाङः नीङ्पाय् ङीइ ङ्हाम्ताक्ओ मान्तालम् च्यवःती झ्यान्ते ङी चोङाय्ती मुनाङी। नीङ्मा ङीलो लेखा ङीकःहाङः चोङाय्तो मुसा खाय्तेःनानी ओउःत स्याव्सा झाक्नाङी। 15एत म्हर्ती “ओउःमयःकायः पेतो स्याव्ताक्पाङःसु” त दाय्ह्ती ङाइ नीङ्कायः क्रुस्लाङ् वाङ्सा बोङःङोतो ओउःत हायःसा नीङ्कःहाङः नीस्पेन्ह्कायः मुसा दोःओ खेःतो 16यात् पेन्ह् मासीदोनीयाताङ् वाङ्तोक्हाङःमा नीङ्कःहाङः ल्होती क्रुस्सा दोःओ खेःतो। फेरीलेः मासीदोनीया देस्सै पाय्ह्ती वाङ्तोक्हाङःमा क्रुस्सामा दोःओ खेःतो ओहाङःसै नीङ्कायः क्रुस्आक्तीको ङाकायः पेतोलेः यहुदीयाताङ् ल्होक्तेःचानाङ्सतो खेःतो। 17ओउःतलेः तोनेःनाङ्सतो वाङ्सा दोःङल। तोतोक्हाङः ङा आह्रे तोओ खेःल ङापाय् ल्हाव्ह्दैबाङ्कोः मान्तालम्लो लेखा यात् पेन्ह्कायः “माः है वाङ्आनाङः” त दाय्ह्ती अरु पेन्ह्कायः “खेःल वाङ्ङल” त दाय्ह्ती ख्याल् ख्याल् नोःओ मान्ता ङा खेःङल बा। 18परमेस्वर्इ तोओ कुरापाय् दोङ् ङ्हाम्सीःओ कुरा लेःआः। ओउःलो लेखा ङाइ तोओ कुरामा दोङ् कुरा लेःआः ले ब्रेह्ती नोःओ कुरापाय् खेःल 19दोह् हायःती दाय्ह्सा ङाइमा सील्भानस् तीमोथीमा नीङ्कःहाङः थोल्ह्ती तोओ परमेस्वर्कोः चोः येसु ख्रीस्कोः कुरापाय् ब्रेह्ती नोःओ कुरा खेःबाय्ल ओउःपाय् सबैलेः परमेस्वर्कोः दोङ् कुरा लेःआः बा 20येसु ख्रीस्इपाय् परमेस्वर्इ तोती गम्ओ कुरा जुदालेः ताप्ताक्तीलेः जाङ्ह्आकान्। ओउःत खेःओ ङीइ येसु ख्रीस्कोः मय्ङ् पेह्ती परमेस्वर्कायः ताङ्ह्ताक्तीलेः नोःती “आमेन्” त दाय्ह्ती तोनाङःसु। 21ङीकायःमा नीङ्कायःमा ग्रमःत ख्रीस्कुस् मुताक्ओपाय् परमेस्वर् लेःआः बा। ओउःइलेः ङीकायः लयःकोः काम् जाङ्ह्साकायः छीङ्ह्ताक्आतय्ही। 22फेरी परमेस्वर्इलेः “इपाय् ङाकोः लेःआः” त छ्यानःसा थेङा ङीकायः लयःकोः ग्वालामः ङ्हाहाङःसै ङीकोः ल्हुङ्हाङः ल्होक्ती बयःआतय्ही।
23ङाकोः ल्हुङ्तुक् चीःओ परमेस्वर्इ ङाकायः पाःती तोपाःताङः। नीङ्कायः लीह्सीःओ स्याव्ताक्माःसाकायः ह कोरीन्थहाङः ङा द्यान्ह्ती वाङ्धाङ्ङल। 24नीङ्कायःपाय् “लौ नीङ् इतलेः ङ्हाम्सा खेःतो” त गानाक्ती तोसा परल दोह् हायःती दाय्ह्सा नीङ्पाय् द्याह् ग्रमःत मुलेःतेःनै। खेःल नीङ्कायः चोङाय्ताक्साकायः ङीइ नीङ्कुस् ब्राङ्तीलेः काम् जाङ्ह्नाःतय्ह्नी।
Currently Selected:
२ कोरीन्थी 1: CDM93
Highlight
Copy
Compare
Share
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
