१ कोरीन्थी 16
16
1द्याह् ओउः ङ्हाम्ओलम्कायः त्युम्ह्ओ पैसा नीङ्इ दोह् हायःसा दाय्ह्सा गतलो ङाइ गालातीकोः मान्तालम्कायः तोआलाङःसु ओउःतलेः नीङ्इमा जाङ्ह्नु दा। 2आइतेबार् आइतेबार् दीन्लम्हाङः मान्ता मान्ता जोक् सबैइ त्युम्ह्ती गम्नु दा। गतलो मान्ता मान्ता जोक् क्युती दोःआ ओउःलेः त्युम्ह्ती गम्नु। ओहाङःसैको ङा वाङ्सा बेलाहाङः अरु पैसा त्युम्ह्ती वानःसा परल। 3वाङ्आक्तीको ङाइ लेखओ चेतीमा ओउः त्युम्ह्ती गम्ओ पैसामा यात्नीस्चाक् नीङ्इ छ्युङ्ह्ओ मान्ताकुस् यरुसालेम्ताङ् ल्होक्नाङःसु। 4ङामा यरुसालेम्ताङ् आल्सा खेःतो त खेःया लौ ओउःमयः ङाकुस् आल्पै।
5मासीदोनीया देस् च्योल्ती वाङ्आक्तीको ङा नीङ्कःताङ् वाङ्नाङः ओउः देस्पाय् ङा ङ्हा आल्सा खेःनाङः। 6नीङ्कःहाङः दाह्आक्तीको नीङ्कुस् मुसा दोःनाङः यादो य्हुदा महीनालम्च्युक्कायः ङा मुसा दोःनाङः यादो। नीङ्कुस् मुआक्तीको गाःहाङः ङा आल्सा खेःनाङः आल्तोक्हाङः नीङ्इ ङाकायः दाम्ती ल्होक्सा खाय्तेःनेःनानाङ्स। 7ङा द्याह् वाङ्चाङः त खेःया नाङ्कुस् चीच्योक्कायः ह मुसा दोःनाङः यादो। ओउःत हायःसा झाक्ङल प्रभुइ ङाकायः ताक्चाःताङः त खेःया ङा नीङ्कुस्इ बल ज्याङःतोकायः मुनाङः। 8ओउः पचास् दीन्कोः छ्यात् दाह्माःच्युक्हाङःकायःपाय् ङाइ इ एफेसस् सहर्हाङः मुधाङ्नाङः। 9इहाङः ङाकोः दुस्मान् नोःतो मुसापाय् मुनै इहाङः परमेस्वर्कोः पेओ काम्मा आन जाङ्ह्सा दोःनाङः। 10नीङ्कःताङ् तीमोथी वाङ्नाः त खेःया ओउःकायः सबै कुराहाङः पेतोलेः हायःनु दा ङालो लेखालेः ओउःइमा प्रभुकोः काम् जाङ्ह्नौ। 11ओउःकायः मीतो योलाम्। लोने ङाकःताङ् पेतो दाम्ती द्यान्ह्ती ल्होक्नु दा ओउःपाय् अरु ङ्हाम्ओलम्कुस् ङाकःताङ् वाङ्साकायः ल्युङ्ह्तीलेः मुनाङः। 12ङीकोः हौ आपोलस् त तोओकायःपाय् “लौ ङीकोः पुःचोङ् हौचोङ्कुस्इ कोरीन्थहाङः मुओ ङ्हाम्ओलम्कायः क्रुस्लाङ् आल्अ दा” त दाय्ह्ओ ओउःकायः तोझुङ्ङोतो “ङा आल्सा बेलाहाङः दाह्धाङ्ल” त त्याङ्नाः। ओउःतलेः त्याङ्तो लोने क्रोःओ बेलाहाङः ओउःपाय् नीङ्कःताङ् वाङ्आनाः।
13लौ घीःतीलेः रैमाःत ग्रमःत मुती ङ्हाम्नु 14अरुकायः जुगाङ् राप्ती काम् जाङ्ह्नु दा। 15स्तेफानस्मा ओउःकोः कीम्कोः मान्तालम्कायःमा चीःतेःनानी। ओउःमयः एलेनी देस्हाङः अरुसै ङ्हाकोः ङ्हाम्ओलम् लेःआः इ। ओउःमयःइ अरु परमेस्वर्कायः ङ्हाम्ओलम्कायः काम् गलकायःमा जाङ्ह्धै मुनै। 16ओउः खाल्कोः मान्तालम्कायःमा ओउःकुस् काम् जाङ्ह्ती मुओलम्कायःमा पेतो सायःनु दा। 17स्तेफानस् फोर्तुनातस् आखैकुस् वाङ्ती झ्यान्ते ङा म्रोतीलेः मुनाङः। नीङ्कोः रम्ह्गहाङः ओउःमयःइ नीङ्कोः होन्त मुनै। 18नीङ्कायःलो लेखा ओउःमयःइ ङाकायः ल्हुङ् द्युमःताक्आताङः। इलो लेखा मान्तालम् रोम्ती त्याक्सा खेःतो। 19ओउः असीयाहाङः मुओ ङ्हाम्ओलम्इ नीङ्कायः नमस्ते ल्होक्तेःनै। अक्वीला प्रीस्कीलानीस् पय्क्चाःइमा ओउःनीस्कोः कीम्हाङः हुम्ओ ङ्हाम्ओलम्इमा नीङ् प्रभुकायः ङ्हाम्ओलम्कायः आन नमस्ते ल्होक्तेःनै। 20इहाङःकोः अरु ङ्हाम्ओलम्इमा नीङ्कायः नमस्ते ल्होक्तेःनै। सबै लःलयःकायः ग्रोम्काय्ती प्रभुकोः मय्ङ्हाङः रोम्काय्न दा। 21लौ नीङ्कायः ङा पावुल्इमा लयः क्रुत्इ लेखती नमस्ते ल्होक्नेःनाङ्स। 22सुसुइ प्रभुकायः राप्नीली ओउःकायः पेमालो स्याव्पै। मरनाथा त तोसा “प्रभुय वाङ्अ दै” 23ङीकोः प्रभु येसु ख्रीस्इ नीङ्कायः गलकायःमा योनःती योतेःपै। 24लौ ङी सबै येसु ख्रीस्कोः लेःआः तय्ही त खेःओ ङाइ राप्नेःनाङ्स त दाय्ह्नाङः।
Currently Selected:
१ कोरीन्थी 16: CDM93
Highlight
Copy
Compare
Share
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
