१ कोरीन्थी 7
7
1द्याह् नीङ्इ ङ्हा व्हत्ओ कुरा ङाइ त्याङ्ती तोचेःनाङ्स। गोय्चोःलम्पाय् मोमःचोःलम्कुस् एनःमाःत मुसा पेनाः। 2ओउःत हायःसा पेसापाय् पेलेःनाः बुधी नाःमालो गोय्चोःलम्इ मोमःचोःकुस् आन थ्यावःकाय्सा बोङःमय् ओउःत झ्यान्ते गोय्चोः गोय्चोःइपाय् लःलयःकोः बुधी वानःपनौ फेरी मोमःचोः मोमःचोःपाय् लःलयःकोः भाव्कः पाय्ह्पै। 3बुधाखेइ लयःकोः बुधीकायः सबै कुरा पेतो जाङ्ह्सा खेःतो फेरी बुधीखेइमा लयःकोः बुधीकायः पेतो जाङ्ह्पानी। 4बुधीकोः आङ्पाय् बुधाकोः लेःआः लयःकोः ह खेःल। फेरी बुधाकोः आङ्पाय् बुधीकोःलेः मुनाः। 5नीस् पय्क्चाःपाय् लयःकोः बुधा बुधीकुस् ग्यातीलेः एनःपाःच। होम्काय्ती नोःआक्तीको ह परमेस्वर्कः तेती तोसाकायः यात्नीस् दीन्लम्कायः थेथे एनःसा स्याव्नाः अरु बेलाहाङः लयःनीस्कुस् एनःपाःच उया सैतान्सै पेमालो होम्ओ ल्हुङ् वाङ्चाः। 6इ ङाइ तोओ कुरापाय् अह्र्तलेः खेःल नीङ्इ लयःकोः ल्हुङ्हाङः “गाव्खे जाङ्ह्सा पेनाः गाव्खे पेल” त चीःसा खाय्तेःनानी। 7सबै मान्तालम् ङालो लेखा बुधी नाःमाःत मुपै त झाक्ङोतो परमेस्वर्इ मान्ता मान्ताकायः लःलयः जोक् बयःआकान् यात्नीस्खे एकान् मुसा खाय्नानी अरुखे बुधी वानःसा खेःतो। 8सुसु मोमःचोःकोः बुधा सीओलेः मुनाः सुसु बीहा जाङ्ह्धाङ्मालो मुतेःनै नीङ्पाय् ङालो लेखा एकान् मुसा पेनाः एत तोनेःनाङ्स। 9एत हायःसा पेसापाय् पेतोलेः सुखे ग्रमःत मुसा खाय्नीली ओउःमयः बीहा जाङ्ह्पानी। बीहा जाङ्ह्ओपाय् आन लीङ्हायःती मोह्हाय्ओ ल्हुङ् मुओसै पेनाः। 10ओहाङःसैको नीङ् बुधा बुधीलम्पाय् ङाइखे खेःल प्रभु ख्रीस्इलेः इत तोतेःनै “बुधीइ लयःकोः बुधाकायः फेलाम्। 11मोमःचोःइ लयःकोः बुधाकायः फेओ त खेःया अरु गोय्चोःकुस् पाय्ह्सा स्याव्ल एकान् मुसाया ङ्हाकोः बुधाकुस् गोय्खामःती द्यान्ह्ती पाय्ह्साया ओउः ह स्याव्आनाः। फेरी बुधाइमा लयःकोः बुधीकायः फेलाम्” त प्रभुइ तोओ कुरा लेःआः। 12द्याह् इ अरु कुरापाय् प्रभुसै खेःल ङाइलेः तोनेःनाङ्स सुखे ङ्हाम्ओ मान्ताकोः बुधीलेः ङ्हाम्सा ग्यामालो मुनाः ओउः बुधीपाय् बुधाकुस् मुसा ग्यानाः त खेःया ओउःकायः फेलाम्। 13फेरी सुखे ङ्हाम्ओ मोमःचोःकोः बुधालेः ङ्हाम्सा ग्यामालो मुनाः ओउः बुधापाय् बुधीकुस् मुसा ग्यानाः त खेःया ओउःकायः फेलाम्। 14दोह् हायःती दाय्ह्सा ङ्हाम्मालो बुधापाय् ङ्हाम्ओ बुधीकुस् मुती झ्यान्ते ओउः बुधापाय् छय्ङ्तोलेः स्याव्नाः फेरी ङ्हाम्मालो बुधीमा ङ्हाम्ओ बुधाकुस् मुती झ्यान्ते ओउःमा छय्ङ्तोलेः स्याव्नाः ओउःत खेःया नीङ्कोः चोःलम्मा छय्ङ्तोलेः मुनै रेव्तो खेःइली। 15ओउःत हायःसा पेसापाय् पेलेःनाः ओउः ङ्हाम्मालो मान्ता जुगाङ् फेसा ल्हुङ् मुनाः त खेःया ओउः मान्ता आल्पाः। ओउःकुस् ओउः ङ्हाम्ओ मान्तापाय् मुसा परल। नीङ्कायःपाय् गलकायःमा काय्काय्माःत ब्राङ्काय्ती मुसाकायः परमेस्वर्इ गोत्तेःआकाय्। 16बुधीपाय् ओउःकोः ङ्हाम्मालो बुधाकुस् मुतेःनै त खेःया ओउः बुधाकायः “लोने ङ्हाम्ती दल्तो स्याव्नाः” त गत हायःती चीःसा खाय्तेःचौ र। फेरी बुधापाय् ओउःकोः ङ्हाम्मालो बुधीकुस् मुतेःनै त खेःया ओउः बुधीकायः “लोने ङ्हाम्ती दल्तो स्याव्नाः” तमा चीःसा खाय्तेःनीली। 17गतलो परमेस्वर्इ मान्ता मान्ताकायः “इत इत हायःतीलेः वाह्न” त तोती गोत्तेःआकाय् ओउःतलेः वाह्न। इत ङाइ सबै ङ्हाम्ओलम्कायः स्यान्ती तोनाङःसु।
18ओहाङःसैको प्रभुइ गोत्ओ बेलाहाङः यात्चाक्खे यहुदीलम्इ जवओ पुन् तात्ओ मुनाः त खेःया ओउःपाय् ओउःतलेः मुपाः। अरुखे पुन् तात्माःतो मुनाःया ओउःखे ओउःतलेः मुपाः। 19दोह् हायःती दाय्ह्सा ओउः पुन् तात्ओ मुनाः त खेःयामा मुल त खेःयामा दोह्मा दयःल। परमेस्वर्इ तोओ कुरा ग्याती जाङ्ह्सापाय् ओउःपाय् दोङ् ताङ्ह्ओ कुरालेः ओउःत हायःसा परलेःनाः। 20ओउःत झ्यान्ते परमेस्वर्इ गोत्ओ बेलाहाङः गतलो नीङ् मुतेःआकाय् ओउःतलेः मुतेःपै। 21गोत्ओ बेलाहाङःपाय् नाङ् नोकरी खेःतेःतो त खेःया र्याङःमाःत मुअ एत मुसापाय् मुतेःपाः। नाङ्इ नोकरी काम् फेसा दोःतेःनाः त खेःया ओउः बेलाहाङःलेः ओउः काम् फेउ। 22सुसुखे प्रभुइ गोत्ओहाङः नोकरी मुनै ओउःपाय् प्रभुकोः मीक्हाङः नोकरी खेःमालो मान्ता मुनै। फेरी सुसुखे गोत्ओ बेलाहाङः नोकरी खेःइली ओउःपाय् ख्रीस्कोः नोकरी स्याव्नै। 23नीङ्पाय् रेव्ओसै ल्हाङ्ती दल्ताक्साकायः प्रभु ख्रीस्लेः बयःओ खेःतो ओउःत झ्यान्ते मान्ताइ जाङ्ह्ओ ऐन्कोः नोकरी स्याव्लाम्। 24लौ उया पुःचोङ् हौचोङ्य परमेस्वर्इ गोत्ओहाङः गतलोतेः मुतेःआकाय् ओउःतलेः परमेस्वर्कोः काम् जाङ्ह्ती मुतेःपै।
25लौ बीहा जाङ्ह्धाङ्मालोलम्कायः प्रभुसै दोःओ कुरापाय् नाःङल। ङाकायःपाय् प्रभुइ योनःती झ्यान्ते द्याह् ङाइ तोओ कुरा ङ्हाम्सीःओलेः स्याव्नाः। 26तेन्छ्याङ्कोः लीह्ओ गोरःसा बेलाहाङः गतलो यात्चाक् मुनाः ओउःतलेः मुसा पेनाः त ताःनाङः। 27नाङ्कोः बुधी मुनाः त खेःया ओउःकायः फेसा बोङःतेःचौ नाङ्कोः बुधी नाःल त खेःया बुधीकायः बोङःतेःचौ। 28ओउःत हायःसा पेसापाय् पेलेःनाः नाङ्इ मोमःचोः वानःतेःनौ त खेःया ओउःपाय् रेव्ओ काम् खेःल। फेरी मोमःचोःपाय् गोय्चोःकुस् पाय्ह्सा ओउःमा रेव्तो काम् खेःल। तेन्छ्याङ्पाय् ल्हाव्ह्दैबाङ्हाङः नीस् पय्क्चाःपाय् आन लीह्तो स्याव्नाःच ओउःत लीह्सीःओ नीङ्कःताङ् “वाङ्लाम्” त दाय्ह्ती ङाइ इतलेः गानाक्ती तोनेःआलाङ्स। 29लौ पुःचोङ् हौचोङ्य ङाइ तोओ कुरापाय् इलेःआः। द्याह्पाय् नाःतो दीन् मुधाङ्ल ओउःत खेःओ द्याह्हाङःसै बुधी नाःओ मान्तापाय् बुधी नाःमालो मान्तालो लेखा मुतेःपै। 30क्रेस्ओ मान्तामा क्रेस्मालो मान्तालो लेखा मुतेःपै चोङाय्ओ मान्तामा चोङाय्मालो मान्तालो लेखा मुतेःपै। चीस् लेःओ मान्तामा ओउः चीस् लेःमालो मान्तालो लेखा मुतेःपै। 31फेरी ल्हाव्ह्दैबाङ्हाङः काम् जाङ्ह्ओ मान्तामा ओहाङः काम् जाङ्ह्मालो मान्तालो लेखा मुतेःपै दोह् हायःती दाय्ह्सा तेन्छ्याङ्कोः ल्हाव्ह्दैबाङ्पाय् नाःतो दीन्कायः मुधाङ्ल म्हीत्खेःनाः। 32नीङ् र्याङःमाःत मुसा ङा झाक्नाङः। बुधी नाःमालो मान्ताखेइ प्रभुकायः म्रोताक्सा थेङा प्रभुकोः काम् जाङ्ह्सा बोङःनानी 33-34बुधी नाःओ मान्ताखेइ लयःकोः बुधीकायः म्रोताक्साकायः ल्हाव्ह्दैबाङ्कोः काम्लम् जाङ्ह्सा बोङःनानी ओउःकोः ल्हुङ् केङ्तो मुनाः। फेरी बुधा नाःमालो मोमःचोःखेइ प्रभुकायः म्रोताक्सा थेङा ओउःकोः काम् ह जाङ्ह्ती आङ्मा ल्हुङ्मा छय्ङ्तो मुसा बोङःनानी। बुधा नाःओ मोमःचोःखेइ लयःकोः बुधा म्रोताक्साकायः ल्हाव्ह्दैबाङ्कोः काम् जाङ्ह्सा बोङःनानी। 35इ कुरा नीङ्इ पेतो चीःसाकायः तोनेःनाङ्स हुकुम् बयःओ खेःङल। ओहाङःसैको नीङ्इ त्याक्ओ कुरा चीःती ल्हुङ् केङ्माःत मुती प्रभुकोः काम् जाङ्ह्सा खाय्तेःनानी। 36ओहाङःसैको सुखेकोः धयःओ मोमःचोः मुनाः ओउः मोमःचोःकोः ओह् प्ल्याय्ओ त खेःया “लौ इपाय् ङाकुस् पाय्ह्सा खेःतो” त म्हर्ती ओउः मोमःचोः वानःपौ ओउःत हायःसा रेव्ओ काम् खेःल। 37अरु मान्ताखे ओउःकायः धयःती गम्ओ मोमःचोःपाय् “वानःसा परल” त दाय्ह्ती ल्हुङ्हाङः ग्रमःत मुसा खाय्नौ त खेःया ओउःइमा पेतो हायःआकान् बा। 38सुसुइ बुधी वानःनानी ओउःखेइ पेतो हायःनीतो सुसु बुधी वानःमालो मुनाः ओउःखे न्हाङ्तोलेः पेतो हायःनानी। 39बुधा सीधाङ्माखाहाङः बुधीइ ओउःकायः फेसा स्याव्ल ओउःकोः बुधा सीआ त खेःया ओउः मोमःचोःपाय् अरु गोय्चोःकुस् पाय्ह्सा स्याव्सापाय् स्याव्तो ओउः गोय्चोः प्रभुकायः ङ्हाम्ओ मान्ता ह स्याव्नाः। 40फेरी ओउः मोमःचोःपाय् एकान् मुसा न्हाङ्तोलेः पेनाः त ङाइ तोनेःनाङ्स ओहाङःसै परमेस्वर्कोः ग्वालामःइमा ओउःतलेः तोतेःनै त ताःनाङः।
Currently Selected:
१ कोरीन्थी 7: CDM93
Highlight
Copy
Compare
Share
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
