१ कोरीन्थी 6
6
1लौ नीङ्पाय् कायःकाय्ओ बेलाहाङः परमेस्वर्कायः ङ्हाम्ओलम्कायः ल्हेत्ती फेती ङ्हाम्मालो मान्तालम्कःताङ् इ काय्काय्ओ कुरा सायःताक्साकायः आल्तेःनैया। ओउःत हायःसा जुगाङ् स्याव्ल। 2ङ्हाम्ओलम्इपाय् लोनेः सबै ल्हाव्ह्दैबाङ्कोः मान्तालम्कायः तय्छनःती योसा खेःतो त नीङ्इ चीःतेःनीलीया। नीङ्इ सबै ल्हाव्ह्दैबाङ्हाङः मुओलम्कायः तय्छनःती योसा खाय्तेःनानी त खेःया लयःमयःकोः कुरा तय्छनःती योसा खाय्तेःनानी। 3माः रैस ङीइ परमेस्वर्कोः लाङ्कासै ल्होक्ओमयःकायःमा तय्छनःती योनाङःसु। ङीइ ओउःच्युक् ताङ्ह्ओलम्कायः एत हायःसा त खेःया न्हाङ्तोलेः नीङ्इ तेन्छ्याङ्कोः मीओ कुरा तय्छनःती योसा खाय्तेःनानी बा। 4खाय्सापाय् खाय्तेःनानी नीङ्कोः मान्ता कायःकाय्ओ बेलाहाङः नीङ्इ परमेस्वर्कोः कुरा चीःमालोलम्कःताङ् आलःसा परल माःर। 5नीङ्पाय् जुगाङ् रास्सीःतो खेःतेःनै। नीङ्कोः कायःकाय्ओ कुरा होम्काय्ती फेताक्साकायःपाय् व्हाय्ती चीःओ मान्तापाय् यात्चाक् सुमा नाःतेःइली र। 6नाङ्कःहाङः यात्चाक् कुरा तात्सा चीःओ मान्ता खेःतेःइतो त खेःया ङ्हाम्मालो मान्तालम्कोः अदालात्ताङ् तय्छनःती योलाङ् आल्सा परआक्ल। परसापाय् परआक्ल एतलेः हायःताङःतेःनानी रैस। 7दोङ्सीलेः इ कायःकाय्ओ तय्छनःती योसा काम् मुनाः त झ्यान्ते नीङ्कोः ल्हुङ्तुक् पेतो खेःबाय्ल नीङ् सबैकायः जुगाङ् कुरा क्लीमःओलेः मुतेःनै। अरुकुस् कायःकाय्ओसैपाय् लीह्सीःओ गोरःसामा पेलेःनाः नीङ्कोः सामान् माल्ताल्लम् अरुइ लाती आलःसामा पेलेःनाः। 8ओउःत हायःओखे पेलेःनाः बा। नीङ्खेइपाय् लयःकोः पुःचोङ् हौचोङ्कायः कायःकाय्ती लाकाय्ती लीह्सीःओ बयःतेःनानी इत हायःओपाय् पेल। 9रेव्ओ काम् जाङ्ह्ओ मान्तालम्पाय् परमेस्वर्कोः राजीहाङः मुसा दोःइली एत नीङ्इ चीःतेःनीली र। नीङ्इ पेतो चीःसा परलेःनाः बा। ल्हास्या जाङ्ह्ओ मान्तामा मुर्तीकायः मानओ मान्तामा जार् जाङ्ह्ओ मान्तामा गोय्चोः मान्ताइ गोय्चोः मान्ताकायः पेमालो काम् जाङ्ह्ओ मान्तामा 10कुःरेव् जेःरेव् ङोरेव् मान्तामा पेमालो जवती नोःओ मान्ता आन पैसा क्युती जेःओ मान्तामा ओउःमयः सबैलेः परमेस्वर्कोः राजीहाङः मुसा दोःइली। 11नीङ् मान्तालम्पाय् यात्नीस्चाक्इ ङ्हाहाङः एतलेःतेः हायःओ खेःतेःइतो द्याह् नीङ् ओउः काम्लम् फेतेःनीतो झ्यान्ते जय्लनःतोलेः छय्ङ्तोलेः स्याव्तेःआकाय्। प्रभु येसुइमा ओउःकोः ग्वालामःइ नीङ्कायः पेतो स्याव्ताक्ती झ्यान्ते नीङ् परमेस्वर्कोः मीक्हाङः पेतो मुसा दोःतेःनै।
12यात्चाक् “ङाइ दोह् खेःयामा हायःसालेः दोःनाङः” त दाय्ह्ती नोःचै। माःसापाय् माः खेःतो यात्नीस् काम् हायःसाखे नीङ्कायः पेलेःनाः अरुखे पेल। माः रैस ङाइ दोह् खेःयामा जाङ्ह्सा दोःङोतो ओउःत हायःओ ङाइ सोलःती फेसा खाय्माःत मुनाः त खेःया “ओउःत हायःसा स्याव्ल” त दाय्ह्नाङः। 13फेरी “तुक् कोस्ताक्साकायः जेःगालेः स्याव्नाः” त दाय्ह्ओ लेखालेः यात्नीस्चाक् “आङ्कोः मोह्हाय्ओ द्युमःताक्साकायः ल्हास्या काम् जाङ्ह्सा स्याव्लेःनाः” त दाय्ह्नै यादो। ओउःत दाय्ह्सापाय् स्याव्ल दोह् हायःती दाय्ह्सा लोनेः परमेस्वर्इ तुक् जेःगाकोः कुरा सबै म्हीत्ताक्नौ। आने मान्ताकोः आङ्पाय् पेमालो काम् जाङ्ह्साकायः मुओ खेःल प्रभुकोः काम् जाङ्ह्साकायः मुलेःनाः। मान्ताकोः आङ्इ प्रभुकायः काम् जाङ्ह्लेःनौ मान्ताकोः आङ्कायः प्रभुइमा पेतोलेः जाङ्ह्मानौ। 14प्रभु येसु सीआक्तीको ओउःकायःमा परमेस्वर्इ उह्ती च्योक्ताक्आकान् ङीकायःमा ओउःइ लयःकोः ग्वम्इ उह्ती च्योक्ताक्नाःतय्ही। 15नीङ्कोः आङ्लम्पाय् ख्रीस्कोः आङ्ज्याङ्कोः लेःआः एत नीङ्इ चीःतेःनानी माःर। ओउःत झ्यान्ते ख्रीस्कोः आङ्ज्याङ्पाय् ल्हास्याकुस् आङ् ब्राङ्सा स्याव्नाः जुगु। 16सुसुखे ल्हास्या मोमःचोःकुस् साङ्ह्ती वाह्नै ओउःपाय् ओउः मोमःचोःकुस् ब्राङ्लेःनाःच। एतलेः परमेस्वर्कोः आखरःहाङः लेखती मुनाः “ओउःनीस्पाय् यातैज्याङ्लो लेखा स्याव्नाःच” त दाय्ह्ती लेखओआः। 17सुसुखे प्रभुकुस् ब्राङ्काय्ती मुनै ओउःलेः प्रभुकोः ग्वालामःकुस् यातैज्योः स्याव्नै। 18ओउःत झ्यान्ते ल्हास्या काम्पाय् जुगाङ् जाङ्ह्लाम्। सबै अरु रेव्तो काम्लम् जाङ्ह्ओपाय् मान्ताइ लयःकोः आङ्कायः दोह्मा हायःसल सुसुइ ल्हास्या काम् जाङ्ह्नानी ओउःइपाय् लयःकोः आङ्कायः वाय्ताक्नाःस। 19नीङ्कोः आङ्हाङःपाय् परमेस्वर्कोः ग्वालामःलेः मुनै। ओउःत झ्यान्ते नीङ् परमेस्वर्कोः मन्दीर्लो लेखा मुतेःनै एत नीङ्इ चीःतेःनानी माःर। फेरी नीङ्कोः आङ्लम्पाय् परमेस्वर्इ बयःतेःआकाय् नीङ्कोः लयःकोःलेः खेःबाय्ल। 20दोह् हायःती दाय्ह्सा परमेस्वर्इ नीङ् लेःसाकायः आनलेः बयःआकान् बा। ओउःत खेःओकायः नीङ्कोः वाहीमःइमा आङ्इमा काम् पेतो हायःती परमेस्वर्कायः पेतो ताङ्ह्ताक्नु दा।
Currently Selected:
१ कोरीन्थी 6: CDM93
Highlight
Copy
Compare
Share
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
