१ कोरीन्थी 15
15
1लौ पुःचोङ् हौचोङ्य ङाइ ङ्हा थोल्ह्ती तोओ पेओ समचार् फेरीलेः तोनेःनाङ्स दा। ओउः कुरापाय् नीङ्इ पेतो ङ्हाम्ती ग्रमःत मुतेःनै। 2नीङ्इपाय् आह्रे ङ्हाम्तेःनीली त खेःया इ ङाइ तोओ पेओ समचार् पेतोतेः ङ्हाम्ती झ्यान्ते नीङ् रेव्ओसै दल्तेःनै। 3दोह् दोह् कुरा ङाकायः बयःओ खेःतो ओउः कुरालेः नीङ्कायः स्यान्ती तोनेःआलाङ्स। ओउः कुरापाय् चीःती ङ्हाम्सा आन परनाः। ओउः कुरापाय् दोह् दोह्लेः दाय्ह्सा। ङीकोः रेव्ओ काम् जाङ्ह्झ्याङ्कायः क्युम्ह्ती वाय्साकायः ख्रीस्लेः सीआ इतलेः परमेस्वर्कोः आखरःहाङः लेखती मुनाः। 4ओहाङःसैको सीआक्तीको ओउःकोः म्हाङ् पाम्ह्आकानी। पाम्ह्आक्तीको सुम् दीन् स्याव्आक्तीको ओउःकायः परमेस्वर्इ उह्ती च्योक्ताक्आथै। ओउःत हायःओमा परमेस्वर्कोः आखरःहाङः लेखती मुनाः। 5ओहाङःसैको च्योक्आक्तीको ख्रीस्पाय् ङ्हासै पत्रुस्कःताङ् थाआ लोने ओउः बारजन छ्युङ्ह्ओमयः सबैमयःकःताङ् थाआ। 6ओहाङःसैको ख्रीस्पाय् पास्सै हुम्ती मुओ लयःकुस् वाह्ओमयःकःताङ् थाती वाङ्आ। ओउः पास्सै मान्तालम्पाय् तेन्छ्याङ्मा नाःतोलेः सेलः मुधाङ्नै यात्नीस् ह सीओआः। 7ओउःमयःकः थाती वाङ्आक्तीको याकुब्कःताङ्मा ङ्हा थाआ लोनेः सबै छ्युङ्ह्ती ल्होक्ओमयःकःताङ् थाआ। 8फेरी सबैसै लोने ख्रीस्पाय् ङाकःताङ् थाआ। ङापाय् नाय्रो माङ्ह्ओ कुनाङ् चोःलो लेखा ओउःकोः मान्ता स्याव्आलाङः। 9ङापाय् अरु छ्युङ्ह्ओमयःसै मीओ लेःआः ङ। ङ्हासै परमेस्वर्कायः ङ्हाम्ओलम्कायः ङाइ आन पेमालो हायःती लीह्सीःओ बयःआलाङःसु ओउःत झ्यान्ते ङाकायः येसुकोः छ्युङ्ह्ओमयः त तोसा त्याक्ताङःल। 10परमेस्वर्इ ङाकायः योनःती योती झ्यान्ते ह ङापाय् तेन्छ्याङ्लेः ओउःकोः छ्युङ्ह्ती ल्होक्ओ मान्ता लेःआः ङ। माः रैस ओउःकोः योनःती योओपाय् आह्रे खेःल अरु छ्युङ्ह्ओमयःसै ङाइ परमेस्वर्कोः काम् आन त्युस्तीलेः जाङ्ह्आलाङः बा ङाइ झुङ्आले खेःल परमेस्वर्कोः ग्वम् दोःती जाङ्ह्आलाङः। 11ओउःत खेःओ ङाइ तोओमा अरु छ्युङ्ह्ती ल्होक्ओमयःइ थोल्ह्ती तोओमा सबै यातैज्योः कुरा स्यान्ती तोनेःनाङ्सु ओउः कुराकायःपाय् ङ्हाम्तेःआकानी।
12ख्रीस्पाय् सीआक्तीको उह्ती च्योक्आ त दाय्ह्ती ङीइ थोल्ह्ती तोनेःनाङ्सु ओउःत झ्यान्ते नीङ्पाय् दोह् हायःती यात्नीस्इ “सीओ मान्ता उह्ती च्योक्सा दोःइली” त दाय्ह्ती तोनानी। 13ओउःत तोओपाय् दोङ् कुरालेः त खेःयाकायः ख्रीस्मा च्योक्आक्ल। 14ओउःपाय् च्योक्माःदीक् ङीइ थोल्ह्ती तोओमा नीङ्इ ङ्हाम्ओ कुरामा आह्रे लेःआः। 15-16फेरी “सीओलम् उह्ती च्योक्सा दोःइली” त तोसा दोङ् कुरा लेःआः त खेःया “परमेस्वर्इ ख्रीस्कायः उह्ती च्योक्ताक्आथै” त ङीइ थोल्ह्ती तोओपाय् माःओ कुरा लेःआः दोह् हायःती दाय्ह्सा ख्रीस्मा सीआक्तीको च्योक्सा दोःआक्मालो खेःतो। 17ओहाङःसै ख्रीस्मा च्योक्ल त खेःया नीङ्इ ङ्हाम्ओ कुरामा आह्रे लेःआः बा नीङ्कोः रेव्ओ काम्लम् क्युम्ह्ती वाय्ओ खेःल। 18फेरी ओउः सीती मुओ ख्रीस्कायः ङ्हाम्ओलम् जुगाङ् वाय्तोलेः मुनै। 19ख्रीस्इ बयःओ जीङःपाय् इ ल्हाव्ह्दैबाङ् मुओहाङः झुङ्आले खेःनाः त खेःया ङीपाय् सबै अरु मान्तासै योनःसीःओ मान्ता लेःआः तय्ही। 20खेःल दोङ्सीलेः ख्रीस् सीआक्तीको सबै अरुसै ङ्हा ओउः ख्रीस्पाय् च्योक्लेःआ। ओउःत झ्यान्ते अरु सीओलम् च्योक्सा दोःआनै त चीःसा खाय्नाःतय्ह्नी। 21यात्चाक्कोः जाङ्ह्झ्याङ्खेकोः ङी सीसा खेःनाःतय्ही अरु यात्चाक्कोः काम्खे जाङ्ह्झ्याङ्खेकोः ङी रौ जीङः दोःनाःतय्ही। 22आदम् त तोओखे सीआक्तीको ङी मान्ता सबैलेः सीनाःतय्ही ओउःतलेः ख्रीस्खे उह्ती च्योक्आक्तीको ङी सबै ख्रीस्कुस् ब्राङ्ती उह्ती च्योक्नाःतय्ही। 23सबै च्योक्नाःतय्ही तोङ्क तोङ्क च्योक्नै। ङ्हापाय् ख्रीस् च्योक्आ लोने ओउः द्यान्ह्ती वाङ्तोक्हाङः ओउःकोः मान्तालम् च्योक्नै। 24ओहाङःसैको ओउः द्युम्ओ बेलाहाङः वाङ्नाः। ओउःतोक्हाङः सबै राजालम्कायःमा हुकुम् बयःओलम् ग्वम्लम्कायःमा ख्रीस्इपाय् क्लीमःनौ। क्लीमःआक्तीको ओउःकोः राजी ख्रीस्इपाय् लयःकोः परमेस्वर् आपाकायः ल्हानौ। 25परमेस्वर्कोः दुस्मान् सबै क्लीमःधाङ्माःच्युक्हाङः ख्रीस्पाय् राजा स्याव्सा खेःतो। 26ओहाङःसैको सबैसै लोनेः सीताक्सा खाल्लम् क्लीमःती वाय्सा खेःतो। 27दोह् हायःती दाय्ह्सा “सबै थोक्लम् परमेस्वर्इ ओउःकायः क्लीमःताक्नाःथै” त दाय्ह्ती दाय्ह्ओ परमेस्वर्कोः आखरःहाङः लेखती मुनाः। परमेस्वर्इ ख्रीस्कायः सबै क्लीमःताक्थातो लयः परमेस्वर् झुङ्आले क्लीमःमाःत मुलेःनाः। 28ओहाङःसैको सबै थोक् क्लीमःतो स्याव्आक्तीको परमेस्वर्पाय् सबैकोः राजा स्याव्साकायः ख्रीस्कोः राजामा स्याव्लेःनाः।
29फेरी मान्तालम्इ अरु सीओ मान्ताकायः बाप्तीस्मा त्याक्नानी। सीओलम् उह्ती च्योक्इली त खेःया ओउःमयः दोह् हायःती एतलेः बाप्तीस्मा त्याक्नानी। 30ङीमा देङीमा देङीमा सीखेःओ मुनाङी सीओलम्पाय् च्योक्इली त खेःया ङी दोह् हायःती एतलेः सीखेःतो स्याव्सा ग्यानाङी। 31माः रैस पुःचोङ् हौचोङ्य ङीकोः प्रभु येसु ख्रीस्कायः नीङ्इ ङ्हाम्तोलेः मुतेःनै त खेःओ ङा नेह्रो ओर्ताक्तीलेः “ओउःमयःकायः ङा दीन् दीन्हाङः सीझुङ्नाङः” त दाय्ह्तीलेः दोङ् कुरा दाय्ह्नाङः। 32फेरी सीओलम् च्योक्इली त खेःया दोह् हायःतीलेः ङाइ एफेसस्हाङः जाःलम्कुस् मीन्ह्आलाङः। मान्ता च्योक्इली त खेःया ओउःत हायःओ आह्रे लेःआः बा। ओउःसै तेन्छ्याङ् ङीइ जेःसा तुङ्सा ह पेलेःनाः दोह् हायःती दाय्ह्सा “स्याङ्ह्लोहाङः सीखेःओ स्याव्ती वाय्नाःतय्ही” एतलेः यात्नीस् मान्तालम्इ तोनानी। 33लौ माःओ कुरा सायःलाम् सुसु पेमालो मान्तालम्कुस् वाह्चनै ओउःमा ओउःमयः लेखा पेमालोलेः स्याव्नै। 34व्हक्तोलेः चीःती पेओ काम् जाङ्ह्नौ दा नीङ्कोः रेव्ओ काम् ताःताः जाङ्ह्नुलु। नीङ्पाय् रास्सा खेःतो त तोनेःनाङ्स बा दोह् हायःती दाय्ह्सा यात्नीस्चाक्इ परमेस्वर्कायः तय्ह्तेःनीली।
35“सीओ मान्तालम्पाय् गत हायःती उह्ती च्योक्चै फेरी च्योक्आक्तीको आङ्पाय् गतलो” त दाय्ह्ती यात्चाक् व्हत्नै यादो। 36एत व्हत्ती नाङ्पाय् जुगाङ् चीःमालो लेःतेःआः। साःहाङः सुक्ओ बीयाचोया सीआक्माःत ओउःपाय् दुङ्ल। 37सुक्ओ बेलाहाङः दोङ् ताङ्ह्ओ बीरुवातेः सुक्तेःउलु। गहुङ्कोःया अरु खाल्कोःया दोह् खेःयाकोःमा चुय् ह सुक्तेःनौ। 38ओहाङःसैको दुङ्आक्तीको परमेस्वर्इ लयः झाक्ती ओउःकोः आङ् बयःनौ। बीयाकायः लःलयः जोक्कोः आङ् बयःलेःनौ बा। 39सबै सास् नाःओ खाल्कोः मायःलम् यातैज्योः खेःल। मान्ताकोः मायः यात् खाल् स्याःकोः मायः थे खाल्लेः जाःकोः थे खाल्लेः वाःकोः थेलेः ङाःकोः मायः यात् अरु खाल् लेःआः सबै थेथेलेः। 40फेरी फेल्बाङ्खेहाङः यात्ज्योः खाल्कोः थोक्लम् नाःनाः ल्हाव्ह्दैबाङ्खेहाङः अरु थे खाल्कोः थोक्लम् नाःनाः। लाङ्काकोः थोक्लम् यात्ज्योः खाल्कोः पेओ रुप् नाःनाः ल्हाव्ह्दैबाङ्कोः थोक्लम् अरु खाल्कोः पेओ रुप् मुनाः। 41न्याम्पाय् यातैज्योः खाल्कोः पेओ रुप् नाःनाः लाह्पाय् यात्ज्योः अरु खाल्कोः पेओ रुप् नाःनाः कार्लम् यात्ज्योः अरु खाल्कोः पेओ रुप् नाःनाः। माः रैस कार् कार्पाय् लःलयः जोक्कोः पेओ रुप् नाःनै। 42ओउःतलेः सीओ मान्ताकोः म्हाङ्पाय् सुक्ओ बीयाचोयालो लेखा मुनाः। साःहाङः गम्ओ बेलाहाङः म्हाङ् वाय्तोलेः स्याव्नाः लोनेः जुगाङ् वाय्सा खाय्मालो रौ स्याव्ती ओउःपाय् उह्ती च्योक्आनाः। 43ङ्हापाय् ओउः म्हाङ् पेमालो अह्र्सीःतो स्याव्ती साःहाङः पाम्ह्ती गम्ओआः लोनेः पेतो उह्ती च्योक्नाः ङ्हापाय् ग्वम् नाःमालो खेःतो च्योक्आक्तीको ग्वम् नाःओ मुनाः। 44साःहाङः गम्ओ बेलाहाङः ल्हाव्ह्दैबाङ्कोः आङ् लेःआः च्योक्आक्तीको थे स्याव्ती लाङ्काकोः आङ्लेः स्याव्आनाः। नीस् खाल् मुनै ल्हाव्ह्दैबाङ्कोः आङ्मा मुनाः लाङ्काकोः आङ्मा मुनाः। 45ओउः ङ्हा वाङ्ओ आदम् त तोओखे “जीङः दोःओ मान्ता खेःतो” त दाय्ह्ओ आखरःहाङः लेखती मुनाः ओउः लोनेःसै वाङ्ओ आदम्खे जीङः बयःसा ग्वालामः लेःआः। 46ओउः ङ्हा वाङ्ओ लाङ्काकोः खेःल ल्हाव्ह्दैबाङ्कोःआः लोनेसै वाङ्ओ ह लाङ्काकोः लेःआः। 47ओउः ङ्हा थाओ मान्ताखे ल्हाव्ह्दैबाङ्सै वाङ्ओ साःसै जाङ्ह्ओ खेःतो ओउः लोनेसै वाङ्ओचाक्खे लाङ्कासैआः। 48ल्हाव्ह्दैबाङ्कोः मान्तालम्खे साःसै जाङ्ह्ओ आदम्लो लेखा मुनै लाङ्काताङ् आल्सा दोःओलम्खे ओउः लाङ्काकोः मान्तालो लेखा मुनै। 49ङीपाय् ङ्हासै ल्हाव्ह्दैबाङ्कोः मान्ता लेःआः तय्ही लोनेः ओउः लाङ्काकोः मान्तालो लेखा स्याव्नाःतय्ही। 50लौ पुःचोङ् हौचोङ्य “ल्हाव्ह्दैबाङ्कोः आङ् नाःओलम्पाय् परमेस्वर्कोः राजी पोक्सा दोःइली। वाय्सा खेःओ खाल्पाय् वाय्सा खाय्मालो खाल्कःहाङः मुसा दोःइली” एत ङाइ तोनेःनाङ्स। 51लौ द्याह् अरुइ चीःधाङ्मालो कुरामा तोनेःनाङ्स। ङी सबै सीइली यात् चीच्योक्हाङः ङी रौ आङ् दोःती थाङ्नाःतय्ही। 52ओउः लोनेः वाङ्सा खेःओ दीन्कोः बीगुल् गोःमाकादे ङी यात् चीच्योक्हाङः थाङ्माकादे। ओउः गोःतोक्हाङः सीओलम्मा गलमा वाय्मालो रौ जीङः दोःती च्योक्नै ङी सबै थाङ्नाःतय्ही। 53ङी सीती वाय्सा खेःओलम् सीती वाय्मालो आङ् लावसा खेःतो 54ओहाङःसैको ङी सीती वाय्मालो आङ् दोःआक्तीको यात्ज्योः कुरापाय् “सीताक्सापाय् द्याह् क्लीमःतीलेः मुनाः” त दाय्ह्ओ ताप्तो स्याव्नाः। 55माः रैस “ओउः सीताक्सापाय् द्याह् क्लीमःओ लेःआः त झ्यान्ते दोह्कायःमा जीक्ताक्ती सीताक्सा खाय्ल” त दाय्ह्ओ आखरःहाङः लेखती मुनाः। 56ओउः ऐन् मुनाः त खेःया मान्ताइ ऐन्कोः कुरा जाङ्ह्माःत झ्यान्ते रेव्ओ काम् जाङ्ह्नानी। ओउःमयः रेव्ओ काम् जाङ्ह्नानी त झ्यान्ते सीलेःनै। 57ङीकोः प्रभु येसु ख्रीस्इ ङीकायः सीओसै दल्ताक्नाःतय्ही त खेःया परमेस्वर्कायः “च्युता” त तोपाःतय्ह्नी। 58लौ उया ङाइ राप्ओ पुःचोङ् हौचोङ्य ग्रमःत मुती प्रभुकोः काम्पाय् गलकायःमा पेतो म्ह्याङ्तीलेः जाङ्ह्झुङ्नु दा ओउःपाय् आह्रे काम् खेःबाय्ल।
Currently Selected:
१ कोरीन्थी 15: CDM93
Highlight
Copy
Compare
Share
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
