१ कोरीन्थी 14
14
1ओउःत झ्यान्ते राप्सा काम् म्ह्याङ्ती जाङ्ह्नु ओहाङःसै अरु परमेस्वर्इ बयःओ ग्वम्मा बोङःनु। अरुसै परमेस्वर्कोः कुरा छ्यानःती तोसा ग्वम्कायः बोङःसा पेनाः 2दोह् हायःती दाय्ह्सा सुसुखेइ थेथे भासा नोःचनौ ओउःइलेः मान्ताकायः खेःल परमेस्वर्कायः झुङ्आले नोःनौ अरु मान्ताइ ओउःकोः नोःराय् चीःसा खाय्नीली। ओउः मान्तापाय् परमेस्वर्कोः ग्वालामः दोःती अरुइ चीःसा खाय्मालो कुरा नोःनौ। 3सुसुखेइ परमेस्वर्कोः कुरा छ्यानःती तोचनौ ओउःइ चीःसा खाय्ओ कुरा नोःती अरु मान्ताकायः पेतो ङ्हाम्ताक्ती वाह्ताक्ती ओउःमयःकोः ल्हुङ् धोमाय्ताक्नाःथास। 4सुसुखेइ थेथे भासा नोःचनौ ओउःइ लयःकायः ह स्यान्ती पेतो स्याव्ताक्नाःस। सुसुखेइ परमेस्वर्कोः कुरा छ्यानःती तोचनौ ओउःइलेः सबै ङ्हाम्ओलम्कायः पेतो स्याव्ताक्ती तोमानौ। 5नीङ् सबैलेः थेथे भासा नोःतेःपानी एत झाक्सापाय् झाक्नाङः ओउःत हायःओसै नीङ् सबै परमेस्वर्कोः कुरा छ्यानःतीलेः तोतेःपानी त ङा न्हाङ्तोलेः झाक्नाङः। सुसुलो परमेस्वर्कोः कुरा चीःती अरुकायः छ्यानःती तोचानी ओउःइपाय् थेथे भासा नोःओ मान्तासै ताङ्ह्ओ काम् जाङ्ह्नानी। थेथे भासाकोः माने बयःमाःदीक् ओउःत नोःसा ताङ्ह्ओ काम् खेःल माने बयःदीक् ह सबै ङ्हाम्ओलम्कायः पेतो स्याव्ताक्नाःथास। 6ओउःत झ्यान्ते पुःचोङ् हौचोङ्य नीङ्कःहाङः दाह्ती वाङ्च्याःदीङ् ङाइ थेथे भासा नोःसा स्याव्ल। दोह् दोह् स्याव्नाः दाय्ह्सा नीङ्कायः ङाइ परमेस्वर्कःसै दोःओ रौ कुरा स्यान्ती तोनेःनाङ्स ओउःपाय् स्याव्लेःनाः। फेरी परमेस्वर्कोः कुरा चीःताक्ती छ्यानःलाङ् स्यान्लाङ् वाङ्सामा स्याव्नाः। 7बाङ्सुली गोःम्हा पेतो वेस्तो गोःल त खेःया ओउःकोः हाव्नयः सुइमा चीःसा खाय्नीली। 8फेरी सीपाहीकोः बीगुल्मा वेस्तो गोःल त खेःया ओउःमयःइ “इच्युक्हाङः चीङ्सा खेःतो” त चीःसा खाय्नीली। 9ओउःलो लेखालेः नीङ्इपाय् अरुइ चीःसा खाय्मालो कुरा नोःतेःनानी त खेःया नीङ्कोः कुराकोः माने सुइमा चीःसा खाय्नीली आह्रेलेः नोःतेःनानी बा। 10ल्हाव्ह्दैबाङ्हाङः नाःतो भासा मुनाः नाःतो मुलेःनाः सबै भासाकोः माने मुनाः। 11यात्चाक्इ ङाइ चीःमालो भासा नोःनाःताङः त खेःया नीची बीदेसीलो लेखा स्याव्काय्नाङःच। 12परमेस्वर्कोः ग्वालामःइ बयःसा ग्वम्लम् आनतेः बोङःतेःनानी। गाव्खेलो ङ्हाम्ओलम्कायः पेतो छेङःकलःती स्याव्ताक्नाःथास ओउःकायःलेः अरुसै बोङःनु दा।
13लौ उया सुसुइ थेथे भासा नोःचानानी ओउःलेः “लौ ङाकायः इ कुराकोः माने छ्यानःसा ग्वम्मा दोःताक्ची दै” त परमेस्वर्कः तेसा खेःतो। 14परमेस्वर्कायः थेथे भासा नोःतोक्हाङः ङा लयःकोः ग्वालामःखेहाङः नोःङोतो ङा ल्हुङ्खेहाङः चीःङल। 15ओउःत झ्यान्ते दोह् हायःसा पेनाः दाय्ह्सा ङा ग्वालामःहाङःमा परमेस्वर्कायः तोनाङः ल्हुङ्हाङःमा ओउःकायःलेः तोलेःनाङः। ग्वालामःहाङःमा ङा मेनाङः ल्हुङ्हाङःमा मेनाङः। 16नाङ् ग्वालामःहाङः ह परमेस्वर्कायः ताङ्ह्ताक्ती लुङ्ती तोतेःचनौ त खेःया अरुलम्इ ओउः कुराकोः माने गत हायःती चीःचानी। कुराकोः माने चीःमाःत झ्यान्ते अरुलम्इ गत हायःती “माः ओउःपाय् पेतो स्याव्पाः” त होम्ती दाय्ह्सा खाय्चानी र। 17नाङ्इ परमेस्वर्कायः त्याक्तीलेः तोओपाय् तोतेःउतो अरु सायःओ मान्ताकायः दोह्मा हायःतेःउलु ओउःकायः पेतो स्याव्ताक्उलु। 18ङाइपाय् नीङ्सै थेथे भासापाय् न्हाङ्तोलेः नोःनाङः ओउःत खेःओकायः ङाइ परमेस्वर्कायः आन “च्युता” त तोलयःङोतो 19ङ्हाम्ओलम्कःहाङः मुतोक्हाङः थेथे भासाहाङः दस् हजार् कुरा तोओसै ङाइ पास् कुरा अरुइ चीःसा खाय्ओ कुरा स्यान्ती तोसालेः पेनाः।
20लौ पुःचोङ् हौचोङ्य इ कुरापाय् व्हाय्ओ कुरा लेःआः व्हाय्मालो मीओ हौलम्लो लेखा मुलाम्। रेव्तो काम् जाङ्ह्साखेकायः व्हक्मालो मीओ हौलम्लो लेखा मुतेःपै। परमेस्वर्कोः कुरा चीःसाखेकायः व्हाय्ओ ताङ्ह्ओ मान्तालो लेखा स्याव्तेःपै। 21परमेस्वर्कोः आखरःहाङः “लौ इमयःकायः ङाइ थेथे भासा नोःओ मान्तालम्इ गानाक्तीलेः तोताक्नाङःसु। एतलेः तोताक्ङुसुतो इमयःपाय् ङाकोः कुरा सायःसा जुगाङ् ग्यामालो मुनै” त दाय्ह्ती परमेस्वर् दाय्ह्ओ लेखती मुलेःनाः। 22ओउःत झ्यान्ते थेथे भासालम् नोःओखेपाय् ङ्हाम्ओलम्कायः खेःल ङ्हाम्मालो मान्तालम्कायः छ्यानःसा थेङालेः मुनाः। परमेस्वर्कोः कुरा छ्यानःती तोओखे ङ्हाम्ओलम्कायःलेः स्याव्नाः ङ्हाम्मालोलम्कायः खेःल। 23ओहाङःसै सबै ङ्हाम्ओलम् हुम्ती यात् थाव्हाङः वाङ्तोक् बेलाहाङःपाय् नीङ्कःहाङः यात्नीस्इ थेथे भासा नोःचै त खेःया अरु चीःमालो ङ्हाम्मालो मान्तालम् वाङ्दीक् “लौ इमयः आन ब्रःती नोःनै रैस” त दाय्ह्ती दाय्ह्नै माःर। 24खेःल सबैलम्इ परमेस्वर्कोः कुरा छ्यानःतीलेः तोनानी त खेःया ङ्हाम्मालो मान्तालम् वाङ्तोक्हाङः ओउः मान्ताइ इ कुरा सायःती लयःकोः रेव्ओ काम्लम् व्हक्तीलेः चीःती “लौ ङापाय् रेव्ओ लेःआः ङ” त दाय्ह्नाः। 25ओहाङःसैको ओउःकोः ल्हुङ्तुक्कोः अरुइ चीःआक्मालो कुरा सबैकायः छ्यानःओ लेःआः त झ्यान्ते ओउः मान्ताइपाय् “दोङ्सीलेः परमेस्वर्पाय् नीङ्कःहाङः मुलेःनाः” त दाय्ह्ती परमेस्वर्कायः बाःती ताङ्ह्ताक्तीलेः तोनौ।
26लौ पुःचोङ् हौचोङ्य दोह् हायःसा स्याव्नाः दाय्ह्सा। सबै हुम्ती वाङ्ओ बेलाहाङःपाय् यात्चाक्इ मेसा बयःनौ अरुइ स्यान्सालेः बयःनौ अरुइ परमेस्वर्कोः रौ कुरा छ्यानःनौ अरु थे भासालेः नोःनाः अरु ओउः थे भासाकोः माने छ्यानःनौ। इत हायःती सबै ङ्हाम्ओलम्कायः पेतो छेङःकलःसाकायः बयःपानाः। 27थेथे भासा नोःसाकायः नीस् सुम्चाक् ह स्योताङ् स्योताङ् नोःपै। यात्चाक् नोःआक्तीको अरुइ ओउः कुराकोः माने छ्यानःपानी 28माने छ्यानःसा मान्तापाय् नाःमादीक् अरु हुम्ती मुओलम्कःहाङः थेथे भासापाय् नोःसा ताक्लाम् लयः झुङ्आले मुतोक्हाङः ह ओउः थे भासा परमेस्वर्कायः नोःपौ। 29फेरी परमेस्वर्कोः कुरा छ्यानःती तोसाकायः नीस्सुम्चाक्इमा तोपानी ओउःमयः तोओ कुरापाय् अरुलम्इ पेतो सायःती योपानी। 30यात्चाक्इ तोतोक्हाङः परमेस्वर्इ अरु च्युङःती मुओ मान्ताकायः तोसा कुरा बयःनाःथास त खेःया ओउः ङ्हा तोती मुओ मान्तापाय् दीःपाः। 31नीङ् सबै स्योताङ् स्योताङ् परमेस्वर्कोः कुरा छ्यानःती तोसा स्याव्नाः ओहाङःसैको सबैइ स्यान्ती चीःसा खाय्नानी। 32ओउः छ्यानःती तोओलम् तोङ्क तोङ्क तोती लयः झाक्तीलेः दीःसा खेःतो। 33नाःतो मान्ता ब्रक्त ङैसा स्याव्ल दोह् हायःती दाय्ह्सा अलक् मलक् त स्याव्ओपाय् परमेस्वर् झाक्नाः। 34सबै हुम्ती मुओ ङ्हाम्ओलम्कःहाङः मोमःचोःलम् नोःलाम्। ओउःमयः नोःसा स्याव्ल ङैमाःत सायःती मुसा खेःइतो। ओउःमा परमेस्वर्कोः ऐन्हाङः लेखती मुनाः। 35ओउःमयः यात्नीस् कुरा व्हत्सा झाक्नाः त खेःया लयःकोः बुधाकायः लयःकोः कीम्हाङः व्हत्पानी। ङ्हाम्ओलम् हुम्ती मुतोक्हाङः मोमःचोःलम् नोःसाकायः त्याक्उलु।
36परमेस्वर्कोः कुरा नीङ्कःसै वाङ्ओ खेःबाय्ल नीङ् झुङ्आले दोःतेःइतो खेःल। 37सुसुइ “ङापाय् परमेस्वर्कोः कुरा चीःनाङः ओउःकोः कुरा छ्यानःसा खाय्नाङः” त ताःचाःइसी। इ ङाइ लेखओ कुरापाय् “प्रभुइ बयःओ गानाक्ती तोओ कुरा लेःआः बा” त पाःती तोपानी। 38ओउः मान्ताइपाय् ङाकोः कुरा सायःमाःदीक् लौ उया ओउःकोः कुरा सायःलाम्। 39लौ पुःचोङ् हौचोङ्य परमेस्वर्कोः कुरा छ्यानःती तोसाकायः बोङःनु थेथे भासा नोःओलम्कायः त्याःलाम्। 40अलक् मलक्त स्याव्माःत सबै पेतो त्याक्तोलेः हायःनु दा।
Currently Selected:
१ कोरीन्थी 14: CDM93
Highlight
Copy
Compare
Share
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
