१ कोरीन्थी 13
13
1सुसुलो मान्ताकोः नोःराय्मा लाङ्कासै ल्होक्ओमयःकोः नोःराय्मा दाय्ह्चै बुरु अरुलम्कायः राप्नीली त खेःया ओउःपाय् चेकेवेङ्कोः हाव्नयःलो लेखालेः आह्रेलेः दाय्ह्नै बा। 2फेरी सुसुइलो परमेस्वर्कोः ङ्हा छ्यानःआक्मालो कुरा सबैलेः जुगाङ् जोतोलेः छ्यानःसा खाय्चौ सुसुइलो आन पेतो ङ्हाम्ती झ्यान्ते दान्दाकायः न्हेङःती ल्होक्सा खाय्चौ बुरु अरुलम्कायः राप्नीली त खेःया ओउःपाय् दोह्मा खेःल बा। 3सुसुइलो लयःकोः माल्ताल्लम् सबै वीनःती ह्र्यात्लम्कायः जेःगा बयःचौया लयःकोः आङ्पाय् अरुइ म्हेःहाङः कासा ताक्चौया बुरु अरुलम्कायः राप्नीली त खेःया ओउःपाय् दोह्मा खेःल बा। 4अरुकायः पेतो राप्ओ मान्तापाय् गलकायःमा सावःमामाःत काङ्तीलेः मुनै। ओउः पेतो राप्ओ मान्तापाय् अरुकोः चीस् लइली लयःकोः नेह्रो ओर्ताक्ती वाह्इली। 5पेतो राप्ओ मान्तापाय् रेव्तो अह्र्सीःओ जाङ्ह्मानीली लयःकायः म्हर्माइली ओउःपाय् रेन्ह्तोलेः ल्हुङ् मल्ह्इली। ल्हुङ् मल्ह्आक्तीको रेन्ह्तोलेः ओउःकोः ल्हुङ् द्युम्तो स्याव्नाः। 6ओउः मान्तापाय् पेमालो काम् च्यवःती म्रोइली दोङ् पेओ कुरा च्यवःआक्तीको ह म्रोनै। 7ओउःपाय् सबै गोरःती गलकायःमा फेमाःत ङ्हाम्ती मुनै लोनेकोः पेओ बेलाहाङःकायः आसती ल्युङ्ह्ती मुलेःनाः। 8राप्सा काम्खे गलकायःमा पेतोलेः मुनाः। परमेस्वर्कोः कुरा छ्यानःती तोसा काम्मा लोने द्योक्चानाः थेथे भासा नोःओमा लोने द्युम्चाःनाः फेरी परमेस्वर्कोः कुरा जोती चीःओमा लोने द्योक्चाःनाः। 9तेन्छ्याङ्पाय् परमेस्वर्कोः कुरा ङीइ बल बल ह चीःमानाःतय्ह्नी तोमानाःतय्ह्नी 10ओउः लोने वाङ्सा खेःओ पेओ दीन्हाङः ङीइ जुदालेः चीःनाःतय्ह्नी। 11ङा हौलम् मुओहाङःपाय् हौलो लेःखा व्हक्माजम् चीःमाङोतो थह्राय्ह्माजम् तोमाङोतो ङा ताङ्ह्ओ मान्ता स्याव्आक्तीकोपाय् ताङ्ह्ओ मान्तालो लेखा चीःतीलेः तोनाङः बा। 12तेन्छ्याङ् ङीइ परमेस्वर्कोः कुरा वलङ् पलङ्त च्यवःसा खाय्नाःतय्ह्नी लोनेः ङीइ पेतोलेः धेस्तो च्यवःसा खाय्नाःतय्ह्नी। ङाइ द्याह् परमेस्वर्कोः कुरा बल बल ह चीःनाङः लोने ओउः बेलाहाङःपाय् गुच्युक् पेतोलेः परमेस्वर्इ ङाकोः कुरा चीःनाःताङः ओउःच्युक् पेतोलेः ङाइमा चीःलेःनाङः। 13द्याह्पाय् इ सुम्ज्योः पेओ काम् मुनै ङ्हाम्सामा चोङाय्ती ल्युङ्ह्सामा राप्सामा इ मुलेःनाः ओउः सुम्ज्योःकोः राप्साकायःलेः अरुसै ताङ्ह्लेःनाः।
Currently Selected:
१ कोरीन्थी 13: CDM93
Highlight
Copy
Compare
Share
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
