१ कोरीन्थी 12
12
1द्याह् पुःचोङ् हौचोङ्य परमेस्वर्इ ङ्हाम्ओलम्कायः बयःओ कुरा नीङ्कायः चीःताक्सा खेःतो। 2परमेस्वर्कोः मान्ता स्याव्धाङ्मालो बेलाहाङः द्यव्तालम्इ नीङ्कायःपाय् ब्रःताक्ती झ्यान्ते नोःसा चीःमालो मुर्तीलम्कायः मानताक्तेःआकानी एत नीङ्इ चीःतेःनानी। 3परमेस्वर्कोः ग्वालामः दोःआक्तीको सु खेःयामा परमेस्वर्कोः ग्वालामः दोःओ बेलाहाङः येसुकायः प्रनःती नोःसा खाय्नीली एत ङाइ तोती चीःताक्नेःनाङ्स। फेरी परमेस्वर्कोः ग्वालामः दोःमाःत सु खेःयामा येसुकायः “प्रभु” त मय्ङ्सा खाय्नीली।
4परमेस्वर्कोः ग्वालामःइ बयःओ ग्वम्लम्पाय् नाःतो लेःआः ओउः बयःओ ग्वालामःपाय् यातैज्याङ् ह मुनाः। 5फेरी प्रभुकायः जाङ्ह्सा काम्लम्मा नाःतो लेःआः ओउः प्रभुपाय् यातैज्याङ् ह मुनाः। 6ओउः नाःतो काम्लम् जाङ्ह्साकायःपाय् यातैज्योः परमेस्वर्इ सबै जाङ्ह्ताक्लेःनौ। 7सबै ङ्हाम्ओलम् पेतो स्याव्ताक्साकायः परमेस्वर्कोः ग्वालामःपाय् मान्ता मान्ताकायः छ्यानःतोलेः बयःओआः। 8यात्चाक्खेकायः परमेस्वर्कोः ग्वालामःइ व्हाय्तो नोःसा ग्वम् बयःनौ अरुखेकायः ओउः ग्वालामःइपाय् चीःती नोःसा ग्वम् बयःनौ। 9अरुकायः ओउः ग्वालामःइलेः आन ङ्हाम्सा ग्वम् बयःनौ अरुकायः जीक्ओलम् स्याक्ताक्सा ग्वम्लेः बयःनौ। 10फेरी अरुकायः ओउः ग्वालामःइ ग्याङ्ह्राय् जाङ्ह्सा ग्वम्लेः बयःनौ अरुकायः लोनेःकोः कुरा चीःती नोःसा ग्वम् बयःनौ अरुकायः लान्कायः चीःताक्सा ग्वम् बयःनौ। यात्चाक्खेकायः ओउः ग्वालामःइ थे भासा नोःसालेः ग्वम् बयःनौ अरुखेकायः इ भासाकोः माने चीःसालेः ओउःइ ग्वम् बयःनौ। 11इ सबै ग्वम्लम्लेः यातैज्योः परमेस्वर्कोः ग्वालामःइ बयःनौ मान्ता मान्ताकायः लयः झाक्तीलेः वेःती बयःनौ बा।
12यातैज्योः आङ्हाङः नाःतो मुनाः तालाङ् मीक् नो क्रुत् दोम् सबै यातैज्योः आङ्हाङः मुनाः ओउःलो लेखा ख्रीस्लेः खेःनाः। 13ङीपाय् यहुदीकोः मान्तामा यहुदी खेःमालो मान्तामा नोकरीमा नोकरी खेःमालोलम्मा ङी सबैकायः यातैज्योः परमेस्वर्कोः ग्वालामःइ बाप्तीस्मा बयःआतय्ही बयःआक्तीको ङीमा यातैज्योः स्याव्नाःतय्ही यात्ज्योः आङ्लो लेखालेः। फेरी ङी सबै यातैज्योः ग्वालामःपाय् तुङ्सा दोःआतय्ही। 14ङी नाःतो मान्तालेः यातैज्योः आङ्लो लेखा मुनाःतय्ही। 15ओहाङःसै मान्ताकोः दोम्पाय् “लौ ङापाय् क्रुत्लेः खेःङल ओउःत झ्यान्ते आङ्कोःमा खेःङल” त दाय्ह्ती तोयाकायः ओउःपाय् दोङ् कुरालेः खेःल ओउः दोम्पाय् आङ्कोः मुलेःनाः माःर। 16फेरी नोपाय् “ङा मीक्लेः खेःङल ओउःत झ्यान्ते आङ्कोःमा खेःङल” त दाय्ह्ती तोसाकायः ओउःमा दोङ् कुरा खेःल ओउः नोपाय् आङ्कोः मुलेःनाः माःर। 17मान्ताकोः आङ्पाय् मीक् ह त खेःयाकायः मान्ता गत हायःती सायःसा खाय्चौ। फेरी आङ्पाय् नो ह त खेःयाकायः मान्ता गत हायःती नाम्ह्सा खाय्चौ। 18खेःल आङ्हाङः परमेस्वर्इ दोम्मा क्रुत्मा मीक्मा नोमा सबै लयः झाक्तीलेः गम्आकान्। 19क्रुत् दोम् ह मुचाः त खेःया आङ्पाय् ङोस्ल 20आङ्हाङः तालाङ् मीक् नो नेह् क्रुत् दोम् सबै नाःतो लेःआः आङ्पाय् यातैज्याङ् ह। 21यात्ज्योः आङ्कोः मीक्इपाय् “लौ नाङ्पाय् ङाकायः दोह्मा खेःल” त दाय्ह्ती क्रुत्कायः तोसा स्याव्ल। फेरी तालाङ्इमा “लौ नाङ्पाय् ङाकायः दोह्मा खेःल” त दाय्ह्ती दोम्कायः तोसा स्याव्ल। 22माः रैस ङीकोः आङ्कोः दोह् दोह् मीओलेः खेःनाः ओउःपाय् ङीकायः अरुसै चाहनाः। 23फेरी आङ्कोः दोह् दोह् अह्र्सीःओ मुनाः ओउःकायः ङी पेतो हायःती नाय् लावनाःतय्ह्इसी ओउःत खेःया ओउःपाय् पेतोलेः स्याव्नै। 24दोह् हायःती दाय्ह्सा ङीकोः आङ्कोः दोह् दोह् योगार्सीःतो मुनाः ओउःकायः लावसा परल। परमेस्वर्इ ङीकोः आङ्पाय् यातैज्योः जाङ्ह्ती सबै ब्राङ्ताक्ती दोह् दोह् मीओ लेःआः ओउःपाय् ताङ्ह्तोलेः गम्आकान्। 25-27ओउःत हायःती झ्यान्ते आङ्पाय् वेन्ह्माःतो मुनाः। नीङ्पाय् ख्रीस्कोः आङ्लो लेखा मुतेःनै ओउःत झ्यान्ते नीङ् लयःमयःकायः राप्काय्सा खेःतेःनै। यात्चाक्खेपाय् लीह्तोलेः स्याव्नाः त खेःया सबै लीह्तो स्याव्तेःनै अरुखे ताङ्ह्तो स्याव्नाः त खेःया सबै ताङ्ह्तोलेः स्याव्तेःनै 28ङ्हाम्ओलम्कायःपाय् परमेस्वर्इ मान्ता मान्ताकायः लःलयः जोक्कोः काम् बयःआकान्। ङ्हापाय् यात्नीस्चाक् परमेस्वर्इ छ्युङ्ह्ती ल्होक्ओ मान्ता लेःआः। ओहाङःसै अरुखे परमेस्वर्कोः कुरा छ्यानःओमयः लेःआः अरुलम् परमेस्वर्कोः कुरा स्यान्ओमयःलेः इ। ग्याङ्ह्राय् जाङ्ह्ओलम् जीक्ओ मान्ता स्याक्ताक्ओलम् लव्ह्ती बयःओलम् अरुकायः हुकुम् बयःओलम् थेथे भासा नोःओलम् इ सबै मुलेःनै। 29ङ्हाम्ओलम्पाय् सबैलेः परमेस्वर्इ छ्युङ्ह्ती ल्होक्ओ मान्ता लेःआः खेःइली। सबै ओउःकोः कुरा छ्यानःओमयः कुरा स्यान्ओमयः खेःइली। फेरी सबैलेः ग्याङ्ह्राय् काम्लम् 30स्याक्ताक्ओ काम्लम् जाङ्ह्नीली। सबै थेथे भासा नोःनीली सबै ओउः थेथे भासाकोः माने बयःसा खाय्ओलम् खेःइली माःर। 31ओउः अरुसै ताङ्ह्ओ काम् जाङ्ह्साकोः ग्वम्लेः बोङःनु दा। माः ओउःमयःकायः बोङःसापाय् बोङःनु दा यातैज्योः अरु ओउःसै पेओ काम्पाय् मुलेःनाः त तोनेःनाङ्स।
Currently Selected:
१ कोरीन्थी 12: CDM93
Highlight
Copy
Compare
Share
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
