Hosea 4
4
1Inyi bana ba Isreěl! yokakani ndaga ja Jěhova: jambojana Jěhova a na badiyi ba ehe na evâvâ, ikabojana na pâkwěpâkwě, n‘ ibya, na yowěyowě ya Anyambě be ibě o ehe.
2O ’bě na ’lombo kabo bo‐kanakiya na iditě bo‐bulwakidě, na bo‐weyaka, na bo‐ibaka, na ihonde bo‐haka; ba kuhwaka, na makiya ma kupanakě makiya.
3Ovaně‐nd‘ o ehe e ka eyakě, na wěhěpi a diyakě omě a ka nyâmbiyěndi, na tito ja ehanja na lonâni la oba; e, bejaka bea manga be ka věngudwě tepě.
4Ndi moto à papulanake, na moto te moto à kandakidě; jambojana bato bâvě ba te ka ba yomanakě na prist.
5Na nâvě‐o ka kâbi na mwehe, na usâki u ka kâbâ tepě na nâvě na bulu; n‘ Umba‐Mbi ka jilidě nyângwě.
6¶ Bato bamě ba jiludwěndi n‘ ipuhwana ja yowěyowě; ikabojana o kiyendi yowěyowě, Mbi ka kiya tepě âvě, na wà diye pě prist o Umb‘‐’i jadi; yěněngo na o behaliděndi ikambo ja Anyambě ’âvě, Mbi ka behalidě tepě bana bâvě.
7Nyang‘ ’abu e di vuhango, nonaně te ka bâ‐ba hakiyě ’Mba bobe; Mbi ka ’luděnd‘ ivenda jabu ihâni.
8Ba jakiyandi bobe bwa bato bamě, na bâ‐ba těděngo melema meabu o ibeva jabu.
9Na yâ e ka diyandi, bâ bato tě te, ja prist tě te; n‘ Umba‐Mbi ka vomudi bâ o pělě ya myala meabu, na Mba homana bâ behadi beabu.
10Ba ka jandi, ndi bà vule; ba ka vovandi, ndi bà vuhe; ikabojana ba dikindi o bandamidě Jěhova.
11Evovidi na ivě na ivě ja kya be věngěkiděndi ebumulema.
12¶ Bato bamě ba uwakandi ileva o peha jabu, na metumbe meabu me pakwakiya bâ; jambojana ilina ja evovidi i pangi bâ ba lemakě, na ba vovindi oviya o Anyambě ’abu a jadi.
13Ba tumbakandi meambo o hâkâ ja mekodi, ba tumbaka ebedi o bekandangolo o ibomako ja bele bea oak na poplar na těrebinth, ikabojana edingihě ’abu e nd‘ o nyěvě; ovaně‐nd‘ o bana banyu ba bajo ba hakě evove, na mebâmbi meanyu me haka ihonde.
14Mbà vomudě bana bâvě ba‐bajo o bâ‐ba hakě evove, nà mebâmbi meanyu o bâ‐ba hakě ihonde; jambojana bâ‐mětě ba yělwěkěndi na ba‐vovakě, na bâ‐ba yambakiya meambo na bevove; na bato ba ha bweyakidě ba ka kulumanwěndi.
15¶ Tombekete ka âvě, Isreěl, o hakete evove, tombekete nonaně, Juda à diyake kobango; n‘ inyěni ò vakeni o Gilgal, n‘ inyěni‐ò betakeni o Běth‐avěn, nà ò kanakiyeni, na, Ka Jěhova A dite.
16Jambojana Isreěl a haděte mâ‐mětě na vyâlâ, ona evova‐mwadi ya vyâlâ; o kya ’kava nd‘ o Jěhova A ka jedě bâ ka mwan‘‐udâmbě o iboko viněně.
17Ifreim a latindi na megano; dikaka mâ mbwe.
18Imâtâ jabu i ’luwendi ibamu; ba vovakandi egombe ka ’gombe; bapangiyi baju ba tândâkândi ihâni bwamu mětě.
19Upupě u dingi mâ o mapěpu maju, na bâ‐ba ka yěněndi ihani ikabojana meambo meabu.
Currently Selected:
Hosea 4: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
