Hosea 2
2
1Vâki na ndomi janyu na Ammai; na maluku manyu, na, Ruhama.
2Tatwakani na nyangw‘ ’anyu, tatwakani; ikabojana a ’bě mwad‘ ’amě, n‘ Umba‐Mbi ’bě momi ’aju; a dikake evovid‘ ’aju oviya o boho bwaju, na ihonde jaju oviya hanganě ya mabě maju;
3O‐banga Mba duwa mâ uhamba, n‘ Umba‐Mba tědě mâ pani‐ka buhwa bwaju bo jakudwě, na panga mâ pani‐ka nginga, na tědě mâ ka ehiki ya yaheyahe, na weya mâ na evělě;
4E, Mbà diye pě bana baju n‘ ibya; ikabojana ba ndi bana ba a‐vovakě.
5Ikabojana nyangw‘ ’abu a handi evove; a kahaki bâ a handi ihâni iitě; jambojana a vângo, na, Mbi bengakandi matândě mamě ma věkě ’mba beja beamě na miba mamě, mevâtâ meamě mea medâmbě na nyângě jamě ja liněn, mavulě mamě na imâtâ jamě.
6¶ Ovaně‐vâkâna, hilakěte, Mbi ka kakalidi njeya ’vě ukako na mayâ, n‘ Umba‐Mbi ka hayi mâ ugomba, na‐na à duwake pě bejela beaju.
7Na mâ‐a ka bengi matândě maju, ndi à kâbidě mâ; a ka vahi mâ, ndi à duwe mâ; běngě a vâke, na, Mb‘ ’alandi na timba o momi ’amě wa bohoboho a jadi; ikabojana e diyaki n‘ umba bwamu wa na o kya těkaně.
8Jambojana a bu yowakě, na, Umba ndi ma věkě mâ poti, na ivě, na mavulě, n‘ Umba‐Mbi vuhaki mâ hika‐etano na hika‐eveyu, ibeabu be ma kenjanaka Beal.
9Ovaně‐nd‘ Umba‐Mbi ka timbaně poti jamě, o egombe ’aju, na ivě jamě o epedi ’aju, n‘ Umba‐Mba kuwa mevâtâ meamě mea medâmbě na nyângě jamě ja liněn be ’mbakid‘ o diba mâ uhamba.
10Na o kya ’kava Mbi ka sali mâ utemu ’muaju o mihâ ma matândě maju, na o ’bě na a ka patuwě mâ o ikadu jamě.
11Mbi ka panga tepě usevo ’muaju muěhěpi u dâkâ, masango maju, matěki maju ma ngândě, na Mayâjâ maju, na makindaně maju ma eleliya měhěpi.
12N‘ Umba‐Mba jongolidě mekâdi meaju mea ivě na bele beaju bea fig, ibeaju be ma vâkâ, na, Ekadi nd‘ ibâmâ jamě ja matândě mamě i vi ’mba; n‘ Umba‐Mbi ka hi beâ ehiki, na tito ja ’hanja i ka jaka beâ.
13N‘ Umba‐Mbi ka pâdi mâ hwi ja Bealim, ibeaju be tumbakiyě ebedi; o mâ‐a lukakě nyolo ’aju na mbonga jaju ja matâ na belěngwě beaju, na a vala ibenga ja matândě maju, a behalidě ’Mba, Jěhova nd‘ A vâkě.
14¶ Ovaně‐vâkâna, hilakěte, Mbi ka dědi mâ, na pâdě mâ o nginga, na kala n‘ aju te o bo‐yâdâkidě.
15N‘ Umba‐Mba vě mâ bebâga beaju bea ivě oviya omě, na itaba ja Akâr ka jâmbě j‘ ipite; na mâ‐a ka timbwanaka ovoně te ona o hwi ja boěmbe bwaju na ona o buhwa bwaju bo pumakidi oviya o ehe ya Ijipt.
16E ka diyandi o buhwa těboně, t‘ ibwâvě bo ka tubě ’Mba, na, Ishi; wà tube pě ’Mba, na, Beali, Jěhova nd‘ A vâkě.
17Jambojana Mbi ka věngiděndi mina ma Bealim oviya udumbu ’muaju, na bâ‐bà tubwě pě na dina jabu.
18Na o buhwa těboně ndi ’bwamě bo ka hayě bâ panga na tito ja ehanja, na lonâni la oba na belombo be landakě bea he; n‘ Umba‐Mba buka kâmu na ukwala na eduka oviya o he, n‘ Umba‐Mba panga bâ‐ba nangakiya pâlâ.
19N‘ Umba‐Mba nyima âvě o Umba‐Mbi jadi egombe yěhěpi; e, Mba nyima ’vě o Umba‐Mbi jadi na hohonganěngo, na uhango, na itânde‐ja‐kěngâ na mabya.
20Mbi ka paniyand‘ o nyima ’vě Umb‘‐’i jadi n‘ upeha; na o ka yowakě Jěhova.
21E ka diyandi o buhwa těboně, Mbi ka timbwanandi, Jěhova nd‘ A vâkě, Mbi ka timbwanandi byoba, na beâ‐be ka yavwanaka he;
22Na he e ka timbwanaka poti, na ivě, na mavulě; na beâ‐be ka yavwanaka Jězreěl.
23N‘ Umba‐Mbi ka liyi mâ o Umba‐Mbi jadi o he; n‘ Umba‐Mba diya mâ n‘ ibya a ha pahakiyedi ibya; n‘ Umba‐Mba vâ na bâ ba ha diyaki bato bamě, na, Inyěni ndi bato bamě; na bâ‐ba ka vwi, na, Âvě ndi Anyambě ’amě.
Currently Selected:
Hosea 2: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
