Hosea 1
1
1Ndaga ya Jěhova e pâkidi o Hosea, mwana wa Birai a jadi, o hwi ja Uzzaia, Jotham, Ahaz, na Hězekaia, mepolo mea Juda, na o hwi ja Jěroboam, mwana wa Joash upolo mua Isreěl.
2O Jěhova a kalaki na Hosea o bohoboho, Jěhova A vâki na Hosea, na, Kěkě, ka nângâke âvě mwada wa ’vove na bana ba evove; jambojana ehe e handi evove eněně, věngěměngo oviya o Jěhova A jadi.
3A kěki nonaně na nângâkâ Goměr, mwana wa Diblaim wa mwajo: ka mâ‐a kaha, na jaka mâ mua‐momo.
4Ka Jěhova A va na mâ, na, Vangakidě dina jaju, na, Jězreěl; jambojana via dikanate vililingo, n‘ Umba‐Mbi kundaka makiya ma Jězreěl o ndabo ya Jehu, n‘ Umba‐Mbi ka pangandi egândâ ya Ndabo ya Isreěl e dâkâ.
5Na e ka diyandi o buhwa těboně t‘ ibwamě bo ka bukě kâmu ya Isreěl, o itaba ja Jězreěl.
6¶ Ka mâ‐a kaha pě, na jaka mua‐mwajo. Ka Jěhova a vâ na mâ, na, Vangakidě dina jaju, na, Lo‐ruhama; jambojana Mbà diye pě ndabo ya Isreěl n‘ ibya, na‐na Mba yidě pě bâ na vilolombo.
7Ndi Mbi ka diyi Ndabo ya Juda n‘ ibya, n‘ Umba‐Mbi ka yongi bâ na Jěhova Anyambě ’abu, nà yongě bâ na kâmu, tombe na ukwala, tombe na eduka, na kabala, tombe na bamo‐ba‐kabala.
8¶ Nandi, o mâ‐a diyakidi a kiyidě Lo‐ruhama dibě, a kahakindi, na jaka mua‐momo.
9Ka Jěhova A vâ, na, Vangakidě dina jaju, na, Lo‐ammai; ikabojana o ’beni bato bamě, n‘ Umba‐Mbà diye Anyambě ’anyu.
10¶ Ndi tango ya bana ba Isreěl e ka diyandi pani‐ka mahě ma manga ma ha ’bě na ngudi ya yějwě tombe ya langwě; na e ka diyandi, o iboko vi vânâkudwě, na, O ’běni bato bamě, vi ka vâwi bâ, na, O ndini bana ba Anyambě ya mihâ.
11Na bana ba Juda na bana ba Isreěl ba ka yolaněndi ta, na bâ‐mětě ba ka těděndi umbâkâ molo, ba ka betaka oviya ehe; ikabojana buhwa bwa Jězreěl bo ka diyandi boněně.
Currently Selected:
Hosea 1: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
