Hosea 12
12
1Ifreim a jakiyandi o upupě, na a bengaka upupě mua ’hiki: a vuhakěte melango na ujilo egombe ka ’gombe; na bâ‐ba haka panga na Asiria, na mavulě ma valanakwě o Ijipt.
2Jěhova tepě a na Juda na evâvâ, na A ka vomudi Jekâb hohonganěngo na myala meaju; hohonganěngo na behadi beaju t‘ eaju e ka timbaně mâ isango.
3¶ O jemi nd‘ o mâ‐a bweyakidi mwana‐nyangwě o ’kikindi; na o ikeki jaju ja momo nd‘ o mâ‐a diyaki ngudi na Anyambě.
4E, a diyaki ngudi wa na enjěl tě, na balaka; a ’yakindi, na hâhâlâkidě Mâ; A duwaki mâ o Běth‐el, na ovoně nd‘ o Mâ‐a kalaki na hwě;
5Paniyango Jěhova, Anyambě tě ya Ndumba; Jěhova ndi iyongudwě jaju.
6Ovaně‐vâkâna vongwaka ’vě o Anyambě ’âvě A jadi, tataka ibya na uhango, na wa těmiyě Anyambě ’âvě egombe ka ’gombe.
7¶ A nd‘ utayi‐ukita, medodo mea iyabana me nd‘ o ikadu jaju: a tândâkând‘ o pitana.
8Na Ifreim a vâki, na, Mbambayě, mba běnd‘ enami, Mbi duwiyi ’mba ngumba: o meghono meamě meěhěpi bà duwe o umb‘‐’i jadi ibevě i diyaki bobe.
9Ndi Umba ndi Jěhova Anyambě ’âvě oviya o ehe ya Ijipt; Mbi ka ti pě o diyid‘ âvě o behapala, ona o hwi ja isango ja eleliya.
10Mbi kali tepě na basâki, na Mbi vuhiděndi behihila; na ebano ya basâki ndi ’jamě i ma hanaka mekanakâdi.
11Giliad a ndi ibevě? ba te naně, bâ wěhě; o Giliad nd‘ o bâ‐ba yambakiyě behope bea meomi mea nyati: e, âltar jabu i te ona myindi o meghândâ mea upokolo.
12Na Jekâb na kweyaka e ehanja ya Aram, ka Isreěl a janja o nyanga ya mwajo, na nyanga ya mwajo nd‘ eaju e tatanaki medâmbě.
13Na Jěhova A vanakiyendi Isreěl oviya o Ijipt na usâki, na a tatakudwěndi na usâki.
14Ifreim a kâbâlindi o bo‐lingwakidě na‐ngudi mětě: ovaně‐nd‘ o makiya maju ma ka dikaněte na mâ, na isela jaju te ja Jěhova jaju i ka timbě mâ.
Currently Selected:
Hosea 12: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
