Hosea 13
13
1Oifreim a kalakidi, ilikima na diyaka; a betakidi nyolo ’aju o Isreěl: nd‘ o mâ‐a bevanakidě o Beal, a wakindi.
2Na o kya ’kava ba kaki pě bobe wa, na ba hayi bâ tove ja bohovakidě ja hik‘ ’abu etano, paniyango meghano hohonganěngo na ibweyidě jabu mětě, meâ meěhěpi ehavu ya mekěngěkěngě; ba vâki meâ, na, Bamo ba yambakiyě ba pyâpyâke bevova.
3Ovaně‐vâkâna ba ka diyi ka evindi y‘ ubwa, na ona maupa ma tombakě na yakako, ka behavu be vělakudwě na ngwěnyi oviya nděkie‐tudakudwě, na ona itutu oviya o ekumu.
4Tombekete nonaně Umba te Jěhova Anyambě ’âvě oviya o ehe ya Ijipt; na nâvě‐wà yowě pě anyambě ’pâkwě ndi kab‘ Umba, na o ’bě pě n‘ uyongi ta n‘ Umba.
5¶ Mbi yowakidět‘ âvě o nginga, o ehe ya ekolan‘ eněně.
6Nonaně t‘ o bâ‐ba vulakidi, hohonganěngo o ijanido viabu; ba vulakindi, na ebumulem‘ ’abu na betakiya: ovaně‐nd‘ o bâ‐ba behalidě ’Mba.
7Ovaně‐vâkâna Mbi te o bâ‐ba jadi ona amalě; Mbi ka pepuwate njeya ona njâ:
8Mbi ka latate na bâ ona bear e jadi nângânwěngo mabâku, na Mba nyaya mbuja ya ebumulema: na omě nd‘ Umb‘‐’i ka pukulě bâ ona amalě; tito ’a pindi e ka nyayi bâ.
9¶ Isreěl‐O! ujilo ’muâvě nd‘ ekamu, na, o těniděngo n‘ Umba, těniděngo ihana jâvě.
10Upolo ’muâvě mu‐a bě lě kyatěkaně ove, u yong‘ âvě o mamboka mâvě měhěpi? na bayěkidi bâvě, ibâvě ba vâki, na, Vě ’mb‘ upolo na bevolo?
11Mbi věkind‘ âvě upolo, na malingwa mamě; na Mbi věngidi mâ na ngambi ’amě.
12Ibeva ja Ifreim i katudwěndi; bobe bwaju bo kumudwěndi.
13Ngěbě ja mehiyo mea mwajo n‘ ijadi i ka viyand‘ o mâ‐a jadi: a ndi mwana a ha ’bě n‘ iyowě; jambojana ya běndi egombe ’aju e ka diyě à yěngidě pě o iboko via idonidi via bana.
14Mbi ka vanguli bâ oviya o ngudi ya malonga; Mbi ka vanguwi bâ oviya iwedo; Iwedo‐O! bevuva beâvě be l‘ ove? Malonga‐O! ujilo ’muâvě u l‘ ove? itimbě j‘ ulema u ka kutamandi oviya o mihâ mamě.
15Tombekete mâ diyakate ijadi wa o tango ya bana‐ba‐hangwě, upupě mua ’hiki u ka viyandi, pudi ya Jěhova e betaka oviya o nginga, na idango jaju ja bě yaheyahe, na tongo ’aju e ka yahaka: A ka kinandi hika ya beva beyamu beěhěpi.
16Semeria a ka bapěndi ikoba jaju; jambojana a loguwi na Anyambě ’aju: ba ka kwi n‘ ukwala; mekěkě meabu me ka vanjanganwi bepěhi, na bajo babu ba ka pěhwi na memi.
Currently Selected:
Hosea 13: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
