Hosea 10
10
1Isreěl a ndi ukâdi mu‘ ivě mua ijadi, u pumakě ebum‘ ’aju; hohonganěngo na bwinge bwa ebum‘ ’aju t‘ ibwaju bo vuhidě âltar jaju; hohonganěngo na bwamu bwa ehe ’aju t‘ ibwabu bo hadi behembe bea nyěvudwě‐nyěvudwě.
2Ulema ’muabu u kabindi; o kya ’kava nd‘ o bâ‐ba ka duwaniyě kobango; A ka kokandi âltar jabu, A ka jongolidi behembe beabu.
3Mbambayě o kya ’kava nd‘ o bâ‐ba ka vâyě, na, Ho ’bě n‘ upolo: jambojana hwà bangaka Jěhova; na upolo a l‘ a haka hwě nde?
4Ba kalaki bekalěkalě; ba kanaka bo‐lobaka o iha ja panga; ovaně ndi o yěkě e kěkěkě ona behavu o megândâ mea upokolo.
5Badiyi ba Semeria ba ka diyi n‘ ivěvi o pělě ya bevova bea Běth‐avěn; jambojana bato ba omě ba ka eyi yâ, na prist jaju i peyakě na yâ, o pělě ya ivenda jaju, ikabojana i věngěmindi o yâ‐e jadi.
6I ka valanwě tepě o Asiria ka mahango o upolo Jerěb a jadi; Ifreim a ka pahiyandi ihâni, na Isreěl a ka yěněndi ihâni na ileva jaju mětě.
7O pělě ya Semeria, upolo ’muaju u lenudwěndi, ona ivudi o miba.
8Loboko la Avěn l‘ udomba tepě, bobe bwa Isreěl, lo ka jiludwěndi; mbângě na behaha be ka betand‘ o âltar jabu; na bâ‐ba ka vwi na mekodi, na, Pugaki hwě ni; na bekandangolo, na, Kwani o hwě‐ho jadi.
9A! Isreěl, o hango bobe oviya o hwi ja Gibia; ba těměkind‘ ovoně; na‐na eduka e těněkidě bana ba bevakě yà kâbidě bâ o Gibia.
10O viâ‐vi jadi ivahidi viamě, Mbi ka bomi bâ; na bato ba ka yolaněndi ka těnidě na bâ, o bâ‐ba di hakamango o mapulě mabu mabale.
11Na Ifreim a ndi evova‐ya‐mwadi e di yokudwěngo, e tândâkě ituda ja poti; ndi Mbi kahamango o ibâlu jaju iyamu; Mbi ka těděndi ubapami o Ifreim; Juda a ka sambiyandi; Jekâb a ka buludi bebuki beaju.
12Liyakiyani nyolo janyu o hohonganěngo, benjakani hongahonga n‘ ibya; sambakiyani he ’anyu ya mabutu; jambojana ya běndi egombe ya ivaha ja Jěhova, kabo A pângě na A nâdě hohonganěngo o inyěni‐o jadi.
13Inyěni‐o sambiyendini bobe, inyi wa benjani bobe; inyěni‐o jendini ebuma ya melango; jambojana o pitakiděndi mwala muâvě, o bwinge bwa bamo bâvě ba pimba.
14Ovaně‐nd‘ o ilombe i ka betě o bato bâvě ba jadi, na loboko lâvě lokolo lo ka kinakwě, ka Shalmon a kinakidi Běth‐arběl o buhwa bwa ’duka; nyangwě a vanjanganakwě bevande na bana baju ta.
15Nonaně ndi ka Běth‐el a ka hayě na nâvě, ikabojana o pělě ya bobe bwâvě boněně: o buhwa bo ka yayě nd‘ o upolo mua Isreěl a ka lenwě bo‐lenakwě.
Currently Selected:
Hosea 10: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
