Jěnisis 35
35
1Ka Anyambě a vâ na Jekâb, na, Umwaka, kěkě o Běth‐el, o ka diyaka omě: na nâvě o ka haka Anyambě âltar omě, a pumakiyed‘ o âvě‐o jadi, o âvě‐o kweyakidi o boho bwa mwana‐nyângwě Isâ.
2Ka Jekâb a vâ na ba ndabo ’aju, na ba diyaki na ju běhěpi, na, Věngěkiděni bea anyambě be utwakwě be didi o inyěni o jadi, wa nyeviděni nyolo janyu, n‘ inyěni wa ’luděni ngâi janyu:
3Na hwě‐hwa ’muwa, na ’la o Běth‐el; mbi ka handi Anyambě âltar ovoně, e yavwanaki ’mba o buhwa bwamě bwa etuniya, na e diyaki n‘ umba o njea ’amě e kěkidi.
4Ka bâ‐ba vě Jekâb bea anyambě be utwakwě beěhěpi be diyakidi o benâ beabu, na mbonga i diyakidi o matâ mabu; ka Jekâb a kuta beâ o ibomako ja ele ya oak e diyaki pyělě na Shikěm.
5Ka bâ‐ba tamuwa; ka mahihi maněně ma bweya mamboka ma diyaki bâ ulwaniděngo, na bâ b‐u yonganakě bana ba Jekâb.
6¶ Ka Jekâb a pâ o Luz, e jadi o ehe ya Kenean (yâ ndi, na, Běth‐el) mâ na bato ba diyaki na ju běhěpi.
7Ka mâ‐a longa âltar omě, ka mâ‐a vangidě iboko tě, na, El‐Běth‐el; ikabojana omě nd‘ o Anyambě a pumakiyed‘ o mâ‐a jadi, o mâ‐a kweyakid‘ oviya o boho bwa mwana‐nyangwě.
8Ka ebokwedi ya Riběka Děbora a wa, ka mâ‐a tongwě hubiyango Běth‐el o ibomako ja ele ya oak: ka dina ja omě ja tubwě na Allon‐bakuth.
9¶ Ka Anyambě a pumiya pě o Jekâb a jadi, o mâ‐a vakiyed‘ o Pedan‐aram, ka Mâ‐a vambiya mâ ibâtâ.
10Ka Anyambě a vâ na ju, na, Dina jâvě ndi Jekâb: dina jâvě ja tubwě pě, na, Jekâb, ndi dina jâvě i ka diyandi, na, Isreěl; ka mâ‐a vangidě dina jaju, na, Isreěl.
11Ka Anyambě a vâ na ju, na, Umba ndi Anyambě ya Ngudi‐Yěhěpi; janaka na nâvě o ka vuhaka; etomba na njamba ya betomba be ka viyand‘ o âvě‐o jadi, na mepolo me ka viyand‘ o ’hena ’vě;
12Na, ehiki ’amě e di věngo Ebreham na Aisak, te ’amě e ka vě âvě, na, o ibângâ jâvě o mbuhwa ’vě nd‘ ijamě i ka vě ehiki tě.
13Ka Anyambě a beta oviya o mâ‐a jadi, o iboko viaju vi kalaki na ju.
14Ka Jekâb a tědě uhumu o iboko tě o mâ‐a kalaki na ju, uhumu mua ilale; ka mâ‐a hovidě mwambo mua imâtwě omě, ka mâ‐a hovidě tepě mavulě omě.
15Ka Jekâb a vangidě dina ja iboko tě via Anyambě vi kalaki na ju, na, Běth‐el.
16¶ Ka bâ‐ba tamuwa oviya Běth‐el; ndi omě o ngite na ekěndâ o ipâ o Efrath: ka Rechěl a nyima, ka mâ‐a diya na ehavu ekolo.
17E diyakindi, o mâ‐a diyaki na ehavu ekolo, ka mwajo a jakidě a vâ na ju, na, O bangake; ikabojana nandi o ka pahiyi mwa‐momo upâkwě.
18E diyakindi, o ilina jaju i diyakidi i věngěměkě (ikabojana a wakindi) ka mâ‐a vangidě mâ dina jaju, na, Běn‐oni; ndi hangwě a vangakidě mâ, na, Běn‐jamin.
19Ka Rechěl a wa, ka mâ‐a tongwě o njea ya Efrath (e jadi, na, Beth‐lehem).
20Ka Jekâb a tědě uhumu o malonga maju; muně ndi u jadi Uhumu mua Malonga ma Rechěl na bwa buhwa těkabo.
21¶ Ka Isreěl a tamuwa, ka mâ‐a huma mâkâ muaju o pělě ’pâkwě ya elongo ya Eděr.
22E diyakindi, o Isreěl a diyakidi o ehe těně, ka Ruběn a ’la ka nangiya na Bilha mwada wa hangwě wa elěgě: ka Isreěl a yoka yâ.
23Nandi bana ba Jekâb ba bamo ba diyaki jomu na babale: bana ba Lia; ndi Ruběn, njadi ya Jekâb, na Simiân, na Livai, na Juda, na Isekar, na Zěbulân.
24Babamo ba Rechěl; ndi, Josěf, na Běnjamin.
25Babamo ba Bilha, uhayi mua mwajo mua Rechěl; ndi, Dan, na Naftilai.
26Babamo ba Zilpa, uhayi mua mwajo mua Lia; ndi, Gad, na Ashur. Ekaba ndi bana ba bamo ba Jekâb, ba jakudwě o mâ‐a jadi o Pedan‐aram.
27¶ Ka Jekâb a viya o hangwě Aisak a jadi o Mamre, o Kirioth‐Arba (e jadi, na, Hibron) o Ebreham na Aisak ba yěngěkidi.
28Ndi hwi ja Aisak i diyakindi kama ya mepuma na mabo logwambi.
29K‘ ilina ja Aisak ja věngěmě, ka mâ‐a wa, ka mâ‐a yolwě o bato baju ba jadi, utodu na ti na hwi: ka bana baju Isâ na Jekâb ba tonga mâ.
Currently Selected:
Jěnisis 35: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
