Jěnisis 34
34
1Ka Daina mwana wa Lia wa mwajo, uaju a jakidi na Jekâb, a vala ka yěně babajo ba ehe těně.
2Ka Shikěm mwana wa Hemâr wa‐Hivi, upolo mua ehe tě, a yěne mâ, ka mâ‐a nângâ mâ, ka mâ‐a ngia na mâ, ka mâ‐a bevěmâ.
3K‘ ilina jaju ja kangalaně Daina mwana wa Jekâb wa mwajo, ka mua tândâ itângâ, a kalaka na ju na kěngâ.
4Ka Shikěm a kala na hangwě Hemâr, na, Nângâkâ ’mba itângâ těkadi mbi baye jâ.
5Ka Jekâb a yoka na a bevakiděndi mwan‘ ’aju wa mwajo Daina: nandi bana baju babamo ba diyakindi na bembe beaju o upindi: ka Jekâb a diya dâ kabo bâ pângo.
6¶ Ka Hemâr hangwě ya Shikěm a vala o Jekâb a jadi ka kala na ju.
7Ka bana ba Jekâb babamo ba viya oviya upindi o bâ‐ba yokaki yâ: bamo tě ba yěněki ulema mehiyo, ka bâ‐ba linguwa malingwa maitě, ikabojana a hakindi elombo ya ihâni o Isreěl inangiya na mwana wa Jekâb wa mwajo; e ja di elombo e ha lukakid‘ o hama.
8Ka Hemâr a kala na bâ, na, Ilina ja mwan‘ ’amě Shikěm i tândâkândi mwan‘ ’anyu wa mwajo: mbi hâhâlâkiděndi inyěni, věki mâ ni mâ, a baye mâ.
9Bakiyi hwě ni, o věki hwě ni bana banyu babajo, n‘ inyěni o nângâkâni ibahu.
10N‘ inyěni o ka diyaki na hwě; na ehiki e ka diyandi o boho bwanyu; diyakani, n‘ inyěni‐o ka takani ukita omě, n‘ inyěni o ka pahakiyani jumba omě.
11Ka Shikěm a vâ na hangwě ya mwajo na ndomi jaju, na, Mbi pahakiye ehekwě o mihâ manyu, n‘ umba‐mbi ka věnd‘ inyěni eanyu e ka vahě yěhěpi.
12Uwaki ’mba ni ivula ütě na bea bověkě, mbi ka vi pani‐ka inyěni‐o ka vâyěni n‘ umba: ndi věki ’mba ni itângâ, mbi baye jâ.
13Ka bana ba Jekâb babamo ba yavwana Shikěm na hangwě Hemâr n‘ ukândâ, na, ikabojana a bevakiděndi iluku jabu Daina:
14Ka bâ‐ba vâ na bâ, na, Hwa yâlě o ha elombo těkae, ivě ja iluku jahu moto a ha ’bě hěbwěngo; ikabojana yeně e ndi ihâni o hwě‐ho jadi.
15Ndi ho ka bâbâte kabo ekae: oningě o bâbingěni o diyaka ka hwě, momo ’anyu wěhěpi a ka hěběkwě;
16Vâkâna ho věnd‘ inyěni bana bahu, na hwě‐ho ka nângâkâ ibanyu, na hwě‐ho ka diyandi n‘ inyěni, na hwě‐hwa bě etomba yâkâ.
17Nd‘ oningě o yokiyi hwě ni, na hěběkwě ni; vâkâna ho nângindi mwan‘ ’ahu wa mwajo na hwě‐hwa vala.
18Ka ndaga jabu ja tândidě Hemâr na mwan‘ ’aju Shikěm.
19Ndi iwanja tě j‐u bembakě o ha elombo těně, ikabojana a ma yěněki mbya na mwana wa Jekâb wa mwajo; na mâ‐a diyakindi ihekudwě wa na ndabo ya hangwě yěhěpi.
20¶ Ka Hemâr na mwan‘ ’aju wa momo Shikěm ba pâ o jâmbě j‘ ugomba mua mbok‘ ’abu, na bâ‐ba kala na bamo ba mbok‘ ’abu, na.
21Bato těkaba ba na hwě na jonga; ba diyake o ehe, na bâ‐ba take ukita omě; ikabojana ehiki e ndi boněně twětwě na bâ; ho nângâke bana babu babajo, na hwě‐ho baka bâ, na hwě‐ho věke bâ bana bahu ba bajo.
22Kabo ekae ndi ya bamo těbaně e ka bâbě idiya na hwě, idiya ja etomba yâkâ, oningě momo ’ahu wěhěpi a hěbudwěngě, pani‐ka bâ‐ba hěbwěngo.
23Bembe beabu na ngumb‘ ’abu na tito jabu jěhěpi ja diye ijahu? ho kamakidi bâ ni pa, běngě ba diyake na hwě.
24Ka ba kěkidi o jâmbě j‘ ugomba mua mboka běhěpi ba yokiya Hemâr na mwan‘ ’aju Shikěm; ka bamo běhěpi ba hěbwě, ba pumakid‘ o jâmbě j‘ ugomba mua mbok‘ ’aju.
25¶ E diyakind‘ o buhwa bu‘ ilalo, o bâ‐ba diyaki ba bě na mehiyo, ka bana ba Jekâb babale, Simiân na Livai, ndomi ja Daina, ba nângâ ekaně ukwala ekaně ukwala, ka bâ‐ba beta o mboka, ba bange, ka bâ‐ba weya bamo běhěpi.
26Ka bâ‐ba weya Hemâr na mwan‘ ’aju Shikěm na mběbâ y‘ ukwala‐mu‘‐ibâtâ, ka bâ‐ba nângâ Daina oviya ndabo ya Shikěm, ka bâ‐ba vala.
27Ka bana ba Jekâb ba bamo, ba pâ o ba weyakudwě ba jadi, ka bâ‐ba kina mboka tě, ikabojana ba diyaki ba bevě iluku jabu.
28Ka bâ‐ba nângâ myanga meabu, na nyati jabu, na buru jabu, na be diyakidi o mboka, na be diyakidi o ’hiki;
29Na hika ’abu yěhěpi, na bana babu bahâlě, ka bâ‐ba bweya bajo babu mbwedi, ka bâ‐ba kina beěhěpi be diyakid‘ o ndabo.
30Ka Jekâb a vâ na Simiân na Livai, na, O pangindi ’mba ni njuke na mbi nâvâkâ o bato ba ehe ba jadi, ba‐Kenean na ba‐Piriz: nd‘ umba, mbi bě o vuha, ba ka lataniyandi bâ mětě na bâ mětě o umbi jadi, na ba weya ’mba; n‘ umba, mba jiludwě, umba na ndabo ’amě.
31Ka bâ‐ba vâ, na, A lukakind‘ o diya n‘ iluku jahu ka evově?
Currently Selected:
Jěnisis 34: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
