Jěnisis 33
33
1Ka Jekâb a betě mihâ maju, ka mâ‐a tamuwa, umbwakiyate, ndi Isâ a vaka, na kama ja bamo inai. Ka mâ‐a pěhě bana o Lia a jadi, na o Rechěl a jadi, na o bahayi ba bajo babale ba jadi.
2Ka mâ‐a vamě bahayi ba bajo na bana babu o boho mětě, na Lia na bana baju o mbuhwa, na Rechěl na Josěf o mbuhwa mětě.
3Ndi mâ mětě a tombakindi o boho bwabu, ka mâ‐a balama o he njo hěmbwědi, kwanga na o mâ‐a pâkidi pyělě na mwana‐nyangwě.
4Ka Isâ a vala umbila ka lata na ju, ka mâ‐a kehaně mâ, ka mâ‐a kwa o ibâlu jaju, ka mâ‐a pyâpyâ mâ; ka bâ‐ba ya.
5Ka mâ‐a betě mihâ maju, ka mâ‐a yěně bajo na bana, ka mâ‐a vâ, na, Ba lě ba nja ba di na nâvě ekaba? Ka mâ‐a vâ, na, Bana ba Anyambě ba di věngo uhayi ’muâvě na ehekw‘ ’aju.
6Jâ ndi ja bahayi ba bajo na bana babu ba viya pyělě, ka bâ‐ba balama.
7Ka Lia na bana baju ba viya tepě pyělě, ka bâ‐ba balama: o mbuhwěmbuhwě ka Josěf na Rechěl ba viya pyělě, ka bâ‐ba balama.
8Ka mâ‐a vâ, na, O lě na, na njamba tě eamě e ma latana yěhěpi ekaně? Ka mâ‐a vâ, na, Iduwa ja ’hekwě o mihâ ma upangiyi ’mwamě.
9Ka Isâ a vâ, na, Mbi ndi na twětwě; mwana‐jaie, ibeâvě be janidi be diyake ibeâvě mětě.
10Ka Jekâb a vâ, na, Nyawě, mbi hâhâlâkiděnd‘ âvě, na, oningě na mbi pahiyendi ehekwě o mihâ mâvě, ndi nângâkâ o enâ ’amě bověkě bwamě; ikabojana mbi yěnindi boho bwâvě, pani‐ka moto a yěněkě boho bwa Anyambě, na nâvě o tândâkâ n‘ umba.
11Nângâkâ bověkě bwamě, mbi hâhâlâkiděnd‘ âvě, bo di vanwěngo o âvě o jadi; ikabojana Anyambě a hango ’mba ehekwě, ikabojana mbi na twětwě. Ka mâ‐a pinyilidě mâ, ka mâ‐a nângâ bwâ.
12Ka mâ‐a vâ, na, Ho valake ekěndâ ’ahu, na hwě‐ho ka kěkě, n‘ umba‐mbi ka landi o boho na nâvě.
13Ka mâ‐a vâ na ju, na, Upangiyi ’muamě a yowuděte na bana ba ndi bobâbu, na myanga na bembe be di n‘ umba be nyangakěndi; nd‘ oningě bato ba dumidě beâ na‐ngudi buhwa bâkâ, vâkâna myanga měhěpi me ka wandi.
14Upangiyi ’muamě a tombake o boho bwa uhayi muaju, mbi hâhâlâkiděnd‘ âvě; na umba mbi ka tamwanate najana, pani‐ka bembe be tamwakě o boho bwamě, na bana ba ka yâlě ihindina, kwanga n‘ umba‐mbi ka pâyě o upangiyi ’mwamě u jadi o Siěr.
15Ka Isâ a vâ, na, Mbi dikake na nâvě bato ba di n‘ umba bâkâ. Ka mâ‐a vâ, na, E lě na nja malě? mbi pahakiye ehekwě o mihâ ma upangiyi ’muamě.
16¶ Ka Isâ a timba buhwa těboně o njea ’aju na ’la o Siěr.
17Ka Jekâb a tamuwa na ’la o Sukoth, ka mâ‐a longa mâ mětě ndabo, ka mâ‐a ha bembe beaju myâkâ; ovaně nd‘ o dina ja iboko tě i tubakwě, na, Sukoth.
18Ka Jekâb a viya na jonga o mboka ya Shikěm, a jadi o ehe ya Kenean, o mâ‐a vakiyedi oviya Pedan‐aram; ka mâ‐a huma mâkâ muaju o boho bwa mboka.
19Ka mâ‐a hamba epěhi ya ’hiki, eaju e takidě mâkâ muaju, o benâ bea bana ba Hemâr, hangwě ya Shikěm, na kama ya bepěhi bea hika.
20Ka mâ‐a longa âltar omě, ka mâ‐a vangidě yâ, na, El‐Elohe‐Isreěl.
Currently Selected:
Jěnisis 33: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
