Jěnisis 32
32
1Ka Jekâb a vala o njea ’aju, ka benjěl bea Anyambě bea lata na ju.
2O Jekâb a běki beâ yěněngo, ka mâ‐a vâ, na, Ekaně ndi ndumba ya Anyambě; ka mâ‐a vangidě dina ja iboko tě, na, Mahaneim.
3Ka Jekâb a loma metodu o boho bwaju o mwana‐nyangwě Isâ a jadi o ehe ya Siěr, o ehiki ya Idâm.
4Ka mâ‐a sombiyě bâ, na, Kakana ndi k‘ inyěni o ka kalěni n‘ upangiyi muamě Isâ, na; Uhayi muâvě Jekâb a ma vwi kakana, na, mbi yěngěkidi na Leban, k‘ umba‐mba diya omě kwanga na ’la kya těkaně;
5N‘ umba, mbi na nyati na buru, na myanga, na bahayi ba bamo, na bahayi ba bajo: k‘ umba‐mba loma ka languwa upangiyi muamě, ovaně nd‘ umba‐mbi ka pahiyě ehekwě o mihâ mâvě.
6¶ Ka metodu mea timba o Jekâb a jadi, na, Ho ma pâte o mwana‐nyângwě Isâ a jadi, na mâ tepě a vakandi ka lata na nâvě, na kama ja bamo inai.
7Jâ ndi ja Jekâb ja banga jângâ iněně, a ka njanjalanaka: ka mâ‐a pěhě bato ba diyaki na ju, na myanga, na bembe, na kaměl njamba ibale;
8Ka mâ‐a vâ, na, Oningě Isâ a viya o njamba pâkâ, na mâ‐a weya yâ, vâkâna njamba ’pâkwě e didi dikanango e ka kweyandi.
9¶ Ka Jekâb a vâ, na, A! Anyambě ya paia Ebreham, na Anyambě ya paia Aisak! A! Jěhova a vâki n‘ umba, na, Timbaka o ehe ’âvě, na o ikaka jâvě, Mbi ka hand‘ âvě bwamu.
10Mbi ’bě weyango ibya ihâlě o mabya mâvě měhěpi, na pâkwěpâkwě yěhěpi, eâvě e di leviděngo uhayi ’muâvě; ikabojana mbi jabwakite o Jordan těkadi kabo n‘ utumbe ’muamě; ndi mba běndi njamba ibale.
11Yongakě ’mba, mbi hâhâlâkiděnd‘ âvě, oviya o ’nâ ya mwana‐jaie, oviya o ’nâ ya Isâ; ikabojana mbi bangaki mâ, o banga a viya ka weya ’mba, nyangwě na bana.
12Na nâvě o vâki, na, Pâkwěpâkwě Mbi ka hand‘ âvě bwamu, n‘ Umba‐Mbi ka pangandi ibângâ jâvě pani‐ka mahě ma manga, ma ka měndě ma langaniye na bwinge.
13¶ Ka mâ‐a diya omě bulu tě; ka mâ‐a nângâ nyanga e vakiyedi o ’nâ ’aju e věkě mwana‐nyangwě Isâ bověkě;
14Kama ja myadi mea tomba ibale, na mabo ma myomi mea mbodi mabale, kama ja myadi mea medâmbě ibale, na mabo ma myomi mea tomba mabale, kama ja myadi mea medâmbě ibale, na mabo mea myomi mea medâmbě mabale,
15Mabo ma kaměl malalo i věkě manyângâ na bana babu, mabo ma myadi mea nyati manai, na jomu ja myomi mea nyati, mabo mabale ma myadi mea buru, na jomu ja bana ba buru.
16Ka mâ‐a bweyidě beâ o benâ bea bahayi baju, yâně njamba na eaju pělě; ka mâ‐a vâ na bahayi baju, na, Tombakani o boho bwamě, n‘ inyěni wa hani mapolo oviya njamba pâkâ na ’la epâkwě.
17Ka mâ‐a sombiyě ya bohoboho, na, Oningě mwana‐jaie Isâ a lata n‘ inyěni, na mâ‐a uwa inyěni, na, O lě ni ba nja? na na, wa ’la lě ni ove? na na, ekabe be lě bea nja e didi o boho bwâvě?
18Nandi, o ka vâkâni, na, Be ndi bea uhayi ’muâvě Jekâb; be ndi be lomudwě o upangiyi ’muamě Isâ bověkě; umbwakiyate, mâ tepě a te o mbuhw‘ ’ahu.
19Ka mâ‐a sombiyě y‘ ibale, na y‘ ilalo, na ba vitakidě njamba běhěpi, na, Nonaně ndi k‘ inyěni o ka kalěni na Isâ, o inyěni o ka duwi mâ ni;
20O ka vâkâ pě ni, na, Tepě, umbwakiya, uhayi ’muâvě Jekâb a nd‘ o mbuhw‘ ’ahu. Ikabojana a ma vwi, na, Mbi ka vâti mâ na belombo bea bověkě be kěkě o boho, na mbuhwěmbuhwě běngě mbi yěněke boho bwaju; ipě a ka věhělidi ’mba.
21Nonaně nd‘ o belombo bea bověkě be kěkidi o boho bwaju; na mâ mětě na dikanaka bulu těboně o njamba.
22Ka mâ‐a ’muwa na bulu tě, ka mâ‐a nângâ bajo baju babale, na bahayi baju ba bajo babale, na bana baju babamo jomu n‘ umbâkâ, ka bâ‐ba jabuwa o ijabwanido ja Jabbâk.
23Ka mâ‐a nângâ bâ, ka mâ‐a jabudě bâ o viho, ka mâ‐a jabudě ibeaju be diyanakidi.
24¶ Ka Jekâb a dikana dipâ; ka momo a ha na ju makeha omě kwanga na ’la o buhwa bo yakidi.
25O Mâ‐a yěnidi na a‐u bala mâ, ka Mâ‐a kupaně uhâmbi mua ebyâbyâ ’aju; na uhâmbi mua ’byâbyâ ya Jekâb na pihwanakiya, o Mâ‐a haki na ju makeha.
26Ka Mâ‐a vâ, na, Hulwakidě ’mba, ikabojana buhwa bo yakandi. Ka mâ‐a vâ, na, Mba hulud‘ âvě, kabo wa vambiya ’mba ibâtâ.
27Ka Mâ‐a vâ na ju, na, Dina jâv‘ i lě nja? Ka mâ‐a vâ, na, Jekâb.
28Ka Mâ‐a vâ, na, Dina jâvě ja tubwě pě, na, Jekâb, kabo, na, Isreěl; ikabojana o ndi yanango na Anyambě na bato, na nâvě wa bala.
29Ka Jekâb a uwa Mâ, na, Langwakiya ’mba, mbi hâhâlâkiděnd‘ âvě, dina jâvě. Ka Mâ‐a vâ, na, E lě nd‘ eâvě e uwakě dina jamě? Ka Mâ‐a vambiya mâ ibâtâ omě.
30Ka Jekâb a vangidě dina j‘ iboko tě, na, Peniel: ikabojana, hwě na Anyambě ho yěněnindi pwanja na pwanja, na eměnâ ’amě e tatuwěngo.
31Ka joba ja panyiya mâ o mâ‐a diyakidi a tombaka o Penuěl, ka mâ‐a děhima o ebyâbyâ ’aju.
32Ovaně nd‘ o bana ba Isreěl ba ha jaka uhiha mua ikande u didi o uhâmbi mua ’byâbyâ, na ’la o buhwa těkabo; ikabojana a kupanakiděndi uhâmbi mua ’byabyâ ya Jekâb o uhiha mua ikande.
Currently Selected:
Jěnisis 32: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
