Jěnisis 31
31
1Ka mâ‐a yoka ndaga ja bana ba Leban, na, Jekâb a nângindi belombo bea hangw‘ ’ahu beěhěpi; na na be diyakidi bea hangw‘ ’ahu nd‘ ibeaju be pahaniyedi ivenda těkadi jěhěpi.
2Ka Jekâb a ’mbuwa boho bwa Leban, ka mâ‐a yěně na bwâ bo diye pě o mâ‐a jadi ka bwâ bo diyakě mběmbě.
3Ka Jěhova a vâ na Jekâb, na, Timbaka o ehe ya ba hângwě, na o ikaka jâvě; Mbi ka diyi na nâvě.
4Ka Jekâb a loma ka ndiya Rechěl na Lia o mwanga o mwanga muaju,
5Ka mâ‐a vâ na bâ, na, Mbi yěni boho bwa hangw‘ ’anyu bo ’bě pě o umbi jadi pani‐ka mběmbě; ndi Anyambě ya paia a diyi n‘ umba.
6N‘ inyěni o yowudětěni na mbi hayango hangw‘ ’anyu na ngud‘ ’amě yěhěpi.
7Ndi hangw‘ ’anyu a i ’mba yabango, na mâ‐a uludě ivě jamě jomu ja njo; ndi Anyambě a‐u bâbâkâ na a kokakidě ’mba.
8Oningě a vâ kakana, na, Ja bebalo i diyake ivě jâvě; jâ ndi ja bembe beěhěpi ja ja bea bebalo: nd‘ oningě a vâ kakana, na, Ja melěndâ mea jubu i diyake ivě jâvě; jâ ndi ja bembe beěhěpi ja ja bea melěndâ mea jubu.
9Nonaně nd‘ o Anyambě a nângidi bembe bea hangw‘ ’anyu, ka Mâ‐a vě ’mba beâ.
10E diyakindi o ’gombe ya bembe be kahakidi, k‘ umba‐mba betě mihâ mamě, k‘ umba‐mba yěně o ndâtâ, umbwakiyate, tomba ja myomi i kahamaki bembe i jadi na melěndâ mea jubu, na bebalo, na matâbě mavindo.
11Ka enjěl ya Anyambě ya kala n‘ umba o ndâtâ, na, Jekâb; k‘ umba‐mba vâ, na, Umba nd‘ ekaně.
12Ka Mâ‐a vâ, na, Nandi, betakě mihâ mâvě, na nâvě wa yěně tomba ja myomi jěhěpi i kahamakě o bembe, i ndi na melěndâ mea jubu, na bebalo, na matâbě mavindo: ikabojana Mbi yěnindi nyanga ya Leban e hakě âvě yěhěpi.
13Umba ndi Anyambě ya Běth‐el, o âvě‐o hovakidě mavulě o uhumu, o âvě o yohanakidě ’mba mohano: nandi, umwaka, wa věngěmě o ehe těkae, na nâvě wa timba o ehe ya ijawě jâvě.
14Ka Rechěl na Lia ba yavwana, ka bâ‐ba vâ na ju, na, Ho ngite pě na ngabo na ba ekuha o ndabo ya hangw‘ ’ahu?
15Hwa langakwě ka bangi o mâ‐a jadi? ikabojana a hambi hwě, na mâ‐a pukuli tepě hik‘ ’ahu.
16Ikabojana hika ya Anyambě e nângânidi hangw‘ ’ahu yěhěpi, e nd‘ eahu, na ya bana bahu; nandi, haka nyanga ya Anyambě e di vângo na nâvě.
17¶ Ka Jekâb a ’muwa, ka mâ‐a diyidě bana baju babamo, na bajo baju o kaměl;
18Ka mâ‐a bapě bembe beaju beěhěpi, na ngumb‘ ’aju e pahakiyedi yěhěpi, bembe bea ipahiya jaju, ibeaju be pahakiyedi o Pedan‐aram, ivala o hangwě Aisak a jadi o ehe ya Kenean.
19Nandi Leban a vala ka lena mevâtâ mea medâmbě meaju; ka Rechěl a iba megano mea hangwě.
20Ka Jekâb a kweya ikutakuta, ikabojana a‐u langwaka Leban wa Siria, o mâ‐a kweyakidi.
21Ka mâ‐a kweya na ibeaju be diyanakidi beěhěpi; ka mâ‐a ’muwa, ka mâ‐a jabuwa Viho, ka mâ‐a huma boho bwaju o ukodi mua Giliad.
22E langwakudwi Leban o buhwa bw‘ ilalo, na, Jekâb a kweyindi.
23Ka mâ‐a nângâ bana ba nyangwě na mâ, ka bâ‐ba yonganě mâ ekěndâ ya hwi hěmbwědi; ka mâ‐a kâbidě mâ o ukodi mua Giliad.
24Ka Anyambě a pâ o Leban wa‐Siria a jadi o ndâtâ ya bulu, ka Mâ‐a vâ na ju, na, Bandamakidě o kalake na Jekâb bwamu tombe bobe.
25¶ Jâ ndi ja Leban ja kâbidě Jekâb. Nandi Jekâb a diyakindi a huma mâkâ muaju o ukodi; ka Leban na bana ba nyangwě ba huma o ukodi mua Giliad.
26Ka Leban a vâ na Jekâb, na, E lě nd‘ eâvě e di hango, ikweya jamě ikutakuta, n‘ ivalana ja bana bamě, pani‐ka mbwedi i bweyakwě o eduka?
27Nandi, e lě nd‘ eâvě e kweyakidi ikutakuta, na nâvě wa kweyia ’mba; o languwe ’mba, te mbi valakiděte âvě na upeyo, na lembo, na mabeka, na ngâmbi;
28Tepě wu pangaka ’mba mbi pyâpyâkâ bana bamě babamo na bana bamě babajo? Nandi, o handi ihadi via eboki.
29E ndi o ngudi ya enâ ’amě iha jâvě njuke; ndi Anyambě ya hângwě nd‘ a kalaki n‘ umba o bulu bwa vaiko, na, Bandamakidě o kalake na Jekâb bwamu tombe bobe.
30Nandi, tombe ka âvě‐o vahakě o vala, ikabojana o vahakindi ndabo ya hângwě na‐ngudi, nd‘ e lě nd‘ eâvě e ibidi beanyambě beamě?
31Ka Jekâb a yavuwa ka mâ‐a vâ na Leban, na, Ikabojana mbi bangakindi: mbi vâki, na, O banga wa nângânâ ’mba bana bâvě na ngudi.
32Uâvě wěhěpi a ka duwě a jadi na beanyambě beâvě, à diyake: langwaka o boho bwa bana ba hangw‘ ’ahu elombo ’âvě e di n‘ umba, na nâvě wa nângâ yâ. Ikabojana Jekâb a‐u yowakě na Rechěl nd‘ a di beâ ibango.
33Ka Leban a vala o mâkâ mua Jekâb, na o mâkâ mua Lia, na o mâkâ mua bahayi babajo babale; nd‘ a‐u duwaka beâ. Jâ ndi jaju ja puma oviya mâkâ mua Lia, ka mâ‐a ngia o mâkâ mua Rechěl.
34Nandi, a diyaki megano nângângo, ka mâ‐a vamě meâ o belombo bea kaměl, ka mâ‐a diyia meâ. Ka Leban a boba o mâkâ muěhěpi, nd‘ a‐u duwaka meâ.
35Ka mâ‐a vâ na hangwě, na, E binakidě upangiyi muamě ya mbi ’muwe o boho bwâvě; ikabojana mběmbâ ya bajo e nd‘ umba mbi jadi. Ka mâ‐a buta, nd‘ a‐u duwaka megano.
36¶ Na Jekâb na lingwaka, ka mâ‐a yomana na Leban: ka Jekâb a yavuwa ka mâ‐a vâ na Leban, na, Ibevě jamě i l‘ ove? na bobe bwamě bo l‘ ove, eâvě e yonganakě ’mba na‐ngudi?
37O âvě‐o didi bobango belombo beamě beěhěpi, nd‘ e lě nd‘ eâvě e didi duwango ya belombo bea ndabo ’âvě beěhěpi? Těkidě yâ okava o boho bwa bana ba paia na bana ba hângwě, ovaně nd‘ o bâ‐ba ka yěkidě o hangan‘ ’ahu ya babale.
38Mbi diyi na nâvě mabo tě ma mepuma mabale ekama; ndi myadi meâvě mea medâmbě, na myadi mea mbodi me ha nyange bana babu, n‘ umba‐mbi ’bě jango myomi mea mwanga muâvě.
39Mb‐u vanaka ya tito e ma weyaka o âvě o jadi; mbi ma nangâkândi inyanga jaju; na o enâ ’amě nd‘ eâvě e uwaki yâ, tombe ya ibwě na mwehe, tombe ya ibwě na bulu.
40Nonaně nd‘ umba‐mbi diyakidi; egombe ya mwehe evělě e hinakidě ’mba, na ivěvu na bulu; na viya viamě vi věngěměkindi o mihâ mamě.
41Mabo ma mepuma mabale ekame ndi umba‐mbi diyedi o ndabo ’âvě; mbi hakiyendi âvě jomu na mepuma menai o pělě ya bana bâvě babajo babale, mepuma utoba o pělě ya bembe beâvě; na nâvě wa ulwakiděndi ivě jamě jomu ja njo.
42Kabo Anyambě ya paia, Anyambě ya Ebreham, na Jângâ ja Aisak, be jaka be diye n‘ umba, te pâkwěpâkwě o validěte ’mba naně. Ndi Anyambě a yěněkite etuniya ’amě na ehavu ya benâ beamě, ka Mâ‐a kandid‘ âvě bulu bwa vaiko.
43¶ Ka Leban a yavuwa, ka mâ‐a vâ na Jekâb, na, Ba tě ba bajo ekaba ba ndi babajo bamě, na ba tě bana ekaba ba ndi bana bamě, na bembe těkabe be ndi bembe beamě, na beěhěpi ibeâvě be yěněkě be ndi ibeamě: na, e lě nd‘ eamě e ka hayě o buhwa těkabo o pělě ba tě ibamě babajo ekaba, tombe o bana babu ba di jango?
44Nandi vaka, ho hake panga, hwě na nâvě; na yâ e ka diyaka tali o hangan‘ ’ahu na nâvě.
45Ka Jekâb a nângâ ilale, ka mâ‐a tědě jâ pani‐ka uhumu.
46Ka Jekâb a vâ na bana ba nyangwě, na, Yolakěni malale; ka bâ‐ba yolě malale, ka bâ‐ba ha mwindi: ka bâ‐ba ja baka na mwindi tě.
47Ka Leban a vangidě muâ, na, Jegar‐sahadutha; ndi Jekâb a vangakidi muâ, na, Galiěd.
48Ka Leban a vâ, na, Mwindi těkamu ndi tali o hangan‘ ’ahu na nâvě o buhwa těkabo. Ovaně nd‘ o dina ja omě i vangakudwě na, Galiěd:
49Na Mizpa; ikabojana a vâki, na, Jěhova a pepwake o hangan‘ ’ahu na nâvě, o hwě‐ho ka palwanidě.
50Oningě wa ha bana bamě njuke, tombe wa nângâ bajo bapâkwě na bana bamě ta, mot‘ upâkwě a ’bě na hwě; yěněkěte, Anyambě ndi tali o hangan‘ ’ahu na nâvě.
51Ka Leban a vâ na Jekâb, na, Umbwakiyate mwindi těkamu, na nâvě wa ’mbuwa uhumu tě umuamě u di těděngo o hangan‘ ’ahu na nâvě.
52Mwindi těkamu u diyakě tali, na uhumu těkamu u diyakě tali, na mba kunduwe mwindi těkamu na pâ o âvě‐o jadi, na nâvě wa kunduwe mwindi těkamu na uhumu těkamu o umba‐mbi jadi, o ikokidě.
53Anyambě ya Ebreham, na Anyambě ya Nehâr, na Anyambě ya hangw‘ ’abu, a yěkěkidě o hangan‘ ’ahu. Ka Jekâb a kaniya na Jângâ ja hangwě Aisak.
54Ka Jekâb a tumba mwambo o ukodi, ka mâ‐a ndiya bana ba nyangwě ka ja pěmbě; ka bâ‐ba ja, na diyaka bulu bwěhěpi o ukodi.
55Ka Leban a punda imuwa n‘ ubwa, ka mâ‐a pyâpyâ bana baju babamo na bana baju babajo, ka mâ‐a vambiya bâ ibâtâ; ka Leban a věngěmě, ka mâ‐a timba o iboko viaju.
Currently Selected:
Jěnisis 31: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
