Jěnisis 30
30
1O Rechěl a yěněki na a‐u ja Jekâb bana, Rechěl a vinakiyindi mwana‐nyangwě; ka mâ‐a vâ na Jekâb, na, Věkě ’mba bana, ipě mbi wake.
2Ka malingwa ma Jekâb ma yoda na Rechěl; ka mâ‐a vâ, na, Umba ndi jadi o maihana ma Anyambě, a di himbiděngo âvě ebuma y‘ ihuhu?
3Ka mâ‐a vâ, na, Umbwakiyate, uhayi muamě mua mwajo Bilha, ngakiya na ju; na mâ‐a ka jaka o mabângâ mamě, mbi pahiye tepě bana na ju.
4Ka mâ‐a vě mâ uhayi muaju mua mwajo Bilha na a diyake mwad‘ ’aju: ka Jekâb a ngia na ju.
5Ka Bilha a kaha, ka mâ‐a ja Jekâb mwa‐momo.
6Ka Rechěl a vâ, na, Anyambě a yěkidi ’mba, na mâ‐a yoki tepě joi jamě, a vi ’mba mwa‐momo; ovaně nd‘ o mâ‐a vangakidě mâ dina, na, Dan.
7Ka Bilha uhayi mua mwajo mua Rechěl a kaha pě, ka mâ‐a ja Jekâb mwa‐momo wa babale.
8Ka Rechěl a vâ, na, Makeha maněně i nd‘ imamě ma di hango na mwanina, k‘ umba‐mba bala; ka mâ‐a vangidě dina jaju, na, Naftelai.
9O Lia a yěněki na à jaka pě, ka mâ‐a nângâ uhayi muaju mua mwajo Zilpa, ka mâ‐a vě mâ Jekâb a jadi, na, a diyake mwad‘ ’aju.
10Ka uhayi mua mwajo mua Lia, Zilpa, a ja Jekâb mwa‐momo.
11Ka Lia a vâ, na, Ehimo! ka mâ‐a vangidě mâ dina na Gad.
12Ka uhayi mua mwajo mua Lia, Zilpa, a ja Jekâb mwa‐momo wa babale.
13Ka Lia a vâ, na, Mbya n‘ umba, ikabojana babajo ba ka tubi ’mba, na, mbya: ka mâ‐a vangidě mâ dina na Asher.
14¶ Ka Ruběn a vala o hwi ja juma ja hwib, ka mâ‐a duwa bebuma bea mandrek o mwanga, ka mâ‐a vana beâ o nyangwě Lia a jadi. Jâ ndi ja Rechěl ja vâ na Lia, na, Mbi hâhâlâkiděnd‘ âvě, na, věkě ’mba o mandrek ma mwan‘ ’âvě.
15Ka mâ‐a vâ na ju, na, E te elombo ehâlě ya na o nângâni ’mba momi amě? nandi o vahaka tepě o nângâ bebuma bea mandrek bea mwan‘ ’amě? Ka Rechěl a vâ, na, A ka nangiyi na nâvě na bulu těkabo o pělě ya mandrek ma mwan‘ ’âvě.
16Ka Jekâb a viya oviya mwanga na kolo, ka Lia a vala ka lata na ju, ka mâ‐a vâ, na, O ka ngakiya n‘ umba; ikabojana pâkwěpâkwě mbi hambind‘ âvě na mandrek ma mwan‘ ’amě. Ka mâ‐a nangiya na ju o bulu tě.
17Ka Anyambě a yokiya Lia, ka mâ‐a kaha, ka mâ‐a ja Jekâb mwa‐momo wa batano.
18Ka Lia a vâ, na, Anyambě a ’mba věngo ivě jamě, ikabojana mbi věkindi uhayi muamě mua mwajo o momi amě a jadi: ka mâ‐a vangidě mâ dina na Isakar.
19Ka Lia a kaha pě, ka mâ‐a ja pě Jekâb mwa‐momo wa utoba.
20Ka Lia a vâ, na, Anyambě a ’mba vulango n‘ ivula iyamu; nandi momi amě a ka diyi n‘ umba, ikabojana mbi mâ jango bana utoba; ka mâ‐a vangidě mâ dina, na, Zěbulân.
21Ka mâ‐a ja mwa‐mwajo o mbuhwa, ka mâ‐a vangidě mâ dina, na, Daina.
22¶ Ka Anyambě a yongidě Rechěl, ka Mâ‐a yokiya mâ, ka Mâ‐a bumudě ihuhu jaju.
23Ka mâ‐a kaha, ka mâ‐a ja mwa‐momo; ka mâ‐a vâ, na, Anyambě a věngiděndi ikili jamě:
24Ka mâ‐a vangidě mâ dina, na, Josěf; ka mâ‐a vâ, na, Jěhova a ka badiyate ’mba mwana upâkwě wa momo.
25¶ E diyakindi, o Rechěl a diyaki a ja Josěf, ka Jekâb a vâ na Leban, na, Hulwakidě ’mba, mbi vale o iboko viamě mětě na o ehiki ’amě.
26Věkě ’mba bajo bamě na bana bamě, ibamě ba did‘ âvě hayango, na nâvě wa huludě ’mba: ikabojana o yowuděte ihaya jamě i did‘ âvě hayango.
27Ka Leban a vâ na ju, na, Mbi hâhâlâkiděnd‘ âvě, na, oningě na mbi pahiyango unyěvěno o mihâ mâvě, vengaka; mbi sâkângo, na, Jěhova a vambiyango ’mba ibâtâ o pěl‘ âvě.
28Ka mâ‐a vâ, na, Tubaka ’mba ivě jâvě, mbi ka vi jâ.
29Ka mâ‐a vâ na ju, na, O yowuděte nyang‘ ’amě e did‘ âvě hayango, na nyanga ya bembe beâvě be diyake n‘ umba.
30Ikabojana o diyakite na behâlě ovaně mbi t‘ o pâ, nandi be vuhindi ebimba; na Jěhova a vambiyend‘ âvě ibâtâ pěle ’amě e uluakě yěhěpi: nandi e lě nja ’gombe ě eamě e ka kenjě tepě o pělě ya ndabo ’amě mětě?
31Ka mâ‐a vâ, na, Mbi věkě lě âvě nde? Ka Jekâb a vâ, na, O věke ’mba elombo: oningě o hangwě ’mba elombo těkae, vâkâna mbi jedi pě mwanga muâvě n‘ umba mbi ka tataka muâ.
32Mbi ka tombandi o mwanga muâvě muěhěpi o buhwa těkabo, na umba‐mbi ka věngěkidě omě bembe be di na bebalo na mâtâbě beěhěpi, na evindo yěhěpi o njamba ya medâmbě, na ya mâtâbě na bebalo o njamba ya mbodi; beně be ka diyaka ivě jamě.
33Nonaně ndi o mahuwa mamě ma ka yavuwě o pěl‘ ’amě okava tombango, o âvě‐o ka viyě o pělě ya ivě jamě i jadi o boho bwâvě: yěhěpi e ha ’bě na bebalo na matâbě o tomba, na bovindo o medâmbě, oningě ya duwaniya n‘ umba e ka langakwě ’mba na mbi ibindi.
34Ka Leban a vâ, na, Umbwakiyate, mbi vahaki na e diyake hohonganěngo na ndaga ’vě.
35Ka mâ‐a věngidě buhwa těboně tomba ja myomi i diyaki na melěndâ mea jubu na matâbě, na tomba ja myadi jěhěpi i diyaki na bebalo na matâbě, na jěhěpi i diyaki na botano bohâlě, na medâmbě mevindo meěhěpi, ka mâ‐a vě beâ o benâ bea bana baju:
36Ka mâ‐a lenidě ekěndâ ya hwi ilalo o hangan‘ abu na Jekâb; ka Jekâb a jedě myanga mea Leban mepâkwě.
37¶ Ka Jekâb a nângâ o mâ‐a jadi ngwahi ja ele ya poplar ya mihâ, na ele ya almond, na ele ya plane; ka mâ‐a nyâpâlâ jâ melěndâ metano, ka mâ‐a panga botano bo diyakidi o ngwahi bo pumakiya.
38Ka mâ‐a tědě ngwahi tě ijaju i nyâpâlâkidi o boho bwa myanga o mehembe na o beboka, o meâ me vakě ka mâtâ; na ovaně nd‘ o meâ‐me ka kahě, o meâ‐me ka vakě ka mâtâ.
39Ka myanga mea kaha o boho bwa ngwahi, ka meâ‐mea ja bembe bea melěndě mea jubu, na bebalo, na matâbě.
40Ka Jekâb a věngidě bana ba medâmbě, ka mâ‐a tědě myoho mea myanga o pělě ya myanga mea melěndâ mea jubu na mevindo meěhěpi o mwanga mua Leban; ka mâ‐a valana myanga meaju iboko n‘ iviabu, a‐u vamake meâ o bembe bea Leban.
41E diyakindi, o bembe bea ngudi be kahakidi, vâkâna Jekâb a nangakidi ngwahi o mihâ ma bembe o mehembe na ovaně nd‘ o meâ‐me ka kahě o ngwahi i jadi;
42Nd‘ oningě bembe be diye na ngudi, vâkâna à těkidě jâ; nonaně ndi bea vâhâ be diyaki bea Leban, na bea ngudi bea Jekâb.
43Ka momo tě a vuha nangudi mětě eitě, ka mâ‐a diya na myanga meněně, na bahayi ba bajo, na bahayi ba bamo, na kaměl, na buru.
Currently Selected:
Jěnisis 30: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
