Jěnisis 29
29
1Jâ ndi Jekâb ja vala o ekěndâ ’aju, ka mâ‐a pâ o ehe ya bato ba mbuhwa.
2Ka mâ‐a tamuwa, ka mâ‐a yěně idango o mwanga, umbwakiyate, omě o jadi na myanga mea medâmbě melalo baka na jâ; ikabojana o idango tě ndi ijabu i ma mâtâkidě myanga tě: ilale iněně i diyakindi o udumbu mua idango.
3Omě nd‘ o myanga meěhěpi me yolanakidě: na bâ‐ba vunguludě ilale tě oviya o udumbu mwa idango, na bâ‐ba mâtidě medâmbě, na bâ‐ba timbě pě ilale o iboko viaju o udumbu mua idango.
4Ka Jekâb a vâ na bâ, na, Bana‐bina, o lě ni ba nja pělě? Ka bâ‐ba vâ, na, Ho ndi ba Haran.
5Ka mâ‐a vâ na bâ, na, O yowuděteni Leban mwana wa Nehâr? Ka bâ‐ba vâ, na, Ho yowuděte mâ.
6Ka mâ‐a vâ na bâ, na, A te bwamu‐ě? Ka bâ‐ba vâ na ju, na, A te bwamu: umbwakiyate, mwan‘ ’aju wa mwajo Rechěl a vakate na medâmbě.
7Ka mâ‐a vâ, na, Umbwakiyate, buhwa bo nd‘ oba, tepě e ’bě ’gombe ya bembe e yolakwě: mâtâkiděni medâmbě, n‘ inyěni wa ’la ka jedě meâ.
8Ka bâ‐ba vâ, na, Hwa yâlě, kabo myanga meěhěpi mea yolwě, na bâ‐ba vunguludě ilale oviya udumbu mua idango; vâkâna ho mâtidi medâmbě.
9¶ O mâ‐a diyakidi a kalaka na bâ, ka Rechěl a viya na medâmbě mea hangwě; ikabojana mâ ndi a ma tataka meâ.
10E diyakindi, o Jekâb a yěněki Rechěl mwana wa ndomi ya nyangwě Leban wa mwajo, na medâmbě mea ndomi ya nyangwě Leban, ka Jekâb a vala pyělě, ka mâ‐a vunguludě ilale oviya udumbu mua idango, ka mâ‐a mâtidě myanga mea ndomi ya nyangwě Leban.
11Ka Jekâb a pyâpyâ Rechěl, ka mâ‐a betě joi jaju, ka mâ‐a ya.
12Ka Jekâb a vâ na Rechěl na a ndi mwana‐nyangwě na hangwě, mwana wa Riběka: ka mâ‐a vala umbila ka mâ‐a languwa hangwě.
13E diyakindi, o Leban a yokaki sango ya Jekâb mwana wa iluku jaju, ka mâ‐a vala umbila ka lata na ju, ka mâ‐a kehaně mâ, ka mâ‐a pyâpyâ mâ, ka mâ‐a vana mâ o ndabo ’aju. Ka mâ‐a languwa Leban belombo těkabe beěhěpi.
14Ka Leban a vâ na ju, na, Pâkwěpâkwě, âvě ndi evehi ’amě na mehoni meamě. Ka mâ‐a diya na ju pani‐ka ngândě.
15¶ Ka Leban a vâ na Jekâb, na, Ikabojana o ndi mwana‐jaie, o ka hayi ’mba o naně? langwakiya ’mba nyanga ya ivě jâvě i ka diyě.
16Leban a diyaki na babajo babale: dina ja wa utodu ndi Lia, dina ja wa nděmbě ndi Rechěl.
17Mihâ ma Lia ma diyaki bobâbu; ndi Rechěl a diyakindi elanga na ehini eyamu.
18Ka Jekâb a tândâ Rechěl; ka mâ‐a vâ, na, Mbi ka hayand‘ âvě mepuma hěmbwědi o pělě ya mwan‘ ’âvě wa nděmbě Rechěl.
19Ka Leban a vâ, na, E ndi bwamu na mbi věkě mâ âvě wa na mbi věkě mâ mot‘ upâkwě: diyaka n‘ umba.
20Ka Jekâb a haya mepuma hěmbwědi o pělě ya Rechěl; ndi me diyakite o mâ‐a jadi ona hwi ’hâlě, o pělě ya itândâ jaju i tândâki mâ.
21¶ Ka Jekâb a vâ na Leban, na, Věkě ’mba mwad‘ ’amě, ikabojana hwi jamě i hânjâbiyěndi, ovaně nd‘ umba‐mbi ka ngiě o mâ‐a jadi.
22Ka Leban a yolě bamo běhěpi ba iboko těvině, ka mâ‐a ha isango.
23E diyaki na kolo, ka mâ‐a nângâ mwan‘ ’aju Lia, ka mâ‐a vana mâ o mâ‐a jadi; ka mâ‐a ngia o mâ‐a jadi.
24Ka Leban a vě mwan‘ ’aju wa mwajo Lia uhayi mwaju mua mwajo Zilpa, na a diyake uhayi muaju mua mwajo.
25E diyakindi o ubwa, umbwakiyate, a jadi Lia: ka mâ‐a vâ na Leban, na, Ekae e lě nde eâvě e di ’mba hango? mb‐u dilakě âvě o pělě ya Rechěl? o yabaka lě ’mba na nde?
26Ka Leban a vâ, na, E ibě nonaně o iboko viahu o ivě ja wa nděmbě o diba o boho na wa utodu.
27Hânjâbâkidě wiki ya ekaně, vâkâna ho věnd‘ âvě tepě upâkwě o pělě ya ihaya jâvě i ka hayě ’mba mepuma mepâkwě hěmbwědi.
28Ka Jekâb a ha nonaně, ka mâ‐a hânjâbidě wiki ’aju; ka mâ‐a vě mâ mwan‘ ’aju Rechěl tepě na a bakě mâ.
29Ka Leban a vě mwan‘ ’aju wa mwajo Rechěl uhayi mwaju mua mwajo Bilha na a diyake uhayi mwaju mua mwajo.
30Ka mâ‐a ngia tepě o Rechěl a jadi, ka mâ‐a tândâ tepě Rechěl wa na Lia, ka mâ‐a haya tepě mâ mepuma mepâkwě hěmbwědi.
31¶ Ka Jěhova a yěně, na, Lia a binakwěndi, a bumwakiděndi ihuhu jaju; ndi Rechěl a diyakindi ekomba.
32Ka Lia a kaha, ka mâ‐a ja mwa‐momo, ka mâ‐a vangidě mâ duia na Ruběn; ikabojana a vâki, na, Nandi Jěhova a yěnindi etuniy‘ ’amě; nandi momi amě a ka tândi ’mba.
33Ka mâ‐a kaha pě njo ’pâkwě, ka mâ‐a ja mwa‐momo; ka mâ‐a vâ, na, Ikabojana Jěhova a yokindi, na, mbi binakwěndi, ovaně nd‘ o Mâ‐a vi ’mba tepě ekaně; ka mâ‐a vangidě mâ dina na Simiân.
34Ka mâ‐a kaha pě, ka mâ‐a ja mwa‐momo; ka mâ‐a vâ, na, Kya těkaně momi amě a ka lati n‘ umba, ikabojana mbi jayi mâ bana balalo: ovaně nd‘ o dina jaju i vangakudwě na Livai.
35Ka mâ‐a kaha pě, ka mâ‐a ja mwa‐momo; ka mâ‐a vâ, na, Nandi mbi ka bendi Jěhova; ovaně nd‘ o mâ‐a vangakidě dina jaju, na, Juda: ka mâ‐a dika ijadi.
Currently Selected:
Jěnisis 29: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
