Jěnisis 28
28
1Ka Aisak a ndiya Jekâb, ka mâ‐a vambiya mâ ibâtâ, ka mâ‐a pakuwa mâ, ka mâ‐a vâ na ju, na, O nângâke mwajo wa babajo ba Kenean.
2Umwaka, wa vala o Pedan‐aram, o ndabo ya Běthuěl hangwě ya nyângwě; na nâvě o ka nângâkâ mwajo omě o babajo ba ndomi ya nyângwě, Leban, ba jadi.
3Anyambě ya ngudi yěhěpi a vambakiye âvě ibâtâ, na Mâ‐a ka věkě âvě ijadi, na Mâ‐a ka vuhakě âvě, ovaně nd‘ o âvě‐o ka diyě ebimba ya bato;
4Na Mâ‐a ka vě âvě ibâtâ ja Ebreham, âvě, na ibângâ jâvě na nâvě; ovaně nd‘ o âvě‐o ka jigě ehe ya iyěngidě jâvě, ya Anyambě e věkidi Ebreham.
5Ka Aisak a validě Jekâb: ka mâ‐a vala o Pedan‐aram, o Leban a jadi, mwana wa Běthuěl wa‐Siria, ndomi ya Riběka, nyangwě ya Jekâb na Isâ.
6¶ O Isâ a yěněki na Aisak a vambiyendi Jekâb ibâtâ, nana a validi mâ o Pedan‐aram, ka nângâ mwajo ovaně; nana o mâ‐a vambakiyi mâ ibâtâ a pakwaki mâ, na, O nângâke mwajo wa babajo ba Kenean:
7Na na Jekâb a yokiyi hangwě na nyangwě, ka mâ‐a vala o Pedan‐aram;
8O Isâ a yěněki, na, babajo ba Kenean bà tândâkidě hangwě Aisak:
9Jâ ndi ja Isâ ja vala o Ishmeěl a jadi, ka mâ‐a bada o bajo baju ba diyanakidi, Maheleth mwana wa Ishmeěl mwana wa Ebreham, iluku ja Nabaioth, na a diyake mwad‘ ’aju.
10¶ Ka Jekâb a věngěmě o Bir‐shiba, ka mâ‐a vala o pělě ya Heran.
11Ka mâ‐a himba o iboko n‘ ihuhu, ka mâ‐a diya omě bulu bwěhěpi, ikabojana joba i diyaki ja kweiya; ka mâ‐a nângâ ilale jâkâ o malale ma iboko těvině, ka mâ‐a nangidě jâ o ibomako ja molo mwaju, ka mâ‐a nangiya o iboko těvině iya.
12Ka mâ‐a yâtâ ndâtâ, umbwakiyate, ilala tědwěngo o he, hâkâ ’aju e kâbâkidě oba; na, umbwakiyate, benjěl bea Anyambě be betaka, na beâ be hubaka omě.
13Umbwakiyate, Jěhova a didi oba omě de, ka Mâ‐a vâ, na, Umba ndi Jěhova, Anyambě ya hângwě Ebreham, na Anyambě ya Aisak: ehe ’âvě e di nangiyango nd‘ eamě e ka veyě âvě na ibângâ jâvě.
14N‘ ibângâ jâvě i ka diyi pani‐ka mahě ma he; na nâvě o ka tamandi o pělě ya ulângâ, na o pělě ya ’hiki, na o pělě ya ngângâ, na o pělě ya diko; na o âvě‐o jadi, na o ibângâ jâvě o jadi ndi o makaka ma he měhěpi ma ka tuwanwě ibâtâ.
15Umbwakiyate, Mbi na nâvě, n‘ Umba‐Mbi ka tatand‘ âvě o loboko lâvě lo kěkě lěhěpi, n‘ Umba‐Mbi ka timbi pě âvě o ehe těkae; ikabojana mbà dike âvě, kab‘ Umba hango nyang‘ ’amě e di kalango na nâvě.
16¶ Ka Jekâb a ’muwa o viyâ viaju, ka mâ‐a vâ, na, Jěhova a nd‘ iboko těkavi pâkwěpâkwě; ndi mb‐u yowakě yâ.
17Ka mâ‐a banga, ka mâ‐a vâ, na, Ma lě nja mahihi ě ma didi o iboko těkavi! ekae e ’bě epâkwě kabo ndabo ya Anyambě, na ekadi ndi jâmbě ja oba.
18Ka Jekâb a punda imuwa n‘ ubwa, ka mâ‐a nângâ ilale tě ijaju i nangakidě o ibomako ja molo mwaju, ka mâ‐a tědě jâ ka uhumu, ka mâ‐a hovidě mavulě o hâkâ ya omě.
19Ka mâ‐a vangidě iboko těvině, na, Běth‐el: ndi dina ja mboka těně i diyakindi Luz, o bohoboho.
20Ka Jekâb a panganě panga, na, Oningě Anyambě a diyingě n‘ umba, na Mâ‐a tata ’mba o njea tě eamě e kěkě ekaně, na Mâ‐a vě ’mba beja be jakě, na ngâi i bâtâkě,
21N‘ umba‐mba timba pě o ndabo ya paia na jonga, vâkâna Jěhova a ka diyandi Anyambě ’amě,
22Na ilale tě ijamě i di těděngo uhumu ekadi, i ka diyi ndabo ya Anyambě; na o eâvě e ka věyě ’mba yěhěpi, pâkwěpâkwě mbi ka věndi ya jomu o âvě o jadi.
Currently Selected:
Jěnisis 28: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
