Jěnisis 27
27
1E diyakindi, o Aisak a diyakidi a bě utodu, na mihâ maju ma bě na ingute, na mâ‐à diye pě na ngudi e yěněkě, ka mâ‐a ndiya mwan‘ ’aju w‘ utodu, ka mâ‐a vâ na ju, na, Mwan‘ ’amě: ka mâ‐a vâ na ju, na, Umba ndi ekaně.
2Ka mâ‐a vâ, na, Nandi, umbwakiyate, mbi ndi utodu, n‘ umba, mbà ’we buhwa bw‘ iwedo jamě:
3Nandi, mbi hâhâlâkiděnd‘ âvě, na, nângâkâ bevolani beâvě, mbanja jâvě na kâmu ’âvě, na nâvě wa vala o ’hiki, na nâvě wa bweya ’mba pande:
4Na nâvě wa ha ’mba bejaka bea kango nyang‘ ’amě e tândâkě, na nâvě wa vana beâ o umbi jadi, mbi je, ovaně nd‘ o ilina jamě i ka vambiy‘ âvě ibâtâ, mbi t‘ o wa.
5Ka Riběka a yoka o Aisak a kalakidi na mwan‘ ’aju Isâ. Ka Isâ a vala o ’hiki ka vaha pande, na ka vana yâ.
6¶ Ka Riběka a kala na mwan‘ ’aju Jekâb, na, Umbwakiyate, mbi ma yoki hângwě a kalaka na mwana‐nyângwě Isâ, na,
7Vanaka ’mba pande, na nâvě wa ha ’mba bejaka bea kango, mbi je, n‘ umba‐mba vambiy‘ âvě ibâtâ o pwanja ya Jěhova, mbi t‘ o wa.
8Nandi, mwan‘ ’amě, yokakiya joi jamě hohonganěngo na nyang‘ ’amě e sombiyakě âvě.
9Kěkě o mwanga, wa vana oviya omě, bana ba tomba bayamu babale; mbi haye jâ bejaka bea kango o pělě ya hângwě, nyanga eaju e tândâkě:
10Na nâvě o ka valanaka yâ hângwě, na mâ‐a ja, ovaně nd‘ o mâ‐a ka vambiy‘ âvě ibâtâ na mâ na taka o wa.
11Ka Jekâb a vâ na nyangwě Riběka, na, Umbwakiyate, mwana‐jaie Isâ a ndi moto wa mevâtâ, nd‘ umba, mbi ndi moto wa hělěnguhělěngu:
12Ipě paia a ka bobi ’mba, vâkâna a ka yěni ’mba pani‐ka uyabi: vâkâna mbi ka pahiyi jâki, hanga ibâtâ.
13Ka nyangwě a vâ na ju, na, Jâki jâvě i diyake n‘ umba, mwan‘ ’amě: yokakiya kabo joi jamě, na nâvě wa vala ka vana ’mba beâ.
14Ka mâ‐a vala, ka mâ‐a vana beâ o nyangwě a didi; ka nyangwě a ha bejaka bea kango, nyanga ya hangwě e tândâkidi.
15Ka Riběka a nângâ ngâi ja mwan‘ ’aju w‘ utodu Isâ iyamu, i diyaki na ju o ndabo, ka mâ‐a bâtidě jâ mwan‘ ’aju wa nděmbě Jekâb:
16Ka mâ‐a vamě bekoto bea mbodi tě o benâ beaju, na o ibâlu jaju ja hělěnguhělěngu:
17Ka mâ‐a vě bejaka bea kango na pěmbě, ibeaju be kenjakidě, o benâ bea mwan‘ ’aju Jekâb.
18¶ Ka mâ‐a pâ o hangwě a jadi, ka mâ‐a vâ, na, Paia: ka mâ‐a vâ, na, Umba nd‘ ekaně; âvě lě nja, mwan‘ ’amě?
19Ka Jekâb a vâ na hangwě, na, Umba njad‘ ’âvě Isâ; mbi handi ka âvě‐o ma sombiyě ’mba: mbi hâlâlâkiděnd‘ âvě, na, umwaka, wa diya ka ja pande jamě, ilina jâvě i vambakiyě ’mba ibâtâ.
20Ka Aisak a vâ na mwan‘ ’aju, na, E lě nd‘ eâvě ya hungana o duwa yâ, mwan‘ ’amě? Ka mâ‐a vâ, na, Ikabojana Jěhova Anyambě eâvě a volidi ’mba.
21Ka Aisak a vâ na Jekâb, na, Vaka pyělě, mbi hâhâlâkiděnd‘ âvě, mbi bobe âvě, mwan‘ ’amě, ipě o te mwan‘ ’amě Isâ mětě, ipě o ’bě.
22Ka Jekâb a vala pyělě na hangwě Aisak: ka mâ‐a boba mâ, ka mâ‐a vâ, na, Joi i ndi joi ja Jekâb, ndi benâ be ndi benâ bea Isâ.
23Ndi a‐u yowakě mâ, ikabojana benâ beaju be diyaki na mevâtâ, pani‐ka benâ bea mwana‐nyangwě Isâ; ka mâ‐a vambiya mâ ibâtâ.
24Ka mâ‐a vâ, na, O te mwan‘ ’amě mětě Isâ? Ka mâ‐a vâ, na, Umbi mâ.
25Ka mâ‐a vâ, na, Vanaka yâ pyělě n‘ umba, mbi je pande ya mwan‘ ’amě, ovaně nd‘ o ilina jamě i ka vambiy‘ âvě ibâtâ. Ka mâ‐a vana yâ pyělě na ju, ka mâ‐a ja: ka mâ‐a vana mâ ivě, ka mâ‐a mâtâ.
26Ka hangwě Aisak a vâ na ju, na, Nandi vaka pyělě, na nâvě wa pyâpyâ ’mba, mwan‘ ’amě.
27Ka mâ‐a pâ pyělě, ka mâ‐a pyâpyâ mâ: ka mâ‐a nâvidě unâvi mua ngâi ’aju, ka mâ‐a vambiya mâ ibâtâ, ka mâ‐a vâ, na, Yěněkěte, unâvi mua mwan‘ ’amě u ndi pani‐ka unâvi mua mwanga mua Jěhova u di tuwango ibâtâ:
28Nandi, Anyambě a věke âvě maupa ma oba, na mavângâ ma he, na bwinge bwa poti n‘ ivě:
29Bato ba dilakě âvě, na betomba be balamake o âvě‐o jadi; diyaka upangiyi mua bana ba nyângwě, na bana ba nyângwě ba balamake o âvě‐o jadi: jâki na moto wěhěpi a hâkâkě âvě, ibâtâ na moto wěhěpi a vambakiyě âvě ibâtâ.
30¶ E diyakindi, o Aisak a hânjâbâkidě ivambiya ja Jekâb ibâtâ, na Jekâb a diyakite a věngěměkěte kya o pwanja ya hangwě Aisak, ka Isâ a pâ oviya ulěngě muaju.
31A diyaki tepě a ha bejaka bea kango, ka mâ‐a vana beâ o hangwě a jadi, ka mâ‐a vâ na hangwě, na, Paia, umwaka, na nâvě wa ja pande ja mwan‘ ’âvě, ilina jâvě i vambiye ’mba ibâtâ.
32Ka hangwě Aisak a vâ na ju, na, Âvě a lě nja? Ka mâ‐a vâ, na, Umba mwan‘ ’âvě, njad‘ ’âvě, Isâ.
33Ka Aisak a likima nangudi, ka mâ‐a vâ, na, A lě nja mâně a ma nângâ pande, na mâ‐a yana yâ o umbi jadi, n‘ umba‐mba ja yěhěpi âvě‐o t‘ o pâ, n‘ umba‐mba vambiya mâ ibâtâ? e, a ka vambudwěndi ibâtâ.
34O Isâ a yokaki ndaga ja hangwě, a yakindi iya iněně na ngěbě mětě, ka mâ‐a vâ na hangwě, na, Vambakiya ’mba ibâtâ, umba tepě A! paia.
35Ka mâ‐a vâ, na, Mwana‐nyângwě a ma viyi n‘ ukândâ, a nângindi ibâtâ jâvě.
36Ka mâ‐a vâ, na, A ’bě vangudwěngo dina hohonganěngo na Jekâb? ikabojana a věngěkidi ’mba njo tě ibale ekadi: a nângâni ’mba ijiga jamě: umbwakiyate, a nângi pě ’mba ibâtâ jamě kya těkaně. Ka mâ‐a vâ, na, O ’bě kanjângo ibâtâ o pěl‘ ’amě.
37Ka Aisak a yavuwa ka mâ‐a vâ na Isâ, na, Umbwakiyate, mbi mâ pangango upangiyi muâvě, mbi mâ věngo bana ba nyangwě běhěpi na ba diyake bahai baju; n‘ umba mbi mâ hukango na poti n‘ ivě: ndi mbi ka ha lě pě âvě, na, mwan‘ ’amě?
38Ka Isâ a vâ na hangwě, na, O te ibâtâ jâkâ pa, paia? vambakiya ’mba ibâtâ, umba tepě A! paia! Ka Isâ a betě joi jaju oba, ka mâ‐a ya.
39Ka hangwě Aisak a yavuwa, ka mâ‐a vâ na ju, na, Umbwakiyate, bodiya bwâvě bo ka diyi mavângâ ma he, na o maupa oviya oba:
40Na nâvě, o ka diyi n‘ ukwala muâvě mua ibâtâ, na nâvě o ka dili mwana‐nyângwě: e ka diyandi, o âvě‐o ka unjuwaniyě, vâkâna o pukudi pang‘ ’aju oviya o ibâlu jâvě.
41¶ Ka Isâ a numba Jekâb o pělě ya ibâtâ ja hangwě i tuwaki mâ: ka Isâ a vâ n‘ ulema muaju, na, Hwi ja kwedi ya paia ja běndi pyělě; běngě mbi weyake mwana‐jaie Jekâb.
42Ka ndaga tě ja Isâ mwan‘ ’aju utodu ekadi ja langudwě Riběka: ka mâ‐a loma ka mâ‐a ndiya mwan‘ ’aju wa nděmbě Jekâb, ka mâ‐a vâ na ju, na, Umbwakiyate, mwana‐nyângwě Isâ a yâdiděngo ulema muaju o pěl‘ ’âvě, na, a vahakand‘ o weya âvě.
43Nandi, mwan‘ ’amě, yokakiya joi jamě; umwaka, wa kweya o mwana‐jaie Leban a jadi, o Heran;
44O ka diyaka na ju hwi ’hâlě, na ’la ngambi ya mwana‐nyângwě e ka věngěmě;
45Na ’la malingwa ma mwana‐nyângwě ma ka věngěmě oviya o âvě‐o jadi, na mâ‐a behalidě nyanga ’âvě e di mâ hango: vâkâna mbi bandindi ovoně, ka bonganiya âvě: e lě nd‘ eamě e mbakě o puhwana inyěni běhěpi babale o buhwa bâkâ?
46Ka Riběka a vâ na Aisak, na, Mbi vâhâmângo eměnâ ’amě o pělě ya bana ba Hěth babajo: oningě Jekâb a nângâ mwajo wa bana ba Hěth babajo, pani‐ka ba tě, ba babajo ba ehe ekaba, bo lě nja bwamu‐ě bwa eměnâ ’amě bo ka hayě ’mba?
Currently Selected:
Jěnisis 27: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
