Jěnisis 26
26
1Ka nja ya kwa o ehe tě, hanga nja ya bohoboho ya hwi ja Ebreham. Ka Aisak a vala o Ebimelěk a jadi upolo mua Felistini o Girar.
2Ka Jěhova a pumiya o mâ‐a jadi, ka mâ‐a vâ, na, O valake o Ijipt; diyaka o ’hiki ’amě e ka languw‘ âvě.
3Yěngěkidě o ehe těkae, n‘ Umba‐Mbi ka diyi na nâvě, n‘ Umba‐Mbi ka vambiyand‘ âvě ibâtâ; ikabojana o âvě‐o jadi, na o ibângâ jâvě ndi ibamě ba ka věyě behe těkabe beěhěpi, na Umba‐Mbi ka yâdiděndi ikana ijamě i kanakiyi hângwě Ebreham;
4Na Mbi ka vuhěndi ibângâ jâvě pani‐ka nyětěti ja oba, n‘ Umba‐Mbi ka věndi ibângâ jâvě behe těkabe beěhěpi; na o ibângâ jâvě ndi ja betomba bea he beěhěpi be ka tuwanwě ibâtâ:
5Ikabojana Ebreham a yokaki joi jamě, ka mâ‐a tata ilanguwa jamě, n‘ isombiyě jamě, na holo jamě, na belekanako beamě.
6¶ Ka Aisak a diya o Girar.
7Ka bato ba iboko těvině ba uwa mâ o pělě ya mwad‘ ’aju; ka mâ‐a vâ, na, A ndi iluku jamě; ikabojana a bangakindi o vâ, na, Mwad‘ ’amě; o banga, bato ba iboko těvině ba weya ’mba o pělě ya Riběka; ikabojana a diyaki elanga e hilakwě.
8E diyakindi, o mâ‐a diyakid‘ omě ukili uyaba, ka Ebimelěk upole mua ba‐Felistini, a tamuwa oviya jâmbě ihâlě, ka mâ‐a yěně, umbwakiyate, Aisak a jokaka na mwad‘ ’aju Riběka.
9Ka Ebimelěk a ndiya Aisak, ka mâ‐a vâ, na, Umbwakiyate, pâkwěpâkwě a mwad‘ ’âvě: nd‘ e lě nd‘ eâvě e vâkě, na, A ndi iluku jamě? Ka Aisak a vâ na ju, na, Ikabojana mbi vâki, na, O banga mba wa o pěl‘ ’aju.
10Ka Ebimelěk a vâ, na, Ekae e lě nde eâvě e di hwě hango? mot‘ umbâkâ a diyakite a ngakiya na mwad‘ ’âvě ka voi, na nâvě wa ’la ka pâdě hwě ikoba.
11Ka Ebimelěk a sombiyě bato běhěpi, na, Moto a ka kupaně momo těkaně tombe mwad‘ ’aju a ka wandi pâkwěpâkwě.
12Jâ ndi ja Aisak ja liya o ehe těně, ka mâ‐a duwa kama o upuma tě: ka Jěhova a vambiya mâ ibâtâ.
13Ka momo tě a kena, ka mâ‐a vala o bohoboho, ka mâ‐a tombuwa botombwaka na botombwaka, kwanga na ’la o mâ‐a diyakidi a bě boněně mětě:
14Ikabojana a diyakindi pahiyango myanga, na pahiyango bembe, na egândâ eněně: ka ba‐Felistini ba viniya mâ.
15Nandi, ba‐Felistini ba dibaki madango měhěpi ma bahayi ba hangwě ma tongakidi o hwi ja hangwě Ebreham, ka bâ‐ba londě mâ na mahě.
16Ka Ebimelěk a vâ na Aisak, na, Věngěměkě oviya o hwě‐ho jadi: ikabojana wa bi ngudi eitě wa na hwě.
17¶ Ka Aisak a ’muwa omě, ka mâ‐a huma mâkâ mwaju o itaba ja Girar, ka mâ‐a diya omě.
18Ka Aisak a tonga pě madango ma miba, imabu ma tongakidi o hwi ja hangwě Ebreham; ikabojana ba‐Felistini ba diyaki ba diba mâ o Ebreham a wakidi: ka mâ‐a vangidě mâ mina ma hangwě ma vangakidě mâ.
19Ka bahayi ba Aisak ba tonga o itaba, ka bâ‐ba duwa omě idango ja miba ma vovolakě.
20Ka batati myanga ba Girar ba sâja na batati ba myanga ba Aisak, na, Miba ma ndi mahu: ka mâ‐a tuba idango tě, na, Isěk: ikabojana ba sâjaki na mâ.
21Ka bâ‐ba tonga idango ipâkwě, ka bâ‐ba sâja tepě o pěl‘ ’a jâ: ka mâ‐a tuba jâ dina, na, Sitna.
22Ka mâ‐a ’muwa omě, ka mâ‐a tonga idango ipâkwě; b‐ù sâjaka o pělě ya dině: ka mâ‐a tuba jâ dina, na, Rehobâth: ikabojana a vâki, na, Nandi Jěhova a hayi hwě ipolo, na hwě‐ho ka vuhandi o ehe.
23Ka mâ‐a vala oviya omě na ’la o Bir‐shiba.
24Ka Jěhova a pumiya o mâ‐a jadi na bulu tě, ka Mâ‐a vâ, na, Umba ndi Anyambě ya hângwě Ebreham: o bangake, ikabojana Mbi na nâvě, Mbi ka vambiyand‘ âvě ibâtâ, n‘ Umba‐Mbi ka vuhěndi ibângâ jâvě o pělě ya uhayi muamě Ebreham.
25Ka mâ‐a longa âltar omě, ka mâ‐a ndiya dina ja Jěhova, ka mâ‐a huma mâkâ mwaju omě: ka bahayi ba Aisak ba tonga idango omě.
26¶ Jâ ndi ja Ebimelěk, na Ahuzath mbweyi ’aju pâkâ, na Fikâl ngâwě ya ndumb‘ ’aju, ja vala o mâ‐a jadi oviya Girar.
27Ka Aisak a vâ na bâ, na, O vaka lě ni o ’mbi didi na nde, ikabojana o numbakandi ’mba ni, n‘ inyěni o dumakandi ’mba ni o ’nyěni‐o jadi.
28Ka bâ‐ba vâ, na, Ho yěněkindi bwebwe na Jěhova a na nâvě: ka hwě‐hwa vâ, na, Ijekana i diyake o hangan‘ ’ahu, paniyango o hangan‘ ’ahu na nâvě, na hwě‐ho hake panga na nâvě:
29Na ovaně nd‘ o âvě‐o ka měndě o haye hwě njuke, pani‐ka hwě‐ho ha kupanakid‘ âvě, na ka hwě‐ho ha hakid‘ âvě elombo kabo bwamu, na hwě‐hwa valid‘ âvě na jonga: o ndi nandi wa ibâtâ ja Jěhova.
30Ka mâ‐a ha bâ isango, ka bâ‐ba ja, ka bâ‐ba mâtâ.
31Ka bâ‐ba ’muwa n‘ ubwa n‘ ubwa, ka bâ‐ba kananiya: ka Aisak a validě bâ, ka bâ‐ba vala na jonga.
32E diyakindi o buhwa tě, ka bahayi ba Aisak ba viya ka languwa mâ o pělě ya idango jabu i tongakidi, ka bâ‐ba vâ na ju, na, Ho duwi miba.
33Ka mâ‐a vangidě jâ, na, Shiba: ovaně nd‘ o dina ja mboka tě i di na Bir‐shiba, kwanga na ’la buhwa těkabo.
34¶ Isâ a diyaki mabo ma mepuma manai utodu o mâ‐a nângâki mwad‘ ’aju Judith mwana wa Beěrai wa‐Hěth, na Bashěmath mwana wa Elân wa‐Hiti:
35Ba diyakidi ulema mehiyo o Aisak na Riběka ba jadi.
Currently Selected:
Jěnisis 26: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
