Jěnisis 25
25
1Ka Ebreham a nângâ pě mwajo upâkwě, dina jaju ndi na Ketura.
2Ka mâ‐a ja mâ Zimran, na Jâkshan, na Medan, na Midian, na Yishbak, na Shua.
3Ka Jâkshan a ja Shiba na Didan. Bana ba Didan ndi ba‐Ashur, na ba‐Litush, na ba‐Leum.
4Bana ba Midian; Efa, na Efer, na Henâk, na Abaida, na Eledaya. Ekaba běhěpi ba diyaki bana ba Ketura.
5¶ Ka Ebreham a vě ibeaju be diyanakidi beěhěpi o Aisak a jadi.
6Ndi o babamo ba belěgě bea Ebreham be diyanakidi, ndi ba Ebreham ba věki bea‐bověkě, ka mâ‐a věngidě bâ oviya o mwan‘ ’aju Aisak a jadi, o pělě ya ’hiki, o ehe ya mbuhwa, o mâ‐a diyakidi a ngite mihâ.
7Ekadi ndi hwi ja mepuma mea eměnâ ya Ebreham, imeaju me diyakidi, kama pâkâ na mabo hěmbwědi na mepuma metano.
8Ka ilina ja Ebreham ja věngěmě, ka mâ‐a wa igona iyamu ja utodu, utodu mua momo, ti na mepuma: ka mâ‐a yolwě o bato baju ba jadi.
9Ka bana baju Aisak na Ishmeěl ba tonga mâ o budu bwa Makpila, o ’hiki ya Efrân mwana wa Zohar wa‐Hěth, bo jadi o boho bwa Mamre:
10Ehiki ya Ebreham e hambakidi na bana ba Hěth: omě nd‘ o Ebreham a tongakudwě, na mwad‘ ’aju Serah.
11¶ E diyakindi o iwedo ja Ebreham kělěbě, ka Anyambě a vambiya mwan‘ ’aju Aisak ibâtâ; na Aisak a diyakind‘ o Bir‐lahai‐roi.
12¶ Nandi mbamba ja Ishmeěl nd‘ ekadi, mwana wa Ebreham, wa Hegar ya‐Ijipt, uhayi mua Serah, a jakidi na Ebreham:
13Mina ma bana ba Ishmeěl nd‘ ekama, na mina mabu, hohonganěngo na mbamba jabu: njadi ya Ishmeěl, Nebajâth, na Kedar, na Adbeal, na Mibsam,
14Na Mishma, na Duma, na Masa,
15Hedar, na Tema, Jetur, Nafěsh, na Kedima:
16Ekaba ba ndi bana ba Ishmeěl, mina mabu nd‘ ekama, na mamboka mabu, na mahuma mabu: jomu ja mepolo na mepolo mebale, hohonganěngo na betomba beabu.
17Mepuma mea eměnâ ya Ishmeěl nd‘ ekame, kama pâkâ na mabo malalo na mepuma hěmbwědi: ka ilina jaju ja věngěmě, ka mâ‐a wa, ka mâ‐a yolwě o bato baju ba jadi.
18Ka bâ‐ba diya oviya Havila na ’la Shur, e jadi o boho bwa Ijipt, oningě o kěkě o pělě ya Asiria: a diyakindi o pwanja ya bana ba hangwě běhěpi.
19¶ Ekadi ndi mbamba ja Aisak, mwana wa Ebreham: ka Ebreham a ja Aisak:
20Aisak a diyaki mabo ma mepuma manai utodu o mâ‐a bakidi Riběka, mwana wa Běthuěl wa‐Siria, oviya Pedan‐aram, iluku ja Leban wa‐Siria.
21Ka Aisak a hâhâlidě Jěhova o pělě ya mwad‘ ’aju, ikabojana a diyakindi ekomba: ka Jěhova a yokiya mâ, ka mwad‘ ’aju Riběka a kaha.
22Ka bana ba ha makeha ta o ihuhu jaju; ka mâ‐a vâ, na, Oningě ya diya nonaně, mbi diyaka lě pě nde? Ka mâ‐a vala ka uwa Jěhova.
23Ka Jěhova a vâ na ju, na, Betomba bebale be nd‘ o jemi jâvě, na mangâ ma bato mabale ma ka paludwěndi oviya behuhu beâvě, na bato bâkâ ba ka diyi ngudi wa na bapâkwě: na wa utodu a ka dili wa nděmbě.
24¶ O hwi jaju ja ijadi i pâkidi, umbwakiyate, mavaha o jemi jaju.
25Wa bohoboho a puma nyolo yěhěpi veivei, pani‐ka ngâi ya mevâtâ: ka bâ‐ba vangidě dina jaju, na, Isâ.
26Na o mbuhwěmbuhwě, ka mwana‐nyangwě a puma, ka enâ ’aju ya bweya ekikindi ya Isâ; na dina jaju na vangakudwě, na, Jekâb: Aisak a diyaki mabo ma mepuma utoba utodu o mâ‐a jaki bâ.
27Ka babama ba tombuwa: Isâ a diyakindi umbeni mua bokeli, momo mwa ’hiki; Jekâb a diyaki momo mwa hwěi, a diyaka o myâkâ.
28Nandi Aisak a tândâkindi Isâ, ikabojana a jaki pande jaju; ndi Riběka a tândâkindi Jekâb.
29¶ Ka Jekâb a yamba beja: ka Isâ a viya o ’hiki, na mâ‐a diyaki nyolo vâhâ:
30Ka Isâ a vâ na Jekâb, na, Mbi hâhâlâkiděnd‘ âvě, na, Jakidě ’mba na beja tě bea veivei beně; ikabojana mbi ndi nyolo vâhâ: ovaně nd‘ o dina jaju i vangakudwě, na, Idâm.
31Ka Jekâb a vâ na ju, na, Hambaka n‘ umba ijiga jâvě o buhwa těkabo.
32Ka Isâ a vâ, na, Umbwakiyate, mbi ndi o bowaka: na ijiga těkadi i ka ha lě ’mba nja mal‘ e?
33Ka Jekâb a vâ, na, Kanakiya ’mba o buhwa těkabo: ka mâ‐a kaniya mâ: ka mâ‐a hambidě ijiga jaju na Jekâb.
34Jâ ndi ja Jekâb ja vě Isâ pěmbě na beja bea mehange; ka mâ‐a ja, ka mâ‐a mâtâ, ka mâ‐a ’muwa, na vala o njea ’aju. Kakana nd‘ o Isâ a pějěkidi ijiga jaju.
Currently Selected:
Jěnisis 25: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
