Jěnisis 24
24
1Ebreham a diyakindi a bě utodu, a duna: na Jěhova a diyakindi a vambiya Ebreham ibâtâ o belombo beěhěpi.
2Ka Ebreham a vâ na uhayi mua ndabo ’aju utodu u ma pangakiya ibeaju be diyanakidě beěhěpi, na, Mbi hâhâlâkiděnd‘ âvě, na, Vamakě enâ ’vě o ibomako ja ebyâbyâ ’amě:
3N‘ umba‐mbi ka pangand‘ âvě o kanakiya Jěhova Anyambě ya Oba, na Anyambě ya he, na, O nângâke mwan‘ ’amě mwajo o babajo ba Kenean, o ibamě ba diyanakě;
4Ndi âvě o ka valaka o ehe ’amě, o ’tâkâ ’amě, ka nângâ mwan‘ ’amě Aisak mwajo.
5Ka uhayi tě mâ‐a vâ na ju, na, Ipě mwajo tě à bâbe o viya n‘ umba o ehe těkae: mbi timbanake pě mwan‘ ’âvě o ehe ’âvě e vakiyedi?
6Ka Ebreham a vâ na ju, na, Kelevaka âvě, o valanake pě mwan‘ ’amě ovoně.
7¶ Jěhova, Anyambě ya Oba, a nângâki ’mba oviya o ndabo ya paia, na oviya ehe ’amě e jakudwě, na a kalaki n‘ umba, na a kanakiyi ’mba, na, Mbi ka věndi ehe těkae ibângâ jâvě; Mâ nd‘ a ka lomě enjěl ’aju o boho bwâvě, na nâvě o ka nângâkâ mwan‘ ’amě mwajo omě.
8Ndi, oningě mwajo tě à bâbe o vitě âvě, vâkâna o huludwěndi oviya ikana tě ijamě ekadi: ndi kabo mwan‘ ’amě o timbanake mâ ovoně.
9Ka uhayi tě mâ‐a vamě enâ ’aju o ibomako ja ebyâbyâ ya hangwě Ebreham, ka mâ‐a kaniya mâ o pělě ya upako těkamu.
10Ka uhayi tě mâ‐a nângâ jomu ja kaměl o kaměl ja hangwě, ka mâ‐a vala: ikabojana a jadi na belombo bea hangwě beyamu beěhěpi o enâ ’aju: ka mâ‐a ’muwa na valaka o Měsopotamia, o mboka ya Nehâr.
11Ka mâ‐a panga kaměl jaju i humaka mabângâ o kolo o bwebwe ya mboka baka na idango ja miba, o ’gombe ya bajo e valakě ka toka miba.
12Ka mâ‐a vâ, na, A! Jěhova, Anyambě ya paia Ebreham, mbi kalakiyand‘ âvě, na, valanaka ’mba bwamu o buhwa těkabo, na nâvě wa levidě paia Ebreham kěngâ.
13Umbwakiyate, mbi těměkěndi baka na idango ja miba; babajo ba bamo ba mboka ba vakandi ka toka miba:
14E diyake, itângâ jamě i ka vâye, na, Hubakě ehuka ’vě, mbi hâhâlâkiděnd‘ âvě, mbi mâte; na a ka vâyě, na, Mâtâkâ, n‘ umba‐mbi ka vě tepě kaměl jâvě imâtâ; mâ mâně a diyake mâ uwâvě a di kenjěngo wa uhayi muâvě Aisak; omě nd‘ umba‐mbi ka yowě na o levidi paia kěngâ.
15¶ E diyakindi, a t‘ o madě ikala, umbwakiyate ka Riběka a pumakě, a jakudwě o Běthuěl a jadi, mwana wa Milka, mwada wa Nehâr, mwana‐nyangwě na Ebreham, na ehuk‘ ’aju o iběkě jaju.
16Itângâ tě i diyaki nyěvenyěve n‘ ihilě, ehila, momo ka momo tepě a‐u yowakě mâ: ka mâ‐a huba o idango, ka mâ‐a londě ehuk‘ ’aju, ka mâ‐a beta.
17Ka uhayi tě mâ‐a vala umbila ka lata na mâ, ka mâ‐a vâ na ju, na, Mbi hâhâlâkiděnd‘ âvě, na věkě ’mba mbi mâte miba mahâlě o ’huka ’vě.
18Ka mâ‐a vâ, na, Mâtâkâ upangiyi muamě: ka mâ‐a hungana o hubě ehuk‘ ’aju o enâ ’aju, ka mâ‐a vě mâ imâtâ.
19Nandi, o mâ‐a makidě ivě jaju imâtâ, ka mâ‐a vâ, na, Mbi ka toka tepě o pělě ya kaměl jâvě, kabo ja madě imâtâ.
20Ka mâ‐a hungana o hovidě ehuk‘ ’aju o eboka, ka mâ‐a vala pě umbila o idango ka toka, ka mâ‐a toka o pělě ya kaměl jaju jěhěpi.
21Nandi momo tě a tamwakiyi mâ sü, mâ te dâ, o iyowě ja na ipě Jěhova a longuděndi ekěndâ ’aju, ipě a‐u longudě.
22E diyakindi, o kaměl i makidě imâtâ, ka momo tě a nângâ mbonga ya hika e pehwaka ekulu ya shěkěl, na makanja mabale ma benâ beaju, ma pehwaka jomu ja shěkěl ya hika:
23Ka mâ‐a vâ, na, O lě mwana nja wa mwajo? mbi hâhâlâkiděnd‘ âvě, langwakiya ’mba: ndabo ya hângwě e te n‘ iboko via na ho yěngěkidě?
24Ka mâ‐a vâ na ju, na, Mbi ndi mwa‐mwajo wa Běthuěl, mwana wa Milka, uwaju a jakdi o Nehâr a jadi.
25Ka mâ‐a vâ tepě na ju, na, Ho te na honji na beja bea tito twětwě, na iboko vi yěngěkidě.
26Ka momo tě a balidě molo mwaju, ka mâ‐a kaliya Jěhova.
27Ka mâ‐a vâ, na, Ibâtâ na Jěhova Anyambě ya paia Ebreham, a ha ’bě dikango paia à diye na ngěbě ’aju na pâkwěpâkwě ’aju: o pěl‘ ’amě, Jěhova a validi ’mba o njea ya ndabo ya bana ba nyangwě ya paia.
28Ka itângâ via vala umbila, ka mâ‐a languwa ba ndabo ya nyangwě hohonganěngo na ndaga těkadi.
29¶ Nandi Riběka a diyaki na ndomi, dina jaju i diyaki, na, Leban: ka Leban a puma umbila o momo tě a jadi, o idango.
30E diyakindi, o mâ‐a yěněki mbonga, na makanja o benâ bea iluku jaju, na mâ‐a yoka ndaga ja iluku jaju Riběka, na, Momo tě a ma kali n‘ umba kakana, ka mâ‐a pâ o momo tě a jadi; na, umbwakiya, a didi těměngo pyělě o idango.
31Ka mâ‐a vâ, na, Ngakiya âvě wa Jěhova a didi vambiyango ibâtâ: e lě nde ’âvě e těměkě o uhěngě? ikabojana mbi kenjidi ndabo, na iboko via kaměl.
32¶ Ka momo tě a ngia o ndabo: ka mâ‐a věngidě kaměl jaju belombo, ka mâ‐a vě kaměl honji na beja, na miba ma tukakě beko beaju, na beko bea bamo ba diyaki na ju.
33Ka beja bea tědwě o boho bwaju na a jake: ndi a vâki, na, Mbà je kabo mba ta o languwa uloma muamě. Ka mâ‐a vâ, na, Kalaka.
34Ka mâ‐a vâ, na, Mbi ndi uhayi mua Ebreham.
35Jěhova a ndi vambiyango paia ibâtâ iněně, na mâ‐a kenindi: a věngo mâ myanga, na bembe, na hika etano, na hika, na bahayi ba bamo, na bahayi ba bajo, na kaměl, na buru.
36Ka mwad‘ ’a paia, Serah, a ja paia mwa‐momo o mâ‐a diyakidi a bě utodu: mâ ndi uaju a jadi věngo ibeaju be janidě beěhěpi.
37Ka paia a panga ’mba mbi kanaka, na, O nângâke mwan‘ ’amě mwajo o babajo ba‐Kenean ba ’hiki ’amě e diyakě:
38Nd‘ âvě o ka kěkě o ndabo ya paia, o bato bamě ba jadi, na nâvě o ka nângâkâ mwan‘ ’amě mwajo.
39K‘ umba mba vâ na paia, na, Ipě mwajo à vitě ’mba.
40Ka mâ‐a vâ n‘ umba, na, Jěhova, o boho bwa uamě a tamwanakě, a ka lomandi enjěl ’aju na nâvě, ka longudě njea ’vě: na nâvě, o ka nângâkâ mwan‘ ’amě mwajo o bato bamě ba jadi, o ndabo ya paia.
41Vâkâna o věngěmindi o ikana t‘ ijamě ekadi, o âvě‐o ka pâyě o bato bamě ba jadi; oningě bà věye mâ ’âvě, vâkâna o věngěmindi o ikana jamě.
42K‘ umba mba pâ o buhwa těkabo o idango, k‘ umba mba vâ, na, A! Jěhova Anyambě ya paia Ebreham, nandi oningě o longuděngě njea ’amě eamě e kěkě;
43Umbwakiyate, mbi těměkěndi baka n‘ idango ja miba; na yâ e ka diyaka, na, itângâ tě i ka viyě ka toka, ijamě i ka vâyě, na, Mbi hâhâlâkiděnd‘ âvě, věkě ’mba miba mahâlě ma mâtâkě o ehuka ’vě;
44Na mâ‐a vâ n‘ umba, na, Mâtâkâ, n‘ umba‐mbi ka tokiya tepě kaměl jâvě; mâ mâně a diyake mwajo wa Jěhova a kenjakidě mwana wa paia.
45Mbi t‘ o madě ikala n‘ ulema muamě, umbwakiyate, Riběka a vaka na ehuka o iběkě jaju; ka mâ‐a huba o idango, ka mâ‐a toka; k‘ umba mba vâ na ju, na, Mbi hâhâlâkiděnd‘ âvě, bâbâkâ mbi mâtâkâ.
46Ka mâ‐a hadividě, ka mâ‐a hubě ehuk‘ ’aju oviya iběkě jaju, na, Mâtâkâ, mbi ka vě tepě kaměl jâvě imâtâ: k‘ umba mba mâtâ, ka mâ‐a panga tepě kaměl i mâtâkâ.
47K‘ umba mba uwa mâ, na, O lě mwan‘ ’a nja? Ka mâ‐a vâ, na, Mwa‐mwajo wa Běthuěl, mwana wa Nehâr, wa Milka a jaki na ju: k‘ umba mba vamě mbonga o vijo viaju, na makanja o benâ beaju.
48K‘ umba balidě molo muamě, k‘ umba‐mba kaliya Jěhova, k‘ umba‐mba bendě Jěhova Anyambě ya paia Ebreham, a tumbwanaki ’mba o njea ya hohonganěngo o inângâ ja mwa‐mwajo wa mwana‐nyangwě ya paia mwada wa mwan‘ aju.
49Nandi, oningě o diyingěni na kěngâ na pâkwěpâkwě o paia a jadi, langwakiyi ’mba ni: nd‘ oningě è diye, wa languwi ’mba ni; ovaně nd‘ umba‐mbi ka ’luwě o ’nâ eyomi, tombete o ya měngwě.
50Jâ ndi ja Leban na Běthuěl ja yavwana, ka bâ‐ba vâ, na, Elombo těkae e vakiyandi o Jěhova a jadi: hwà yâlě o kala na nâvě bobe tombete bwamu.
51Umbwakiyate, Riběka a nd‘ o boho bwâvě; nângâkâ mâ, wa vala, na mâ‐a ka diyaka mwajo wa mwana wa hângwě, pani‐ka Jěhova a di kalango.
52E diyakindi, o uhayi mua Ebreham u yokakidi ndaga jabu, a balamakindi na nyolo ’aju o he o Jěhova a jadi.
53Ka uhayi tě mâ‐a pumě belombo beyamu bea hika etano, na hika, na belombo bebâtâkwě, ka mâ‐a vě beâ Riběka; a věki tepě ndomi ’aju na nyangwě belombo bea tâ.
54Ka bâ‐ba ja, ka bâ‐ba mâtâ, mâ na bato ba diyaki na ju, ka bâ‐ba diya bulu bwěhěpi; ka bâ‐ba ’muwa n‘ ubwa, ka mâ‐a vâ, na, Valakidi ’mba ni o paia a jadi.
55Ka ndomi ’aju na nyangwě ba vâ, na, Itângâ i tepě o diya na hwě hwi, tombete jamu; yeně tombango běngě a kěke.
56Ka mâ‐a vâ, na, O himbakidi ’mba ni, yěněkěteni Jěhova a longudi njea ’amě; valakidi ’mba ni, mbi vale o paia a jadi.
57Ka bâ‐ba vâ, na, Ho ndakiyandi itângâ, na hwě‐hwa uwa udumbu muaju.
58Ka bâ‐ba ndiya Riběka, ka bâ‐ba vâ na ju, na, O ka late na momo těkaně? Ka mâ‐a vâ, na, Mbi ka late.
59Ka bâ‐ba validě iluku jabu Riběka, na ebokwed‘ ’aju, na uhayi mua Ebreham, na bato baju.
60Ka bâ‐ba tuwa Riběka ibâtâ, ka bâ‐ba vâ na ju, na, Âvě, iluku jaju, diyaka nyangwě ya tâjeni ja jomu ja tâjeni, na ibângâ jâvě i pahakiye jâmbě ja ba numbakě bâ.
61Ka Riběka a ’muwa, na lotângâ laju, ka bâ‐ba bapama kaměl, ka bâ‐ba vitě momo tě: ka uhayi tě mua nângâ Riběka, ka mâ‐a vala o njea ’aju.
62Ka Aisak a viya oviya njea ya Bir‐lahai‐roi; ikabojana a diyakind‘ o ehe ya diko.
63Ka Aisak a vala ka pikiliya na kolo o mwanga: ka mâ‐a betě mihâ maju, ka mâ‐a yěně umbwakiyate kaměl i vaka.
64Ka Riběka a betě mihâ maju, o mâ‐a yěněkidi Aisak, ka mâ‐a huba o kaměl.
65Ikabojana a vâki na uhayi, na, A lě nja moto‐ě a tamwakě o mwanga ka lata na hwě ekaně? K‘ uhayi mâ‐a vâ, na, A ndi paia: ovaně nd‘ o mâ‐a nângâkidi evělěhi, ka mâ‐a diba nyolo ’aju.
66Ka uhayi tě mâ‐a languwa Aisak belombo beaju be hakidi beěhěpi.
67Ka Aisak a vana mâ o mâkâ mwa nyangwě Serah, ka mâ‐a nângâ Riběka, ka mâ‐a diya a bě mwad‘ ’aju: ka mâ‐a tândâ mâ: ka Aisak a keha o pělě ya iwedo ja nyangwě.
Currently Selected:
Jěnisis 24: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
