Jěnisis 23
23
1Eměnâ ya Serah e diyakindi kama ya mepuma pâkâ na mabo mabale na mepuma hěmbwědi: ekame ndi me diyaki mepuma mea eměnâ ya Serah.
2Ka Serah a wa o Kirjath‐Areba (yâ ndi e jadi Hibron) o ehe ya Kenean: ka Ebreham a viya ka ha Serah kwedi, na ka ya mâ.
3¶ Ka Ebreham a těmě o boho bwa ekengo ’aju, ka mâ‐a kala na bana ba Hěth, na,
4Mbi ndi o inyěni‐o jadi mwěngi na uyěngidi: věki ’mba ni ipahiya ja iboko vi tongakwě inyěni‐o jadi, ovaně nd‘ umba‐mbi ka tongě ekengo ’amě oviya mihâ mamě.
5Ka bana ba Hěth ba yavwana Ebreham, ka bâ‐ba vâ na ju, na,
6Yokakiya hwě, upangiyi mwamě; ikabojana âvě o ndi upolo uněně o hwě‐ho jadi: tongaka ekengo ’âvě o malonga mahu ma bopinjakwě; ho ’bě n‘ umbâkâ a ka himbidě âvě malonga maju, nd‘ âvě tongaka ekengo ’âvě.
7Ka Ebreham a těmě de ka mâ‐a balama o bato ba ehe ba jadi, o bana ba Hěth.
8Ka mâ‐a kala na bâ, na, Oningě na u te ulema muanyu na mbi tongake ekengo ’amě oviya mihâ mamě, yokakiyi ’mba ni, wa hâhâlidi ’mba ni Efrân mwana wa Zohar,
9Na, a věke ’mba buda bwa Makpila ibwaju bo janidi bo jadi o ihuku ja mwanga muaju; a věke ’mba buâ o ihambe ja bwâ ja ti, o hanganě ’anyu, o pělě ya ipahiya ja iboko vi tongakwě bato.
10Nandi, Efrân a diyaki diya o hanganě ya bana ba Hěth. Ka Efrân wa‐Hiti a yavwana Ebreham o matâ ma bana ba Hěth, ba ngakiyedi o jâmbě j‘ ugomba mua mboka běhěpi, na,
11Nyawě, upangiyi ’muamě, yokakiya ’mba: mbi věnd‘ ’âvě ehe těně, na budu bo jad‘ omě, mbi věnd‘ âvě yâ; o boho bwa bana ba bato bamě mbi věnd‘ âvě yâ; tongaka ekengo ’âvě.
12Ka Ebreham a balidě nyol‘ ’aju o he o boho bwa bato ba ehe.
13Ka mâ‐a kala na Efrân o matâ ma bato ba ehe, na, nd‘ oningě na o bâbindi, mbi hâhâlâkiděnd‘ âvě, yokakiya ’mba: mbi ka věnd‘ âvě ihambe o pělě ya mwanga; nângâkâ jâ n‘ umba; vâkâna mbi tongindi ekengo ’amě.
14Ka Efrân a yavwana Ebreham, ka mâ‐a vâ na ju, na,
15Upangiyi ’mwamě, yokakiya ’mba; epěhi ya ehiki e weyaka kama ja shěkěl ja hika etano inai; ndi yěně e lě nd‘ o hanganě ’ahu na nâvě? tongaka ekengo ’âvě.
16Ka Ebreham a yokiya Efrân; ka Ebreham a pehuwa Efrân nyanga ya hika etano eaju e tubakidi, o matâ ma bana ba Hěth, hika etano kama ja shěkěl inai, hika eyamu na maseni.
17¶ Nonaně nd‘ o ehiki ya Efrân, e diyakid‘ o Makpila, e diyakidi o boho bwa Mamre, ehiki, na budu bo diyakid‘ omě, na bele be diyakid‘ o ’hiki beěhěpi, be diyakid‘ o mahuku měhěpi ulwaniděngo, ka beâ‐bea hawě pâkwěpâkwě,
18O Ebreham a jadi, idiya ja ibeaju, o matâ ma bana ba Hěth, na o boho bwa ba ngakiyedi o jâmbě ja ugomba mua mbok‘ aju běhěpi.
19Ekae tombango, ka Ebreham a tonga mwad‘ ’aju Serah o budu bwa ’hiki ya Makpila o boho bwa Mamri: (yâ ndi e jadi Hibron) o ehe ya Kenean.
20Na ehiki, na budu bo jad‘ omě, bea hawě pâkwěpâkwě na bana ba Hěth o Ebreham a jadi, na bo diyake iboko viaju vi tongakiyě bato.
Currently Selected:
Jěnisis 23: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
